Khuamial simta hiveh aw..

Kei leng ofis kaitawp lampi a huai thei chi tuamtuam ka leisekna muh ah, apple leh thil dangdang lei ding chi in ka khawl a, huchia ka apple lei dingte khong a hoih chih ding hia, a mel a etlah huai deuhte teng kawm a, a zuak tupan sel a ahonteh kawm in ken ka leiding thildangte khawng envel a ka om lai in ka kiang ah, tangval lian mahmah khat a mel etmai a zong mullit huai petmah khat hong ding ngeingoi hi.

Ka ngaihtuah na ah hiaite eive le mihing saidawi-um bang a zangte pawl, Facebook khawng a kigengente... A sung a omte teng zangbei a, a zatzoh chiang ua, niinpaihna a paihzel a chihte uh chi in, chik mah a ka houpih leh ka kituahpih khak hikei mahleh ka na mudah mawk a, ka hehtha hong suak dek mawk a himahleh heh in vo ek mawk di chi leng ka zou hetkei ding chih ka theih ziak in ka dai a ka ngaihsak kei hi :).

Huchia ka mitsiik a enkawm leh ka thillei di-te lunglut tak a en kawm a ka ding leh... Kamsiam takmai in huai ka kiang a hong ding tangval lian leh vom lelu, mit bang lian pha zozen, a muk bang tehmoh louh dia patoktonol mahbang leloih zozen khat in, "Baby what is this?? Can you give me some??" honchi a, kenleng a kua houpih hipeuhmah ding hiam chi a ka mitsik a ka etleh keilam hon nga a kei hon houpih ana hi laizang a, zummoh na maizen e kei amah baby honsa a mawk diam maw? Chih te ka ngaihtuah a, ka nak muh thadah lotel a, ahihhang in bangmah bel ka gen tuansam kei a, ka vanlei pen lazok a paikhiak ding ka chihleh vanzuak tupan sumnen ana neikei zomah a, huai vazong ngaiding honna ngak in hon chi a, huchi in keilah ka kiang a pa ka mullit toh ka hehtha suah toh vanzuak pa kiah, ka la kei ding chi in ka sumpiak pen lakkik sawm in ka ngen kik hi.

Huchia ka nget kik leh vanzuak tupan hehpih in tomchik honna ngak hamham in chihtoh sumnen zong ding in kuankhia hi, huchia ka kiang a dingpa lah paikhiak sawm tamawngmawng lou in hon enen ahi chih ka mitsik in ka mu a, ka leh lauh sim a, huchia bangtan hiam ka om nung in hong paukhe nawn a, "Melhoih nang koi a kipan na hi hiam? Hondawng ve mi i houpih a hon dawng kei uh leh nuam hetlou ahi, kei Nigeria a pat ka hi a, India a ka hongpai a meltuam deuhte ka muhchiang in ka om a nuam tuam mahmah a, huaiziak a hong houpih ka hi, kei sumsin mi kahi a, nang le Delhi-te na hikei ding chih ka gingta a, huaiziak in buaina na tuah zenzen leh hiai ka phone no in hon phone in aw... Ka hon panpih thei gige ding," chi in, laithem khat ah mobile number hon pia a, huai leng la tuanlou ka hih man in aman leng a chih ngaihna theilou ahiding a, huai vanzuakna mun ah nusia in amah leng a pai khe khong hi.

Sawtlou nung in vanzuakpa leng hong tung khongkhong a, kisuanglah deuh in "Madam na sumnen di," chi a kintak a honpiak kawm in, "Madam na lawm te hia," chi in hon dong a, kenleng "Hi kei," ka chihleh, hiai telawi mi lauhuai ahi, honchi a, kenle  "Aw" kia chi in ka dawngsau kei a, ka kiheikhiak san a bangmah dang leng gentuan lou in ka paikhiaksan hi.

Huchia lampi paikawm in huai tangval pa ka ngaihtuah kha nilouh a, a hang bel kei tung a siatna neileng hilou, ho tawk lengle a agente bek luunglut deuh a ka ngaihkhiak ding zaw hi a, peuh ka chi a, a chang in lah hiaite lawi mawngmawng mithei leng hilou BABY chi peuh MELHOIH chi peuh a khumdeuh a kisap ngeingai a kam bang siam zozen a sung a lah kamkei kual a chihte uh ahi di peuh chi in ka ngaihtuahna ah ka muhdahna lian in a lian mawk a, mi va hichi huat mawk thildik zaw hilou hi a, peuh chi in ka lungsim a kisual nilouh hi.

Hichituk a kamsiam leh mipanpih theidia mansa diam a om ahih dan khong a gente uh, a lungsim tak bel ahihet kei chih a kithei mahmah mai a, himahleh mite lungsim zou mahmah ahi chihbel ka haih hetkei hi, hiai khawng ziak a, ei zolianute lungsim siangthou tak leh kamsiam douzou loute pukpuk i hi uh chih gintakna liantak ka nei mawk hi.

Numei khenkhat a Zomi pihte kiang a val kisa lua leh tazou nawnlou kisa hialkhop a kikoih tampite pen mipi lak a hong kihel dek chiang un i na nawlkhin un i etdan uh tuam ahi chih amau leng haih hetlou uh ahihman in, maingal ngamlou in kingai se semsem in, tomkal kipahna ana zongkha sek uh hidan in ka koih hi.

Pathian i chichi uh ahi maithei, himahleh huchibang dinmun a na ding in zaw Pathian milua na hihkei leh puk baihlam mahmah ding in um ing.

Mihoihlou i chihte leng a ziak om ding ahi a, ahinkhua ua bang ana paltou uh hiam chih i theihchet ma zaw mite nawlkhin leh pawng gengen ding hilou ahi a, a omdante uh deihlouh leh zakthadah huai a omleh amau kiang ah gen in thumpih zaw leng, i nam, i gam a ding in khangtouh huai leh dam huai zaw ding in ka gingta hi.