'Khokhom' kici thumal hi Lusei thumal 'khawkhawm' kici apat lakkhiak ahi a, 'khua gawmkhawm' cihna ahi mai hi. Singtang zodawn a om khota inn 20/30 lekte khua khat a kigawmkhawm genna ahi. Khokhom tuh a loupen in khota 10 sanga tam jaw gawmkhawm ahi hi. Khokhom in a tup pen tuh "Pankhawm Hatna Ahi" cih neih ahi a, "Ngasa in a tam sihpih a, mihing in bel a tam dampih hi" cih ahih dungjui in singtang zodawn khotate a milip tawm chik, kitoudelh lou leh tuantualte, hong kigawmkhawm a, hong tam chiang un hong khangtou thei pan uhi. Khokhom jiak mahin English Revolution, American Revolution, French Revolution leh Rise of the Nations tuamtuam ana tung a, sum-le-pai, nek-le-taak (economy) leh simleivai, gam-le-nam ki-ukna (politics) zong hiai khokhom jiak mahin buching thei hi. Khokhom jiakin gam tuamtuam ah nam tuamtuam te'n khopi kilawm taktakte ana lam ua, ei Zogam ah zong khokhom jiakin Lamka, Aizawl, Lunglei, Tedim, Haka, Tahan, Imphal cihte ana ding sam ta hi. Ahihhangin, khokhom' pen i Zogam ah deih bangin hat nailou a, duhthusam zong tung nailou nilouh hi. Huaijiakin, i gam in a taksap, a mamoh leh i nampi dam khosuah na'ng a poimoh mahmah tuh 'khokhom' bawl hahkat meng ahi hi.
Zogam Khokhom Dinmun:
Sing-le-suang bia a ana om tuan a pupa hunlai apat 'khokhom' bawl nachang ana kithei hileh 'Chindwin Valley Civilization' ana om dia, tuni'n Zomi-te i namai sam kei ding un uphuai hi. Himahleh siangthouna ana taksap luat tel jiak un khokhom bawl theilou utlou genlouh, singtang kawm ah mun sang pipi ah khota satin pipute ana om ua, ("Hiai khua ah teng leng tuapan kum 300 nungin bang a chi dia?" chih ngaihtuah/galdot neilou in) tu'n a thuaktu khangthakte i hi maimah uhi. Tuni'n nam khat, minam khat, khovel a nam tuamtuam, pau tuamtuamte laka khat i hihlam i kiphawkkhia ua, ei di'n khovel a thak suak hi. Hibang a Zogam thak i lutna ah pilna leh siamnate neiin i hong om ua, Zogam lamthak di'n i kisingsa lellel uhi. Tulai Zogam khokhom dinmun pen i theihna leh i kimuhkhiak nung kum 100 bang pai ta hial mahleh niam law lai a, lungtunhuai nailou in kipahhuai lou hi.
Tuni tanpha in singtang zodawn ah khota tampi petmah kipumdim lai a, i gammang (natural vegetation) hauhsaknate pawnlak, loutul suaksak in i khosa lai lai uhi. I gam leitang hauhsakna (natural/mineral resources) neihte zang siam lou in mahni a kitoudelh theih thil tampi gamdang\namdangte apan i lalut maimah uhi. Khokhom suanhuai i din louh jiak un melma te'n hon ngamthoh ua, sumdawnna lam ahte, khotang kivaipuakna lam ahte leh kong bangkim a khantouhna lamah i niamkiak mahmah uhi. Japan mikhat Zogam hong zin in a gendan in, "Zomi te'n khantouh taktak na ut uleh singtang zodawn lam teeng teltul lou in khopi 2/3 lamkhia unla, na singtang gamte uh huan, lou (plantation) bawl nadi'n zang jaw un" hong chi cihthu ka sim kha ngei hi. Eimi Japan va zin khat in lah "Karese, Japan gama singtang khota om lou, rel (train) a i tuan leh nahtang mun mel 10, lengthei mel 10, sekkhum mel 10 leh adg.dg. Huan (firm) ngen a pumdim himai" ci hi. American Tourist khat Mizoram zin in leng "Nou na gam ua om sawt tum lou uh maw? Om det sawm lou na hih ualeh koia pem ding uh e? Na gam uh kuate piak tum na uoi?" cikhe ek! Khokhom bawl louh jiakin gamsa te'n hon lawi di'n kisa ta ua, sing-le-lou leh haichi te'n gah suang zou nawn lou uhi. I nam chiamteh VAPHUAL nangawn in hon len mangsan kha tel ding e!
Khokhom Dingdan:
Jingchiang thai chiang chi lou a, tutphahzawn a mawk lup zenzon mai lou a, i gam-le-nam heutute adi'n mittang ke leleng tawm manlou khop a buai hun ahi ta hi. I nam i gam dam hen i cih leh khokhom sai hun ahi ta hi. Tua di'n scholars, philosophers, researchers zong tampi kinei ta hi. 'Belhawm gin ngaih' i bang kha diam ai'hkeh 'ka right' peuh i ci zaw diam khokhom dingdan hiai anuaia bangin hithei leh uthuai:
(NB: Mahni khota min leh Hausa hihna bel keng lut ding)
1. Block/Sub Division 1 huamsung a om Zodawn khota om teng Khua 1 ah (a gawm in 2 lakhs vel) Khopi milip 2-3 lakhs omna ah khantouhna paizang mahmah.
OR
2. District Hqtrs 1 huamsung a khua tengteng (including Blocks and Sub Div) tua District khopi ah. Milip 3-7 lakhs omna tuh thupi mahmah.
OR
Zomi nambil jel in houh khopi khat chiat din ta lehang, "kua khopi a siangthou/etlawm pen?" ci'n kitaiteh ta lehang khangtou veve ding.
OR
3. Amasa 2-te hiai thu gelhtu'n sit lai! Manipur a Zomi Zosuan nam chichih Lamka leh Imphal Tulihal Airport tan kikal ah. Mizoram a om tengteng Aizawl ah. Chin State a om tengteng Tedim or Gunlui pang ah. (Re-unification tangtung hi phial mai ding.)
Conclusion:
Hibanga Zogam i chei thak ua, i namsung i puahphat ua, khokhom i pat hun hun in i gam uah Transport hong hoih dia, i khopite kikal Super Bus nalh taktak tai zenzen mai ding hi. I pil le houh Zogam Airlines ah zong kituang khamoh lou ding hi. Khopi lian leh kilawm himhim luilian pangah kinga ngei ngei cih mangngilh louh ding ahi. Gam-le-nam zahtakhuaina jaw eimah kivaipuak dan ah ana hi jaw hi.
Another article by the author:
http://www.zogam.com/articles/politics/1052-lamka-the-final-frontier-of-the-zo-people.html