SAMARI MIHOIH: NA HOIH SEM
(Luka 10:33-35)
By Mangmuansang Tombing
India khopi minthang mahmahte' lak a khat, mipi tampi omna mun a July 2000 vel in, thiltung mulkimhuai takmai khat om hi. Numei khat Kerosene a buah/theh (douse) a hal in om hi. Numei nu’n panpih ngen in naktak in kikou mahle, kuaman panpih utlou uh. A taksa tung 95% vel kangliam in, a khawnung in hospital a si hi. Panpihtu ding in mikhat lelleng ding khelou a, numei kangnu hundia, mipi thathou saktu dia kipan (dingkhia) kuamah leng om tellou hi. A haltupa leng chiantak in thei uh. Christiante hehpihna leh lainatna haute hihang. Huaiziak in, eimi tamna lak (tamna mun) a thiltung hileh, numeinu huntu leh panpihtu tampi om di’n kagingta hi.
1. PANPIH NGAITE PANPIH:
Mikhat Jerusalem khua apan Jeriko a paisuk leh suamhat tuakkha hi. A puansilh laksuh ua, si dektak a vawliam in paisan uh. Siampu (Sahkhaw heutu) in amah a muhtak in, lampi siik lehlam a pel maimah hi. Levi mikhat inleng amah a muh in, lampi siik lehlam a pel jel hi. Huchihlai in, Samari mi (Juda te’n sianglou a angaih uh) khualzin khat, mizawng, sum haulou leh khualzin lai in, a muhtak in hehpih petmah a, panpih hi ( Lk. 10:30-37).
Mihingte’ khosak dan kibang kimlou a hihman in, sum leh pai zatsenglouh nei, gari anuamtak a kitholh henhen mi tampi omlai in, haksatna thupitak tuak inkuan tampi omsek hi. Singtang gam a ki-vaihawmna tuam i neihna ding ua, pan ilak dante uh thupi lua. Mipite khualna ziak a sawt pipi bandh bawllouh leng thupi (hoih) lua. Himahleh nasem tampi te’n, sepna ding mu lemlou ua, inn bahara piak leh nektaak ding kaihkhawm haksa sa tampi om hi. Huaiziak in, Saptuam te’n thildong kia pibawl lou in, na hoih sepleh genthei panpih hah bawl zawlle uh chih ngaihdan neimi tampi omsek hi.
2.SALTANGTE PIKHIA:
Khovel a saltandan chi tuamtuam om a, mi tampi saltang om. Saltang chih thumal in banglam hon ngaihtuahsak pen in nathei? Zu-hai, a zuduh in zingkal phong pah, a zu dawn huntun chiang a, dawnlou a omtheilou, a ngawlh chiang ua, vision bang a thil tuamtuam muthei ngol veite maw? Drugs sal a thuktak a tang, duhna ziak a utlouh tantan sem khate maw? Normal life nang kia a drugs hihte maw? Dan palsat leh khelhna ziak a suangkulh tangte maw? Ahihkeileh, galte mai a vuallel a salmat a omkha Prisoner of War-te maw? Pathian in mikhialte it petmah a, hondam nuam hi.
Khovel Mihingte’ lak a kua hehpih huai na sapen chih hong kidong leh kuate hehpihhuai i sapen dia? HIV/AIDS hiik pai a lunggim tak a hinkhua zangte maw? Cancer natna nei a doctor te’n tomchik damdia a gente umaw? Sum dawnna lam a lohsapna thupitak tuak a, nek leh tak ding nasan sutuah zoulou phialte maw? Tapa neihsun in a sihsan nu leh pate (inkuante) maw? Insung nu leh pa'n a sihsan, nutsiat tate maw? Ahihkeileh, damlou pen in neihleh lamteng a nek gaih zohnung a a sihsan inkuante maw? Mikhial hihlam kiphoklou, himahleh khalam saltang suakta zouloute, hehpih huaipen uh. Pathian in saltangte suakta sak ut hi.
3.GAM LEH NAM ADIA SEM:
Pathian in gam leh nam it petmah ahi chih Bible a kimuthei hi. Pathian nei taktak te’n gam leh nam it ua, gamsung leh mipi hoihna di’n nasem zel uh. Gam leh nam khualna ziak a pangte ngaihsan huai petmah hi. Gam leh nam itna toh kisai gendi tam mahleh, anuai a Bible thu tamloute pansan in, Pathian' mitel-te'n gam leh nam a itdan uh enni.
a). Mosi in gam leh nam it in gam leh nam a di'n sem hi. Aigupta gam apan a pikhiat phunchiak leh helhat mahmahte’ khelhna Pathian in a ngaihdam keileh, hinna laibu apan a min lakhe di’n Pathian kiang ah ngen hial hi (Exo. 32:32).
b). Rahab in Israel' mi enkhetute selgu hi. Jeriko a teng te’n theile uh enkhetute (spy) kia hilou in Rahab leng that ding uh (Jos. 2:1-24).
c).Debora in gam leh nam it hi. Israelte' tung a kizen tak leh siamtak in vaihawm, mite pi a (in) hondam hi (Vai. 4-5).
d). David in Israelte’ melma lian petmah Goliath vasual, a gam-leh-chipihte hondam hi (I Sam. 17:1-58).
e). Esther in a chipihte hotdamna di’n ka man leh mang kahi mai ding chi in sual a vualzou hi (Esth. 4:16).
Gam leh nam khualna ziak a, hinna phal a nasem leh pangte kipiak zohna thupi petmah a, ngaihsan huai in, zahtak huai petmah uhi.