Pathian belin muang zaw in.
Biak S Tawmbing

Hinkhua haksa leh mangbat huai I hongtung chiangin khovel ah I lametna tengteng bei thei hi. Huai dinmun ah I din chiangin haksa ahi. Haksa kama gen khiat kia in leng ahun kei a, mel a leng a kilang thei hi. I maban ding I ngaihtuah a, ngaihtuah tuah lele phatuam lou, sep khiat ngai himahleh I pilna siamna hatna in le hon chilou, mi zaw ki bang zoulou ahi chi a kingaihna alian mahmah, I lungsim kap den Pathian muanding ahi chih chu ki theilua, huai chu mi tengteng in le theih sa ahi.

Bang ding a khawvel a piangkha ka hiam? Bang ding a khawvel a kei om kha ka hiam? Khut leh khe chu kim sepna leh summuh na bangmah ki nei lou inn sunga leng I gen ut teng ki gen khe thei nawnlou, lawm I pol a, I lungsim teng le ki gen khe ngamlou, lawm le ki pol ut lou, mahni le mahni kia a om khawng nuam kisa, mite theih siam seng ding le ki hi nawn lou, I haksa I lunggimna leng kua mah kianga ki gen khe nuam nawnlou, pau bangle ki pau tawm hiai hiai.

Pathian a pianthakna kinei himahleh Pathian in honpi dan ki thei zoulou, bang(wall) phu hileh kilawm a I hindan I pai didan leng ki thei zou nawn lou, lung hin a hing chih dia lah mihing kihi zel sam, mihing chih dia lah innsung a dia bang mah sep khiat leh puak lut bangmah ki neilou.

Ngaihzawng I nei dek a lah, tulai nulehpa nungak te’n sepna neilou te deihlouh uh bang mah di le chilou uh haksa lam ngen a thil I ngaihtuah hilou chih kithei I lungsim a honglut hun om ngaihtuah lou ding chih chiang a le honglut hun om.

Hichi bangbang tua a tung a kon gelh khiatte ngaihtuah a kua mah theilouh a lungsim buaitak a hun zang gige tuailai tamtak om panpih tu ding bei kisa, nu leh pa itna a thu tuam hileh huchilou a hon ittu ding haksa I neih tengteng I tut theih na ding omlou kisa a om tampitak om hi.

Pathian in amawkna a hon piangsak lou ahi chih thei taktak phot in, khawvel a I lametna te a bei dikdek hun a leng I sih zawh nung a nuamtak a lungkham mangbatna om nawnlouh na mun ah om ding pai ding I hi huai in kipaktak leh lungmuangtak in I om zaw ding.

Khawvel ah kipahna di khat lel leng omlou hi. Na hihna bangbang toh Toupa kiangah om gige zaw in. Kuamah in na kipahna ding hon pe kei dinga, Pathian bel in muang zaw in.