Manipur Sorkar in Village Authority Election (Hill Areas) a neih diing chi a Theihsakna (Notice) abawl dungzui in Churachandpur District huapsung khua bangzah hiam ah kiteelna neih a aom lai in Naga Khullakpa leh Kuki Hausa (Chief) atamzaw in kiteelna neih diing deih lou in doudal uh a; hiai kiteelna toh kisai nongkaina tampi Manipur Sorkar in maituah lellel hi. Singtang khua tamzawtham ah kiteelna om thei lou diing bang hi. Village Authority Election in singtang mite lak ah “Hamphatna” hia...ahihke’h “Vangsiatna” bangzah hon puak diing hi hiam chih theih haksapi asuak hi. Hamphatna ngah malak a tribal customs and procedures, cultural rights & traditional practices nelhsiahna leh siikdenna ahizaw kha maimah diam chih Naga leh Kuki Hausa tamzawte ngaihdan ahih baan ah, “Chieftainship Institution” beisak diing deihna ziak a Village Authority Election Manipur sorkar in hon sai ahizaw kha diing chih lauhthawnghuai asak ziak ua “oppose or boycott” bawl ahi peuhmah uhi. 

Manipur Singtang khua chih a tualsung kivaihawmna diing chi in India Sorkar in “The Manipur (Village In the Hill Areas) Act, 1956” kichi ana bawlkhia hi. Hiai pen Parliament Enactment ahi a; kum 56 paita a Act (Daan) ana kibawl ahihman in lui law mahmahta chihna suak hi. Amendment (Bawlphatna) khatvei lel leng om nai lou hileh kilawm, huaiziak in bawlphatna diing bangzah hiam om ngei diing in uphuai hi. Etsakna khat lel i taklangh diing: Section 56-na i etleh, Language of village courts pen hichi’n kigelh hi: “All proceedings before a village court shall be in Manipuri.” Village Courts a thu kigente tengteng Manipuri (Meitei pau) a gelh a chiamteh vek diing chihna ahi. Singtang kawm a khua tamzaw a Hausate thugen khempeuh ahihke’h Village Courts Proceedings khempeuh Meitei pau (Manipuri) a gelh diing chih pen singtang mite, abiiktak in Zomi Hausate lak kholdiak a diing in houh nawngkaina tampi hon tun theileh kilawm sak in om hi. Manipuri (Meitei pau) a thugelh pen thil baihlam liai hi lou diing ahihman in pilvanhuai mahmah asuak hi.

Kuki Hausate leh Naga Khullakpa kichite ngaihdan in bel hiai “The Manipur (Village Authority In the Hill Areas) Act, 1956” Amendment bawl masak phot a, huchia Village Authority Election neih hi hen chih pen adeihdan uh ahi. Aziak bel hiai kiteelna pen Manipur Sorkar in hoih asakdan leh adeihdan a hon hihsak sawm ahihna ah “Singtang mite pu-pa ngeina leh tawndan baan ah Hausa Inpi Kivaihawmna” chihte tengteng nelhsiah a bangmah lou a hon koihsak sawmna ahi chih ngaihdan aneih ziak ua “boycott & oppose” bawl ahi uh chih Kuki Inn, Imphal ah All Tribal Chiefs’ Forum, Manipur & CoPTAM in October 30, 2012 ni a Joint-Meeting aneih lai ua agendan uh ahi hi.

Nagaland ah ahihleh India Daan Bupi, Art. 371A nuai ah Special Provision hiai anuai a bang in Nagate a diing a bawlsak in om hi:

(i) religious or social practices of the Nagas,

(ii) Naga customary law and procedures,

(iii) administration of civil and criminal justice involving decisions according to Naga customary law,
(iv) ownership and transfer of land and its resources,Mizoram State a Mizote a diing in zong India Daan Bupi, Art. 371G nuai ah Special Provision hiai bang a bawlsak in om hi:

(v) religious or social practices of the Mizos,
(vi) Mizo customary law and procedures,
(vii) administration of civil and criminal justice involving decisions according to Mizo customary law,
(viii) ownership and transfer of land and its resources,

Manipur State toh kisai Special Provision India Daan Bupi Art. 371C nuai ah Singtang mite a diing a bawl a om ahihleh “Hill Areas” huapsung a Members of Legislative Assembly (MLA) teelching a omte’n “Committee” bawlkhia in, tua pen “Hill Areas Committee” akichi hi. Hiai Committee kivaipuakna leh Daan zuih diing pen Manipur Sorkar in adeihdantak a bawl in “Rules of Procedure and Conduct of Business in the Legislative Assembly of Manipur” kichi bawlkhia hi. Manipur State Government in “Hill Areas Committee” akoihdan dinmun diktak bang hita zen hiam chih ngaihtuah detdet a, Daan abawl pen velthak a, Singtang mite “religious or social practices of the tribals in Manipur; Tribal customary law and procedures, administration of civil and criminal justice involving decisions according to tribal customary law, ownership and transfer of land and its resources” chihte tengteng kepbit a aom sam theihna diing in “Hill Areas Committee” Daan Bu pen kintak a Amendment bawltuak petmah ahihdan kichiantak a theisiam a, mipi ai-oh dia teelching a om, muan mahmah MLA 20-te’n amau ‘Home-work’ ahihdan haizaan siam chiat diing un i gingta hi. Tua baan ah, Money Bill toh kisai hiai Committee in thuneihna aneih theihna diing in zong a Daan Bu pen Bawlphat kul-le-poimoh khempeuhte velchian a kintak a ‘Amendment’ bawl hun petmahta ahi chih zong mipi ai-oh palaite lungsim tawng ah om vekta ngei diing in i lamen hi.

Nagaland leh Mizoram pen Tribal States hinapi in amaute pu-pa ngeina leh tawndan, sabiak leh khotang hinkhua paizia humbit leh kepbitsak kiphamoh ahihleh bangziak a Manipur State pen phaijang mi atamzaw hi ua, Tribals tawmzaw thamte hihna, pu-pa ngeina, tawndan leh sabiak ahihke’h khotang hindan ngeinate kepbit kiphamoh zawtham lou diing adiam...??? Hiai pen ngaikhawk a, Singtang mite i pankhawm uh hun petmahta hi lou hiam?

Village Authority Election tua paitou lellel toh kisai in Hausa Inpi Kivaipuakna kepbit a aom theihna di’n “The Manipur (Village Authority in Hill Areas) Act, 1956” Bawlphatna kintak in om henla, “Village Courts” ahi diing bang a paisak hileh, thubuai leh thukhen diing Pu-pa Ngeina leh Tawndan dungzui a hihtheih tampi om ahihman in vaihawmna hoihtak “Democratic Forms of Local Self-Government” kipanthei diing hi. Phualpi Sorkar akipan sum-le-pai, hamphatna tuamtuam Village-level a hong pai khempeuh ahamphatpih dia kilawm mite lak hong tung theileh, tagah-genthei, meithai leh panpihngai tamtakte’n hamphatpih theile uh adeihhuai tuntun hi. Khua chih ah Development Funds ahi diing bangtak in tung thei henla, huchi in, Gam-le-Nam khantouhna leh Siamsinna lam ah masawnna Zodawn ah hong piang taktak theileh achihhuai petmah hi. Etsakna khat: MGNREGS nuai a Funds etlahna ziak lel a Village Authority Member a pan ut i hihkhaak diing thil lauhuaitak ahi. Sum-le-pai, neih-le-lam, hauhsakna leh neek-le-dawn michih in akiningching i deih chiat uh ka gingta hi. Himahleh sum muhdan dik leh kilawm aom a, tua pen Kristian hinkhua toh kituak ahih diing kisam hi. Midangte tanpual, ngah diing leh muh diing etlahsak diing ahi kei a, hazatna nungngatsan a khat-le-khat kideihsaktuah chiat diing hizaw hi. Adik lou a sum muhna pen detdou lou a, sawtdaih het lou diing ahihman in, mahni sepgah ah lungkimdan siam le’ng khanletna om thei pan phet diing hi. Zankhat thu a hauhsakna chihte pawl akipan kihem mang in, mahni khut nasep gah ah kinga in, kuhkaltak chiat a pang in Village-level akipan Zogam pen Gam nuam in bawl ni!

Zogam ah tuidawn, kikawmtuahna lamlian hoih leh detdou, kawlphe meivak chihte’n mihing hinkhua khoihkha, abulpi a poimohpente ahihman un a kul-le-poimohna munchih, mualchih ah kiningchingtak a koih ahihtheihna diing in kivaihawmna mumal aom masak kiphamoh hi. Vaihawmna Inpi (Autonomous State Assembly) ah vaihawmtute atutkhawm uh chiang in Zodawn khantouhna in masawn theipan phet diing suak hi. Autonomous State sung ah bel District(s) tuamtuam Sixth Schedule Provisions nuai ah mahni kivaihawm in aomta diing a; Zohuan bawl leh lam tuamtuam a khantouhna in nasatak in masawnta diing hi. Huchi in, Village Authority Election toh kisai Autonomous State Assembly in Tribal Customary Law and Procedures toh kituak a zuih diing “Autonomous State Assembly” in Daan Bu Government Gazette ah hon suahkheta diing ahihman in Deputy Commissioner(s), ahihke’h Sub-Divisional Officer(s) leh mipi kaal ah buaina himhim aomta kei diing hi...!!