Hiai thu gelh dia ka kisaklai in ka khitui nanzoh vuallouh in hong pawt hi.  I tenna khovel tulgawpta siatna tuipi in hon tuammangta, i gam simthu puaknat huai ka sa lua hi. Poilua poilaw petmah agen didan om tuanlou himai..... 

 

I sisante khelhna nasem dia kiman in, i khete sisan suah dia kalsuan in, i mite khemna thang a piluta om, i ngaihtuahna  lungtangte hihmang leh khimmang a om, bang doh-ai a bumhaia om ihi hiam ?? Setan deihna bang sem dia kipia a kimanna lungtang nei i gam ah dimta.... a nalua hi, siamtu Pathian lungtang bangzahta in ana dia unau.... Pathian lam ah kikthakni. 

 

 Innkuan sung ah ki itna leh hehpihna om nawnlou. I saptuam ah, soceity ah, ki-itna kithutuahna om nawnlou. I pianpih i mi, i sa ah hehpihna om nawnlou. Lemna thu kituahna ding thu gen himhim om nawnlou. Thu hoih, la hoih gen leng le' aselam ngen a ki laksakta.  I lak uah ki itnate kithutuahnate ki hehpihna te'n munnei nawnlou. Innkuan sung mi hinpihte laka Pathian i tatsak nawnlouh ziak in, ki itna ki hehpihna in vaihawm nawnlou. A hichitel a i gam siatna in hon tuam ahi. Pathian sang a Setan mun neisak a, thu i neihsak zawk ziak ahi.... poilua.  I lungsim kongkhakte hong thak in, Toupa lut sak thak ni. Innkuan sung, igam sung damna ding in. Na mite ka khial zouta uh Toupa aw hon ngaidam in .

.

Aw i gam simthu a nna lua, ganhing bang mai a sakap a kikap a kithah bang lungsimpu ihi hiam.., mi thah ngamna nei dia sisan hon suhang a hon sawltu kua ahia? ganhing hilou i hi uh. Pathian hinna koppih a siamte ihi. Nang leh kei hinna kibang a siamte ihi. Hon bawltupa'n hinna manphatak a hon bawlte ihi. Pathian in a thilsiam tengteng lak a hoih asak pente ihi uh. A thilsiamte en vengveng a alungkimna leh akipahna ei mihingte ihi. Pathian lungkimna, manpha tak ahon bawlte i hinna uh manpha lua in ithuai lua hi.  Kimawlna leh tatsiatna a kizatna dia pammaih lua ahi. Hinna manphat dan, it huai dante hon theisiam sak thak in aw...Toupa. Na mai a kuuntakloute himah le' ung kon ngen lai hi. 

 

Toupa aw.... ka tenna Khovel uh lungkhamna leh natna'n a dimzouta, atung ah lungmuanna om talou, siatna tuipi a kihawt tak ziak in...... Toupa aw ka mit ua ka muh uh, ka bil ua ka zakte un ani nai tak dan hon theisak. Hun nanungte a thiltung ding nagente hong tung lellel hilou hiam? huai dinmun ah ka dingta uh.  Na hun tawpdi ahong naita, niteng hun teng a thiltung te'n lah kipahna thu zak ding himhim om nawnlou. Na hun anaitak dan, ihmu khanloh hun ahihtak dan, lungmuang taka om hun ahihlouh dan' Toupa aw hon theisak thak in... Na aw nem hon zasak thak in, nang lam a ka hong kihei theihna ding un.  Ka lungtang uah na kha in nna hong semthak in, nang leh nang hong kipahtawi thak in chi'n ko'n ngen ngutngut hi....Toupa aw !! 

 

I tenna khovel teek gawpta chimse dia kisata Zion ta-ten innsang i lam uh hunta hi. I khalam tuihing lui i kuang khiaksak uh hunta hi. Setan tung a vualzou a Pathian tate i kilam khiat hunta hiveh aw..... Vanmei kuang thupi ka tung uah vabang hong tuang in, a tungsa Pentecost ni bang, athak in hong semnawn in. Pathian tate'n i vak uh mite muh dia i vakkhiak sak uh hunta hi. Setan thuneihna  a lian lawta.  Hai sualna septe hawlmang di'n Pathian tate kisa thak ni. Toupa' hatna toh pang in sual gal dou ding in kipanthakni hang..... Unau.

 

I kam chauh hilou a taktak a Pathian gum gam a dingkip ding leh Pathian min a thuak ngap ding poimawh hi. Pathian thu kilawm sakna mai a nei a, kicheina azang a polam kilawmna kia zong mailou in, koimun peuh ah i om zawng in thutak gum apang ding heutu, makai i hihna bang bang toh Toupa nang hon gum ngam di, na lam apang ding mi ka poimawh lua uh. Tua bang ding  mi honpia in... ka lailung sung uah nang mah hong teng in. Ka innsung uah, ka gamsung uah nang mah a lianpen leh lalpen in hong pangta in..... Toupa aw nang mah ka hon ngai un, kon poimawh lua uhi.  Mi chih lungtang ah na thu hong genthak in.....Toupa aw, kon ngai uh hi .

 

Simtute' ginglou mite'n i vak a muhtheih ding un vaksak chiat ni. ALPHA leh OMEGA - Pathian abul alaizang leh atawp tan pha a nungzuitu muan huai hithei ding in Toupa'n hon vualzawl chiat hen.