Panpih dia man Jesu: Jesu nasep ahihleh mi lungkham-liangvaite panpih, a liamte sukdam, hatloute, damloute damna piak ahi. “… chidamte’n Doctor kisam lou a, chinate ahi zaw doctor kisam” (Mt. 9:12). Tuni in unau panpih ngai in na kithei hia? Ahihkei leh panpih le ngailou a Khristian hat leh buching hi in na kithei hia
? Jesu’n a panpih utte zaw hat kisalou leh puakgik neite ahi. Pharisaite bang Sahkhua lam ah hat akisa mahmah ua, chin le a kisa ua, Jesu bang chu amau nuai a mi bang in a koih uhi. Dan thei a kisa ua, Dan bang in le a gamta ua, sawm-a-khat diktaktak in a pia ua, dan zuiloute bang suang in a denglum sek uhi. Sahkhua na lam ah a buching uh ahi mai. I Toupa Jesu’n Doctor te chidam te’n poimohlou achih lai in a gen ut tak ahihleh, Sahkhua na a chin kisate a genna ahi.
Na dinmun theiin: Awle, unau I Khovel khualzinna ah, haksa na sakni a om ding a, nuam nasakni le a om tham ding. Paul in “Koute’n ka pumpi uah Toupa Jesu sihna ka paw gige uhi. Tua bel, koute’ pumpi-a Jesu’ hinna a kilat na ding ahi” (2 Cor.
4:10) ana chi hi. Tuni in Khristian hinkhua a I etton uh/ model Paul in a Khristian hinkhua ah Jesu sihna a paw gige, aziak ahihleh Jesu hinna a kilatna ding in achi hi. “…Nisimin ka si (1 Cor.
15:31) achi hi. Tulai in niteng a sih sang in hat kisa a, midang a hatlou, liam leh zawngkhalte bang simmoh bawl a I om khak ding ki-et huai mahmah hi. I Hatna ding in I sih gige a Jesu a I hin gige a poimoh hi.
Thukhitna: I changtel ah “Semgim leh puakgik pua noute khempeuh ka kiang ah hong pai un, keima’n tawlngak khawlna kon pe ding” Toupa Jesu’n achi hi. I hatlouhna iki theih a, puakgik I neih a, I Puakgik pen ei kia a pawzoulou ihihlam I kitheih leh, Jesu’n ka kiang ah hong pai un chi ahi. Na puakgik a gik mahmah leh nang kia in paw kenla, na mihinpihte kiang a na tai leh na vanpuak hon behlap sak ding uh a, a gik semsem ding hi. Himahleh, Jesu kiang ah vatun lechin Aman honna dawn ding a mansa ahi. Na tate ziak a haksatna, insung khosakna a haksatna, sepna lam a haksatna, nu-pa kala haksatna hiam Khristian hinkhua a haksatna na neih leh lungkham a kuiku mailou in ginna toh Jesu kiang zuan lechin Aman honna panpih ding a hon chial gige ahi. Try Jesus.
Source: Ngeisok
