TOUPA’ KIDOUNA AHI  (I Samuel 17:47)

By Mangmuansang Tombing, M.Th.

THUMASA
Mosi tuh Israelte a saltanna uapan pikhetu din sap in om hi. Pathian’ ompihna toh Aigupta gam apan pikhia hi. Mosi kiang ah Pathian in a chiam bang in, a khepek ua a sikna chiangchiang uh Pathian in Israelte peding. Joshua damsung teng kuaman nang zoulou ding uh. Pathian in Mosi a ompih bang a ompih dia, taisan leh zuausan lou ding chih ahi. Lok Sabha election 2019 zoh hita, vote simna 23rd May 2019 in om a, BJP in full majority ngah hi. Mi tampite patauhna mahmah tuh bang hiam i chihleh, BJP vaihawmna nuai ah, Christiante (abik in mission field leh Christian tawmna munte ah) bitlou zawsem a omding uh chih a muh kholh ziak un patau uhi. Vote sim leh a result puan khiat ni huam kha a, anngawl thumna (fasting prayer) nei a Toupa Pathian kiang ah kana thumna tuh "India (India gam) honpia in," "India Christian gam suak sak in." "India gam vaihawmtu dia telching a om MP te'n sahkhua leh chi leh kuang khen tuam neilou di'n pilna leh vaihawm siamna pia in," chih ahi. Khalam gal phual ah om galdou ihi. Mi tampi te'n India Christian gam a suah ding gingta hetlou ua, thil hitheilou leh piang theilou ding khop in ngai uhi. Himahleh, Joshua kiang ah na khepek ua na sikna gam chiangchiang uh konpe dek chitu Pathian in bang teng hihthei hi. Toupa' kidouna ah Toupa vuallel ngeilou hi.

1. TOUPA' KIDOUNA:
Gideon tuh Israelte tunga, vaihawmtu khat di’n sap in om. Israel te’n a melma uh Midiante amau tha hatna a zou a kisak ding uh Pathian in deihlou hi. Midiante douding a kuan dekte Gideon in khikhia, lau leh lingte kik di’n sawl a, mi 2,2000 vel kik uh (Vai. 7:3). Himahleh mi tam lawlai ahihman un, a tuidawnna mun uapan, tui
khutpek a liahthoh mi 300 vel chihlouh adang teng kiksak hi ( Vai. 7:5-8). Pathian in mi tawmchikte, Midian seppaih hon tampite tung a vualzou sak hi. Kidouna tuh Pathian a ahi. Kidouna phual a teipi, temsau, galvan tuamtuam leh mitam in mihing hinna humbit zou denlou, vualzohna leng piansak denlou
hi. Vualzohna tuh Toupa a ahi.

2.TOUPA' MIN A DOU:
Seppaihte Pathian leh Toupa tuh galdou lunglut, vuallel ngeilou, melmate' tung a vualzou gige Pathian ahi. Philistiate’ mihat Goliath kithopna, phaw, galvan, a din sandan leh hattuak dan mu, Israel kumpipa leh a seppaih te’n lau petmah uh. David tuh Goliath sual ding in, tangtawn Toupa, seppaihte’ Pathian, Goliath in a simmawh pa min in kuan hi ( I Sam. 17:45). David vaisuanglot tang, Goliath taltang a lut a, leilak a puksuk helhul hi ( I Sam. 17:49).

3. PATHIAN OMPIH MITE VUALZOU:
Pathian ompih mite’n vualzohna tangtou den uh ahihdan a nuai ah Point tamlou ensuk ni.

(a). Mosi in khut a lik zawh sungteng, Israel te’n Amelekte zou uh (Exo. 17:8-16).

(b). Pathian ziak in, Israel te’n Jeriko khua baihlam tak in la uh (Jos.6:1-27).

(c). Joshua hun in, Israel te’n melmate tunga, phuba a lakzoh masiah uh ni (sun) leh Kha (moon) khol
hi (Jos. 10:12).

(d). Philistiate tung a Toupan, van gingsak a, buai gawp ua, Israelte mai a zahlak uh ( I Sam. 7:10).

(e). Israel te’n Philistiate’ kho laksuhte lakik uh ( I Sam. 7:14).

(f). David in seppaih tawmchik toh Amelekte zou, azi leh tate honkhia ua, gallak thil leng lalai uh ( I
Sam. 30:1-31).

4. TOUPA PATHIAN BEL, A DEIH DAN A HING IN AMAH TOH SEMKHAWM CHIAT NI:
Thukhunlui Laisiangthou i etleh, Pathian mizat tampi te'n Pathian' na toh gam leh nam humbitna leh kepna na thuah uhi. Pathian neite mah in gam leh nam ana it uh... A nuai a thu tamlou I ending uh.

(a). Pathian nei a kingai himahleh gam leh nam na it theih keileh zaw nang ah kisam omlai chihna ahi.

(b). Khelhna tuh khelhna chih ding ahi. Himahleh, khelhnate ngaidam Pathian I neih man un I hampha uhi.

(c). Christiante aw, a poimohna mun ah dai dide a omtheih pen nam chidamna suakthei ahi.

(d). Khawvel mi ngaih in kingaih niamna leh thunuai lutna pen vuallehna bang mahleh Pathian ngaih in a kingainiam leh thu nuailut zouzou vualzou hi.

(e). Toupa' kidouna ah, Toupa Pathian bel leh neite tuh vuallel bang in om mahle uh, vualzou thouthou ding uhi.

Simmoh leh nuihsan in ki omta. Maban bang hong chi diam chi a etthoh hun hilou. Toupa Pathian mah bel a, a deih dan a hing in Amah toh sem khawm peuhle, a hoih lam a kikhekna leh halh thakna thupitak i gam uah hong tungthei hi.

THUKHUPNA
Pathian in gam hum a daikai ding mi zong hi. Saptuam maikai leh heutu te'n halhthakna (revival) tungsak thei, honpe thei hile uh, sawtpi in igam ua Revival a tungta ding. Camp leh Crusade bawl tam ziak a I gam ua Revival tung ding hileh, sawtpi in a tungta ding. E Politician te'n Manipur singtang gam a teng 'ZO' suante adia ki vaihawmna tuam, amau thu a hon pethei ding hile uh a hon piakna uh sawta ding. Nam leh Pawlpi makaite makaihna a, Galvan toh sual a gam ngah ding hileh, nam seppaihte makaihna in, huham tak in Galvan toh i sualna uh sawtta ding. Mipi pan khawmna ziak a gam (I nget uh) muhding hileh Salpha 9te luang tungtawn in, heutute leh makaite nungzui in, nak takin I pang khawm ua, i muta ding uh. Kuamah mimal kok tuam nei a dem kahi kei. Ka gennop pen tuh Pathian kia in hihthei leh hon pethei. Toupa' kidouna a tuh mitam leh galvan hauh ziak a vualzoh ahi kei a, Toupa lampang leh Toupa' panpihte vualzou uhi.