(Note from the Author: Please read between the lines)
Exam zoh chu……… BABARE himai! Nuamlou chihna di ka theijou himhim kei. Exam laitak bang in exam zoh chia program dikhawng plan tuamtuam atam ut mahmah a, himahleh i hong zoh hial alelah bangmah ana hikholkei mawk hi. Lunch nekhin in TISS campus apat Pu Muanding Guite’ quarter lam ka zuan pah a, local train a tuang in Mumbai Central a ka kumkhia hi. Paina ding lampi theizoklou a ka omlai in Pu Kamzalian Tomging in minute 20 sung a hong tung ding ahih dan ahong gen hi. Pu Kamzalian leh azi it Madam Chin Ngaih Lian’ teenna RBI quarter ah ka va khawl denta hi. Mipil mah in a om ua, houlim bang pai mahmah ahidia ann bang ka va neden zawzen hi. Huaizoh in Pu Kamzalian toh Pu Muanding Guite Quarter ah ka pawt uhi.
Ka houlimna uh nuam kasa petmah hi. Eilam khawng a houlim i chih tangpi mi khat leh nih demna, ki COMPLAIN tuahna ahideuh gige a, himahleh kou houlimna hichilam ana hikei daih hi. Bangchi leh media hatsak thei ding, imi-isate bangchi leh khangtou a kipumkhat thei ding chihkhawng ahi tangpi hi. Hichi dandeuh houlimna poimoh ka sakna alian petmah hi. Nuam salua ka diam ah ka pau tam teutau hi. Mi liantate lak a omzaw anuam aka! A jing in ka nuneu Lunching Guite toh bazar ka pawt ua, huaizoh in Lucy in Mercedes a hon pick up in, mun tuamtuam ka vakta uhi. Car a ka tailai khawng un huaima nitak a Pu Ginpu Guite toh facebook a ka kihounate khawng uh ka lungsim ah ahong lang dundun a, mi piching lamdeuhte ka muh chiang bang in amah (Pu Ginpu Guite) ding bangpeuh in kakoih kha jel hi. Aziak chuh Pu Ginpu bang le Mumbai a hongzin ahih chia! Mu ut tuntun kawm a mulou, amanle Lucy mu ut ahihdan gen mahleh mulou asuakta hi.
Car sung ah Lucy in “SL, innlam a hong paisan ding na hita. Na gam dinmun uh et in, na damsung in bang hilechin na ut a, bang in hong kipaksak pen di’n gingta a ?” chih ahong dong hi. Gending a tam mahmah a, himahleh kagen ding katheikei. “Ka gam uah FREEDOM (Zaleenna) omleh chitaleng ‘Bangziak a free lou’ na hong chidia, ‘DEVELOPMENT IN DIFFERENT FIELDS’ chitaleng ‘Solkal in NEC leh Central fund tuamtuam apan in na gam uh changkang nading fund hongpelou hia’ non chi dia, ‘EDUCATION’ chijel lenglah ‘na state un Right to Education (RTE) implement lou hia?’ non chi jel dia…. ka lung sim ah adimlet zungzung thil tampi na omsak ka chi Lucy,” chi’n ka dawng hi. Huchih kal in Bandra a Lucyte inn ka tungta uhi.
Inn a omte’n Pu VL Mangzou duh zawngtak singpi ahong awm ua, ka dawn kawm un Lucy in “Leitung ah khantouhna omtheihna di’n FREEDOM (Zaleenna)apoimoh pen hi. Freedom in tampi ahuam maithei, himahleh ei dinmun et in FREEDOM from FEAR ka gen ut hi. Hiai lauhna bang ziak a eilak a om ahidia? Mipite’n Right to Freedom’ chih aneikei ua ahi diam? Zaleenna ideihziak a asung a teengte zaleenlou ihi uhia leh? Zaleenna deih ziak liauliau a mipite ‘lau-leh-liing’ a om chihbang omthei ahi diam? chihkhawng ka ngaihtuah dundun hi. Hiai zaleenna a omlouh chiang in mipil-misiamte’n thil thak, ngaihdan thak leh amau siamna tan a nasep utna/siamna, a lungsim khuak ngaihsutna azang theikei uhi. Ngaihdan thak ahong omlouh chiang in society ‘amuih dek’ lam ahita hi. Thamlou in lauhna ziak in mipite’n lungtang natna (mental health problem) tuamtuam aneithei zawmah uh,i” chi’n ka Lucy in ahong gen chiauchiau hi. Kenle, “A diak in Lamka a damdawi zuakte leh doctorte hong dong lechin sungna, taksa na, amhai, thazoi, kawngna etc chihkhawng natna tangpi ahi. Hiaite natna ahikei i chikei, himahleh PSYCHOSOMATIC SYMPTOM zaw ahi,” chi’n ka dawng teisam hi.
Hicibang kawmkal ah zaleenna lam tuamtuam i neijel uhi. Huaite khenkhat ahihleh zudawn, kingaih thanghuai, sisan suah leh phuba lakna, neekguk-takgukna etc. ahi. Leaders consultative meeting, training, committee etc., i neih tam deuhdeuh aleh buaina tam deuhdeuh hileh kilawm abatna chiang a omsek hi. Nidang a Europe a RENAISSANCE dandeuh hongtung dek ahita diam chih kinepna ka nei hi. Sapte thupil in “The darkest night is before the dawn,” achi uhi. Huchidan stage tungdek i hi diam? Ahihkei lelah civilization lian leh thupite amuihmang bang a muihdek houh ihizaw diam?
Nidang toh teh in Doctorate degree nei i tam mahmahta ua, officer bangle lam chiteng ah a ki-omta hi. Gamtuam a zilna sangtak nei bangle kitamta, political awarenessor awakening bang le omta sam. Ahihleh bangziak a hichi teektuuk i hi ding uh? A ziak a ka muh khat ahihleh mipil leh INTELLECTUAL a i neih atamzawte in IDEA hoih pipi aneihte uh khotang phattuamna ding in athoh (ngam) kei uhi. Economistte’n bangziak a i gam economic toh kisai ahoihlouhna tangkoupihlou or ahoihna ding bangdia tangkoupih lou? Political ideologistte bangziak a PUPPET dan a omta? Pastor lah tam deuhdeuh, Pasian thu lah ki-uangbawl deuhdeuh, bangziak a sualna khang hulhul ahi dia? Bangmah dang ziak ahikei a, LAUHNA ziak ahi tangpi hi. Ka laukei na chi maithei, himahleh na lungsim taktak toh thilhoih hih na ut a, kuate hiam a heetkha dia na gintat aleh na hih ngamkei maithei.
Huaiziak in hiai lauhna lauhhuai beisak ngai ka sa mahmah ta. Social Network a kinial ziak a phatuam ding ahikei a, michin in ei hihtheih lamteng ah ahoihpen hih tum tinten in, thunei zawdeuh a i theihte’n pan hongla le uh khantouhna chikhat beek omding in ka gingta tinten hi. Himahleh Social Networking site natawm a lauhhuai sim abangta hi. Hiai lauhna hong kipatna bangmah dang hilou in zaleenna ineihlouh ziak ahi.
Thu tuamtuam gen a sawtpi ka houlim nung un, “Lucy, innlam paidek ka hih toh ka na pai phot dia, November kha in kimu nawn maini,” chi in ka giahna lam zot ka hong sawmta hi. “Keile Monday a US zindek ka hi, na tate ading in Apple ka lei a, huaibeek ana pua in,” chi in apple bang ahong pemawk hi. Lak dialah hilou, laklouh dia ah hilou. Huchi in car in ahong kha nawn hi. “Lucy, ka pute khat Pu Ginpu Guite in hong nakmuh ut maizen toh, kei lah paidekta ing a bang kana gen dia? Amah ahihleh kou Zomite lak adia kasuan mahmah khat uh ahi. Ahihtheih leh khatvei beek kimuhpih lechin ka ut. Na number kana pemai diam ? Tulaitak in Mumbai ah ahong zin a” ka chih suausuau aleh “SL, nangzaw Pute chih mah nahau a, kenle ka mu ut. Nang tung a ahoihnate uh keitung a ahoihna bang un kangai. Himahleh SL, itna kichi bang ahih katheijou kei. Itna ziak a mihingte’n nuamsa ding hitaleh station leh slum lak a khosate’n nuam asa ding uh. Himahleh nuam asa tuankei uh. Hauhsakna ziak a nopsakna omding hileh kei mahmah inle nuam kasa ding. Hausatna ziak a itna omding hileh nang bang inle hon ngai thamta dia gingta kahi.Himahleh…………” chi in ka khut ala a, sim chenchen kawm in ahong en kilkel hi. Keile kideek joulou in, “Lucy…….” ka chih khitphet in a phone ahong ging a, “US a ka U in a hong call zual” chi in aphone ala a, huaikal in ka zintunna mun ka tungta hi. Ka paiding hongphallou in, ka khut ahong leen tinten a, gending atawm petmah hi……………..
~~13102012~~