LIANGVAITE KIANG A TANCHINHOIH
(Luke 4:17-19)

Mangmuansang Tombing, M.Th

Jesu Khris hong sihna, vuina, thohnawnna leh sisan a hon tatna thugen a, namchih apan nungzui bawl ding a thukhah ihihman un, Christiante' na (mission) lian petmah hi. Himahleh, hiai article a thu tuamtuam tampi huam (tun) saklou in, liangvaite kiang a Tanchihhoih gen poimawhna thu kikumle kachi hi. Jesu Khris leitung ah hong pianni champha ngaklah huai sim nawnta. Jesu tuh a khanletna Nazareth khua ah, sabbath ni’n Synagogue a lut hi. Jawlnei Isai in ama thu a genna (Prophecied) namun sim hi (Isai 61:1). Jesu Khris tuh liangvaite kiang a, Tanchinhoih gendia thaunilh ahi. Aman mitdelte musak a, khebai leh damlouhna chi tuamtuam neite hihdam in, misi kaithou hi. Jakai' in a hotdamna tun (tungsak) a, mikhialte lawm chih ding zumlou hi. Samari numei leh Samari miten leng Jesu thaunilh (Messia) gingta uh (Jn.4:1-42). Min nang a Pathian itna amu uhia? Na kiang a om nuam asa uhia? Pathian neite ngaihnat in om a, a kiang a om mi'n nuamsa hi. I gam ua (uah) khelhna thu naktak a tangkou a, khauhtak leh naktak a thugen thei itamta ua kipah huai hi. Himahleh, igam in, itna leh veina taktak tawh khitui naptui luang a thugen theiding mi poimohta hi.

1. LIANGVAITE:
Jesu Khris tuh liangvaite kiang a, Tanchinhoih gending a thaunilh ahi. Ahihleh kuate ahi ua liangvaite? Tagah, meithai, zi leh pasal’ sihsante hia? Sum leh pai kining ching zat ding neilou mizongte (migentheite) hia?Damtheihna hoihtak neilou, mi damthei loute hia? Pianken a mi phalou leh vual banloute hia? Diklou taka ngoh a om, lungkham a omte hia? Nengdet, nuaisiah a om, milak a paukhe zouloute ahizaw ding uam? Ahihkeileh, Khalam saltang suakta zoulou, himahleh suaktak utte a hizaw ding uam? Liangvai chih thumal tawh kisai a, ka gennop pen tuh Pathian neilou, khalam saltang leh Khris ah hausa loute ahi.

Pathian tuh pa neiloute' pa leh meithaite ngaihtuah pa ahi (Sam 68:5b). Nuaisiah a omte a di’n thil kizen takin hihsak a (Sam 103:6), tagahte' a di’n diktak in vaihawm sakding hi (Sam 140:12b). A tapa Jesu Khris tuh lungtang tamkhamte damsak ding, mit tawte mit vakna peding, nuaisiahte khah kheding, salte kiang ah pawtna thu leh Tangtawn Toupa’ deihsakna kumthu, puang ding in Pathian in honsawl hi (Lk. 4:18-19). Khotang a dinmun niamchik nei, taksap tuamtuam nei a, nelsiah a om hi’n na kithei hia? Pathian in vanmun khawng a khalam vualzawlna chikim in eite Khris a hon vualzawl hi chih thei in (Eph. 1:3).

Jesu'n Ama thu in bangmah a hihkei a, Pa septe sem in (Jn. 5:19), Pan a thugen ding pia hi (Jn. 12:49). Nang Pathian a na kinga zou hia? Mihaute sang in mizongte Pathian ah kinga zouzaw hi. Jesun Laodisia saptuamte kiang ah ka hau a, taksap ka neikei na chi a, ahihhang in "mi gethei nuam salou, zawng, mitdel leh vuaktang na hihlam kithei lou a, 'ka hausa, hauhsaknate ka neita, bang mah ka kitasam kei' na chih ziak in..." (Rev. 3: 17-18). Hau leh taksap neilou a khosa na kisa hia? Pathian' mitmuh in zongtak nahi kha ding e. Jesu Khris tuh na hondampa din nasung ah piangsak in.

2.PATHIAN IN GENTHEI LEH LIANGVAITE IT:
Pathian in genthei leh liangvaite khotuah petmah hi. Israel te’n lou a buh a lak chiang ua, lounawl julte tan a lavek lou a, asang leng zonglou a, Grape gah kia leng tomkhawm lou a, genthei leh gamdang mi adia hawisak ding chih ahi (Lev. 19:9,10). A tapa Jesun tuh, mi neupente laka mikhat tung a, na hihlouh utuh, ka tung a hihlou nahi uh chi hi (Matt. 25:45). Huaiziak in, Pathian in gentheite it petmah chih kilang hi.

Pathian lauhna tawm deudeuh ta. Khovel kitaitehna a tualaite pai sang lawta. Laizil, Bible sin leh siamna tuamtuam nei a, mahni professional line lam chiat a hoihtak a pai di'n, a sang theipen tun sawm ding ahi. Drug addicts, sex workers te’n na saptuam ah mun a tangzou uhia? Khalam liangvaite Pathian in it hi. Pathian in khentuam neilou, midik leh diklou tungah ni sasak a, vuah leng a kibang in zusak hi (Matt. 5: 45). Genthei liangvai te’n vaihawmna dik a tang uhia? Kizuak te’n vangam hon kaisan ding uh chih thu mangngilh ken.

Pathian in genthei leh liangvaite it hi. A mitmuh a sabiak siangthou leh gilou panglou tuh, "tagah leh meithaite gimthuak lai a veh leh, khovel buahna banglou a kibawl jel" ahi (Jak. 1:27). Na saptuam ah genthei leh liangvaite a intek thei uhia? Pathian kihong tak in a bethei uhia? Kicheina vante khong a kidemdem laitel ding maw? A neizou leh hitheite kia pibawl lailai ding maw? Pathian ei hon siampa a pipen in koih ta ni.

3. LIANGVAITE KIANG A TANCHINHOIH GEN:
Jesu Khris sihna, vuina, thohnawna leh sisan a hon leina tuh Tanchinhoih ichi uh. Ahihleh a damlai a, a thugente, thu sinsakte, damlou a hih damna thu leh nasepte Tanchinhoih ahi kha diam? Jesu’ thugen, thu sinsak leh nasepte tellou in Pathian’ thu leh a lalgam tanchin itheisiam keiding uh. Leitung ah a lalgam tanchin thu honggen a, huaimun ilut theihna ding un, sihna tungtawn in, lampi hon bawlsak hi.
Jesu Khris hon puak hotdamna thu, za nailou, liangvaite kiang a gen din Pathian in hon deih hi. Tanchinhoih in mi zongte hausa sakthei hi.

Jesu Khris khekhap zui a, liangvaite kiang a Tanchinhoih gen tuh, gingtute mohpuak ahi. Himahleh, genthei liangvaite kiang tung peihlou, na thugen leng tung baan lou ahi maimah hia? Pulpit tan a thugen kia hun sading maw? Pathian’ suahtak sak ngai, hotdam poimawh mi tampi om hi. Khovel khantouh dungzui in, a hoihlam gending tampi om hi. Huchihlai in, Satan nasepna ziak in, khang thakte’ laka siatna lian petmah hi. Zu leh drugs a siatnate zaw neep (hou) lawta. Huaiziak in, biakinn naih zoulou, Khalam liangvai tampi omte pikhia di’n, Pathian in nang hon deih hi.

Martin Luther in, ka heh chiang in thumna neih leh thugen ka siamzaw chi ngei hi. Joel Osteen in, saptuamte kiang a thugen kia ka utkei (hun kasa kei). Message zazaw (lian zaw) nei in ka kithei chi hi. Pope Francis in, khang thakte lametna ingah/mukik sakding ua, tekte (upate) panpih in... Mizongte kiang a zong bang a om. Poseh a omte telsak/lalut in, lemna thu igen ding uh chi hi. Unaute khovel a Tanchinhoih za nailou, liangvai tak a khosa tampi om chih thei ni. Amaute lak a silh leh ten kichian neilou, kikep siangthou ding dan theilou, khelhna saltang, lungsim neuchik (narrow mind) nei a khosa leh mi hausa, khalam saltang leh liangvai tampi om hi. Amaute pikhe di’n Pathian in nang hon zang nuam hi.