Thumapi:
The Federation of Regional Indigenous Societies (FRIENDS) President, Sapamcha Jadumani in Hon’ble Chief Minister Okram Ibobi kiang ah “Report of the Expert Committee on the Introduction of Bengal Eastern Frontier Regulation, 1873 or ILP System to the state of Manipur” kichi November 5, 2011 ni in ana pelut hi. Report apiaklutna ah hiai bang in kigelh hi: “The arbitrary abolition of ‘Permit System’ from Manipur on November 18, 1950 has been one singular factor for the uncontrolled and unregulated influx of inter-state migrants, which metamorphosed the demographic structure of the state into a highly volatile and having grave potential of communal misunderstanding. The simple fact of having nearly 30% of the total population by migrant population is an ominous sign of social catastrophe.”
India Sorkar in kuamah dong masa lou a adeihdan leh hoihsakna dungzui a hiai ‘Permit System’ pen November 18, 1950 ni a phiat a, a hihbeina in namkaal kitheihsiam louhna tunthei ahih baan ah, state dang akipan khamvuallouh a mi hong peemlut zungzungte’n huaisetak a buaina piangsak thei gige diing bang in kilang hi chi in Chief Minister khut ah FRIENDS in “Report” ana pelutta hi..
Manipur State gam huap letdan pen 22,327 Sq. Km ahi a; singtang gam (hill areas) pen 90% a lian, phaijang gam letdan pen 10% ahi. Himahleh tuni chiang in phaijang leh singtang (Hill Districts) gamgite nasatak a kheklamdang in aomta hi. Phaijang mite’n singtang gam ah MLR & LR Act, 1960 dungzui a inn-le-lou neithei lou diing uh chih om hinapi in, mun tamtak ah ahong teenglutta mawk uhi. India in Independence angah kum 1947 a kibawl – “The Manipur State Hill People (Administration) Regulation, 1947” – (The Manipur Code Part II) dungzui a singtang khua-le-khua gamgi kichiantak a khen detdet a om leh Hausate min toh kigelh dimdiam hinapi in, Daan dungzui a bawlphatna mumaltak om zong hi lou, singtang mite phalna leh theihpihna zong telse lou in Hill District(s) huapsung gam lianpipi Plain District(s) ah thuneitute’n lalut in, Hill District(s) gamgi chiamtehna lai poimohte nasan singtang gam akipan tuahkhia in phaijang ah koih in omta hi. Etsakna di’n: Churachandpur District Boundaries chiamtehna lai poimohte Bishnupur District DC/SDO Office ah puaklut in om hi. Tua mah bang in District dangte zong mun bangzah hiam ah hiai dinmun toh kibang geih in om hi.
The Bengal Eastern Frontier Regulation, 1873 & Inner Line Permit:
India khua-le-tui hihna neite mah in zuih diing a kibawl – “Inner Line Permit System” Kamrup, Darrang, Nowgong, Sibsagar, Lakhimpur (Garo Hills), Khasi and Jaintia Hills, Naga Hills, Cachar District(s) gam huapsungte a muanna leh sorkar kivaihawmna mumaltak aom diing deihna ziak in British-India in August 27, 1873 in Provisions of Act 33 Vict. Chapter – 3, Section 1-na nuai ah ana puangkhia hi. Inner Line Permit akizatna State(s) ah namdang, phaijang mite, India State dang akipan khualzin – gamvak mite’n avehnop ualeh hiai Daan kizatna State Sorkar akipan phalna kichiantak agelhthoh a alaak masakphot uh kisam hi. Huchibang phalna mumaltak nei lou mite pen hiai ‘Inner Line Permit’ kizatna State(s) ah amawkna a luttheih ahi het kei hi. Huchibang phalna lai poimoh pekhetu diing a thuneihna piak a om ahihleh State Deputy Resident Commissioners/Deputy Commissioners ahihke’h State Government in tua chibang phalna pekhethei diing a mohpuakna leh thuneihna apiak aomleh huchibang mite kia’n “Inner Line Permit” pethei lel uhi. Hiai ‘Inner Line Permit’ in atup-le-ngim pentak ahihleh – Tualsuak mi (Indigenous Peoples) leh nam tuantualte ahihke’h atawmzaw namte (Tribals/Minorities) humbitna diing leh ateenna uh gamsung a pawlam mite’n tummang mai lou a, ahihna diktak uh leh kituamna aneihte uh humbitna diing baan a lungmuangtak a aluahna uh gamsung a akhosak theihna diing ua Daan, The Bengal Eastern Frontier Regulation, 1873 nuai ah “Inner Line Permit System” diktak a zuih diing a bawl ahi.
Inner Line Permit Poimohna:
India in Independence angah nung nangawn in North-East India States – Nagaland, Mizoram leh Arunachal Pradesh ah ‘Inner Line Permit System’ tunitan zat leh zuih in om hi. Hiai Daan poimohna mahmah ahihleh Inner Line Permit System kizatna state(s) sung a luttheihna diing a phalna, agelhthoh a lai poimoh nei lou a mi kua hiam state pawlam akipan ahong lut teitei aleh gam Daan dungzui a Thukhentu (Magistrate) mai ah puakkhiak ahi diing a, kumkhat sung, Taan-Inn (Jail) a khum diing ahih baan ah, sum Rs. 1,000 liausak theih ahi. Inner Line Permit sub-section (1) dungzui in State Government in akituahpih gawtna apiak baan ah, Megistrate in huchibang mohpaih a om mi van puakte tengteng nangawn matsak diing in thutankhum thei lai hi. State pawlam a teeng mi kua hiam khat, India khua-le-tui hihna nei himahleh phalna lai piak ahih keileh ‘Inner Line Permit System’ akizatna State sung ah, hiai daan in akaan khak ziak in, amah ut thu in amawklut thei kei hi.
Inner Line Permit Phattuamnate:
1. State pawlam mite akipan gam leitang humbitna hoihtak ahi diing a; phaijang mi khat peuhpeuh kiang ah gam leitang piak leh leisak ahihke’h zuakkhiak louh diing ahi.
2. Tualsuak mite teenna huapsung [i.e., State or District(s)] ah phaijang mite’n gam leitang hong luah diing uh khaamna ahih baan ah, mun-le-mual kip, innmun-loumun kip a neih diing uh khamna vanzat hoihtak hi diing ahi.
Sum sinna toh kisai in tualsuak mite kia’n Dawr neitu hihna leen diing ahihman un van man bikhiahna ah nawngkaina bangmah om lou diing a, kineksiatna tawm tuan mahmah diing hi.
3. Electoral Roll ah pawlam mite guanlut ahihlouh diing ziak in kitelpina (e.g., MDCs, MLAs, & MPs) ah tualsuak mite kia mah teelching in aom thei gige diing uhi.
4. Tualsuak mi Candidate(s) hi lel diing uh ahihman in pawlam mi, phaijang mite’n gen-le-sak hong neipha lou diing ua, amaute pen ‘vote bank’ bangdan a ngaihsutna beita diing hi.
5. Inner Line Permit System in lemna leh muanna ahon puak diing a, tualsuak mite leh pawlam mite kaal ah hiamgamna atawmsak tuan mahmah diing hi.
6. Inner Line Permit System in nam tuam leh zaat tuamtuam hihna toh kisai kepbitna lam ah panpihtu hoihtak ahi diing a, tualsuak mite gam leitang humbitna toh kisai in phattuamna tampi a om thei diing hi.
7. Tualsuak mite neekzonna leh khotang hinkhua toh kisai khantouhna hoihtak a om theihna diing in Inner Line Permit System in hon panpih mahmah diing hi.
8. Tualsuak mite gam leitang luahna munte humbit leh kepbitna diing toh kisai in Inner Line Permit System in nasatak in ahon panpih diing a; pawlam mite (phaijang mite) i teenna District(s) ah kiamsak in a hong om theita diing hi. Tua pen in pawlam a kipan hong lut phaijang mite leh tualsuak mite kaal ah kitheihsiamna leh kizahtuahna a piangsak theita diing hi.
9. Nam neute, pau-le-ham tuam, pu-pa ngeina leh tawndan tuam nei – tualsuak mi khat peuhpeuh khangmang mai lou a, amaute humbitna diing a Inner Line Permit System pen panpihtu vanzat hoihtak ahi ngei diing hi.
Manipur Land Revenue & Land Reforms Act, 1960:
Gam leitang chiamtehna toh kisai Manipur State phaijang huapsung ah tulel a Daan zat a om bel Manipur Land Revenue & Land Reforms Act, 1960 (MLR & LR Act, 1960) kichi ahi hi. Singtang gam (Hill Areas) huapsung ah ahihleh Manipur Hill Areas District Council Act, 1971 & Rules, 1972 nuai ah kivaihawm in om lel hi. Tua baan ah, Manipur (Hill Areas) Village Authority Act, 1956 kichi zong zat in om veve hi.
MLR & LR Act, 1960 pen Manipur Plain Area kia a zat diing chih himahleh phaijang mite’n Manipur State pumpi, Hill Areas (singtang gam) ah leng – phaijang leh singtang gam kibang a hiai Daan pen zat ngeingei diing ahi chih ngaihdan anei maimah uhi. Banghang hiam chihleh, innmun-loumun kiptak, gam leitang amau min a a neihtheihna diing uh ngimna ahi masa phot peuhmah hi. Mun detdou Manipur Hill Areas huapsung ah phaijang mite’n zalentak a hong neithei bang hitale uh tualsuak mite pen neih-le-lam ah hi in, siamna leh pilna lam ah hitaleh, taksapna lianpi nei akihihman in hong thuneihkhum pah diing ua, hon tummang pah diing uh ahi chih a chian hi.
Hill Areas Committee:
Mipi sik-le-tang a Daan bawlpawlpi (Legislative Assembly), Hill Areas akipan tualsuak mite’n kitelpina a om teng in MLA palai 20 Manipur Innpi ah kisawllut zel hi. Hiai Palai 20-te pen Hill Areas Committee Members ahi uhi. Amaute mohpuakna poimoh penpen ahihleh Hill Areas huapsung gam leitang leh kivaihawmna toh kisai in muanna leh bitna a om hia chih leh tualsuak mipite deihna bang dungzui a gam leitang kepbit in aom hia chihte baan ah neekzonna, khotang leh gam-le-nam khantouhna diing in kong bangkim ah Daan bang a kisemsuah hina hiam chih mipite sik-le-tang a kembit a enkaitu ahih ziak un a mohpuakna uh a lian in a poimoh petmah hi.
Manipur Innpi in Inner Line Permit System Manipur State a zat diing deihna ziak in July 13, 2012 in Assembly ah “The Bengal Eastern Frontier Regulation, 1873” kituaktak a Passed in, Phualpi Sorkar ah a pelutta hi. Tua mah bang in, Hill Areas Committee in zong mipite khualna leh gam-le-nam itna ziak a sepsuah diing poimoh masa nei ahi chih phawk tawntung a; amangngilh ngei hetlouh diing ahi.
Hill Areas Committee in Thupukna bawl a, abohzui masak diing kul-le-poimoh kin i taklang diing:
1. The Chin Hill Regulations, 1896 pen India Daan Bupi Bawlphatna 83-veina (Eighty Third Amendment) Act, 2000 [September 8, 2000] in Arunachal Pradesh ah Phualpi Sorkar in Daan hisak in leh zat a a om toh kiton in Manipur State ah leng Hill Areas Committee in kithukimna hoihtak bawl a, Innpi ah Bill a puaklut pah hoih diing ahi. Huchia Phualpi Sorkar in Arunachal Pradesh a hiai Daan (Regulations) zat ahihsak mah bang a Manipur State ah leng Daan hihsak a zuih leh zat ahihtheihna diing a HAC in malak kul-le-poimoh kin ahi. Inner Line Permit System zat hi kei mahleh Tribal mipite humbitna diing in “The Chin Hill Regulations, 1896” ahuntawk mahmah hi.
2. Indian Constitution, Article 371C nuai a thuneihna Hill Areas Committee ah piak ahih dungzui in “Rules of Procedure and Conduct of Business in Manipur Legislative Assembly – Proposed Amendment Bill, 2012” kintak a bawl a Manipur Innpi a luikhiak diing... Article 275 nuai a Consolidated Fund of India, Tribal Sub-Plan kichi pen Planning Department tawn lou a Phualpi Sorkar in tangtak a Hill Areas Committee ah apiaklut theihna diing Daan bawl poimoh thukin ahita hi. Huchi a Manipur (Hill Areas) Autonomous District Councils tungtawn a Hill Districts teng ah Scheduled Tribes, nam tuantualte khantouhna diing Funds hawmzaak ahihtheihna diing in…
3. Manipur (Hill Areas) Autonomous District Council pen in India Daan Bupi nuai ah venbitna mumaltak aneih theihna diing leh gam leitang venbit ahihtheihna diing in Sixth Scheduled Provisions, Manipur Hill Areas huapsung ah zatpah ahihtheihna diing in Hill Areas Committee in nasatak a malak kisam hi. ADC teng in leng kithuahpihna khut taklam apiak chiat diing uh ahi. Huchi lou in zaw, Singtang gam tengteng khahsuahtheih dinmun ah aomta hi.
4. Inner Line Permit System pen ahi diing bangtak a Manipur phaijang mite’n a zuih uh a deihsakhuai toh kiton in, MLR & LR Act, 1960 pen Hill Areas huapsung ah chikmah a zat ahihlouhna diing in, telching a om – Mipi Palai 20 (Hill Areas Committee) in ahihna uh kitheihkhemmoh bawl mai lou a, chin-le-ha suang a pan a honlak uh kisam petmah hi.