Myanmar kumpi in Myanmar sung ah Zomi min pen politics vai ah pom theilou a, Chin bek pom thei leh ei Chimnuai mite democracy hong hih hun chiang in tulaitak a Sagaing division sung a om Upper Chindwin pen 1962 malam a bang in Chin state sung ah koih ding i lungsim kam lian pen hipah ding hi.

Zomi min bek pen biakna vai ah Myanmar sung ah kizang thei gige ding hi. Politics vai ah ahihleh Chin aitang in Zomi min i zang thei ngei kei ding hi. Ahang bel ei Chiimnuai mite bek in Zomi chih Chin aitang a pom in, Chin state sung a om veve, ei sang a milip tam zaw thamtham southern Chin mibuppi in a pomlouh hang ahi. Politics vai ah bel i ut luat leh Zomi Chin kichih theih hi. Ahangbel Asho Chin zong politics vai ah na om hi. Tua in a gennop pen Chin minam buppi khat sung ah ‘tribe’ min tuamtuam omte lak ah Zomi zong tribe min khat hi a, Asho zong tribe min khat ahi chihna hi.

Aman tak in Myanmar kumpi in tu in decrocracy a kilaihma in Chin state pen Zo state in hong pomsak in hong kheksak henla, Chin aitang in Zomi min zat ding hong lemsak pih henla, ahihhang in Chindwin luipi pen amin khek lamdanglou in Chindwin luipi mah hihenla, Sagaing Division sung a om Upper Chindwin gambuppi a gam om teng pen Chiimnuai mite gam ahi kichi thei nawnlou ding hi. Tuaban ah democracy a ki-ukna hong kilaih bang in Upper Chindwin gambuppi Kalemyo pan Moreh kikal khempeuh pen constitution ah ei gam Chin State sung ah koih ding in pan kila theilou ding hi. Aman taktak in Myanmar kumpi in Chindwin luipi pen Zodwin luipi a hong kheksak ding ngen in lemsa kei henla, Chindwin luipi min mah hi lailai henla, ahizong in politics vai ah Zo min leh Zomi min ih zat theih ding lem hong sak pih theita leh, Chin minam buppi sung a a sum/ a taan lian pen ding ei Chiimnuai mite ihi uhi. Ahangbel Upper Chindwin gambup tengteng ah eigam koih thei ngei nawnlou ding ihi uhi. Chindwin min khiatna pen ‘hole of Chin’ hiam ‘valley of Chin’ – Chin mite pianna kawvang hiam Chin mite pianna kuamzawl chihna ahi.

Eimiten sum bek deih in gam ih deih kei uhi. Sum pen bangmah hilou in kumkhat sung a gam sung a mi om tengteng sepsuahsa tengteng manphat dan a sum a tuat a tua dungzui a sum kikhenkhia ahi. Tuaman in gam hausa ichihte pen gamsung a mihingte nasepsuahte a manphat dan a tuat uleh gam hausa himai hi. Tua bel gam hausa pen sumhau leh sum value uh sang a manpha chihna ahi. Sum bulpi pen gam chihna ahi. Singapore pen tai 240 kimkot bek in lian a a gam ah bangmah pianglou hi. Bangkim gamdang apan laklut vive ahi. USA ah anntang kg 10 pen US $ 2 in lei uhenla, Singapore ah kg 10 pen US $ 3 in zuak uhenla, hotel neituten hotel ah mi ann nekna pan kg 10 ah US $ 8 bang na khawng leh US $ 5 met chihna hi. Tua US $ 5 neitu in Singapore $ in hong khekkhia hi. Tua man in sum bangmah hilou a, sum kipatna gam poimoh hi. Leitung a gam om tengteng a sum om tengteng susia gai vek leng ann nek ding om nak leh mi khat zong kisilou ding hi. Zong ih buai kei ding uhi. Sun leh zan a ih buaipih pen uh ann hi a, ann pen leitung pan piangkhia ahi. Job 28:5. Mihingte nuntakna ann pen leitung a piang ahihleh mihingte kisap zong leitung mah ah kinga gai hi chihna ahi.

Rome kumpi in AD 72 in Israel gam sim a Jerusalem susia mangkhin a Judate leitung gamteng ah galtai in kithehdalh uhi. German dictator ahi Hitler in 1942-1944 sung in Judate 60,00,000 tak thatlum hi. 1948 in Israel mite in independence hong mu uhi. Leitung gam tuamtuam pan in Israel ah hong teenglut uhi. Apau, alai, a culture, a custom leh biakna, kum zatampi a mansak sa tengteng uh hong puahthak kik uh a, minam mangthanglou hong suak thei kik bilbel uhi. Israel gam a om man in sum neihna leh gal leh sa pan bitna ban ah nam dinsuahna piang thei pan bek hi. Israel gam neuchik a gumtu USA pen Arab mi tengteng muhdah a suak hi.

Upper Chindwin manphat dang gen vet dah mai ni. Upper Chindwin pen eigam sung ah om hitaleh gamlum gam ahihchiang in rubber sing chiing hitale hang bangzah tak in i hau uh diam ka chi hi. Buhchi bung khat Khamtung a i tuhna mun ah pen rubber singnou 400 kisuan thei hi. Kung khat pan in Rs 200.00 a nai man in 2010 pan in kha khat hun sung in kisiak hi. Kum khat sung in kha 10 sung a naai kidoh hi. Asuan apan kum 5 chiang in anaai kidoh theita a, kum 7 a chin chiang in bukim tak in kidoh theita hi. Rubber sing kum 50 dam hi. Thawh ngailou a vat ahi. A nna sep awl hi. A naai pen huan sese lou in a tui mah in ah zuak theih hi. Mawtaw pei, khedap, phelkhai, buangnai nam zatna khempeuh ah kizang hi.

Mizoram toh gamgi Tripura state hauhsakna rubber sing ahi. Mizoram a gamgi naih Tripura leh Assam gamlum teng ah Mizoten zong 2011 apan in rubber nakchiin mahmahta uhi.

India in Sen kumpi pen economics ah Asia ah khatna hong hi ding a Asia hong uk chip thei ding chih ana muhkholh man in ‘Look East” policy kichi programme paipih in Sen gam leh Myanmar toh gamgi kimatte, Arunachal Pradesh, Nagaland, Manipur leh Mizoram pen economics a naktak a dop kang sawm in pan alak saan laitak uh ahi. Tua ding in tua i gen statete sung ah bangchi leh mitengte pen economics a khangtou ding chih ngaihsut ban ah i gen statete sung ah national highway lampi lianpi in a sial saan laitak ahi.

Ei Chiimnuai mite zong tuni apan in Upper Chindwin pen democracy hihchiang a Chin state sung a a om theih ngeingeina ding in constitution ah gelh lut ahihtheih ngei na ding in naktak in panla ni. Ei gam ahong hileh rubber ching ding hang a, tua pen India’ ‘look east’ policy leh Sen kumpi economics hong hat mahmah ding toh kituak ding hi.

Gamdang a galtai a omte democracy a hihchiang in a tunna gamte un a min leh man hoih tak in chiamteh uh a, tuaman in na gam uh hoihta, chiahta un bang chi ta henla hong chiahta leh i Khamtung gam ah a teen ut ding uh lamet huailou a, Kalemyo zang mah ah teen a sawm chiat ding uh up huai hi. Kalemyo zang Upper Chindwin pumpi pen democracy hih chiang in ei Chin Hill state sung ngei a ih koih zoh kei lebel ih maban ding buaihuaipi suak thei ding hi. Khamtung gam lah neuchik hi in, mipil leh hausa masa a ih neihte Kalemyo zang sung kidenna pahpah uhi. Kalemyo zang sung phei kuam lah eimite ukna nuai a omlou in Kawlte khut nuai ah om ding hi. Tua ahihman in hun hong paipai leh midangte in hong neh gawp in ih mangthang ding hi. Tuabang omlouhna ding in Upper Chindwin pen 1962 malam a bang a ei gam sung ngei ahih theihna ding in tuni mahmah apan pan lak kul hi. Ahangbel gam vai toh kisai in khat vei a kipelh leh kipelh mualsuak ding a leitung beitan in kila kik zou nawnlou ding hi. Tua thu pen Kawlten theichian in naktak in pan hong la ngeingei ding uhi. Sum leh pai bel tun zawng mah le hang ih tu leh tate khang ah kihau mahmah thei a, tu a mihaute zong amau damsung a a hauhna khawmlou tampi om ding hi. Sum leh pai pen neih hun ding kikhellou hi. Tuhun a Chiimnuai mite ih zawn mahmah hang un Upper Chindwin pumpi pen Chin state sung a ih koih zawh nak leh Chin minamte sung a a hau ding pen minam ihi ding uhi. Tua ban ah gam ichi hiam gamthem kichian tak i neih kei uhleh hun hong paipai leh kimangthang [assimilated] gawp ding hi. Ahang bel Kalemyo kuam phei a eimi tengteng Kawlte ukna nuai a om vek ding ua, ih mipil leh hausa tengteng ban ah Tonzang leh Tedim township areate a teeng tengteng sang in Kalemyo kuam sung a teeng kitam zaw ding hi.

Ei Chiimnuai mite in tulai tak in Sagaing Division a Upper Chindwin gambup 1962 malam bang a Chin state sung ah koih zou bang hita le hang Kalemyo zang kuam ah eimi leh Kawlte kiteng polh ding hang a a sawt chiang Kawlmi kisuak gai vek ding chih a lauhthawn pen uhi ahi. Hih a daal theihna ding lampi khat bekbek om hi. India gam a om Punjabite, Muslimte, Meiteite leh Thuchiam Lui hun a Israel namte pen assimilation a om ngeihlouhna pen a biakna dan leh ngeina dan pumkhat bang a paikhawm ngitnget hang ahi hi.

A tung a ih gen minamte bang in ih ngeina dan ah Zomi numei peuhpeuh in Zomi hilou kuapeuh pasal ding in a nei thei kei ding a, a neih peuh mah leh aman leh zu thawl kilalou ding a, van zong bangmah kikengsaklou ding hi. Nopni dahni in zong a a nunglamte – anu leh pa, sanggamte, behte kuamah kawm thei ngeilou ding chih gelh lut ding ahi. Tua i ngeina dan toh kituak in biakna dan bupi ah Laipian biakna, Catholic biakna, Khristian biakna leh Buddhist biakna pen eimi kampau sung biakna sung ah tuabang a namdang pasal nei hong kipiak zenzen uleh zong a nu leh pa, tu sawn ta sawn tanpha a panmun bangmah piak ngeilouh ding chih thu gelh lut a gakchip ding ahi.

Assimilation tungtang ah khauh pai mahmah ding ichih uleh numei leh pasal in Zomi hilou namdang peuhpeuh pasal hiam zi hiam in teenpih thei ngeilou ding, a tenpih om leh zong amau nupa bek hilou, atu ata leh tu sawnsawn tan a nopni, dahni, bangchik hun peuh a nu leh pa, sanggamte leh behte kawm thei ngeilou ding hi. Namdang teenpih peuhmah man leh mual kilalou ding, zong ki-inntuan theilou ding, a sisan zoppihte khat vei zong kawm theilou ding chih pen ngeina dan bupi ah gelh ding ahi. Tua dungzui in ei pau a biakna dan bupi in eimite pen namdang zi leh pasal nei peuhmah biakna sung ah tu leh ta, tu sawnsawn tan pha in bangmah panmun kipe theilou ding chih gelh a chiamteh ding ahi.

India gam a assimilation om thei ngeilou Sikh/Punjabite leh Manipur a Meitei gam bang ah hithei leh vapai in amau mahmah toh kam leh kam in kidong ngiat in tua pen eimite ngeina dan leh biakna dan ah gelh lut thei pan bang hilehang hoih zaw sem lai ding hi.

Ih gentak bang in Isarelte pen gamteng a galtai a om himah le uh namdangte lak a assimilation om theihlouhna pen a sahkhua dan leh ngeina dan a kibang lian a apaikhawm hang ahi. Biakna dan kembittu pen ngeina dan kembittu ahih pah hang ahi hi. Muslimte zong a biakna dan leh ngeina dan a ton khop gige man in assimilation om thei ngeilou hi.

Mikangten Burma gam independence apiak ding in Upper Chindwin gambup pen Chinland map sung ah gelh lut in Kalemyo pen Chin state capital ding in na bawl khol uhi. Tuaman in Kalemyo uk leh Upper Chindwin neitu Chin state sung a mun poimoh pen kemtu ei Chiimnuaimi in Chin state pumpi aitang in Panglong Agreement 1947 ah Burma in independence amuhna ding in thukimpihna [ signature of agreement n recommendation ] suai na kai hi. Chin state capital a Kalemyo a kizat sung in ei Chiimnuai mite pen Chin minam bup uktu, amakaitu, a lian pen leh mitam pen ihi uhi. Tua pen Falam mitten hong haza lua ahihchiang in Pu Zahrelian ( Falammi ) in Chin Minister a hong septak chiang in Chin Special Division Act kichi bawlkhia, phuankhia in supiching hi. Tua Act dungzui in Upper Chindwin gambuppi tengteng Sagaing Division sung a heikhe mang khin hi. Tua Act hang mah in state capital a Kalemyo kizang pen Hakha ah kisuan khesak hi. Tua Act hang mah in ei Chin mibup sung ah gam lian leh deihhuai nei penpen gam neu leh deihhuailou pen Tedim leh Tonzang khamtung gam bek a neite ih hong suak khong mawk hi. Nidang a Chin minam bup uktu hi gige pen minam neu ih hong suakta hi. Tua Act pen Pu Zahrelian in Chiimnuai mite suksiatna ding bek a ngaihsutna a phuan khiak leh a lohchinsak ahi.

Aman tak in Southern Chinten tulai politics toh kisai in Chiimnuai mite tung ah ‘Zomi kichi ni” chi in hong kuppih le uh eimiten,’Hi nai kei hen. Upper Chindwin buppi Chin state sung a ih koih kik zoh ban ah Chindwin Luipi min pen Zodwin lui a ih khekkhit zohma siah uh politics vaitoh Zomi pen Chin aitang in zang kei phot ni, ih zat leh zong Zomi Chin bek zang ni,” a chi ding penpen in Chin aitang in Zomi min bek zang ut a ih pan masakna un gam deihlou, mi nam genthei leh mangthang a om ding ih hihtheihna ding hong laakkhia hi.

Pu Aung Sann in Panglong agreement 1947 ah ‘ leaders of the supreme council of the union of hill peoples’ tung ah,’I gam bup min ding pen Burma kichi ding, kou minam min ahihleh Myanmar ahi’ achih chiang in Burma gambup a khamtungmi makai tengteng zou a, independence la hi. Kawlte pen Burma gambup a thunei pen leh mitam pen ban ah namdang teng uktu in om hi. Tuabang a Kawlten thuneihna toh kisai in amau sang a lian zaw a om louh tak in 1989 in Burma min pen Myanmar in khek pan phet uhi.

India constitution sung a minam chiamtehna ah Mizoram a eimite pen Sukte hiam Guite min toh na kichiamteh hi. 1965 in Pu Tun Kho Pum nuai ah eimi omten Paite min toh gam na ngen uhi. Mizoten a gam sung ah Paite min chiamtehna omlou chih a theih chiang un Delhi ah India kumpi tung ah Paite pen gamdang mi ahi chi a ahektak chiang un gam a nget uh a ngah ding lai pen khaktan in om hi. Eimiten thu saupi na ngaihtuah uhenla, constitution a om bang in Sukte hiam Guite min zang in gam na ngen phot uhela, a ngah zoh chiang un damdam a ngaihsutna takpi zang a Paite min a khek ding dan a ngaihtuah pat ding uh hi a, hih khiallua, khatvei thu, nawk khat a thu tawp tun sawmna ziak ahi hi.

India constitution sung ah Lakher chih tribe min om hi. Tua pen amau kichihna min hilou in namdangten a engchihna min pen nam min in nei suak uhi. Lakher a khiatna in ‘La’ pen pat khau leh ‘kher’ pen khek chihna ahi a ‘patkhau khekte’ chihna ahi. Pawi kichi zong India constitution sung a tribe min mah ahi. Amau kichihna hilou in namdangten a enghouna min uh ahi. Pawi chihna in ‘luzang’, ‘ lusip omna mun,’’samtum mite’ chih genna ahi.

‘Pawi’ leh ‘Lakher’ namten India constitution sung ah a nam min ding un gelh lut kha uhi. Consitution sung a kigelh ahihman in tua min zang in gam na ngen ua Mizoten zong gamdang mi na hi uh chi thei tuanlou uhi. A gam nget uh a mau khut sung a a om zoh chiang bek in India kumpi ah ka minam min uh man kei, namdangte hong sapna min na nei kha hi ung, kou min diktak in hong kheksak un chi a a nget chiang un kuaman niallou hi. 1988 a Rajiv Gandhi in India Prime Minister ahihlai in constitution a ‘Lakher’ leh ‘Pawi’ chihte ‘Mara’ leh ‘Lai’ chiin khek sak tuak hi. A tribe min a khektak chiang un a gam min uh zong khek uh chihna hipah mai hi.

Aman tak in Zomi pen ei leh ei kichihna min hi a, ‘Chin’ pen Lakher leh Pawi mahbang a namdangte hong engchihna min ahi. Zomi min in ih lungsim hong vut veva hi. Chin kichih ding sang in Zomi kichih ding pen hih article gelhpa, eimi dang om tengteng sang a a ut penpa ka hi. Ahizong in tulai politics dinmun ah Chin hiam Zomi Chin hiam min bek hithei hi. Chin min aitang a Zomi min ih zat hun ding pen tu a Upper Chindwin buppi Kalemyo zang kuam zawlpi tengteng Myanmar constitution a Chin state gam mah hi chi a gelh lut zoh chiang zat theih pat hileh deih huai hi. Tua ma in Pong Kingdom AD 80 -1474 kichi laibu Thai leh English a kigelh pen Kawl pau leh Chin pau a leh khiat a Myanmar gam sung teng a hawmzak a, kumpi uliante tua laibu toh thuzoh a, Chndwin pen Zodwin a khek a Chin state pen Zo state a khek zoh phot ding kul hi. Psalm laibu sung ah Israelten a a hawmlai in beh gamgi ding in lui na zang uh chih gelh a om bang in Mangkangten leitung buppi a uklai un gam khat leh gam khat gamgi leh state gamgi ding a khenchiang un lui na zang gige tangpi uhi. US $ thupi kisa chiat a leitung buppi a US $ om teng sang in Chindwin gam zang buppi ka deih zaw hi.

Pong Kingdom AD 80 -1474 laibu in a gen dan in hih hun sung in a kumpite un Thailand pan in uk a, Bengal gam, Sen gam, Vietnam gam leh Kawlgam laizang phei pawlkhat huam hi. Pong kumpi khangsimna ah Zomite na kihel hi. Hih Pong Kingdom ah state 10, district 99 om ah state nambat 9na pen Zo province kichi hi. Zo province sung ah state 4 om a, Khangsei district { Nagaland leh Manipur saklam teng], Kathe-meitei district, Kalay district ( Chindwin) leh Khampat district ahi. Tu a Khampat khua a nitumna lam a bungpi sing pouna pen hih hunlai a ih pipute uh suan leh sulnung ahi. Hih Khampat bungpi mun pen Mizoram Central YMA in a mun leikhia in kisialou ding in vengbit uhi.

Ih tuppi pen uh Upper Chindwin pen bangchileh Chin state sung ah koih thei ding chih thu ahi. Akoih theihna ding in lampi khat bek om a, tua pen singnuaimi kiphuan ding in galvan tawi in thagum zang a kumpi nawk ding in,’Upper Chindwin pen Chin state sung a koih ding chih constitution a gelh lut ahih kei leh kidou, kikap ding hi hang’ chi a kumpi tung ah phu ding hihang. Kalemyo phaizang kuam, Upper Chindwin pumpi sung a Chin mi vote om zah leh Chin milou Kawl mite vote om zah kibuksak in Chin mi a tam zawk leh Chin state sung a koih ding Kawl milip a tam zawk leh Sagaing a koih ding chih bang hileh Kawlngian toh panla ding uh ahihman in kilohchinglou ding hi. Kawlte lungsim in bel democracy chiang in gamgi kikhung sulamdanglou ding, Panglong Agreement 1947 pen kisubei leh chih a tup tinten uh hi a, tua pen Kawlmilou teng in Panglong Agreement 1947 tungtawn in democracy a om ding chiin phu leuleu uhi.

USA, UNO leh adangte in zong Myanmar kumpi leh Aung Saan Su Kyi tung ah,”Tapong ( insurgent) omteng toh kilemna bawl phot unla, tua na kilemna dungzui in constitution gelh khia in constitution thak bangbang in democracy in pai un,” chih a thu phut uleh genpih pen uh ahi.

Kam bek toh gen in bel kingah zou ngeilou ding a, tua sang in genlouh hoih zaw lai hi. Kumpi tung a galvan zang a thagum toh ih nget a hong lau mahmah kei uleh zong hong pialou lai ding hi. Kumpi tung ah galvan zang a ngen a ih nget hong piak kei leh kap pah ding a ih om chiang in ih ngah pan ding hi. Taphong phuan in ngen le bel ih ngah teitei ding hi ahangbel independence ngen hilou hang a Upper Chindwin pen Chin state sung a koih ding ngen ihih bek hang ahi.

Mikang kumpi in London apan Burma independence a piak lai a Chinland state map a gelh pen a copy lak a ei Chiimnuai mite a tuam vilvel a tapong min khat phuan a tua tungtawn a nget ding ahi. South Chinte tapong CNF tung ah zong hong ngetpih un chi a gen ding a, Upper Chindwin a teeng Chinmite bek hilou Chin state pumpi, Chin mibuppi tung ah zong Upper Chindwin pen Chin state sung a koih ding in ngen ding a chial ding hilai hi.

Lai Siangthou sung Isai 60:12; Acts 17:26; Late 22:28; Isai 58:11-12; Nehemia 9:36; II Khangthu 20:15; Paikhiatna 14:14; Jeremia 1:10; John 19:11; Daniel 5:26. I Kumpi 9:7,11:11 leh mundang tampi ah gam pen Pasian bawl ahihdan leh a sung ami tengteng zong Amah thuthu a om ahihdan chiantak in kithei hi. Tuaman in ei Chiimnuai mite in zong Upper Chindwin pen Chin state sung a om theihna ding in Pasian tung ah hun sawtpi sung ann ngawl kawm a upna khaichi vawh tungtawn a ih nget tawntung ding uh ahi.

Ei Chiimnuai miten tapong CNF(O) hiam CNF ( U) min hiam phuan in ih kiphin ding uhi. ‘O’ pen original, ‘U’ pen Upper Chindwin chihna hipah ding hi. Chin min leh Chin state pen Chindwin luipi min hang a hong piangkhia bek hi a, Chindwin luipi pen ei Chin minam buppi sung ah Chiimnuai mite omna kuam sung sese a a om hang ahi hi. India zong Jammu & Kashmir apan luipi ‘Indus’ luangsuk pan in India kichi hi.

CNF(O) pen Manipur a ZRA, Thadou-Kuki tapongte, Naga tapong Moreh kim a uk NSCN(IM) leh Myanmar Naga tapong NSCN(K) toh kipawl khawm thei ding uhi. NSCN(K) toh Myanmar kumpi in kilemna thu a gen khawm uhi. NSCN(IM) in India in independence amuhma apan tuni tan tawplou in independence ngen hi. 1960 in Thadou-Kukite in Hmar mite toh kidou in zoulou uhi. Meiteite tosawnna hang in 1992-1993 in Nagate toh kidou leuleu in zoulou hi. 1997 in Meiteite tosawnna hang mah ih Zomite hong dou leuleu uh a, ei mawhlou ihihman in Pasian thupha ih ngah uhi.

Eimite tapong CNF(O) pen Southern Chin mite tapong CNF/CAN toh kipawllou ding hi. Ahangbel Myanmar kumpi in divide and rule policy a hong uk khumsa ahi. Tu in democracy hihma in Chin state capital pen Hakha hi a, Hakha miten Kalemyo pen Chin state ah om leh Chin state capital pen Hakha pan in Kalemyo ah kisuan ding hi chi ding uhi. Falam miten lah Yangon pan a state radio language ding a Falam pau kizang a, tulai democracy hih ma in zong galkap sung a Mymyoh Military Centre pan in Tedim pau in radio news kigenkhia ahi chi leuleu ding uhi. Amantak in Falam a Pawi mite pen amau sang a lian zaw ding minam dang khat peuh a om leh thagum a zoh a kingap uh leh thagum zang a vatmai sawm pahpah uh chih pen pipu hun apan ih theih ahi. Pu Zahrelian hang a Upper Chindwin pen Sagaing division sung a heikhiat ahi chih mangngilh hetlouh ding ahi.

Ei Chiimnuai mite in thupi tak in kumpi tung ah Upper Chindwin ih ngen ding uh a, ih lohchin chiang in Southern Chin mite toh ih kihoutheih kei leh zong Upper Chindwin pumpi, Tedim leh Tonzang township areate kigawm in state min dang khat phuak in Southern Chinte toh om khawmlou in a tuam vilvel in ih om tuam mai ding hi. Upper Chindwin pen ih ngah nak leh Chin mi buppi sung ah a nuamsa ding penpen eimite ihi ding uhi. Pasian nna sem in Ama mai zong in ann ngawl in Pasian tung ah thungen in tulaitak a Upper Chindwin, Kalemyo pan Moreh kikal sung a namdang Chin mi hilou tengteng mundang a a pemkhiatna ding in ngen le hang Pasian in hong lohching sak ngei ding hi.

2012 sung in Tedim in a thu bek toh district ngen a, ahihhang in Hakha pen district pia hi. Ataktak in Hakha pen state capital ahihman in district piak ngai nawnlou hi. Hakha in district angah hang bel CNF leh kumpite kilemna hang ahi.
Tapong CNF(O) tungtawn in ngen ni ka chihna bel ngah teitei tupna hang ahi. Tu in democracy chiang in Upper Chindwin ngah kei lehang leitung bei dong a ngah zou ngei nawnlou ding hihang. Sum leh pai pen tu in ih neihlouh hang in ih tu, ih tate khang ah mihau penpen zong kisuak thei hi. Ahizong in politics vai ah khatvei kipelh leh kipelh muaksuak thei hi. Ahang pen gam toh kisai ahihhang ahi hi.

Global Zomi Alliance in Kalemyo ah headquarter a zat ding gam lianpi lei sawm hi. Tua munpi lianpi pen Upper Chindwin a Kalemto zang Chin state sung ah koih zou kei ta le hang pen chikmah chiang in Zomiten leitung ah gam nei ngei nawnlou ding hihang. Ngaihsutna piak taktak hun lai taka hi a zekai ma in.