June 15, 2012, Chicago.
May 9, 2012 in USA President Barack Obama in pasal leh pasal, numei leh numei nupa dia kitengte pom ahih thu puang hi. President Obama thupuan kipahpih Kristian gingtu leh saptuam tamtak om a, a mohpaih leh dal leng tamtak mah om hi. Kum li paisa, August 16, 2008, in President Obama in, "Kitenna pen numei leh pasal kigawmna ahi a, Kristian ka hihna ah, kigawmna siangthou hi in leng ka pom hi. Huan huai kigawmna ah Pathian a kihel hi," ana chi ngeita hi. USA a saptuam leh gingtute kikhen sak tu lianpen tuh numei le numei, pasal le pasal kingaihna thu (homosexuality) ah ahi chih theih hi. "Maizen!" chi tampi I om ka gingta. Ahi a, tuni a ka hon kup ut pen numei-numei leh pasal-pasal kikal thu toh kisai hizawlou in, Kristian chiatchiat, Bible kibang chiatchiat pomtheih leh pomtheihlouh kibang hetlou chinih—Conservative leh Liberal—ka tuahkhakte' kibatna leh kibatlouhna ahi hi. Gamdang ah le omtham mahleh, kei mimal mahmah in ka muh leh tuah khak na tan US context ah ka hon gen ding. I theihna kibehlapna leh I ziltheih banghiam om lametna toh hon kum ut ka hi zaw hi. A kibat leh kibatlouhna uh khenkhat en in, a kibatlouhna jiak uh bang hi hiam chih I en ding. Atawppen in I kibatpih hetlou Kristian gingtute apat I zil theih bang a om hiam chih en ni hang. Amasa in akibatna lam en masa ni.
Conservative Kristian hi in Liberal Kristian te hitaleh Pathian leh Jesu Kris ginna (faith) leh gingtu pawlpi (faith community) hihna pomkip tuak mahmah (kichi) uhi. Pathian' sapna dawng a Tanchinhoih nnasepna, Kris in ana patsa nna semzom in kikoih tuaktuak uhi. Huai ban in, Bible gingta a thil tuamtuam a gindan, pomdan, leh thupuknate leng Bible mah a kibulphuh kichi uhi. Kristian hihna dia kibulphuhna poimohte—Pathian leh Jesus a ginna, Pathian' sapna dawnna leh Bible a kibulphuh dan in kigen tuak mahle uh, vai tuamtuam ah kituam mahmah mawk uhi—Conservative te'n pomtheihlouh thil tuamtuam hau in kikhak (closed) deuh uh a, Liberal te'n bel thil tampi pom in kihong (open) leh zaleen mahmah uhi.
A kituamna uh khenkhatte ahihleh:
1. Numei ministry a kizatna: Ataangpi in Conservative saptuamte'n numei ordain phallou a, Liberal saptuamte'n bel numei ordainna pom uhi. Ahi a, thudang a Conservative mahmah himahleh numei ordainna pom saptuam leng om veve hi. Gentehna di'n American Baptist saptuam bang thu dang ah a Conservative mahmah na om mahleh numei in ordain dia Pathian sapna tang a omleh ordainna pia hi.
2. Toupa nitak annkuang: Conservative te lak ah Toupa' nitak annkuang saptuam upate kia in hawm thei a, piangthak leh baptisma tangsate kia in ne thei hi. Liberal te lak ah bel upate kia hi seselou khatpeuh in hawmthei a, Toupa'n ama' ankuang miteng adia alui ahi chi in a nek leng kikhawm kuapeuh in nethei hi. Hiai toh kisai inleng, Conservative lak ah ana zalen mahmah om veve hi. Gentehna ding in, Evangelical (conservative) biakinn khenkhat ah pastor hiam upa ordain hi seselou tuailai usherte hiam ahihkeileh kua khatpeuh in sai a hawm chih bang om hi.
3. Ministry (Pathian nnasepna): Conservative te'n khalam pianthakna, missionary nnasepna, biakinn sung leh biakinn tungtawna ministry piibawl uhi. Khotaang a thiltungte ngaihsaklou chihna hikei mahleh mimal khalam dinmun piibawl zaw uhi. Liberal te'n mihing hinna/hinkhua dinmun awlmoh zaw ua, saptuam nnasepna le hih mahle uh, biakinn pualam a khotang (society) a ministry hah bawl uhi. Gentehna ding in: khotaang a ki deidanna omlouhna ding (social justice) bang hah ngaihsak uhi. Nam (nationality) hiam, vun rong (ngou, vom, jawngrong) hiam jiak khawnga kideidanna (racism), numei hihna jiak a ki etniamna (gender inequality/discrimination), numei le numei, pasal le pasal kingaihna (sexual orientation) jiaka kideidanna leh kinelhsiahna (discrimination) leh hiai thilte jiaka hamphatna (rights, privilege) kidalsak chihte laka nnasepna hah bawl uhi.
4. Bible pomdan: Conservative te'n Bible pen thil bangkim—khalam, salam leh khotaang vai ah leng thupuukna leh thutawp genna dinga kingakna ding ahi chi in Bible pen thuneihna lianpen (absolute authority) pia uhi. Liberal te'n bel Bible pen Pathian thu ahihna pom mah le uh akigelh lai hun toh tua ei khang a thil paidan kituam mahmahta ahijiakin tangtaka khotang hinkhua a thupukna leh thutawp bawlna ding in Bible kia hilou in I tawndan (culture) bang, mihing leh khotang paizia suinate (sociology leh anthropology) toh zat tuah ngai chi uhi.
5. Numei-numei/Pasal-pasal kingaihna: Liberal te'n numei-numei, pasal-pasal kingaihna (gay/lesbian, homosexual) pen amau utthu hilou in Pathian in huaibanga a siam ahi chi a pom in pastor di'n leng ordain thei uhi. Conservative te'n bel hiaite khelhna ahi a, Kristianna toh kituaklou kia hilou in thilsiam leh mihing paizia toh leng kituaklou (unnatural) ahi chi uhi.
6. Sahkhua dangte toh kal: Liberal te'n bel mite a tuamna bangbang a pomding ahi chih piibawl mahmah in sahkhua dangte leng amau hihna bangbang theisiam a pom ding thupi ngaih uhi. Conservative te'n bel sahkhua dangte Jesu Kris ah hotdamna pom in Kristian hongsuak thei le uh chih thupi ngaih uhi.
A gaal a za te a ding in, "Maizen! Liberal kristian te lauhuai, numei pasal chih le khenthei nawnlou uh" ahihkeileh "Zezen! Conservative te Pathian' hihna di tuh, numei Pathian' sapna a tang om bang hileh le ordainna va daal zezen" leng chih theih hi. Ahi a, ke'n kana tuah khakna dan in, khat lam zawkzawk te leng mawk huphulh huai hipah zaw lou in mahni hihtheihna tawka Pathian nna sem ut leh sem ekek te bang ahi uhi. Huchi hileh bangjiaka kibang hetlou hiding?
Conservative leh Liberal te kibatlouhna bulpi pen a thil etdan uh hidi'n gintakhuai hi:
1. Liberal te'n mihing dinmun, mihing haksatna hah et in pi bawl (focus) zaw uh a, Pathian in miteng hon it dan kibang vek, huan kikim vek a hon mu chih leng a thupi uh ahi. "Kibatlouhna chi tuamtuam—nam, vun ngou, vun vom, numei, pasal, homosexual chihte mahni utthu hilou in Pathian in ahon siam dan hi a, ei mihing in khentuam hiam enniam hiam kei ni. Mi mikhial a puangthei leh vaihawmkhum thei Pathian kia ahi, Amah khut a koih zaw ni," chi uhi.
2. Conservative te'n bel Pathian' etdan ding pen hah et in pi bawl (focus) zaw uh a, Pathian in mihing te hon et dan ding ngai khawk uhi. Huaijiakin, "Khelhna ngai zam mawk kei ni. Khelhna pen hua in douni, a khialtu bel it ni, kisika hong kikhek theihna dingin pan la ni" chi uhi. "Pathian itna a dim hileh leng siangthou leh vaihawm ding leng ahihmanin mihingin I ut bangbangin hinkhua zang mawk kei ni," chi uhi.
Eilam saptuamte ataangpi in Conservative hi in kamu hi. Hileh I kibatpih hetlouh te pen mawk tuambawl, mohsak bawl hiam gaal bawl sangin amau apan I zil theih bang omhiam chih kana et-et na ah hoih kasak khat ka hon kum ut hi.
Eite adia sindia hoih kasak: Liberal Kristian te apat eilam saptuamte'n zil theih dia kana muh khat tuh khotaang a akihelna uh ahi. Ataangpi in kholaka inn neilou a omte bang vakna ding vaisai (feeding program for the homeless) hahbawl un ka mu a, huan numei sualluihna (rape) hiam khelbawlna (violated/abused) ana tuakte bangle awlmoh mahmah uh bang a, thil tuamtuam jiaka nelhsiaha oma solkar apan panpihna (privileges) ngah di lai ngahloute ading in kirualna (justice) ding bang ngaipoimoh in hah tangkoupih uhi. Ataangpi in social work hah bawl uh chih theih hi. Khalam pianthakna leh khalam khanna pen I Kristian hihna bulpi hi a, poimoh mahmah hi. Himahleh, khalam hotdamna tan chuah a a tawp leh bukimlou ahidiam honchi sak hi. Tanchinhoih in I salam leh khotang hinkhua leng a sukkhak ding hi in ka mu hi. Laisiangthou I et leh Jesu khovel a hongpai lai in synagogue (Judate biakinn chimai ni) te ah thu bang gen in omjel a, himahleh a hun tamtak kholak, khopi leh khota, kongzing te a ana zang hi. Huailai hun a sahkhua heutute omdia kilawmlou ana sak na mun tata bang ah om mun a, sianglou a koih a omte lak bang ah ministry nna sem hi—numei (sipawt) sianglou te lak bang (Luka 8:43-56), natna sianglou (phaak) te lak bang (Luka 5:12-13), dawi paai te lak bang (Mathai 17:14-18; Luka 4:33-36), misi te lak bang (Johan 11:43-44). Jesu pen saptuam leh khotang in a nelhsiah a om siahkhonte lawm bang hi a, thil tuamtuam jiaka mite deidana omte lak ah nnasem hi. Huan, Pharisai te bangle tai ngam a, mihausa te bangle tai ngam hi.
A biiktakin tulai I gam a thiltungte ka ngaihtuahtuah chiah ka lungsim ahon khoih mahmah a, setan saptuam leh setan biakna thute eite lak ah hong tungta, numei naupang sualluihna thu bang hong tam mahmah, baihlam taka mulkimhuai taka kithahna bang tam ta, Tanchinhoih in huaite leng lawng (deal) kha ngei ding hi. Hiai thilte nam sung a pawlpi taumtuam, skul naupang pawpi leh nam sepaihte bangin ngaihven in doudal uh chihthu kiza jel a, ahi ding mah ahi. Hiaite ban ah saptuam in leng ngaihven (address/response) poimoh hilou hiam honchi sak hi. Pathian nnasepna leh mission nasepnate biakinn sung leh gaal gamla a khamangthang te lak ahih ban ah I khotang—I gam sung mahmah bang leng ahih kuul in ka mu hi. I sermonte—I pulpitte, I project te biakinn buuk (building) pualam ah keekkhiat a om ding hon lunggulh sak hi. Khotaang a buaina (issue) tuamtuam omte bang leng khotanang pawlpi te kia ngaihven di mailou a Kristian huaitak leh Tanchinhoih sepsuahna in saptuam bang inle ngaihven hoihlou ding hiam hon chisak hi. Jesu in ana patsa nnasepna biakbuk sung leh pualam ah, khalam leh salam ah sepsuah pen I mohpuakna tuaktuak hi in theih in om hi.
.