Thumapui:
Naupangte leh khanglaite’n a khantou kawmkawm un hasatna leh lunggimna tampi ahing tuohtou uhi. Hasatna leh lung gimna ichite ahoilou ichi na hilou in, tamte pilhuoitah a hepkhiet theina pen lungsim khantouna (emotional growth) khat ahi. Hinanleh naupang khenkhat in aniteng hamsatnate ban-ah akisuongsawn a gentheina tuntu - nu-le-pa kikhen, nu-le-pa toh umkhawmlou, innsung kituohlou, damtheilou, skul a hamsatna leh khotang a hamsatnate atuoh uhi.
Naupang khenkhat tam hahsatnate toh aki adjust thei ua, khenkhat aki adjust theilou zieh un lungthah, lunggim leh zauna in adim uhi. Hinanleh khenkhat in a chiimawnate(helplessness) atahsatung uah natna(physical complaint) dan in alangsah uhi. Hamsahna tampi ahing kigawmkhawm a hun sottah ahingpuah khawm chieng un atahsa paidan(physiological change) ahing kiheng a, tam hamsatnate tahsa damlouna in ahing kilangkhe thei hi.
Conversion Disorder: “a damlou nu/pa tahsa hieng khenkhat khotheilou dandeu a um(numbness), ahilou leh zeng/huntutnei (paralysis or fits) bang natna chikhat nei, hinanleh ahuoh leh tahsa a damlouna bangma kimulou” chilei adih pen ding hi. Tam conversion disorder ahileh International Statistical Classification of Diseases and Related Health Problems (ICD-10) leh Diagnostical and Statistical Manual of Mental Disorders 4th edition (DSM-IV) in psychiatric disorders khat in apom uhi. Nidang lai in tam natna ‘HYSTERIA’ ana kichi hi. Hinanleh ‘lunggimna tampi kigawmkhawm a tahsa damlouna a hing kilangkhie’ ahi chizieh in Conversion Disorder chi’n ahing kiheng khie hi (Sigmund Freud)
Natna kilatdan:
Conversion disorder kilatdan (signs and symptoms) khenkhat ahileh - tahsa munkhat (e.g. khut) bangma theilou a um (tangtheilou), tahsa pumpi zeng ahilou leh bangma theilou a pua in kisat(seizure and/or convulsions) tuazou a naah hamsa sa (gasping), mit in khuo mutheilou, hinanleh doctor te’n atahsa a dihlouna bangma mulou (absence of an underlying medical etiology) chite ahi. Atangpi in shiding bang in aki muangmaw ua, khophohlou bang a aum zieh un a enkoltute a dingin abuai huai mama hi. Tam akilatdan tangpite adamlou in abawlthu leh a control thei ahisih hi.
Tuaban ah conversion disorder ahileh kilawsawnthei (sociogenic illness) ahi ban ah akithethang hat (rapid spread) mama natna khat ahi. Sociogenic illness ichi chieng in natna kilatdan (signs and symptoms) mihonkhat sung maimai a kilawsawn china ahi (affecting members of a cohesive group). DSM in tam natna somatoform disorder nuai ah akoi hi (Rabi Shakya, Epidemic of Hysteria in a School of Rural Eastern Nepal: A Case Report)
Numeite’n tam conversion disorder nei utdeu abang uhi. Atangpi a et in numei leh pasal 5:1 in akikhe zou hi. Numeite ahi leh azau uleh zaukhawm, aka (cry) uleh kapkhawm, silkhat abawl uleh bawlkhawm, ki-engsawnthei mihing ngaiumtah ahivang a khat veivei buoihuoi ahi ut mama uhi. Adieh in Teenagers lah ah tambang mizie atam ut hi. Tuaziehin, alawm-aguol lah ua mikhat in conversion disorder aneileh adangte’n zong atheiloukal un (subconscious mind) ana copy khaleng uhi. Tualeh naupang kum 10 nuailam leh upalam in anei vang mama a, kum 30 nuailam mite’n anei ut diah uhi.(Deveci, 2007, Carson, 2000). Tambang natnate khenkhat in DAWI-le-KAU bawl chi in thumna neipawl, ngeen (nga matna) a tuam pawl, maibi-maiba zuan pawl leh adamlou soisa pawl a um uhi. Tampen lekhasiam zieh ahiai, hausat zieh ahiai, thunei zieh ahiai a theithei chi ahi kholsih hi.
Zending dan (treatment):
1.Explanation. Damlouna toh kisai hoitah a hilchet ding ahi. A damlouna pen ahamsat ding dan leh damlou tahtah bang a kingai ahidan, mi tampi’n tambang natna neithei ahidan, damthei kia leh ‘psycho’ ahilou dan hoitah a hilchet ding ahi. Hawmthaw tah a kep le don (caring and supportive) in a damlouna symptoms teng a subeibai deu hi. Tualeh a damlouna a control thei nading in hanthawn inla, athugen teng gingta phot in. Na kinielpi leh dam sang in huoisiet lam a nawt zaw ding hi. Tualeh a symptomte a nalung himawseng leh zong anatna a huoise ut a bang hi. A symptom teng a bei chieng in Neurology lamtoh kisai in hoitah in enkaitou jel adeihuoi ding hi.
2.Physiotherapy a umleh jahthei ahi.
3.Depression leh anxiety (comorbid) anei leh psychiatrist etsah a zen ding ahi.
Cognitive behavioral therapy (CBT), hypnosis leh psychodynamic psychotherapy chite aphattuam leh phattuomlou akigenthei naisih hi.
Nu-le-pate’n panlah ngai:
Tate’n natna khat atuoh chieng un ‘natha sietman/natha da man’ chilou a ngaisah ding ahi. Doctor ensah inla a natna (lutangna, gilna, nungjang/el na, ann dulou, ihmu theilou, lungvai, luahsuah, ning kitel, lunggim, ham utlou, azieh umlou a kapjel leh adang dang) phatuamlou a, nichin hinkhuo leh skulkai/lekha sim asuhbuoi veve leh tahsa damlouna (physical illness) hilouzaw maithei hi. Anatnate ama utthu hilou in, alunggim zieh hithei hi (emotionally based). Pilvan apoimaw diehna ahileh tambang hunchieng in damna ding chi in khangnoute’n damdawi khamthei, ju-le-sa leh hindan kilawmlou tampi ahing bawlpan uhi.
Anatdan leh anatna mun akam mama in gen sah in. Abuoinate natheisiem dan theisah kawm in suhdam thei ahidan genpi in. Tambang natna te lunggim zieh leh pressure zieh a umthei ahidan hil inla, gawtna (punishment) leh ama dihlouna (fault) hilou ahidan gen in. Lunggimna in tahsa ah natna chituomtuom atun thei hi chizong hilchien in. Ama tung a mitmawna umsate toh meehmat nai da mai in.
Anatna hing kipatna theisawm tinten in (potential cause). Natanu/pa in laizilna, innsung hindan, skul kihengzieh a buoina, innsung ahilou leh aloihoi mamakhat damlou/shi zieh, asang a thuneizawte’n avuoh ahilou leh lupkhawmpi (physical or sexual abuse) zieh a lunggim- lungngai a damlou hithei hi. Natheilou kal a zau-le-liing a um gige zong hithei hi.
Na tanu/pa in a natna a control thei nading in lampi suipiah in. Etsahna in, a lutang nat ahing kipat chieng in bang abawl laitah, bang hun (time of the day) akim-akiang a bang kibawl, bangtan na, bang in a natna uangsah chite note book khat a record sah ding. Tam information in a hinkhuo a bang henglamdang theiding a um ei chi ang theisah ding hi. Etsahna, skul a bang hamsatna tuoh, innsung a bangchi, society leh alawi-aguol lah a bang chi hin.
Muthei khop a zauthawng (alarm) leh hawmthaw bawl seng a kilang (overly solicitous) in umsin. Tambang natna natete/na innsung mite’n theikholloupi a ahing tuohkhah leh, thakhat thu in moh patauh sinlen, lungsim geel vengveng jaw in. Tua hileh azen ding dan lungsim leh ngaidan kilawm nathei thei zaw ding hi. Na moh patau tahluat leh adamloupen a ding in pieh bebe abang ding a, damhah ding ahi.
Thukup:
Centenary lawm in, siemna pilna ah sangpi tung nanlei, ilunggel tangpite heng ahunta hi. Tamteng nabawl ding, tamteng bawllou ding, tammunte a hawlou ding, nai hijat chieng a nabawl teitei ding chite’n natate lungsim a sugenthei maimai hi. Tam lungsim gentheina in geentheilou natna tampi atunthei a, ideiloupen shina (suicide) tan atungthei chi thei vai.
25102010