A gelhtu : Upa V. Lianzathang, EBCC, Langol, Imphal.

 

Siampute huna Jawlneite hongkilat chiangun Siampute Pathian adia gin-om nawnlou, sakhua lam thu a niam kiak ua, gam sung a khelhna a hong otluat chiangun Jawlneite Pathian in a sawlsek hi. Johan a hong kilat laiin Israel gam zanmial bangin amial hi. Malaki in Toupa hongpai di tungtang leh ama a tangkou hongpaidi agen khitin thukhun lui khak in a omta hi.

 

Gen kholhna Malaki ah abeita a, huai nung kum 400 nungin kisikna did thu leh thukhun thak hehpihna hun hong kihongdi gen in Johan ahong om hi. Johan min khiakna Pathian lainatna leh hehpihna chih ahi. Johan

in hun paisa leh hun hong tungdi a entuak tuak hi. Jesu bang in apiandi leh amindi genkholh in a om hi. Johan asih in mitampin asihdan asoisel ua, himah leh hunsawt lou nungin adaikik hi. Jesu sihna le Kha siangthou nasep ziak hilou hileh adaikik maiding in agintak huai hi.

 

Johan piandan ngeina hilou a apian kia hilou in a pian nungin kum 30 mitoh kihellou in a om hi.Huai hunsung in thil tung tum tuam tampi a om hi. Tom kumpipa asi a, naungek kumnih nuai lam thahdia thupetu Herod asita a, Belampute asita ua, Simeon leh Anna hiai Jawl neite asita ua, Baptist Johan pa le asita hi. A huat huaite leh a ngaih huaite le asituak tuak uhi. Huchiin kua mah theih kholh louh in gamdai ah kikou aw ahong suak a, "Kisik un vangam a naita," chiin hong kikou hi..

 

Jawlnei tampi a om ua, Johan dan nuai a Jawlnei nanungpen ahi. A mah thu khun lui hun khaktu dia hong piang ahi chile ichi khial kei mai thei hi. A man a khe khatin Thu khun lui hun asik a, a khe khat a thu khun thak sik-in a ding hi achih theih hi. A man agen thu pipen tuh hunpaisa ah bang ana omta a, hun hongtung ding ah bang hongom ding ahia chih agen thupipen ahi.

 

Evangelist 4 te'n Baptist Johan tanchin agen chiat uhi. Mathai in, "Huai hun laiin Judia gam dai ah Baptist Johan in hotdamna thu agen," achi hi. Mark in, "Gamdai a kikou aw in, "Toupa lamlian sial unla a lampite hih tang un," achi. Luke in, "huai lai in Gamdai ah Zakaria tapa Johan kiang ah Pathian thu hong tunga," chiin agen a, huan it Johan in "Pathian sawl mikhat a hong om, amin Johan ahi," achi hi.

 

Johan hunlai a mite lungsim phawng mah mah khat tuh a kizepna ahi. Sa ngawng sau mul asilh a, savun in a kawng agaak hi. Tanchin hoih agen chiangin Eliza toh kibang asa ua, angai sang uhi. A thu gen a hong

thang hiai hiai a, atawp tawp in Jesrusalem tanpha ah a thu hong thang ta. Johan tanchin hoih tangkou pihna a, atel khalou thil lamdangte (Miracle), chiamtehna (sign) ahi ua, huaite louin le mite a-thathou uhi.

 

Johan leh Jesu tanchin hoih genna tungtawna Judia gam a halhna atung bang bang atung ngei kei hi. A kimu thei lama tomkhah thathou phut hilou in sunggil lam a sutbang a na in khelh kisikna Judia gam a mite

sungah a hong omta hi. Abraham, Isak, Jakob te leh Jawlneite ana om ua, himah leh tun huaite teng teng sanga lianzaw ahong langta, Judia gam leh a kim a mite alai zanga pan in akim vel hon naih panta uhi. Kisikna thu Baptist Johan in agen Judia gam, Samari leh Jerusalem khopi pha in a hong thangta hi.

 

A thu danin Jeruslem ah Johan a minthang kholkei hi. /Gamdai a kikoupa chih ahi lel hi. Gamla pipi a panin mitampi hong paikhawm uh a, athugen ataksang uhi. Bang ziak ahi ding ? A mah Pathian sawl ahih ziak ahi. Tulai a thugentu minthang khovel dan hi in khovel dan hilou Sahkhua dan hileh le gamdai ah paikhele uh mipi a-thugen uh ngaikhe dingin a hong kuan di uam ? Na thugen , ka thugen, ngaikhe dingin gamla pipi a pan mite hongpai khawmdi un igingta uhia ? Johan thugen ngaikhe dingin mitampipi hong paikhawm zel uhi. Mi khialte amah thugen ngai khedia hongpaite kipah didan zongin Johan in thu agen kei hi. Pathizn hilou mihing lau louin thu agen hi. Mikhialte khelhna agen dausak keia, khelhna douin thu hangsan takin agen hi. Pharisaite leh Sadukaite a kianga baptisma tangdia a hongpai lai un a kiang uah "Gul suante aw, hehna hongtung ding taisan dingin kuan hon thu hilh a ? Huchiin kisikna toh kilawm gah honsuang khia un, Abraham kapu uh ahi chiin kingaih tuah kei un : Pathian in hiai suangte khawng Abraham suante in adingsak thei hi," (Matt. 3:7-9). A lep chiahna uleh akiphatna uh ana vunhawk a, amu deih dan leh ngaih dan, amau duh dan takin Johan in thugen asawm kei hi. Pathian a kipan thutung dan dan agen sawn a, a thugen ngaikhete phat in thu agen kei a, thil ahidan dan in, ahihna diktak chiangtak in agen hi. 

 

Mathai ah Johan hangsanna muh theih in a om hi. Kisa thei a, a maul eh amau huntawk kisate kiang , "Tua kipan in heipi sing bul teng ah a koihta uh, huchiin sing chih gah hoih a gahlou peuh peuh aphuk ua, mei ah apai lut zel uh," chiin Matt. 3:10 ah agen hi. Huan Luke 3:10 ah "Huan mipite'n a kiang ah bang ka hih ding ua leh ?" chiin adong ua, aman akiang uah hichiin agen hi :-

 

Mipi te kiang ah :-

1. Ku peuh puan-ak nih nei in anei lou king ah hawm hen Matt. 3:11

2. Ku peuh an neiin huchi bang mah in hih hen Matt. 3:11

 

Siah khon mite kiang ah :-

1. Hon sehsaka val uh vakhon kei un Matt. 3:13

 

Sepaihte kiang ah :-

1. Kua mah hiam gam in hih kei un Matt. 3:14

2. Diklou pi in kua mah hekkei un

3. Na loh uah lungkim un

 

Hiai Johan thugen kipatna ahi a, a thu ngai khete huai ah anosia mai kei hi. Kibawl thakna, kisikna chihten Jesu kiang a hontut kei ua leh Pathian lalgam polam a om ahi ua, mahni ngaihdan a paina in khelhna mah ahontun thou thou hi. Huai ziak in Johan in a thu gen nate ah ahong pai pah ding Messiah agentel zel zel hi.

 

Jordan lup piau John pulpit ahi a, gamdai a tenna inn ahi, huchi a thu agen khit chiang in gamdai ah agiak zel hi. A ann Khaupe leh khuaizu ahi, tu lai a khut doh-a kivakte a mah sang-a haksatna thuak nasazaw a

omkeidi chile adik thei phial ding hi. Pathian in gendia a piak teng teng agen a, bang mah iim nei louin, hangsan takin pil leh thei kisate kiang ah lau hetlou in a genvek hi. Matt. 3:5-6 ah hichiin a gen hi

:-

"Huchih laiin Jerusalem khuate, Judia gamte teng teng, Jordan lui dung kim khawng ate teng teng a hongpai khia ua, a kiang lam ah apai ua, a khelhna uh thupha tawiin, Jordan lui ah a mah kiang ah Baptisma atang ua," chiin a gelh hi.

 

A ma in Baptist Johan bang bang a kisiik ding thu tang koupih a omkei uhi. Ni teng in gamdai a kipan a hongpai khia in, Jordan lui piau a ding in, "Kisik un, vangam a naita," chiin mipite thu a hilh zel hi.

 

Tu bang in le Jordan lui piau a kisikna thu Johan in a tangkou pih namit kha a na ngaihtuah a, na suang tuah leh a ging za bangin na om thei phial ding hi. Hiai Jordan lui, lui minthang mah mah ahi. Hiai lui ah Naaman phakna silsiang in a omn a, Eliza leh Elisa in hiai tui luang lai lei keu a pai bang mai in a kantan ua, gam chiam a tun theihna ding un Joshua in Israelte gamkeu a pai bang mai in hiai Jordan lui akantan uhi. Jesu le hiai lui ah Baptisma piakin a om hi.

 

Hiai teng teng ban ah gamdai a om a, kisikna thu Johan in agen ngaikhia dingin numei, pasal, nupi, papi, nungak, tangval, laigelh mite, Pharisaite, Sadukaite leh Vai hawmtute Judia gam, Samari gam leh Galilee gam a kipan in Johan thugen ngai khia dingin ahongpaikhawm uhi.

 

Hiai a mipi thungai khedia hongpai khawmte zak nop pen leh a maute tha thou sakpen bang hidin nangaih tuah a ? Kisik un chih hia ?, baptisna thu hia ?,khelhna a puan khiakna uh ahi diam ? Hilou, lungsim khoih pen leh tha thousak pen Matt. 3:11 a agen, "Ka nung a hongpai dingpa tuh kei sangin a thupi zaw," chih in a lungsim uh khoihpen dingin a gintak huai hi. Bangchi dan in-e ? na chi mai thei hi. Leitung kivaipuakna ah-le Kumpi leh Vai hawm tute miliante a khual zin chiang un a ma uah a misawlte uh a zin nasan uh toh kisai bang bang hiam bawl lem masa ding in amatai sek uhi. Lampi hoih louhnate abawl hoih masa ua, lei (bridge) sia bang a om leh a bawl thak ua, kumpi hongpai nadia nuam lousak thil omtheite abawl lem masa sek uhi. Johan in agen kunmpi hongpai di a om a, kei a lampi bawl dia hong pai kahi chiin a gen hi. Johan gen kumpi tuh kisiikna toh maituah louh in bang mah a phatuam kei ding hi.

 

Lamdang sa in bang chik chia hongpai di ahia ? chi a dong dingun agintak huai hi. Johan in kisiik un vangam anaita chiin agen hi. A hongpai pah ding, nagintak sang ua kinzaw in ahongpai ding, amah lung tang a kisiikna diktak toh namai tuah kei u leh bang mah a phatuam keiding chiin agen khol zel zel hi. Johan in Jesu hongpai masakna agen a, eiten ahong pai nawnna igen uhi. Jesu hong pai nawn ding ahi chih igen uh ei phuah tawm ahikei a, Jesu mah mah in ka hongpai nawndi chih agen hi. Eite kiang ah nasi khadi uh pilvang un achi kei a, pilvang un hongpai nawndi ka hi achi hi.

 

Johan in A mah hongpai pah ding, lam etlouh kal in, tha khatin, A tung a Pathian Kha sing thou hong tung di omden ding chih gen in Jesu tanchin a tangkou pih hi. Johan in Jesu hongpai na masa gen kholh bang in eiten ahongpai nihveina ding igen khol uhi. Jesu hongpai khat veina Johan in agen adik bang bang in eiten ahongpai nawnna di igen uh a tak tak mah in ahong tung ding hi.

 

John in A mah eite lak ah a om, eite lak ah ateeng chih gen in mite lungsim nak pitakin atha thou sak hi. Judaten kum sangli bang paita a,lam-entak a angak uh Johan in, "a hong tungta, eite lak ah a om" achi hi. Numei suan akipan in ahong paing ding chi a tang lai a kipan-a na na kigensa, Setan lutang sidup saktu di tun ilak uah a om ta chiin Johan in a gen hi.

 

Ni khat tuh Jerusalem a kipan in siampu lian in a seh khiak thunei pawl khat Johan kiang ah a hongpai ua, a kiang ah Messia nahi hia, Eliza nahi zaw hia, ahih kei leh kua him him na hia ? chi in a hong dong uhi. Tan chin hoih Johan in a gen bang in huai amisawl te'n koute na tanchin kan chian dinga hong pai kahi uh, ka ngaklah gige uh Messia nahi hia ? chiin ava kan uhi. Johan ki kiliansak leh a hih louhna tan a amah leh amah ki domsang nuam hi leh Messia kahi chih nadia hun lem hoih tak a om a, a maule taksang theidi khop a minthang ahi. Johan thupi a sak luat ziakun kua himah mahdi a hia chih a thei nuam uhi. Leitung-a Judate'n a maute tanpa hong paidi a lam et uh hi mah mah ding in aging ta uhi. Ka ngak lah mahmah uh Messia na hi hia? achi chi mai uhi. A mah leh a mah kigen lian mai lou in ki ngai niam takin Messia kahikei chiin adawng hi.

 

A tang pi in mihingte paidan, amau hihna sang a sang zaw deuh a kigen utna a om sek hi. Mi tam zaw ten hiai ngaih dan anei uhi. Mi tampite a mah hihna chiah na theih chian chiang in na muh nadan sang a niamzaw tampi a om sek uhi. Johan ahih leh alian sem sem hi. Bang ziak-in? A ziak tuh Johan amah ngaih in mineu khah, mi kingai niam ahi a, a nung a hongpai dingpa Jesu thupina amuh chet ziak-a neu kisa lua ahihna in Johan Jesu ngaih in milian ahi.

 

Johan in amah khihna kanchian dia hong hohte kiang ah, "Nou hon sawltupa kiang ah mihing a simtakle kahikei achi vachi un" chiin a dawng hi. Kei bang mah kahikei a, ka thugen ngaih khiak dia poimoh ahi achi hi. Ka nunga hongpai ding, akhedap khau pheltak le ka hikei a, huai tanchin gendia hong pai kahi achi hi.

 

Johan omdan, a thupina hiai ahi. Johan in, "Kei lampi ka hikei a,  lampi kawkmuh tu kahi," achi khi. "Kei honzui kei unla, ka nunga hongpai dingpa zui un," achi hi. "Ken lampi dik kamu a, huai lampi zui un chi-a honchial dinga, huai tanchin hoih hong puang khia ka hi,"chi in Johan in agen hi. 

 

Kristian te'n Johan a-om Kha (Spirit) nei in Kros liim a om kawm in Krist lampi kawk muh tu in pang theile a-ut huai mah mah hi. Johan a mah ngaih in neu mah leh a pian ma in angel in, "A mah Toupa ngaih in milian ahi ding," achi hi. Luke 1:15 ah Johan milian a hihna ziak kigen hiai ahi, aman, "en-un Pathian Belam nou, kei zaw bang mah ka hikei, A mah bang kima bang kim ahi," achi hi. Eite hichi hithei le, hichi danin chithei chiat le a deih huai hi.

 

Judate siampu lian in Johan tanchin kndia a pawlte aswl lai a Johan dawnna hiai tea hi. Johan in a mah hihna diktak genin kei Krist hilou ka hi, Eliza le ka hikei a, Jawlnei le kahi kei hi. A hih leh kua him him na hia kou honsawltu kadawn theihna ding un. Nang leh nang na ki theih danin kua na hia ? chi a adotna uh a dawnna in Johan in kei tuh "Jawlnei Isai in agen bang in Toupa lam lian sial unla a lampite hih tang un chi a gamdai a kikou aw ka hi," chiin a dawng hi,( Johan 1:19-23).

 

Huchi bang a siampu lian mi sawlte toh kihou khin phet in mi tampite a thugen ngain khia a Jordan lui piau a tudep dupa a omlai un Johan omdan ahong lamdang guih ta hi. A mit phelou a a gallam en a a thugen genzom thei nawnlou in lamdang sakna leh zah takna kithuah lungtang a ngaih tuahna thupitak toh Jesu a mah lam zuan a Jordn luia hongpai amuta hi. Jesun Baptistma hontang sakin chiin angenta hi. "Ken nang hon Baptist di maw ?" chiin Jesu adawngta hi. Hiai mi ahi Johan in baptisma atansak ut louh a, miten lamdang asak mah mah uh. Mi dangte baptisma tangsak-a Jesu baptisma atandi anial thil lamdang mah mah

khat ahi. A kiim a kiang a mute'n le lamdang asa mah mah ding un agintak huai hi. Matt. 3:14-15 ah "Johan in bel nang kei non Baptis kipha moh zopi a, kei kiang ah na hong zosop maw ? chiin kham atum a, Himah leh Jesu'n a kiang ah Tu in lemsak tei tei in, hichi bang a diktatna teng teng hih tangtun eia dia kilawm ahi chiin a dawng a,Huchiin lem asa ta a. Huchiin anih un Jordan lui ah apai lut ua, Johan in Jesu baptisma atang sakta". Heutu pa'n thu apia a, Johan in thupiak azui hi. Johan in a heutupa thu amang hi.

 

Hiai ni leitung a nisuakte lak a ni thupipen ahi chile ichi khialkei maithei hi. Kha (moon) a hongsuak a, avak phasim hi. Himah leh ni ahong suah a, nivak a honghat hiai hiai leh Kha vak adau hiai hiai hi. Jesu Krist hongpai ta a, a mah vak ah Johan amial hiai hiai hi.Kha vakna ni a kipan a a laksawn ahih bangin Johan leh eite vakna Jesu a pan a i-laksawn uh ahi. Jesu inaih hiai hiai leh kei kahi chihna abei hiai hiai a,Jesu hihna ei ah a kilang hiai hiai hi. Hiai ihinkhua ah adik thei na hia ? Kha in nivak atang sawn sak bangin eite le Jesu Krist vak tangsawn sakdia om ihi uhi. Jesu baptisma atan apan in Johan in kisk un vangam anaita chih gen nawn lou in en-un Pathian belam nou khovel khelhna lamangpa chi in a thugen a khek hi. En-un Pathian belam nou khovel khelhna podingin khovel ah a hongpaita. Tun kei bang mah kahi nawnkei a, A mah zaw bang kima bangkim ahi chiin Johan in agen hi.