PATHIAN' IT NAM
By~ Mangmuansang Tombing
THUMASA
Pathian tuh lohsam leh vuallel ngeilou, vualzou den hi. Israel te'n lam etna lianpi nei in Aigupta pawt san uh. Himahleh a lamet sang un gamdai ah haksatna thuak tamzaw uh. A chang in vualzou kisa in, vualzou hinkhua zang in, kannan lam zuan ua. A chang in vuallel kisa in thazawi takin, gamchiam (promised land) lam zuan uh. Bah leh tawl kisa kawm pipi in Kannan lam zuan ua, Aigupta a a thil nekte uh khelah ua, Aigupta gam a kiknawn bang ut thepthup uh. Drugs hihden leh na suahtak nung a leng na saltanna khuk ah kik ut teitei na hihleh mi vangtah nahi. Pathian in a hoihna Israelte tung ah, ni bang in tang sak a, sun in meipi (cloud) in pi a, zan in meikuang (fire) in pi hi. A dangtak hun un dawn ding tuipia a, van apan Manna in vak hi. Tuaban ah a puan uh silh tullou uhi. Pathian it nam ihi. Zo suante Pathian in hon it petmah. Huaiziak in Kikhen theiding ihi kei uhi.
1. GAMCHIAM LUT UH:
Abraham in apa insung mite leh a chipihte nusia in, Kanan gam ah vateng hi. Jakob leh a inkuante tuh kial (femine) thupitak ziakin, Joseph kianga, Aigupta gam a pemlut uh. Israel mi te'n Aigupta gam pawtsan a, gamchiam (Promised Land) Kanan lam zuan a a pailai un, a gitlouh man un, mitampi hinna Pathian in la hi. Gal tampi dou ua, Kanan enkhe dia kuante lak a, mi 10 lunke zomah lai uh. Kum 40 vel gamdai ah a vakvaih nung un gamchiam Kanan (Promised Land) lutpan uh.
2. VUALZOHNA TANG UH:
Israel te’n Pathian taisan a bawltawm Pathiante bia a, Pathian’ deihlouhlam Na asep chiang un, lohsapna leh vuallehna thupitak tuak sek uh. A melmate un , a inn leh loute uh hihsiatsak ua, suak leh sal di’n pi uh. Himahleh, kisik a Pathian’ mel azon kik chiang un, a khelhna uh ngaihdamsak, a gam uh damsak lai hi. Tua ban ah a saltanna uapan a mitelte zang in Israelte pikhia hi. Vualzohna thupitak tang uh.
3. PATHIAN TUH LOHSAM LEH VUALLEL NGEILOU:
Christian hinkhua a lohsam leh vuallel kisak hun om tham mahle, Pathian tuh lohsam leh vuallel ngeilou. Amite’n vuallelhna leh lohsapna a tuah hun unleng (I Sam 4:1-22), A’mah lohsam ngeilou hi (I Sam. 5:1-12). Huaiziak in, Pathian eilam ah apan leh kuan honzou thei dia? Lauh ding bangmah omkei. Zoh lah ding khatle omlou lai hi. Kigawm a pan khawn hatna ahi. Makaite nung zuih tawpsan keini. Makaite hong mawk lung kiat kei un... Pathian tuh lohsam ngeilou leh vuallel ngeilou hi.
THUKHUPNA
Israelte Pathian in a it petmah bang in, Zo suante Pathian in hon it hi. Amah deihna bang a I hin zohlouh lai unleng hon it veve hi. I theih ding ua hoih tuh, mihing lauh sang in, Pathian lauh manpha zaw hi. Mihing mitmei ven sang in, Pathian' mitmei ven zawk ding ahi. Kei phak leh theihna chiang ah, eilak dan in, sihna in mundang ah huchi tel in vaihawm lou hi. Himahleh, i gam ua niteng phial in misi omden. Misi teng na gal seng kei hi. Misi gal leng na pikhat suak thei hi. Pathian in Adam leh Evi kiang a ana gen (hamsiat) leivui a siam, leivui ah kik ding chih ahi. Pathian heh leh thang paih nang khelhna thupitak hihkha i hita uhia? Sisi mai... I hoih louhna utuh mi pahtawi sang a, dem leh gensiat kisiam zaw. Damlai a kipahtawi sang a sihnung a kipahtawi pen a za dipen in zakha nawnlou ahihman in, manpha lotel nawnlou suak hi. Damlai a ki-it ding sih chiang a kivui ding. Toupa it nam ihi ua, khat leh khat ki it tuah ni.