TUPNA A OM LEH LAMPI A OM - I
By Mawi Tombing
Mihing khat a piang ihih ngal leh tupna neih poimawh hi. Tup leh ngim mumal neilou a hinkhua zat tuh ganhing toh kibang ihi. Thil tupguhna tellou in bangmah lohchin chih om theilou hi. Tupna neite mah a lohchingte ahi ua, thil khat peuh ah tupna kichian neih poimawh in mihingte hinkhua adi'n a loutheilou ahi hi.
Charles Robert Darwin in Evolutionary Theory ah "Survival of the fittest" chih ana gelh hi. Tulai khovel a mihingte a ding bik a bang hi. Siamna pilna lah sang deuhdeuh, kidemtu ding lah tam hulhul. Tua ziakin, lohchinna taktak ding in tuh a chinpen, a siampen hih ngaita hi. Tua ding in nasepna, nektak zonna, siamsinna leh thil khat peuh a mi lawhching i hih theihna di'n tupna kichian nei a, i hihtheihna pel a kisuk a lungsim taktak toh kalsuan kisam hi.
Thil itup leh alampi ding hong ommai in, tupna kichian poimawh masa hi. Jacob 1:8 ah, Lungsim det neilou tuh a thilhih tengteng ah a kip kei hi a chih bang in, salam leh khalam ah lungsim det, tupna kichian a om nak leh a lampi omtuak hi. Khalam ah, Toupa'n i lampi ding ana sialkhin in, a naseh kholhsa om hi. Huai lampi tawn dia bawlte ihi. Salam ah leng pi leh pu, nu leh pate'n i lampi tot ding ngaihtuahna ziak hon thuhilh in, i ma hon napi uhi. Tuate zuih ding eite mohpuak ahi a, i zuih theihna di'n tupna poimawh in a lampi tot ngai hi. Tupna om leh alampi ding hong om mai ahihna ah, itup leh tuplouh ei thutanna ah kinga hi. Tupna neilouh tuh mihing hinna a dia bukimna neilou toh ki bang hi.
Thal/thau kap kidemna a tupbik a neih bang un, na hinkhua ah tup kichian naneih teitei poimawh hi. Tup bik na neih kei leh bang chiang mah natung kei ding a, kipahna leng na nei sam kei ding hi. Na tupna in kisukna, thalakna hon pe ding a, tua na tupna/ngimna en gige kawm in a sepkhiak ding dan leng ngaihtuah in. Thupil in Lawhchin kilamenlou mi tuh a lohsamsa ahi chi a, Pau.23:7 ah Mi'n a lungsim a angaihtuahna bangbang tuh ahihna ahi chi hi. Huai ziakin, zou ding, lawhching ding chih kimuanngamna toh i tupna ah lungsim bawlfel kisam hi.
Jim Rohn in Na tup leh na lawhchinna ding kikal a lei (bridge) poimawh pen tuh KITHUNUNNA ahi achih bang in, hun zat dik, kimuan ngamna, omdan ngamtat a mahni kithununna chihte tuh a poimawh leh aloutheiloute ahi hi. Jim Rohn mah in Mi kuapeuh in natna nih om lakah khat i tel teitei ding uh a om - Kithunun ziaka natna leh Kisik ziaka natna a chih bang in, kithunun kawma tupna a vualzawhna i tel chiat ding uh ahi. Mihing a dia hih theih vuallouh leng Pathian toh i pankhawm leh bangkim hih theih ahi; Jesu'n achih bang in itup leh kalsuanna bangkim a i lawhchinna ding in Pathian amasapen a koih ding ahi.
Toupa'n i tupna ah lohchinna hon pe ding ahi, ei hihtheihna chiang ah pang phot peuhmah le'ng. Toupan i tup leh kuhkal dan zil in lawhchinna hon peding ahi. Aman i zohlouh ding tupna hon pelou ding ahi chih muanngamna toh kuhkal tak in pang leng atawp ah mi lohching ihi ngei ding hi. Toupa hatna toh zohlah omlou hi.