Thumapui:-
Sex (numei leh pasal tahsa a kipolna) I chi pen Pasian sil siam te lah a chi khat leh mihing bukim na khat jong ahi. Tami sex lunggul na ahi lou leh dugol( lust feeling) aum lou chiang in mihing bukim lou ahiai khat a ngaisut na um thei jel hi. Hinanleh tulai gingtute te lah a tami sex jia in igam sung leh khotang hinkhua hing su kha in ahi lou lam tah a jang in thang huai na leh gitlou nan I jang ta uh hi. Tami sex I chi pen mijousia in ki nei chiat a, hinanleh aki bang kim sih hi. Khenkhat te a ngai tuana uleh a ut na lungtang/tahsa ngaitua na khu ahat/akho a, khenkhat te ahu chi kia jel sih uhi.
Et dan tuam tuam:-
Tami sex I chi Pasian sil siam ahi chi I thei ta ma bang in ahoi leh ahoilou ahi lou leh asia leh apha in ki jang thei hi. Pasian in sil jousia a siam lai in hoi asa sua kei hi (Gen.1:25b). Hinanleh mimasa Adam leh Eve te khelna/solna ahing puo chiang un sagua a um ahi dan uleh zum na ahing thei ni ua ki pat in silhoi khu silhoi lou ahing sua ta hi. Pasian in sil jousia asiam lai in ahoi sua kei a asiamsa mihing te a ding in hamphat na leh gualzawlna itan di jousia ukhu hamselo na leh vangsiat na ahing sua ta hi. Tuajiain in tami sex Ichi jong mihing te ading gualzawlna hinanleh ipuagih uh khat ahing sua tahi.
Khangdong te laha:-
Sex in tulai gingtu khangdawng ahing khang khe pan-pan te kung a na sah tah in siatna hing tun ta hi. Tam te jousia khu bang jia hi va I chi ei…?? ngaitua kha in na nei kha tai…??? Kei mi mal mu dan leh ngaidan in I gam sung ua tumlam gam te pei dan leh tawndan (impact of western culture) te I copy ua ahoi um sun-sun te ki copy ta lou in ahoi lou lam lam te I en ton ua I gam/inn sung ecomomy toh ki tua lou deu in hindan khandan I bawl ua, ihin dan leh tat dan te isum leh pai mu dan ahilouleh inei leh lam te toh kitua lou deu mei in hinkhua ki mang hi. Tulai dia-dia in Korean impact ki chi le chi khial ding in ka ki ging ta sih hi.Tuami te in theilou kal in khangtha te kung a nasa tah In siatna hing tun hi adia in sex lampang ah, tha’nghuai na lam a siatna ahing tun hi. Tulai khangdawng te kum naopang nou nou in ahing ki ngai ua, tulai ham hi leh ahing ki star tua ua, ki ngai hinkhua ahing jang ta uhi. Ki it-kingai asia ahi sia ka dem na lam zong ahi sih hi. Ki itna kingaina I chi pen Pasian sil siam ahia, ahi ding mong ma ahi. Hinanleh, ahing kingai chiang un TV hileh adang adang-bang vel a amu bang bang un hinkhua ahing jat sawm uhi. Kingai sung a tahsa lunggul nate suhpi ching asawm tei tei ua, khosahna bei keei in hinkhua a zang uhi. Nu leh Pa ten lah atate uh bang to bang hinkhua jang ahi ua chi ngai sut na lah um ta lou. Aum sun sun te lah atate uh mi teng teng sang a hoi jo leh pha jo in a ngai sut uhi. Ajia pen tulai khangtha te inn sung naopang, kholai nungah/tangval ahi ta jia un nu leh pa ten atate uh bang tan tung leh bang tan gei ahi lam uh athei pha ban sih uhi. Ka chi jat pen pen khat kia ta leu-leu ahi leh la Zolengthe in Lamka khopi a numei kum 13 apat 19 tan survey/interview a bawl na ua 70% ten a virginity uh mansua ta uh chi va yea hi. Tami ahi tulai idin mun uh, iki hoi sah iki siangthou sah sawm pou-pou vang in a result ki lang ve ve hi ve aw. Nu leh Pa ten tua teng lah a kei ta leh nao tel kha sih va tel kha mong mong sih va ichi ngam ngel na diaile..?? Tuabanah khanglai ten tua te lah a kei ka tel kha mong mong sih hi mi bang zat in I chi ngam na diai le..?? ki ngai tua tham ching kasa hi. Khristain ngen la iki chi sam ua, Laisiangthou in bang agen ei chi khat vei toh en lei ut huai isa hi. Alang khat a Bible ei ma ut dan dan leh lem sah dan dan in ilet (interpretation) ua, Laisiangthou in bang pen dei na leh ngim na agen ahiai chi na sang in ei ma ut dan dan in I let ta uhi. Laisiangthou in tambang in ana gen hi, Khristian gingtuten atahsa un Pasian thupi na pia uh hen, ajia pen tahsa pum khu Pasian Biahinn ahi jia in ( 1 Cor. 6:13-20). Tuami jia in ei gingtuten itahsa pum uh khu Pasian thupi na ding a ijat ding uh ahi (Rom. 12:1). Khenkhat te ngaidan in kingai lai tah a tahsa lunggul suh buching khu ki hi sah na leh ki tha’ngal nan anei kia ta leu leu uhi. Angkawm in aki koi sih uhi, ajia pen kiteeng nai lou a tahsa ut na suh bukim khu angkawm ahi chin gingtu tam joten angai thei sih uhi. Angkawm umjia neu khat en lei ut huai kasa hi. Angkawm ichi chiang in numei/pasal kiteeng jou sa hina pi a mi dang mani ji/pasal hi lou toh tahsa utna suh piching te khu angkawm aki chi hi. Tuin khangtha te din mun leh angkawm umjia en kia vai: khanglai ten kingai lai tah a tahsa ut na a suh piching chiang un angkawm a aki ngai thei lou lai un angkawm tah tah ana ahi uhi. Aumjia pen ji/pasal nei nai lou pi a mani ut na suh buching khu angkawm lian pen pen te ana hi uhi. Ji/pasal nei nai lou in bang chi dan a naki ngai pi nu/pa toh Nu leh Pa hinkhua na mang thei ata diai…??
Solna(temptation) leh khelna(sin):-
Atung a igen sa teng teng bang jia a hi chi bang sil hing um thei ahiei chi tom khat en kia vai. Solna leh khelna aki bang sih hi. Solna Ichi chaing in sil hoi thei na jen pi a silhoi lou bawl ding a ki sa gei gui khu solna ahia, khelna Ichi chaing in solna dou jou lou a pua ahi lou leh gamtat na khu khelna ahi. Tami sex lunggul na le ut nate khu solna ahia, satan in ingaitua na uh hoi lou te khu suh piching ding in hing phut gei gui a, hinanleh tami solna khu khelna ana hi nai sam lou hi. Satan apat solna te I dou jou lou chiang in tua I gen gen te ing suhbuching chiang in tuami khu khelna anahi hi. Tuin, kiteeng nai lou pi a na lawm nu ahi lou leh na lawm pa toh sex kipawlna na jat uh khu solna ahiei ahi lou leh khelna ahiei chi ki ngai tua tham ching mama in ka thei hi. Laisiangthou apat imu ta ma bang in mihing ten itahsa uh khu Pasian biahinn ahi chi thei na gegu pi a su tha’nghuai tei tei khu solna ahiai ahi lou leh khelna ahiai…?? Solna khu khelna ahi sih a hinanleh solna buching sah khu khelna ahi. Mihing te idam lai hun sung in solna niteng-hunteng a tua gige ding ihi uhi. Tuami solna te idou zou thei na ding in niteng leh hunteng a Pasian kung a panpi na nget ding leh thumzing khu imamaw chiat uh ahi. Jesu ngel zong leitung a ahing len lai in satan apat solna ana tua zou tham hi. Hinanleh aman tua solna te khu ana dou zou a khelna ah ana pua kha sih hi. Tuamabang in ei gingtute zong solna dou zou ding in ki han chiam vai…itahsa pum khu Pasian Biahinn ahi ma bang in ama lim leh mel sun a hing siam pa in asiangthou ding in hing dei hi.
Thukhupsitna:-
Tuaziehin, Khrist a hinna nei iki chi a ahileh, solna te zou ngei ding in kising sa in ihinkhua khu Pasian dei thei bang a jang lei ut huai kasa hi. Mihing ihia, solna pen niteng leh hunteng a tua ding mawng ihi. Hinanleh, satan sol na a pua mei lou in khelna a pua lou ding in kihan chiam vai…unau, tunin na tahsa khu Pasian Biahinn ahi chi thei jing in len, thanghuaina, thangtatna, adia in tahsa lunggul suh piching na lam ah itahsa Pasian Biahinn khu asuh bua tu hi lou in ama lim leh mel sun a hing siampa thupi na ding leh minthan na ding in zang ta lei ka chi hi.
BIBLIOGRAPHY:-
1.Poone Zac, Sex, Love and Marriage The Christian Approach, printed and published by M. E. Eapen, GLS press, Pant Nagar, Bombay. 1972.
2. Getz. A. Gene, The Measure of a Man, published by OM Headlines, Secunderabad, 20