SINZAWL KHUA A ZODAWN SIAMSINNA
Pastor T Thangzasiam, EBCC Sinzawl.
THUMASA: Kum 1888 kum a, Phamsa Pu Sianthuam Guite,Vumhang in anasat Sinzawl khua, Nidang lai pi leh pute hun in ‘Sihzawl’ ana kichi hi. Tumdawh lam kholui mun ah ‘Sihtui’ hoihtak ana om in, gamsaten tua sihtui a naknek mahmah ziak un khokim leh khokiang akipan sabeng miten tua sih va chang/awm zel uh kichi hi. Hiai sih tuiziakin a teng masate ana dam theihlouh banuah, ana sisi uh chiin upaten gen uhi. Tua sih a pan lasawn in “ Sihzawl” ana kichi masa hi. Tu a tenna lellel mun a hong kisuan touh chiangin “Sinzawl” chia khek in om in, a teng mite zong damthei zaw, khomun mahmah leng a nawpzawk banah singlam tuilam khopawtna nuam tuan mahmahta hi. Tu’n Pu Liansuanthang Guite hauhsakna nuaiah Inn 200val minmen kitenglai lai hi (based on Job card holders). Sinzawl khua tuh Manipur simtum a om tulai zogam khopite laka lianpen pawl ahia, Lamka apan Guite Rd tawnin 147kms a tunphakna ahia, Tipaimukh Rd leh NEC Rd totna ah 191kms (approx) a tunna ahi. A kho omna sea-level apan teh in kenleng ka theituan kei hi! Indo-Myanmar leh Mizoram tehtuah a om ahih manin Zogam triangle chih theih ding khop a mun poimoh ahi, a omna location kia et inleng tulai I Zogam a ding in kho poimoh leh puah huai petmah khuate laka khat ahi hi.
SINZAWL KHUA LEH SIAMSINNA: Khut nasep a taima leh buh leh bal mahni khamkhop khou khesek khua, nek leh dawn a mahni kitoudelh zoukhua
ahia, khokim khokiangte kiang a puuktaw tam vaklou khua ahihna in, siamsinna lamah kho mite’ mitvak haksak deuh ahikha diam kachi hi. Huchihlaiin, mailam ding saupi muhkholhna nei laisiam masa Upa Tualsiam Valte (Tua Teikhang a omta) in kum 1970 touvelin, amah inn ah naupangte samkhawm in laihilh ana kibul patpih hi, hun hongpai touzel in I saptuam EBC in school hon patkhiak chiangin awl awl in ki khanglou hiai hiai in. Tu kumzabi 20th leh 21st tehtuah kal hun nanung ah siamsinna lam toh kisaiin khanlohna thupitak hongtungta hi, tuni chiangin Sinzawl khua ah Class-X tan sin theihna hoihtak Hostel (Siamsin Hostel) toh kithuah “Convention English High School (CEHS)” kichi, EBCC HQ te deihsakna ziakin kineita in. Hiai I school tungtawn un kumteng in Class-X board exam ah naupang ten sang taktak in passed khe ziahziah theita uhi. Singtang dawn apan nu leh pa an huansa nekawm a pawlsawm zoh theihna omsun a suakta hi. Tukum 2012 academic session ah Student kho tuamtuam- Songtal, Phaitong, Khajang, Thanlon, Bungpilon leh Mizoram Daidou leh NE Tangnuam akipan teng toh a gawmin 330 val kinei hi. Naupang haksa diakte etkolna toh kisai khopi a om saptuam leh pawl tuamtuam banah, mimal kiphalte ziak a hiai tan tung ihih manun kipah huai kisa mahmah hi.
CEHS BUILDING DELDEEP: I School building uh se lawta, deldeep lawta, vuahzuk chiang a naupangte tawpbaih ngai, huihpi nundek chiang a tawpbaih ngaizel in. Nikhat huihpi nungding staff-ten tawp baihpih uhi. Himahleh, naupang neu khenkhatte a mau in a tunma teng uh tai teitei dingsa pawlkhat om ua, huihpi’n lampi ah phaman in, huandai (fencing) leh mi inn baang khawng toh butbelh khak pawl nei hi. Tua bang hunah piching bangzah hiam ten ana hunkhe manlou hileuh naupang bang zah hiamte hinna mansuah thei dinmun ah ki om hi. Tuabanah naupangte huihpi vuahpi’n a school uah nuaikha taleh, school building muanhuai nawnlouh ziakin. I minam leh saptuam ading a mualphou na hong hikha ding chih kilau gu giugiau hi.
SIAMSIN HOSTEL: EBC HQ panpihna ziakin kum tamlou paisa akipan siamsin hostel kichi patkhiak ahi a, Hiai hostel ah tu lellel in kho tuamtuam (Manipur leh Mizoram state) akipan naupang 20vel om uh. Amaute Warden feltak khat leh Cook khat in ompih den uhi. Hostel te Kitchen a siatluat takziakin bialtu Pu M Ginzapau MDC in a tung langva ding honpia a. Kipah huailua! Himahleh school building buaia akibuai ziakin ki bawl thak zou nailou deuh a suak a, Bawlpah hita ding hi.
BUILDING BAWLNA: Khopi mun tuamtuam a om zodawn siamsinna ngai poihmohte muh dingin kon taklang hi. CEHS New building thak ding Fit 128 a sau, Fit 18 a za/lian leh sawng- 1 nei ding bawlna April 2012 in kipan khe theita hi. sum hul omsa toh patkhiak ahikei a, poimohna aliatluat ziak in Pathian muanna toh patkhiak ahi. EBC HQ te hon huhnate, Khosung hausate, khosung mite leh mi kiphal tuamtuamte ziakin hiai tan kitung theita. Khosung mipi’n education hoih deihna ziakin tha leh zung tamtak kisengin, Niteng a natlang a kineih banah Lamka ah leng Pu H Siamzathang, Chairman na nuaiah Sub-Committee dinkhiak ahita hi. Tu’n sum leh pai taksapna liantak kituak panta ahihna ah. Mun tuamtuam a om zomi ten thumna toh honna phawk chiat dingin chialna kon bawl hi. Thumna kialou leng wel-come gige ahi.
CEHS A POIMOHNA: Govt in education puahphat a sawmsek ua, dan leh dun tuamtuam a bawlzel uh. Himahleh, Manipur tuh Manipur ahih miau si ziak in a kingak theih taktak tuankei in, a muan ngam huai tuankei hi. Singtang khua teng ah Govt school a omchiat sim a, himahleh DC leh Bialtu pa hongzin chiang kia in teacher suanhuai taktak te melmuh phak ahih lel ziak un. Mipi’n ki muang zoulou mah ahikha ding. I gam dinmun a pan etin, neihziak hilou, duh thusam masa leng hikhol keimahleh, haksa pipi a I run uh saptuam school mah hon chi sak teitei dinmun ah ki om lellel hi. Govt a nasem thei heutu muan mahmah ten hiai thei le uh a deih huai hi. I saptuam schoolte hon puah uh henla, building khawng hon bawlpih maimah zaw le-uh a kizang kha zaw diam? Chi nuam sim dan ihi. Tu’n zodawn adingin CEHS sinzawl kia Class-X board exam appeared thei omsun a suak maimah hi. A omna mun(location) a dik a, school mahmah leng a hoih bawk ziak in Thanlon bial mipi leh Mizoram tanpha honzawt batna ahih naklai zawkmah ziakin. A poimoh petmah hi. Hiai akipan sum sen leh paih tawm chik toh Class-X tan I mi leh saten zoukhe theita uh. Khopi a “ Ding Dong Bell” tan zohna dia na sen tengin, singtang ah Class-V tan zou zou mahmah dingin a gintak huai hi, Lamka jang leh khopi tungzou nailou I mi leh sate tunphakna mun ahih banah, I economy toh kituak siamsinna ahih manin. I hih theihna lamchiat ah pan lakhawm siausiau leng a chih huaisim mahmah hi.
