Ka na et vel vel chiang in leh ka na muh dan in tulai khangthak te (kei sim a) i khan dan uh dik lua hi in kana thei khol kei hi. Kei chuh ka naupang mah mah lai a, ka ngaih dan teng leng dik kim ding in ka koih kei hi, a upa deuh te ngaih tuah na leh a neu te ngaih tuah na a kibang thei lovak kei hi. A neute in ah ngaih dan hoih tak tak nei mah le hang a upa zaw deuh te ngaih tuah na ana pha lou deuh tei tei hi. Hiai hi chik mah in khial ding in ka ging kei hi. A upa deuh ten hi sau ana lungeel zaw deuh tei tei hi ei a tuailai te sang in. Ei tuailai te hi lung piching chi tawk le hang le i tuailai lai, i tha hat lai ahih kei leh sisan hat lai ziak in thil kihih ka phut phut nak hi. Ken hi khan dan (developed) uh dik lou kana sak tam lou ka hon gelh hi.

Amasapen in chuh tulai a kithang mah mah banah a neu a lian in i khoih thei uh leh i mek theih uh mobile phone tungtang thu tamlou i en ding. Hiai mobile phone hi a hoih mah mah mai a, khovel bang neu tuan sak hileh kilawm khop in a hoih hi. A neu a lian in i neita ua, i khoih leng i khoih siam thei mah mah uhi. Kum sawm (10) paisa in hiai mobile phone hi a kithang het kei a, kua man tu dan in tawi lou hi. Huai lai a mobile phone a nei te bang chuh mihau sa lua te ana hi hi. Huai lai in mobile pbone kithang lou in landline ngen kizang sim tangpi in (theih khelh ahih kei leh). Tun ah bel a neu alian tawi hong hita hi.

I et chiang in mobile phone i neih te uh hoih thei mah mah hi. Mizawng sim i sak te bang inle mobile phone hoih pipi tawi thei uhi. Hiai mobile phone bawl tu ten hi a bawl na ziak uh ahih leh mi toh kihou theih na di, ahih kei leh mi toh ki message theih na ding hiam laa ngaih na ding ahih kei leh internet i chi hiam klhoih theih na ding in i um hi. Himah leh ei lawi in i bang chi zat ua le? Hon nekang tu ding in i zang uhia? ahih keileh eimah hoih na ding in i zang hia? Ken kana muh dan in chuh ei hon nekang tu hi in kana mu hi. Adiak in tuailai te lak bang ah hi lawh lah neilou inn khawng a om mai mai nute chawm sa ngen i hi tangpi uhi. Huai te bang in message pack i chi hia ahih kei leh internet pack hi kha khat in khat vei thun tei tei hi. A sum a tuat in hi Rs. 150 bang a lou theilou in bei hi. Hita leh lawh neilou ten hi kum khat sung in bang zah i nute kiah i lai khe ding ua? Kenle ka toi thou himah leh sum ka neih lou chiang in ka thun kei. Khat vei nih vei hiam khawng ka nute in hon thun sak lel uhi.

Den a i gen teng khat in koih le hang angle dang in en nawn leu leu ni. Mobile phone hi laa khum theih na ahih kei leh video play theih na ngen hi i toi tangpi uhi. Memory card chih hi aom a hia in hi i thil neih teng teng hi i thun thei hi. Chih leh huai te ah bang bang i thun ua le? Kingaih tuah thak le hang ah a tam zaw in hi thil thang huai pipi i koih uh ka gingta hi. Adiak in tulai a kithang mah mah lem hoih lou pipi ahih kei leh video thanghuai pipi koih hi tam mah mah ding in ka gingta hi. Mobile phone i toi theih uh khawng le hi changkang na khat ahi a khan (developed) na chi khat le ahih hi. Chih leh hiai te khan dan dik ahi diam? I thil neih te un hi hon siat pih le ahi ta mai hi aziak bel video thanghuai pipi khawng le eimi sung mah mah ah leng nak pi takin tam pet mah ta hi. En en kei leng hi kuan hiaite hon bawl het lou di ahi uh chih hi theih ding in hoih kasa hi. Bang kim teng ah zaw mihing i hih na ah kisubukim zoulou di mah i hi hiai hi kithei siam hi. Himahleh thei gegu a va hih ahih kei leh bawl tei tei pen khelh na hilou ding hiam? I mobile neih te ziak in sualna kichi hon sang hiai hiai ta hi. Numeite tung a thang tat na hi uang deuh deuh ta hi. Hiai te hi eimah sung a kibawl hoih ahih kei leh mun dang ah kibawl hoih chih om thei him him lou ding hi.

Tulai naupang te hi pil mah mah ta uhi. Nidang in naupang khat kiang ah “na khel leh kapa malta meh dia hon man di kei kha” i chih leh lau a lau thei mai uh hi. Himah leh tulai naupang ten a bang chi dawn ua le? napa in mihing malta meh dia zang hia chih khawng ahi a dawn na uh. Chih leh hiai te kua ziak ahi dia le? nu leh pa te ziak maw ahih kei leh i khan dan uh a dik zawh louh ziak? I neu a pat honna zil sak zaw hikei himah leh i hon khang let chiang in thil hoih sang in thil hoih lou kithei masa zaw tei tei hi. Mi pau bang le a hoih lou te kithei masa zaw tei tei hi. Ka gen nawp tak chuh eimi te hi nu leh pate toh i tate uh kal kithu zaak na tawm luat ziak hi in ka thei hi. A ziak chuh naupang khat in ngaihzawng nei leh a nu leh pa te a hilh het kei ding a, a lawm te a hilh masa zaw diing hi. Hiai chiah chuh ka gen khial kei hial diing. Hiai chet ahi ka gen nawp, nu leh pate hi i tate kimai ngal sak le hang bang a a siat na di om. Hon maingal ve ua chih theih zaw hikei himah leh kizah taak sak dan ahun om ahi. Maingal chih bel lawm bang a kithuah thei (lawm bang a kibawl thei, i haksat nate uh kikum khawm thei) hi le hang naupang kham theih hih tawm mah mah ding in kathei hi. Banah mahni kithat (suicide) kichi leng tuailai lak ah tawm tuan ding in ka ging ta mah mah hi.

A tawp na ding in over all a ka gen nawp chuh i society uh hoih lou pen i khek hoih theih na di ua ei mimal sung chi le (ei innkuan sung) a hoih a ngai masa pen hi. Huchi leh i society uh bawl ngailou a hong hoih mai di ahi. Eimah ni kivel chian phot phot le adang te zaw ama hoih hoih a hong hoih tou na di ahi. Na chi u hia Lawmte???