"Sam kaang pa," hon chih uh a nuam kei a, "Sam kaang nei na hi maw?" hon chih uh bel zaak a nuamzaw deuh hi. Deihthu hileh chu sam kaang ka deih het kei, himahleh 'sam kaang nei pa' ka hi a, ahihhang in 'sam kaang pa' chih a om di ka ut tuan khol het kei, a ziak tuh atamzaw tham ka sam a kaan nailouh ziak in.

Biang a chivom a om a, chivom nei pa ka hi a, hilehle 'chivom pa' chu ka hi kei hi. Lawmpa' khomuhna a hoihlouh hang in 'mitdel pa' chih sang in 'muhna hoihlou nei pa' chih zak nuam a sa zaw. Huchi bang in midangte bang a Pathian in hinna kha a piak ziak a mihing khat hi, ahihhang a taksa ka hiang khat a bukimlouhna hiam hoihlouhna hiam ahihkeileh khengvallua neih khak ziak in a kimlouhna pen 'min' a neih kuamah a ut kei uhi. Piangsual, vualphalou, mibanglou, mihai, mitduuk, khutbuul, khebuul, na-ngong, leh adangdang a kichih toihtoih chu a nei taktakte a dia zaak haksapi ahi, ahihhang in a kizangkha naak hi.

Ahi a... World Health Organisation (WHO) in 1980 a suahkhiak International Classification of Impairments, Disabilities and Handicaps (ICIDH) dungzui in mihing a taksa hiangte a bukimlouhna khat a hong om chiang in Bukimlouhna (Impairment) kichi a, huai taksa hiang bukimlouhna ziak a mimal gamtatna hihtheihlouh, septheihlouh leh ngaihtuahtheihlouh a hong hih chiang in Piansualna (Disability) kichi hi. Bukimlouhna leh piansualna ziak a ngeina bang a om theilou a khutsam tak a hong om chiang in Vualphalou (Handicap) kichi hi. Taksa hiang a bukimlouhna (impairment) ziak in piansuanlna (disability) tun a, piansualna ziak in vualphaklouhna (handicap) a hon tun hi.

Hiai a thumal Piansualna (disability) leh Vualphaklouhna (handicap) kichite India Solkal in ahitheitan a zatlouh diing deih a, thumal kilawmzaw dang zat diing in thusuah zong bawl hi. Aziak ahihleh piangsual leh vualphalou i chih thumal kilawmlou leh tuam bawlna kammal abat ziak ahi. Ka sam kaan ziak a tuambawl theih ka hi kei a, biang a chivom om ziak a ka min peel a huai a theih ka ut kei hi. Huchi bang in kuahiam in a taksa kahiang a bukimlouhna a neih ziak in piangsual hiam vualphalou chih pah mawk pen a dik kei mah hi. Huai a mite' theih leng kuamah a ut kei diing hi. Himahleh huai sam kaang pa i chih un sam kaang nei pa chih a teelzawk bang in mitdel pa in leng muhna hoihlou nei pa chih a telzaw. A kilawmzaw Sappau in gelhzualle person with visual impairment, person with hearing impairment, person with disabilities chihdan ahi.

Piangsual kichi thumal leng i zatzat himahleh zaak a nuam het kei hi. Mi khawng toh kihou a, banghiam hun a., "Huai piangsual pen," a hon chihkhiak moih chiang un laidiip neem a luh vengveng thei mawk hi. Nidang in bel huchi bang a om ngei kei a, amun taktak a i lut a, a nei khat i hong hihleh hiai kammal ana kha law mahmah ahihlam phawkkhiak in a om hi. Huchi bang in i pau vaantaang uah, 'Hai nuih' chih bang i nei uhi. Ahimah ahi diing, lungsim bukimlouhna nei lawi khat amun toh kituakloupi khawng in a nuikhe viaivuai mawk nguut uhi. Ngeina bang a omte le kilawmlou tak khawng a hong nuih chiang un, 'Hai nuihnuih...' i chi uhi. Hiai bangle zatkhak a om chiang in thuak a haksa mahmahta hi.

Ei lak ah inkuan a songnawi neihkhak pen hamse lohna leh gawtna dan a lakkhak a om ziak in kingaihtuah thak tuak ka sa mahmah hi. Pasian in mihingte Asiam in Amah batpih a asiam ahi. Huan athilsiamte Amah theihlouh a siam a om kei a, vaang thu leh bawlkhelhthu a bawl ahi kei hi. Ka gensek bang in Albert Einstein in 'God doesn't play dice' ana chi hi. Huaiziak in Pasian in deihna a neih bang a siam ahihlam uh sungkuan mite kia hilou a khotaang inle i theih uh kisam hi.

Songnawi chi a innkil khat a koih mai a hun nawn kei a, amau' hihtheih bang hihthei diing a sinsak a poimoh mahmah hi. Blind People Association in a etkai khat uh Vocational Training Centre khat ka phakkhakna apan ka ngaihtuahna ah, (amin ka loh ma in Pasian leh a sungkuante'n le ana zakdah louh di un ka ngen masa), 'Hiaite bang in kisinna ana neihleh Thothawng in zi nei in innkuan bawl thei ngeingei diing ahi,' chih ka lungsim ah a thaam den hi.

Mimal thu k'on zeptel cheuh di. Ka deihteel thu hiam leh ka lunglutna ahi kei, ka sinkhak leh theihsa lampi tawn ka hi kei a, hon Sampa' deihna bang ahi zaw chih ka pomdan ahi. Pathian in lampi tuamtuam ah honpi a, damsung a ka sep di hilou lampite a hon zuineel (experience) sak hi. Ka ngatlouhna lam a kalsuan dia pi in ka om a, lampi maam tak zuih ka tup lai in siallouh kensia leh pawn lak zui dia seh ka hihlam ka phawk hi. Phawkkhiak diing tamzaw tham omlai diing in ka lam-en hi.

Mite'n chiil theihlouh diing a sak lai un Pasian khut thil hihtheihna ziak ke-leu in sinsakte' hihtheihna tung ah naupangte'n khantouhna a nei uhi. Nu hiam Pa hiam chi ngei lou in a hon sam theita a, tuangtung a lum maite' amau a kithoh thei in a hong om uhi. Hiai apan sinlai hoih tak tuh – opportunity ana neihlouh ziak lel uh ahihdan a kilang hi. Laisim theihna pen mihing hinsan hilou in, mahni a kikhosak theih (independent life) a poimoh pen khat ana hi hi.

Beidotna tawpkhawk ka tun nung in Pasian' lemgeel ahi ngei diing a The Malsawm Initiative (A School for Children with Special Needs)/ TMI chih mipite' huhna liauliau toh patkhiak in om hi. Ngaihtuahna lel ahihlai in akai di mi a om taktak dia aw chih himahleh sinsaktu omzah leh naupang kituak di zah khengval a om hi. A kai lel sang in kaitheih hun di ngaak (wait list) a sauzaw hi. Haksa mahleh naupangte' khantouhna leh masawnna in tha hon pia a, ahaksatna lam mitsuan sang in naupangte' phattuampihna lam en in kal kisuan zel hi. Tunni chiangchiang ah koisan hiam apan funding kichian neih hun lua himahleh Pasian in chi nailou hi diing in ka gingta hi. Amite' hoihna toh kal hon suansak theihlai ziak in.

Ei lak ah songnawina toh kisai a theihchetna a tawm a, huchi bang in a neikhate na tawm in im hiam ahihkeileh inkotawng ah kikoih den mawk hi. Sinsak theih, chiil theih lua uh ahihdan tuni tan a ka sepna uah kilang mahmah hi. TMI ah school dang banglou tak in class I, Class II chihte omlou in Individualised Education Program (IEP) kibawl hi. Mr X curriculum leh syllabus pen hiai IEP ahi. IEP in mihing' khantouhna a dia poimoh thilteng huamkha hi. IEP ah long-term leh short-term goal kibawl hi. Life-skills, Communication, Social Interaction, Pre-academic, leh apoimoh bangbang huap in IEP kibawl a, kha 6 teng a a IEP uh bangtan tungta hiam chih etkikna neih ahi. Manipur aa diing in hiai IEP kichiantak nei leh zang masapen i hih uh ka gingta.

Ei a dia hihdan thak ahihna ah nu-le-pate' leng sinsak touh det a ngai ua, academic session kipatma in ni 5 sung training ban ah kha teng in khatvei beek nu-le-pate toh houlim khawm in a om hi. Hichi bang a thilthak leh amasa i hihna ah phut khak di a tam mahmah hi. School ngeinate a A B C a sim uh kal khat a a theih lai un ei naupangte'n 'dot' leh 'dot' zop mai bangle a kum khat sual uh ahi thei lai hi. Akhanna uh a ze-ol man in khotaang leh abul tum a hong theihkhak pih loute'n phatuam lou bang hon saksak leng a om diing ua, a kai ut teng bang baan kaisak mai di aka hong chi bangle a tam mahmah uh. School ngeina a Classroom a naupang 40/50 teacher khat in a et kollai in ei naupangte khat leh teacher khat khawng ahi. I theihsiam zawng di in ngeina school a naupang 40/50 leh ei school a naupang 1 kibang ahi. Huai ziak in naupang tampi neihna diing in teacher tampi neih a ngai a, huai diing in thilhaksa tak ahi, aziak tuh teacher-te trained ahih uh ngai ahihman in.

Hiai naupangte sinsakna diing in sinna lam tuamtuam a om hi. India a diing in songnawite sinsakna toh kisai a thuneihna lianpen Rehabilitation Council of India (RCI) kichi hi. RCI in songnawina toh kisai kisinna diing course tuamtuam recognition a piak ban ah University tuamtuam in disability studies a nei uhi. Pawl X zoute aa diing in Foundation Course leh short-term course tuamtuam a om a, Class XII zoute a diing in Diploma Course tuamtuam a om ban ah BA (Disability Studies) a om hi. Huan, graduate-te aa diing in B Ed Special Education a om ban ah MA (Disability Studies) leh songnawi toh kisai sin theih tampi a om hi.

Hiai songnawina toh kisai a course-te ah leng songnawite sinsaktu diing a kisinna course om ban ah huaite sinsak chiatchiat lou a management tuamtuam course leng a om lai hi. Manipur kia hilou in India leh khovel pumpi ah leng trained staff a kidaih kei mahmah hi. Lunglutna neite aa diing in kong zapi a kihong a, unlimited chih theih hi. Class XII zou a Diploma Course kum nih hihte leh Graduate-te loh kibang ahi chile i khial kei diing. Manipur ngial ah Diploman Course a zoh nung uh kum khat le om manlou in SSA in a absorb khin ua, graduate pay a pelai uhi. TMI inle mahni a dinsuah theihna diing ngimna in tu in mi nih Diploma in Special Education (Deafblind) kisinsak lel hi. Diploma Course zou chiangte Special Educator kichi hi.

[Songnawi chih thumal ka zat lawikhat in diklou ahi a chih uh a dik ahi. Ahihhang in piangsual leh vualphalou leh thumal tuamtuamte a zaak a hak mahmah ziak in hiai thumalte khekkhiakna di ngaihtuahna kawm a zuak lel ahi. Songnawi i chih nidang in unau kizinglua om nitnet hiam ahihkeileh naupang damtheihlou deuhte khawng genna a i zat uh ahi. Hiai thumal i zatna dinmun uah kuamah i om nawn kei ua, tuadan lel a omleh hiai thumal pen kizang lou hiaihiai in hong mang thouthou diing ahihna ah persons with disabilities chih bang in songnawi a zat theih mai diam chi i hi.]

© August 1, 2012 | Pauzagin Tonsing