PATHIAN' NGAIHDAMNA THUPI
(A thil hihthei ngaihdamna)

~T. Mangmuansang, M.Th. in Missiology

Jack in Pathian kianga summer suti hunkhat kizatna ding ngen hi. Organisation tuamtuam contact mahleh kong kihong mulou hi. A tawp in sepna amuh penpen a sem di’n thupuk hi. Public transport (transportation) bus khat hek hi. A bus a street gangte niteng in sum pelou in vatuang ua. Sum anget chiang in, gang te'n leh vau zomah lai uh. Nikhat tuh gari apan kaikhia ua, naktak in vua uh. Jack tuh hospital puaktung in om hi. Pathian kiang a khasia leh vuitak in, ministry kizatna ding kon ngen a , hiai nna nonpia a, vuak non thuaksak zomah chin thum hi. Anung in gang member-te mat in om ua, siamlouh tan khum (sak) in om ua, suangkulh a khum in om uh. Jack in huai thu a zaktak in, hehpihna leh itna neithak hi. Huai gang member-te ngaidam a, amau adi’n ngaihdam ngetsak. Himahleh a ngaihdam ngetsak pomsak in omlou hi. Jail a gang member-te vaveh zel a, mi tampi’n, a tungtawn in Jesu muhloh uh kichi tangthu om hi. Nang Pathian’ ngaihdamna na tangta hia? Natang na di’n hondampa Jesu na sung a piangsak in.

1. BIBLE A KISIKTE NGAIDAM;
Pathian in mihingte zalentaka deihtelna bawl theihna honpia hi. Adam leh Evi in a deihtelna uh zangkhial in, Pathian’ phallouh singgah ne in khial uh. Himahleh Adam in Pathian’ ngaihdamna ngetsang in, ompih dia nonpiak numei in, honpia a ne kahi chi hi. (Gen.3:1-ff). Kaina in anau that a, khelhna im sawm in, Ka nau donpa kahi ahia chi hi (Gen. 4:9). Noah hunlai in mihingte’ khelhna thupi man in, tuichim in gawt in om uh (Gen. 6- 9:17). Sodom leh Gomora hun in, Mihingte meikuang a hihlup in om uh. Isaraelte’ kumpi khatna Saul in kiliansak a, Pathian’ thu ngaineu, a zuihlouh takin, Pathian in a lalgam David kiang a pia hi. Solomon in zi tampi nei ahihman in, atek nung in, a zite’n idol mai a kun di’n zolzou uh. Jawlneite hunlai a khelhna ahih sekte utuh milim biakna, angkawmna, mi gentheite tuam bawlna etc.

Jakob in a behuan in upazaw hihna lei a (Gen. 25:29-34), kelnou sa, sakhi sa bang a tawi in, a u Esau vualzawlna’ tanding suhsak lai hi (Gen. 27:5-32). Himahleh Israel nam 12te suangtu in pang hi. David in Bethseba tawh lumkhawm in, a pasal Uria that (thah) sak hi. Ani nanung lam a misim in, Pathian in Israelte gawt mahleh, Pathian in ka lungtang bang pu chi hi. Hosea' zi Gomer in ang va kawm zel, a kik ching in a pasal in pomzel hi. Jesu’ pianna khanggui a numei 4 Tamar, Rahab, Ruthi leh Betsebate’ hinkhua isut leh mikhial ahih ban uah, simmawh huai petmah uh. Himahleh Pathian in a hun paisa ua khelhnate enlou in, Jesu khanggui a numei poimawhtak suak uh. Tanchinhoih bu a, Tapa taimang pa kisik a, apa kiang a kik tak in (chiang in) ana ngaidam hi. Peter in kon kitheih mawh bawl keiding chi mahleh, Jesu mat a omlai in, thumvei kitheih mawh bawl hi. Akhelhna ngaihdam in om hi. Sawltak 12te min list a masapen gige a, nungzuite heutu leng ahi.

2. PATHIAN IN HON NGAIDAM:
Pathian in a tapa tuh mikhialte tan di’n honsawl hi. Himahleh, Pianthakna kichian neilou a, Bible sinpan kahihman in, drugs ka ngawl zoutuan kei hi. Nikhat tuh ka lawmte nih tawh, RP tang zuak numei khat man di’n ka kisa ua. Ka lawmpa khat alei din valut, a zuak nun a koih nawnma (a zuak valte a koih kiknawn ma) in, alei dia lutpen hong potphet in, adang nihte kava lut uh. seppaih/underground bang a kigen (kibawl) in, Na hon pekhe diam? Office a tonpih utzaw maw? Kachi uh. A lauh mahmah ziak in RP tang tampi hon pekhia hi. Kou leng kintak a paikhia in, Bible college a ka ne uh. Ka khonung ngaihtuah leh, mikhial petmah kahihlam kaki phok hi. Himahleh, Pathian in a tapa tungtawn in khros a hon ngaidam hi.

Benny Hinn thugenna’ programe thupitak khat a ka telkha hi. Pathian in a tungtawn in naktak in nasem hi. Mitampi ten a thugen leh miracle sepkhiatte phat tuampih in kipak petmah uh. Ahihhang in tuni chiang in, Mi tampite’n gindan kibanglou chi’n ngaina hetlou uh. Aman hun a zatna a, Jesu khrist mikhialte tandia hongpiang, Khros a Pathian’ ngaihdamna thu a gente mah, manpha kasa pen lai... Pastor khat in teenage numei khat counseling a bawlna thu gelhna a, Numeinu Christian ahi a, sexual sin aneihte’ ziak in ngaihdam tampi vei (tamveipi) ngen hi. Pathian in mihingte khelhna Jesu tungtawn a, ngaidam khin chih Bible apan thei hi. Himahleh, a khelhna ngaihdam zou di’n koih theilou hi. Pathian in mikhialte tan din, atapa honsawl a, mihing khelhna tengteng ngaidam zou chih mangngilh ken.

3. NANG LENG NGAIDAM IN:
Benjamin South Africa a teng black Pastor in, kuamah hua in imudah keiding uh, Jesu’n mi tengteng it chin thu genzel hi. Nikhat a car kham khawlsak in om a, migilou ten kaikhia ua, volum uh. A Bible a, a sisan nuh/bangsak/tat uh. A tapa 12 years velding mi suakta hi. Anung kum bangzah hiam nung in, kikhopna thupitak a, Benjamin’ zi leh tapa in, haksatna a tuahte uh gen ua, Pathian in simseng louh lungmuanna leh khamuanna apiak thu leng gen uh. A thugen uh ngaite naktak in khoih kha hi. Huchihlai in, alak uatel mikhat in, na pasal thatte laka khat kahi chin kipuang hi. Benjamin’ zi’n Jesus min in kon ngaidamta chi hi.

Pasal upa tak siding kuan kiang a Pastor khat chial in om hi. Huai pasalpa tuh, a tangval lai apat mi toh kihou utlou, khopi khong a hoh chiang ale lamsik a pai a, kuamah hou khollou. Huaiziak in, kuaman a neellouh uh, Naupang natan inleng a mai ngaplouh ahi. Mikhenkhat te’n khelhna imguk nei di’n gingta ua. Midang khenkhat te’n ahihleh, tualthahna thubuai neiding in gingta uh. Himahleh, huchi dan ahi kei hi. A tangval lai in a lawm in, khelhna/thilhoihlou thupitak atung a hih a, kasih matan ka mangngilh/ngaidam keiding chi hi. Huaiziak in, niteng in huai thu ngaihtuah a, a lawmpa hamsiatzel hi. A tawp in aman Pastorpa kiang ah, mi ka huat, muhdahna in amau suna ding kasak leh, kei hon suna zaw hi. Ka huatna leh khelhna ka ngaihdam zohlouhna in , kei meidil a hon pilut ding hita chi hi. Hiai thu pen tangthu dan a kigen ahi. Ahihleh nang midang khelhna na ngaidam zou hia? Pathian in a tapa sihna tungtawn a, hon ngaihdam bang in, khat leh khat kingaidam tuah chiat din hondeih hi.