India in zalenna (independence) August 15, 1947 in amu a, India gam kichi mipi thuneihna- Socialist, Secular, Democratic Republic Form of Government danbupinuai a ki-uk i hi uhi. Independent, India in amuh 1947 apan January 26, 1950 tawh kal hun teng British India Provisional Constitution kizang phot hi. Huaibel“Sing omlouhna ah gua ki zang”i chih bang ahi phot hi. Himahleh, India Khutsuak Danbupi January 26, 1950 kipatin India gamsung pumpi vaihawmna abukimin kizangta hi chihkuapeuh in i theih uh ahita hi.
India gam zalen ahihma in Ukpi Lenggam tampi mah mah in na kikhen in a Gualzou Leeng hih ding kituh in na kidou mai uh ana hi hi. India gamthuk lamah Landlordte’n thu anei ua, ei omna India Malsuah gam leh Frontier Burma Chin Hills gama Leeng tuam tuam: Pawi, Khalkha, Matupi, Kanpetlet, Tedim-Tonzang Leeng tuam tuamte Burma Union nuai ah nalut in gam ki-ukna vaite nape khia uhi. India malsuah gama teeng Ukpi makaite Manlun Leeng, Haokip Leeng, Guite Leengte, Sailo Lalte Indian Union Danbupi nuai ah na kipekhia in, kuamah mimal Leenggam, Permanent Dictator ki-ukna India Dannuai ah ataktak in om nawn lou hi. Thugente leh Laigelhtu tamtakte’n Manipur Hill Area mite Namtuantualte, Tualsuakmite (Indigenous People) tebitna dingin I Singtanggam hausate (Chiefs) ziaka bit thei lai hamham i hi, chi’n agelh un agen nilouh ua, tua in I hausate’n amau tualsuak khawmite (Indigenous Village People) lak ah apumlum a thuneihkhum nadan in angaihtuah ta uhi. Huchi’n agamsung-khawsung ua Government apan Development Scheme tuamtuam alut khakchiang in, midang khawpihte tan ding hithei salou in, amau sum kilaksak bangin atamzaw Chiefte’n angaihtuahta uhi. Khenkhat ngialin houh, Hotel mun leh mipite lak ah JRY, MNREG, BADP. BRGF, EAS, MOBC chihte Village Chiefte adia “Van a mana hongkia tawh kibang ahi, kuamah hon thuneihpih theih ahi kei” chi’n agenkhe toih toih ua, amau-leh-amau akigen huaiham uhi. JRY leh MNREG a hihleh Village Population, House Counting Number tam leh tawm dandan in asum lut ding zah bikhiah a hongpai ahi. Hiaite Village Chiefte adia Van apan MANA HONGKIA ahi ichi thei tak tak diam? Tuabang dana ngaihtuah zom lai mipi leh Hausa I omlai leh atheih ding thei nailou ahi ding hi.
Hun paisa kum 2/3 paita apan in Churachandpur District Gamgi thu i buaipih mah mah ua COPTAM kiphutkhia in I mansuahsa i gam leitang thu i buaipih uhi. Adiktakin, hiai thu mimal thuneihna Dictator Chiefship a i omziak ua, tualsuak khawmite lemsakna tellou a gam nei Landlord-Chieftainshipte’n amau thu a Phaizang mite kiang a sumlepai a ana zuaksa nung uh, akhawnung a mipit’en kibuaipih nilouh ahizaw hi. Huchi hikei leh Chief’s lamte’n akhawmite tunga a thuneihna uh asuah bang ua Leitang tunga full Power nei tak tak ahih uhleh midang-sadangte’n gamgi hongsuan mawk theihna ding om peuhmah ding hiam chih ngaihtuah thamching ahi.
Tu in Jubilant Oil Companyte’n i Tribal Hill Land ah Tualsuak mite dong lou in Thautui lakkhiatna ding Survey and Testing a hongbawl uh ki deih lou ahi chi in mipite’n i buaipih nawn leu leu uhi. I Tribal Chiefte’n agen bang ua khua leh gamsung a thuniehna nei taktak ahih uleh, amasa in I Hausate un kipawlna Chief’s Union, Kuki Chief’s Union, Zomi Chief’s Union chihte muanhuai tak tak akiphutkhia ua, Adviser muanhuai pipi kibawl uh ahih chiangin, mipi gam neiloute kimalawp lou in, Leitang tunga thuniehna anei tua I Hausa kipawlkhawmten Objection leh dalna hon bawl in kepbitna nna honpan masa uh henla, mipite poimawhna omleh mipite’n panpihl eng ahoih zaw kei dia hia? August 9, 2012 World Indigenous day zatna hun ah ZRO Adviser in “Hiai Oil Companyte nasep ding deihhuai lou mah ahihchiang in i hihtheihtawp leh i nantheihtawp a nan ding in Tualsuakmite’n (Indigenous People) theihtawpa Kiphinna (Hesitation) i bawl louh ngal alampi a omkei” a chi hi. Mipite a dingin Kiphinna tungtawna nanzawh ding kinep huai lou leh ngaphuai kasa kei hi. Hiai hun mah ah Heutupa ZNC General Secretary na hita S. Thangkhangin Ngaihte in “Bang hangin Tualsuakmite hong kidong mah ding hiam, Zomi-Kukite India Constitution ah gam nei a kuama’n hon chiamteh kha loupi, gam neia India Danbupi a mi dottheih/kouhtheih dia ZNC hunlaia Sixth Schedule ki-ukna nuai ah i khua i tui- I Tribal Land teng humbit ni chi a Aktal khuan a i khuan nilouh leh kua mah athou nuam na omlouh pi uh.” ZNC Motto If ZNC die who Live, If ZNC Live who die” chi a Pute T. Gougin, S. Thangkhangin Ngaihte, L. Thianzakham leh Lal Neih Thang Hatlangte pawl Zogam Aktalte a khuan khuan lai un (The Cock Crows) achih lai un “Nambing makai tengin Zogam Aktalte Akgil ah kong non khakkhum ua, vainanung Guahsia in honlap gawp ahita” chi hi.“Tu in zong I gam i lei humbit in, i gama thilpiang manphate tunga thuniehna neiin hong kidong masa zel hen i chih leh State Indigenous mite’n Sih le Sih- Dam le dam, India Constitution pansan in Sixth Schedule ki-ukna mah i sualkhiat louhngal uh alampi omlou phot ahi” chi hi. Pu Gin thugente bildawh thei leng alampi nai pen mah hilou hiam achih huai hi. Huchi ahih kei leh Chieftainship ki-ukna in i gam ahumbit zoukei hialding. Bangziakin I chihleh, India Constitution pen Pure Elected Representative Form of Government ahi. Adiktakin hausa thuniehna ziakin i gam bit hilou in, Tribal Land Protection Act omziaka Chiefship Local Self Administration om thei ham hama hizaw hi. Tuabang ahihman in Phaizangmite’n Indian Constitution nuai a Representative Elected Member tamzawte thupukna pansanin i gam hon luhkhia hiai hiai hizaw uhi.Tua ahihman in Tualsuakmite’n zong i bitna ding un Eimah tualsuak ki-ukna Chieftainship/Dictatorship Form of Administration sangin Democratically Elected Representative Form of 6th Schedule, I Political Goal masa hi henla, huaima in Elected Village Authority mah Democracy tawh kituak a kiptaka i paipih ua, mipite thuniehna mah tawh melma inan khawm kei leh mimal thuniehna pansan in India Danbupi nuai ah melma leh Suamhatte kizoulou ding hi chih pen tuhun dinmun ah ka muhna ahi hi.Tuabanah District guka Elected MDC te’n Kituaktakin Democracy Danbu pansan in hon buluh theite apan Dai (Fencing) honkai le-uh i bitzaw ding uh hi.
Leitung gam tuam tuama Dictatorship ki-ukna gamte kilumlehnate leh aleitung kiheidan a gam khantouhna Development kitholhdante et vengveng poimawh mah mah hi. August 12, 2012 Lamka Post, Sunday Issue ah MNREGS nasepna ah ADC ten 25 % work aguangthei ding uh chih thu ah, MDC te’n 25 % sum kitan ding uh chih ngaihdan in nei ua, tua nanna ding in Khaw Hausa khatin Rs 2000/- chiat kithawh a Court a Hekna bawl ding chih hong kisuah hi. ADC Menberte’n Hausate sum hiam, mipite sum tan ding lai, amau adia vasut hile uh kua a ut mah dia? Himahleh tuabang hilouin MDCte’n mipite amau khua mah ah Work septuak asakte uh 25% aguang ding ua, akhawmi Job Card Holderte mah in ana semding uh chih thu ahi. Hiai thu ah Chiefte’n Democracy Form of Government a kipuakna MDCte hek le uh zong azawh paisuak uh gintak huailou hi. MDCte zoulou hilou in Democratic Principle zou lou ding uh chihna ahi.
Dictatorship/Chieftainship ki-ukna leh Khantouhna Development i chih tuhun chiangin Tui leh Mei kihuat bangin kihua ta hileh kilawm hi. I gam India pen gam khangtou Developing Country hong hita a, Scheme tuam tuam tampi gamsung khantouhna ding honglut ta a, honglut sem sem leh Chiefship a ki-ukna khuate bei hiai hiai mawk hi. Hun paisa lai in Unau Hmar Bial ah buaina na omin, khawneitu Chiefship kivaihawmna khua atam zaw ana beia, mipi Vaihawmna Elected Village Authority Act in aki pua ua, khua khat ah inn 300/400/500/600 chih khawng in ateng ua, mipite kikhualtakin huante bawlin, Pucca innte kibawl a khangtou lel lel uhi. Himahleh Village Authority Act zanglou a Chieftainship kivaihawmna zangkhuate Development alut tam peuh leh Khawmite pem khe sem sem uhi. Chiefship in kipua in, thunei kisa mahle’ng khawmite hong bei chiangin zaw sawt vei tua khuate aneitu in hong kembit den het lou ding uh chih muhsa ahi.
Hiai bang thu kong gelh pen khen khat in zanuam khol lou ding hanga, khenkhat in lah Hausate tawh kituaklou mah mah hiding eive maw, achi om thei ding hi. Kei mimal thu hizaw lou in i gambitna ding leh kituaktak leh kikhual taka i tenkhawm chiang ua, i khua i tui gum ding hanga bit zaw deuh ding ka chihna ahi. Ahih leh Paite Community sung enzualta leng, Zomi-Kuki Conflict omlai a khua kitaisante Savaipaih, Dailon, Tuantung, Singmun, Lawibual chihte tunitan luah louh tenlouhna in a om ni louh hi. Hiai banga a paitouh zel leh Chieftainship in hiai khuate alenkip zou diam? Nam makaite’n leng hiai bang khuate kiluah kikna dingin Policy neih ding leh i achievementding uh hizaw in ka ngaihtuah hi. Hiaithu Nam maikaite Hausate leh hiai thu simkha khempeuh in ngaihtuah tham i sa u hiam? Ki ngaihtuah ni.
Pankhawm hanta ahi a, kikhen pukna ahi chih Thupil lah i thei tetaw ngal ua. I gam dinmun tak tak genkhawm ahihchiangin mipi thakhengdia i telching masak sak lah uimukhen bang tawm tawm zel. Huchi ahih leh I gam Democracy hilou in, before Indian Independence hunlai mah bangin omkik thei heenla, khawsung Hausa Chiefte Full Power na ah kipua hivek lehang navak huai in, zong kibitz zaw kha ding hi.