KRISMAS a hong nai nawn hiaihiai a, Joseph in a tenna khua Nazareth a kipan mel 80 a gamla a om a pi-leh-pute khua Bethlehem a zuat bang in, michih in hiai hun thupi leh poimoh tuh a naum theipen a zat ut chiat in, mundang, khodang, gamdang a omte bang in leng i nu-i-pa, i u-i-nau leh i it-i-ngaihte omna a zat theih dan ngiahtuah in i phe vengvungta uh a bang hi. Khen khat ngial in mun khat a, khat vei kia lop bang leng deih khoplou in a lawm ngaihte uh toh zou lawkna bang nei hial sek uhi. Hiai Krismas kha tuh a tang kha kha, a tang tamtam a hampha hi a; a lawm tamtam a hampha hi uhi. Ahihhang in, hichibang hun thupi i lop chiang in, theihlouh ziak hiam a min ADVENT khawng i chi sek ua; hiai ADVENT pan om ze neitak a ki pankhia, ki zang tou zel ahihziak in huai dan thei kawm a, huai dan a zang ihih leh bel a hoih a; huchi ahih kei leh bel ADVENT chilou in ADVANCED Krismas hiam khawng chi zaw leng hoih zaw ding in ka gingta hi. 

Advent tuh Latin pau a thumal 'adventus' a kipan ahi a, huai tuh "hong tunna/hong paina” (arrival) chihna ahi. Latin pau adventus tuh Greek pau parousia a kipan ahi a, Kris Hongpaina Nihna (Second Coming of Christ) genna ahi. Huai tuh genna ahi a, kipahhuai, lop tham mah ahi. Advent tuh Tumlam Kristian saptuam tampite’n Krismas a Pathian’ Tapa Jesu mihing bang a hong piang a, i lak a hong tenna lopna leh, Kumpi, Vaihawmtu, Thukhentu a a hong paina ding a kisak kholhna a bawlna hun uh ahi.

Kumzabi 5na in, Advent tuh November 11 (St Martin's Day) in kipan a, Krismas ni tan Pathianni kal 6 sung anngawl in zang uhi. Kumzabi 6na in, Pope Gregory I makaihna in, Pathianni kal 4 in hih tom ua, Advent tuh November 30 (St. Andrew's Day) toh kinaihpen Pathianni a kipan Christmas Kiginni (Eve) zanlai tan zang ua, anngolh leng sutawp uhi. Huchiin, Saptuam tampite, abikin Roman Catholic, Anglican, Lutheran, Moravian, Presbyterian leh Methodist saptuamte’n Advent tuh Krismas Ni, December 25 ma a Pathianni 4na, Advent Sunday kichi in a pan uhi. Huai tuh November 27 leh December 3 kikal a Pathianni chihna ahi.

Advent sung a Pathianni khatna tuh Advent Pathianni (Advent Sunday) kichi a, Advent sung a Pathianni 2na tuh Adevnt 2na, Advent sung a Pathianni 3na tuh Advent 3na, Advent sung a Pathianni 4na tuh Advent 4na kichi hia" kichi hi. 2012 in, Advent tuh Krismas ma a Pathianni 4na, November 30 toh kinehpen Pathianni, December 2 in kipan hi. Advent 2na tuh December 9 hi a, Advent 3na tuh December 16 hi a, Advent 4na tuh December 23 ahi.

Advent sung in, Kris hongpaina ziak a Pathian kiang ah kipahthu gen in, Jesu’ Pianna toh kisai laisiangthoute sim in, a hong pai nawnna ding a kisak kholhna hun a zang in, thukhentu a a hong pai nawnna ding toh kisai laisiangthoute sim uhi.

Hiai Pathianni kal 4 sung in singhing hiang in Advent wreath, belvalh bang a kual a kiphan bawl ua, mombati 4 toh thuah in, hiai Pathianni kal 4te a kipat teng in Advent mombati vak in thumna nei uhi. Saptuam tamtak ah Krismas Kiginnitak in biakin kikhopna nei ua; biakin tampite’n zankim in mombati vuak de a kikhopna (special candlelight services) nei uhi. Kumzabi 5na a kipan in Katholikte’n zankim Toupa’ ankuangluina nei uhi. Saptuam khen khat in hiai hun ah kumzabi 13na a Assisi monastery a siampu Saint Francis in ana pat khiak Jesu’ pianna tangthute drama suah uhi.

Suahlam Orthodox Saptuamte’n leng Krismas kisakkholhna, November 14 (St. Philip the Apostle's Feast) zingchiang a kipan December 24 tan, ni 40 sung Pianna Anngolh (Nativity Fast) nei uhi. Hiai Pianna Anngolh tuh kisikna toh kisakkholhna ahih ziakin nguihuai/lungkhamhuai/dahhuai tak in nei uhi. Himahleh, December 20-23 in Pianna Lop Lawkna a neih chiang u’n bel dahhuai nawnlou a, Pianna late bang sa ua, Russian Orthodox bang in a biakin uh kilawmtak in chei uhi. December 24 in Nativity Paramony uluktak in zang ua, nitak lam a Vespers service a zoh mateng uh an himhim nelou uhi.

Tuchiang in khovel thil tampite’n Advent dep gawp in, mi tam zawte’n hiai hun in naungek Kris a ding a kisakkholhna hun neilou ua, Krismas ni a a sungte uh leh a lawmte uh toh a hih dingte uh kisakkholhna in mang zaw ua; Krismas a thupi huaihuai leh Advent nawmvalh huaihuai hi. Krismas lopna a thupi deuhdeuh leh, I lungsim ah Jesu Kris in mun neulou deuhdeuh hi. A poi bel, mite’n Kirismas a lop lai u’n Kris ngaihtuah pha nawnlou ua, Kris-tellou Krismas in Advent a kipan Kris dikkang/hupkang/lakhia (sap) hi.

Sahkhua a hun poimoh dan a Advent hiam Krismas hiam zang in i khalam hinkhua ah hanta leh kipahna thak i mu maithei; himahleh, huchi ihih lailai in, i khelhnate isik-itang a pua a, tangtawn sihna a kipan hong tan a, a van khopi i luah theihna ding a a van hinkhua nusia a, lei Bethlehem a mun niampen bawngbuk sung a hong naungek a hong piang i Hondampa’ thu hi nawnlou in, inkuan thu, sum-leh-pai thu, minthanna thu hiam a hih maimah khak ding lauhuai mahmah hi.

Tutung Krismas tuh nu-leh-pa, u-leh –nau, it-leh-ngaihte leh lawm-lehvualte toh zang khawm a, nang a ding a salam a kipahna, leh nopsakna hun ahih ban ah, belampute leh mipilte’n naungek gan anpiakna lum va mu a, a goubawm uh a hon bang ua, khalam a leng Jesu Kris mu chian a na  goubawm, na neih-leh-lam, na hinna leh na lungtang nangawn na lat khiakna hun hi ding in ka hon deihsak hi.

Tuankhankhup,
Gurgaon
December 2, 2012 (Advent Sunday)