Numei Manpha
By Mawi Tombing

Numei hoih leh manphate hinkhua ettawn a amau apan pilna sin ding tampi om hi. Innsung kepna ah kizen leh vaiveng tak in innsung kemzou uhi. Numei pilte'n nu leh pa kizenlou, pasal kizenloute liahkhuh in cheimawi zou uhi . Pasal zahlak a amualphou theihna ding munte ah zi pilte'n a pasalte uh nungthuap in, ama uah ki khung zou in pasal pil leh felloute bang leng apil suah thei mawk uhi.

Innsung ah numei hoih leh pil poimawh petmah a, atangpi'n pasalte sang' numei innsung ah ki om tamzaw hi. Innsung in numei hoih poimawh pentmah in, numei omlouhna innsung pen bukimlou in ahom toh kibang hi. Innsung fellou in nawngkaina nasatak insung in tuak hi.

Innsung nu hoih in sep leh bawl taima tak in sem a, innsung vante akepna ding muntek ah kem in, feltak leh kizen takin a mohpuakna zou thei hi. Tekpi tekpu, nu leh pa a kepna ah amohpuakna zou in kep a omte zahlak saklou in lungkim tak in koih thei hi. Tua bang nu' in apasal lungmuanna, kipahna nasatak in pia hi. Numei hoih leh hoih lou kal kigamla mahmah zel hi.

Innsung ah numei hoih lou te'n tuh insung nawngkai sak in, thoveng lou suak sak a, innsung in buaina nasatak tuak hi. Nu leh pate mualphou sak, pasalte mualphou sak suak hi. Huchi bang innsung tuh polam mite'n hon thei baih mahmah uhi. Numei in a mohpuakna a zoh louh kilang baih mahmah hi.

Innsung nu hoih leh pil in akep insung tuh insung nuam leh tawldamna insung suak hi. Innsung nek leh tak numei sai ngen ahihna ah, hisap siam ngai lua ahih ziakin numei hihna sulangtu poimawh khat suak hi. Pasal te'n tukha meh man dia hiaizah honpia ahihleh bangchi'n ka zek daih dia? bang chi bang in huan leng ka pasal, ka nu leh pa'n aduh dia chih bang ngaihtuah ngai hi. Gentehna in, sa sel khat i lei innkuan in i kham a, khatvei nek in a bei hi. Hisap siamte'n khatvei nek a beilou din bawl theih a, sa sel khat i lei pen hou in, meh huanna lakah tamlou in kha nam bang hi le'ng meh nih leh thum bang suah theih hi. I meh huante, sum leh pai i zeknate ah hisap siam, i sum neih dan dungzui a akidaih ding dan gelsiam ngai petmah hi. Innsung nu pilin a kidaih lou ding leng ki daih sak theih luat ahi. Tuate ziakin innsung ah nu hoih leh fel poimawh lua in, tuabang nute manpha diakse uhi.

Numei hoihlou te'n pasal in loh nei hiven chi'n bang mah hisapna omlou in tomkhah sung in a om zahzah tui zat a zang in, ip tawvang a thun mah bang thei hi. A denna leng kitheilou in kha beima in zang khin maimah uhi. A om teng zang ziahziah in abei chia' pasalte bang ngoh utlai chih omthei hi. Amah zek siamlouh jiak hinapi'n pasal te ngoh in, sum leitoi ding bang a sawlngam lai..... huchi bang igam ah numei hoih lou tam mahmah hi. Poilua, innsung ah numei hoih leh manpha poimawh hina mai e.....

I kep nu leh pate, pasalte kep louhdawn louh a om a aminsetu ding akemtute ihi. Milak ah i pasalte mualphou huaitak in silh leh ten keplouh, zunlouh luat in lawm leh vual lakah om le uh a mualphou ding a kemtu azi mah hi ding ahi. Pathian in Adam nakguh a kipan numei hon lak khiat ahih mah bang in pasalte kemtu, panpihtu ding leh liahkhuhtu dia numei hon bawlte ihi. Toupan hon bawl apan ihihna leh mohpuakna omsa bang in, innsung ah kizentak in pasalte panpih in hinkhua zang ni. Numei hoih, nu hoih manpha lua hi... huai din kisathak ni.

Pasalte sang in innsung kepna ah i poimawh zaw a, tate kepna ah le' pasal sang in nute toh hun kizang tamzaw in, kithuahna hun tamzaw hi. Nute mah tate toh kithuah tamzaw i hih ziakin i tateten leng nute chituh hon zuizaw uhi. Ta hoihlou tampite nute ziak a tamzaw hi ding in gintak huai hi. Aziak tuh nute toh kithuah tam zaw i hih ziakin i chituh dandan hon khankhiak pih uh ahimai hi. I tate laka chihoih tuh poimawh lua mo.... innsung leh tate i kepna ah nu hoih leh nu hoihlou kilang baih mahmah hi. Nu hoih leh manpha hih sawm chiat ni.

I innsung, gam leh nam hoih leh chidam i neih theihna ding un nute'n ihihna leh mohpuakna zang siam ni. I innsung ah, nu leh pa tung ah, i pasal tung ah, i tate tung ah mohpuakna lianpi neite ihi. Nang leh kei ziak innsung chimse gawp thei in, a tung ding leh khuikhawmtu leng ihithei a, tuabang mah in gam leh nam phildalhtu leh kituahna,lemna tung ding tu leng hithei ihi. Nute'n koipen ah deihtelna i bawl dia?? Pathian in numei a hon bawlna san thei kaw in, hinkhua zang ni.... panpihtu muanhuai hih i sawm ding uh. Ei ziaka innsung min hoih a, min sesak thei ihi chih phokkawm in i hihna tawisang ding leh i mohpuaknate zou thei ding in kisa thak ni. Nu leh pa kipahna pasalte lungmuanna, tate lamdik a pitu hithei ding leh nu hoih, numei manpha hih sawm chiat ni.

Simtute Toupa'n hon bawlna san theisiam a zuithei chiat ding leh i mohpuakna zou thei din Toupa'n hon vualjawl chiat hen aw.