Ezera 4:4; 2 Sam. 2:7; Ezera 6:22; Heb 12:12; Neh 2:18; Job 4:3-4; Is 35:3

Nehemia in a nasep di a sep theih na dia ahih masak pen pilvangtak a kulhbang siatdan velchet masak phot a, huaikhit a asepsuah didan thutanna bawl ahi. Jerusalem kulhbaang lamthakdi adaal ut melmate theih in a thiltup agen masakei hi.

Neh. 2:1-2 ah Kumpipa in a nasemte nguimel, dahmel, lungkimlouh melpu a omding phal ahikei chih Nehemia lauthawngna a kipan i ngaihtuah leh a gintakhuai hi. Kumpi pa’n Nehemia huchibang melpu a amuh Nehemia a ding in thil nuamloupi, zumhuaipi leh lauhuaipi a suakthei hi. Pau. 15:13 ah “Lungtang kipak-in mel kipak abawl a, himahleh lungkhamna in mi a nguisak,” achi hi. Jerusalem a TOUPA Pathian teenna Biakin leh Jerusalem Kulhbaang vaivut suaksa lamnawn ding lung-gulhna in Jeremia a lungkhamsak hi. Himahleh, amah theih louhin Pathian in Kumpipa lungtang ah nna ana seem khin hi. Nehmia Jersalem kulhbaang lamthak dia akik theihna dingin Pathian in kumpipa lungsim ana thuzoh khin hi. I tup leh i-ngiimte Pathian deihdan toh akituah naak leh ei ma in Pathian in a nathei khinvek hi. I ngaihtuah khaak leh ngaihtuah khaak louhte le Pathian in a theivek hi.

Neh. 2:4 ah “Huchi in Van Pathian kiang ah ka thumta hi”, achi hi. Hiai Jeremia thumna tomkhah hidingin a gintakhuai hi. A ziak tuh huai hun mah a, amah kumpipa maia ding ahihziak in a thumna, a lungsim a tomkhah thum hidi’n agintak huai hi. Matt. 10:19-20 ah Jesun a nungzuite thu nawtsiat hichi anei hi, “Himahleh a hon matsak chiang un, Bangchi ding ahia, bang thu ka gendia? chiin lungkham kei un; nagen ding uh ahuntak in ahon theisak ding ahi ngala, Agenpa noumau na hikei ding ua, Napa uh Kha in nou mau ah a genzaw ding ahi ngal a,” achi hi.

Nehemia in Pathian panpihna theihlouh kaal leh a ngaihtuah louh kaal in ana tang khin hi. Jesu’n Matt. 19-20 sung a A gen Nehemia tung taang ah adik-khin hi. Neh. 2:6 ah, “Na khual zinna bangtan a sawtdi ahia ? Huan chikchiangin na hong kiknawn dia ? Hiai ah Nehemia in hun bangtan ngen ahia chih a genkei hi. Himahleh atompen inle bung 5:14 a i muh bang un kum 12 beek hiding in a gintakhuai hi.

Neh. 2:8 ah “Ka tunga Pathian khut hoih a om bangin” achi a, hiai in agen “Pathian in kei hehpihna honpia hi”, chih toh kibang ahi. Nehemia in Jerusalem kulhbang alamna dia a poimoh tengteng Pathian in a pia hi. Neh 2:9 ah apaina a a totkhak ding kumpipa te’n a daal-louhna ding un laithon, sepaih leh Sakoltung tuang mite piakin a om chih i mu hi.

Ezera in Sepaih thahatna a deihkei a, abit thou hi. Nehemia in Sepaih panpihna leng anialkei a, abit thou hi. Ezera 8:22 ah, “Lampi a melma dou dinga ei hon panpih dia kumpipa kiang a Sepaih pawl leh Sakol tungtuang mi nget lah kazum ngala : Hoihna ding a amah zong tengteng tung ah I Pathian khut a oma; himahleh amah mang ngilhte tengteng siatna ding in a thilhih theihna leh a thangpaih na a om hi, chi a kumpipa kiang a thu i gentaak ziakin,” achi hi. Pathian in hun tuamtuam ah; lam tuamtuam in nna asem zel hi chih a kichiang mahmah hi. Pathian muangle Sepaih thahatna leh Sepaih thahatna bei inle
melma i zou ding uh chih hon theisak hi.

Neh. 2:11 ah Nehemia in a lungtang ah sep a tupte pilvangtak in a kem chih i mu hi. A ziak tuh a kiim-a-kiang a Pathian melma pumdim ahih ziak ahi. Nehemia in a lungtanga sep a tupte Pathian tup leh ngiim toh kituak ahi a, Pathian mahmah in a lungtanga a koih ahi chih a theichian hi

Hiai bangbang a gingtute’n Pathian in mihingte adia tup-leh-ngiim a neih theihkhiak masak a poimoh pen ahi. Pathian in mihingte a dia tup-leh-ngiim aneih i theihkhiak a, huai sepsuah na dia theih patawp a pan i laakdi uh kristiante mohpuak ahi. Pathian in eite tungtawn in a seemkhe ngei ding chih ginna toh i sepdi uh ei mohpuak ahi.

Neh 2:16 ah Nehemia in ahih masakpen Pathian lunglutna bangchi banga sepsuahdi ahia chih, a mun-a-mual hoihtaka velchet masak a, huai a taangtun theihna dia bangbang poimoh ahia chih a theihchet maa teng mi’n a hihbuai theih hetlouhna ding ua genkhe hetlou in a geel masa detdet hi. Nehemia in agenkhiak ngaaklah hetlou in, melma thupi lua ahih chiang in Pathian lam toh kilemna angaak masa hi. Saptuam khangtou henla, Kha mangthang manni i chih leh Nehemia sepdaan aa kipan in zildi tampi a om hi.

Neh. 2:18 ah, “Thouni in lamni”, chiin mipite a hong ding khia uhi. Hiai thu Nehemia in mipite a chialna, mipite’n a dawnna uh ahi. “Huan katunga hoih ka Pathian khut tanchin amau ka hilh a, ka kianga agen kumpipa thute leng. Huan amau thouni in lamni achi ua, Huchiin nasep hoih sem dingin akhutte uh a hatsakta uhi” chi in Nehemia in agen hi.

Dou daalna : Neh. 2:19 ah Sanbalat, Tobia leh Arabmi Geshem in hiai ka thil hih sawm uh anazaak un ahon nuihsan ua, “Bang hih sawm namaizen ua ?” chiin ahon nuihsan ua, “Kumpipa tunga helsawm neive ua maw ?” achi uhi.

Mi kuapeuh in Pathian gam nna leh Pathian a kipana thutung a sepsuah dek chiangun “DOUNA” atuak zel uhi. Nehemia dou-in a om , kou-in a om a, kumpipa doudia kisa chi a ngoh in a om hi. Mihingte aa din demna,kouna, muhsitna a thuak hak mahmah a, Nehemia banga Pathian muh chetna neiloute aa din lunglelhna toh hinkhua zat a baihlam mahmah hi. Himahleh Nehemia in Pathian a kipan a thutung bangbang semsuah dia thutanna kichian nei mi ahi a, sap a a omna bangbang buching sak dia tup kichian nei mi ahi. Pathian deihdan nna asep deklai a, adou daltute thu in a omkei hi.

Jerusalem kulhbaang lamthak dia Nehemia kingakna : Neh. 2:20 ah hichi in agen hi, “Ken bel akiang uah Van Pathian in hon lohchingsak ding ahi. Kou a sikhate kahi ua, kalam panpah ding uh. Nou hiai Jerusalem toh kisai in neih-leh-lam thu neihna leh theih gige na ding bangmah na neikei uh,” achi hi. A tung-a hoih Pathian ah a kinga tinten a, Pathian apan a thu tung a muhbang in a semkhia hi.

Neh. 4:1-3 ah hiai muh theih a om hi. Ngaihtuahna giloute’n Pathian gam nasepna a daal gige ua, hiai ah le Sanballat leh Tobia Samari mi ahi ua, Nehemia nasep soiseel chihtakin a soiseel uhi. A minsiat huai thei tawp, a simmohhuai thei tawp leh a zaak thadah huai theitawp a kouna, kamsia in a hou uhi.

Melmate panpihna a deihkei uh : Ezera 4:3 ah, “Zerubabel, Joshua leh beh a intek pente’n bel a kiang uah, “TOUPA ka Pathian uh temple lamna ah non panpih uh angaikei hi. Persia kumpi Sairas in thu honpiak bangin, koumau ngei in kalam ding uh,” achi uhi. Gilou selua, deihlou selua, panpih nuamlou selua leh a lungtang taktak ua Jehova Pathian khopi lamthak dinga veina neiloupi te’ panpihna a deihkei uhi.

Nehemia 4:4 ah, a tawptawp in Nehemia le hong heh khe guih ta a, Pathian kiang ah phuba laa dingin ngetna ahon bawl hial hi. Himahleh Jesu’n eite hon sinsak na daan in, “na melmate uh it unla thumsak un” a honchi hi. Hon kou, hon dem, hon hih heihaite, hon haibawlte hotdam a honghihna di uh eite’n i deihsakpen di uh ahizel hi. Paul in keizaw huai tanchin hoih khainiang bun kahi a chih dik hi na maizen a!, honchisak hi.

Kouna leh demnate ziak in nasep a khawl tuankei uhi : Neh. 4:6 ah Suk-thang paihna tampi tuak mah le uh Nehmia leh Juda mipite’n kuhkal taka kulh baang bawl atawp tuankei uhi. Kouna leh demna kichite’n amau aa dia kuhkal taka nasep utna tha apiak behlap zaw hi. Mi tampite lung lelhna kouna, demna suklauna ahi. Pathian tate’n hichi bang kouna leh demna ziaka nguaina, nguina leh bahna aneih chiang un zat theihlouh, Pathian aadia phatuamlou a hinkhua zat maimah theih ahi. Pau. 15:15 ah, “Nuaisiah a omna nite tengteng ni hoihlou ahi ua, himahleh lungtang kipaak neimi in nop bawlna ankuang luina anei gige,” achi hi. Jesu’n “Hon sawlpa deihlam hih leh anasep ka an ahi,” achi hi. Ei leh ei hoihna hilou a Pathian min thupina taklang theidi thil I lunggulh ding uh ahi.

Neh. 4:9 ah nasep leh thumna ahilhchian hi : Gingtute nasepna leh thumna apaikhawm ngiitnget di ahi. Neh 4:10 ah lunglel hatte’n thanopna anei nawnkei ua, a haksatnate kia uh a ngaihtuah ua, lunglel in kulhbang bawl a tawpsan uhi. Himah leh Nehemia in lunglel a nguaite hon tokthou nawn a, kulhbaang zoh matan nna asem-zom uhi. Habakuk 3:17-18 ah, “ Theipi kungin gah suanglou in, grep gui ah agah omlou in, Olive kungte nangawn lohsam in, lou te’n gah suanglou in, belamte nangawn sivek hialin bawng bukte hawm mah le uh ka nuam in ka kipak thouthou ding, TOUPA Pathian ka hondampa ahih ziakin,” achi hi. Pathian vualzawlna leitung hauhsakna zat senglouh neikei mah le I taksa tungkia ah le dangka tampi man pua in niteng in hun i zang uhi. Pathian nna kipak taka seplouh na ding aziak a omkei hi. Nasung a na kal (Kidney) khat bangzah man ahia ? Kisia henla bawl thakni chi le bang zah aman dia ? Pathian tunga kipah louhna di aziak a omkei hi.Huaiziakin thanop i suah ding ua, Pathian min thupina ding lunggulh in i hinna uh zat i sawm chiat ding uhi. Heb. 12:12 ah “Khut kaikhete liktou unla khutzawte toh” chiin a gelh hi. Pathian gam nasepna ah hotdam tate’n thadah nading aziak a omkei hi. Pathian hon itdan khatkhat in simle Toupa, kakipak hi, chi a kipahthu gengen ding a hoih ahi.

Neh. 2:18 a “Thouni in lamni,” kichi Nehemia in Jerusalem kulh bang lam thakdi chih agen na tungtawn a mipite dawn na ‘aw’ ahi. Nehemia in poimoh lua ahihdan agen a, apoimoh dan mipite a thei siamsak a, Nehemia in puakgik in anei a, a lungsim taktak in a lunggulh a, amel a kilang khop hial in puakgik in anei a, Pathian a dong a, Pathian deihlam ahih atheih chian nung in, mipite kiang ah agen a, a thugen Pathian Kha siangthou in nasem thei in a koiha, huchi in mipite’n “Thouni in lamni” achi uhi. Pathian gam nasepna a, Nehemia in puakgik, huai hun laitak a, aneih leh Juda mipite adia apoimoh uh kulhbaang lamthak ding ahi. Tulai Kristiante a dingin, Jerusalem kulhbaang chim sesa lamthak ding om nawnkei a, mihing leh Pathian kikaal a kizopna sesa tunding nawn ding a om hi. Khelhna ziak ,a Pathian leh mihing nana kizom nawnlou, Jesu sisan ziak a khelh ngaihdam na Pathian in a bawl gintakna ziak a, Pathian toh kizop nawnna eite lunggulh di leh awlmoh pen a,i neih ding uh ahi. Saptuam heutu te leh mipite’n i awlmoh pen uh bang ahia ? Sum tampi kaih khawm a azatna lam a diktat nawnlou maimah a omdi ahi diam ? I sum kaih khawmte’n Khalam nasepna ah bangtan a thuk a khoih kha a ? Ei a kipan a hotdamna thu akilam khiak a, mite’n eite tungtawn a Pathian hon itna a theih ua, a gintak theihna ding uh lunggulh sangin Pathian thu tungtawn a ei leh ei kilam khiak a, milian khat leh mi poimoh khat hidan a kilat mi tampite’n atup uh ahi chih achiang lua hi. Huchibang mite tungtawn in mihing lungsim a Pathian toh kizopna sesa tunding in a om ngeikei ding hi. Saptuam heutute leh mipite kigal ettuah in ahi theikei ding a, kituak a, tup kibang a, i sep chiang un Pathian lalgam mihing lungsim ah tunding in a om ding hi. Pathian Kha Siangthou in hon makaih hen. A mah kipii sakni.