Phamsa Pu Tunkhopum Baite Sulnung & Zomi Political Movement
Tulai khangnou lia-le-tang lungngai dih ve ni;
Igam pu-pa satsa lei tulding bangzou hi, Ka gam ka lei ichi a, kamkei bang ihang;
Igual in zingvai honghawm khumta… Kua hiam ding ding, kua hiam kuan ding? I gam a ding in, itna taktak Pathian anei gamlei a it ding, gemlei ahuai tusawn khangsawm ma khual ding; Hongsung hen aw tung Thianmang in pu-pa satsa gam, Machiang huai ding hon siam hen aw” ~ Pu V Siampu
Thumapi:
I tangthu uh sutding ahihchiang in ikim ikiang uate a patlouh theihlouh ahihman in Kidoupi-II na ahong beikuan khawnga kipat in entou masa le hang. 1946 kum khawng in kidoupi-II na hong daita ahihman in Manipur aom Nagate ahong patau masa pen ua, A.Z Phizo makaih in Nagate tenna tengteng Manipur hin Naga Hills hitaleh vaihawmna khat a gawma, mahni kivaipuakna gamkhat bawlkhiak ding chih tupna toh Naga National Council (NNC) kichi ahon phutkhiata uhi. Hiai NNC ten atup leh angimte uh muntamtak a ahon tangkou pih chiang un Ukhrul a 1919 kuma ana kiphutkhia Tangkhul Naga Long kichite, banah Kabui Naga Association in akhaikhawm Zeliangrong-Zemis, Liangmeis leh Rongmei kichi ten leng hiai pawlpi Naga National Council hong lunglut pih in kithuahpihna pe souhsouh mai uhi. Ahihleh bangziaka huchibang pawlpi hong piangkhia hiam? ichih aleh thuchiam omsa mah banga British ten India zalenna piaka agam taihsan chih ana hi a, ataihsat nung chiang ua Manipur singtangmite kivaihawmna tuama om ding chih ana tup ziak ua hiai pawlpi hong kipan uh ahi zaw hi. I theihchiatsa mah bang un Manipur pen British thahatna ziaka state alaklut ahihziak in Meiteite/phaizang mite tamzaw mahle uh akisaktheihpih luat ding uh omtuanlou hi. A.Z Phizou in campaign hon bawlzom zel in khatvei leng Aizawl lam aom, Lushai Hills aheutute kiang ah chialna bawl ding in 1947 kum in va hoh ngei chi uhi.
Khulmi National Union (Khul Union):
Huchibanga Naga ten PAWLPI ahon bawltak ua kipat inchuh Non-Naga te ading in leng lung-ap huai mahmah ahingei dinga, 1946 kum in Heutupa Zavum makaihna in Imphal a Old Lambulane ah kikhopna thupitak ana sam uhi. Tua hun ah nam tuamtuam Non-Nagate Kuki, Thahdou, Paite, Hmar, Gangte, Vaiphei, Mayon, Lamkang, Maring, Anal, Chiru, etc.. chihte telvek sipsip uh a, tua kikhopna ah Paite ai-oh in Pu T.Thangkhai ana tela, Kom lam akipat in Pu Teba Kilong te ana tel uhi. Himahleh hiai kikhopna ah buaina piang pah ngala, Kuki ten communication leh official language dinga Kuki pau zat ding achih tinten ziak un huai meeting atel Kuki pau zanglou siah in pomtheilou in pawt khiaksan ngal uhi. Huchi vengvung a ahong om nung un October 24, 1946 in Zavum Misao, President leh T.Kipgen, Secretary hihna toh Kuki National Assembly (KNA) ahon phutkhia uhi. Amau ahon tup leuleu uh ahihleh Kuki State bawlkhiak ding chih ahong hinawn hi. Huchibang vengvung ahong hihtak chiang in ei ate leng om maimai theinawn ta lou, hiai KNA pawl kibawlna alah telkhalou teng, viz Hmar, Paite, Thadou(khenkhat), Vaiphei, Kom, Maring, Chiru, Anal (Pakan), Lushai, Mate, Lhungdim, Lenthlang, Changsan, Sukte, Biete leh Shaikhum ten Khulmi National Union (Atom in Khul Union) kichi 1946 in ahon phutkhe nawn uhi. Huchi’n Manipur singtangmite tuh seh 3 (thum) hong phata, Nagate, ban ah Non-Nagate seh 2 kisuah. Tuahunlai a Nagate gamluah ahihleh Ukhrul, Senapati leh Tamenglong ahi a, Kukite a ahihleh Sadar Hills, Tamenglong, Chandel leh Ukhrul, Churachandpur bial a mun khenkhat ahi. Tuaban ah KHUL UNION atelten Churachandpur leh Chandel distrist luah lel uhi.
Hiai I PAWLPI masa uh KHUL UNION in atup ahileh Naga leh Meitei toh naktaka kithuaha pankhawm ahi chi in a President uh Teba Kilong in nasatak in hon tangkou hi. Mitampi ten lunglut pih mahmah in Churachanpur district ah leng Unit thak Lamka, Saikot, Singngat, Thanlon, Parbung chihte ah hong ki phut zungzung pah hi. Hiai Union in atup pipen Paite, Simte, Gangte, Zou te kianga genkhe ding in Pu Thangvang seh in oma, Zo kual ava vakna mun khenkhat bang ah “Union na chh uh nektheih hia?” ana chipawl bangom chi uhi. Hiaiteng kialeng hilou KHUL UNION inchuh ma hon sawn mahmah maia, singtanglam Bukpi, Aibulawn, Mualkui, Mualnuam, Songtal, Mualpheng, Phawibawk Munlian (Vangaitang), Buangmun (Vangaitang), Kaihlam, Galkapkot, Hanship, Dailawn, Savaipaih, Pearsonmun chihte leh mundang tampi ah volunteer tampi nei in pawlpi liantak ahongsuak hi. Hiai KHUL UNION tup nawn uh ahihleh Manipur singtangmite bitna dinga panlak ding ahihban ah Manipur Constitution Making Boby a kiguanlut ding chih ahong hinawn leuleu hi. Tua dungzui in hiai member 14 lak ah telding in Khulmi apat TC Tiankham (Tonsing Christian Tiankham) leh Pu Tiba Kilong ahon guangzou ua, huaituh KHULMI UNION lohchinna thupitak in angai ua, kipak mahmah uhi. Tuazoh in Manipur state in India Independent zom ding ahihna ah kitelna ahong omma Interim Govt Manipur Pu PB Singh makaihan nuai ah bawl in hong om a, huai ah singtangmite lak apat in Pu TC Tiankam leh Major Khathing ten Minister hihna tangkha ua, Pu Teba Kilong pen Adviser in koih uhi. Hiai Interim govt 1947 apan Manipur pen Indian Union sunga om di sa a ngaihtuah ahihziak in nasemthei hongsuakta ua, 1948 kitelna ah leng Pu TC Tiankham Hanship constituency apat telching in oma, Pu Teba Kilong pen Moirang Constituency apat telching in om hi.
Tuahunlai in Manipur sorkal nasemte leh hausate tuh athunei petmah ua, athu uh kuamah in asel ngam kei uhi. Mipi vantangte suak-le-sal a nasatak a zang in athil poimohte uh antang, khawnvaktui, meh ding chihte hakkol a pawsak in Tipaimukh, Thanlon, Lamka, Imphal chihte ah kivialleh saksak maimah ua, loh gina leng pelou zomah in athawn in mipiten thuakgim thei mahmah mai uhi. Tualai mah in khochih in dan aneichiat ua, inn chih in kumteng a hausate kianga BUHSUN piak gige ding chi ahi a, kuamah apelou ngam aomkei uhi. Tuamah bang in sa amat chiang unle SALIANG piakding chih ahiawna, hiaileng thumang tak in pe gige uhi. Hiai suak-le-sal a kibawl gentheihnate, buhsun, tangseu, saliang chihte KHUL UNION volunteer ten nasatak in hon doudal ua, Hausa leh mipite kal ah kinokna thupi lua omkei mahleh kitheihsiamlouhna ana om tou cheuhcheuh a, kiphinna tuamtuam aneih zoh nung un 1947 kum apat in hiaituh ahon tawpsan theita uhi. Huchibanga KHUL UNION in nasep ahonpat laitak in Mizoram ah leng Mizo Union kichi Pu H.K.Bawichhuaka makaihna in ana kiphut khia a, amau tuh India Independent hong hiding ahihna ah Minipur simtuma Hmarte tenna bial leh Mizo Hills (tua hun laia Assam) toh omkhawma, Mizo Hill District bawlkhiak ding chih tup in ana nei uhi. Hiai Union ahong hat dektak in I KHUL UNION ua iompih ngitnget uh Hmar ten ana lunglut pih in October 11, 1947 in honna zopsan maimah uhi. Hiai tuh Khul Union ading a thilkipahhuai hilou in lungliap huai mahmah thil ahong hita hi.
Hiai Mizo Union ten nasepn honpan in ahong kiphinna ziak un Hmar bial leh Mizoram ah buaina neuhneuh ana om hihtuak hi. Huchih hunlai vel mah in ei Khul Union movement leng ana haat touzel mahleh kisualna, inn kihalsak, inn ki phelsak, sisan ki suahna chihte omhetlou in amah in hongdai thei hi. Buaina omsun te bel kampau a nasaktak a kihouna, ki heekna, ki gapna, heitang ki tolsak chihte ahilel hi. Tua nunglam in Mizo Union in Lushai Hills Autonomous District Council hong ngahtak in Hmar bial huamkhalou maimah a, thangpai lua in Mizo Union hon nuseta ua, December 5, 1960 in Hmar National Union kichi ahon phutkhe ta uhi. Mizo Union leh Khul Union in abuaipih mahmah hausa toh kisai tuh hiai Lushai Hills Autonomous District Council in Lushai Hills ah hihbei zoua, tun Village Council chia khek in hong om a, hausate kiang ah 14 lakh compensation pia in ana ki sulungdam uh kichi hi.
Paite National Council (PNC)
Huchihlai in Khul Union a intek taka ana pang Paite mite lak ah makai pawlmin maha politics kipat khawmna lemtang zaw ding chih ngaihtuahna in Tangnuam ah Paite kampau heutu bangzah hiam kikaikhawm in Paite National Council (PNC) kichi Pu Thangkhai makaihna nuai ah ahon phut kheta uhi (1949). Huchibang ahong hihchiang in Khul Union sunga nam tuamtuam in amau pauchiat hon ngaina in Vaiphei National Union (VNO), Simte National Council (SNC), United Zomi Organization (UZO), Gangte Tribal Union (GTU), Komrem Association leh atuamtuam te hong ding khe teltulta uhi. Huchibang mah in Chandel lama I unaute uh Maring, Mayon, Anal, Monsang chihten Naga National Council ana zomnawn uhi. Huchiin, mahni nambing pauchiat min in pawl ahong kibawla, mahni telna chiat sihpih ngam chiat ding in ahon len tinten ta uhi.
Hun hongpai zel in Kuki leh Hmar tualgal huaise takmai ahong oma, aziak adu adate I houlim mankei ding ua, eilaka buaina ahong tun naziak pen bel Hmar ten lah amaulam apang ding ua hon deih chihphetlouh hon chial uh, huchibanga Kuki ten leng kou athuaktu apang hita leng honna gal-et in na hon nuihsan maimah ding uam chih dotna hon bawl khum uh ahihman in I makaite uh ading in lungbuai huai chi mahmah mai hi. I makaite un, tuahun lai in Khul Union lah muihta ahihman in PNC akipua in, neutral aom ding, kuamah guptuam leh paihtuam neihlouh a eimah omna khua chiat venbit theih dingdan lampi ngaihtuah ding chih hon thupukta ua, imi isate uh khenkhat Hmar area leh Kuki area aomkhate galtai bng om in mahni khuachiat venbit theihna dingdan ngaihtuah in buaichiat uh hihtuak hi.
Hiai Kuki leh Hmar buaina ahong thennung in Naga Independence Movement in I Guite kual uh ahon subuai khanawn leuleu hi. Abul lama igentak India in Independence angahdeka A.Z.Phizo makaihna a pawlpi ana patkhiak un masawntou zela, India sepaihte toh akinawkna uh nasa semsem ahihman in itenna district uh leng disturbed area (tulai a Armed Force Special Power Act, 1958 ichih uh) in ahon huapkha mawk hi. Hiai tuh bangziak hiam ichihleh Naga gamnuai miten East Pakistan (tua Bangladesh) toh kikawmtuahna dia I Guite kual uh adiaka Lungthul, Kangkap, Sinzawl chihte lampi dia ana totkhak ziak uh ahi. Tua ahihziakin Assam Rifles te zong Songtal ah sawtpi ki camp uh hihtuak. Hiai buaina hunsung in khatvei Lungthul ah Naga helte leh Sepaihte kikaptuah ua, sepaih lamte 2 asih ban uah Naga helte lamte leng si ding ua gintak ahi chihthu kiza chi uhi. Tua buaina ziak in sepaih tuh Sinzawl, Songtal, Kangkap chihte ah helicopter in kinawnlut zungzung maimah chi uhi. Akhonung thu kiza dan in tua hunlai in helicopter zang in Pu Nehru in Songtal vapha chihthu zong om hihtuak hi.
I theihchiatsa mahbang un Paite mite Manipur, Mizorm leh Chin Hills (Burma) ateng Tedim te toh phung khat, tang khat, pau kibang leh gampek khat a tengkhawm ihihlai un Lord Armherst in Burma tung ah gal hon bawla, hong kidou ekek ua, February 24, 1826 in kilemna suai kum 2 sung khawng ding nung in hon kaithei uhi. Tua kilemna “Treaty of Yandaboo” kichi ah Chin/Paite/Zomi te tenna Manipur sim lam leh suahlam gamte Manipur a pan a vaihawmkhum ding chi uh ahihman in ei Zomi te tenna tuh 1937 kum in gam 2 akhenkhiak in I hong omta uhi. Hun hongpai zel in PNC in Oct 10-13, 1957 kum in Hanship ah khawmpi thupitak ana nei ua, Zomite India leh Burma akhen aompen gamkhat, kivaihawmna khat a omkhawm theihna dinga nataka panlak ding in thupuk ua, tua bohzuina in memorandum “Chin Re-unification” kichi India Prime Minister kiang ah May 30, 1960 in ana kheta uhi. Tuahun laia PNC President Pu T.Goukhenpau ahi a, G/Secy Pu S Vungkhawm ahi. Paite miten politics agel peuhmah chiang un amau unaupih Chin State a mite tellou in buchinglou in ngai uh a, kalkhat asuan pat chiang un asuannawn na d uah Chin State a a unaute uh bang achi di ua?, chih dotna poimoh pahpah ahi zel hi. Huchi ahihziak in Chin State lamte tellou achuh Paite politics “buchinglou” bang in ngaihtuah uhi.
[Hmmm…. Tua Re-unification kichi hoihtak kha (inspiration) ana tangkha ahi ngei ding a, Panglian khomi Pa Tunkhopum Baite in Chin mite kigawm khawm na dinga thagum-thatang leh thaulawng poimohsa ahihman in hon masuan in pan honlata hi…. Tua I thulu ua lutsawm pandan ihi, Chin Liberation Army ichihchiang in Pu Tunkhopum Baite sulnung genna toh kibang ahi chihdan in ana ngaituah ding uh…]
CHIN LIBERATION ARMY (CLA)
Igen taksa mah bang in PNC in Chin-Reunification movement ahon patkhiak pen Panglian Khomi Pu Tunkhopum Baite in khat (inspiration) ana ngah mahmah ahi dinga, Chin mite mite gawmkhawm na ding pen thagum-thatang leh thaulawng tellou a mualsuah lou ding ihi chih ngaihtuahna nei kawm in akhua uh Panglian akipan hong kipankhia in Sugnu, Geljang chihte leh akiim a khua omte hon tawnkual in Chin mite gamkhat leh leitang khata teng himahlehang vaihawmna tuama khenzak aom pen iki gawmkhawm nawn ding uh ahi, hiai tangtun na ding in thagum-thatang lou ngal alampi dang ding omlou chih in hong tangkou ta mai hi. Tangval gam-itte hip mahmah ahi dinga, sawtlou chik nung in tangval ahon khawm a, December 23, 1962 in Chin Liberation Army (CLA) or Chin Army ahon phuan hi. Tua ah President Pu Tunkhopum Baite ahi a, V/President Paobul Baite (@Pa Bul) ahi a, Burma army akipan a Burma kivaihawmna deihlou leh Zomite adinga bitna om salou a ahongtai, Col. Shonkhopau, Chief of Army Staff ahi a, Burma Army mah apan hongtai, Lt.Col. Ngullet Home Secy. leh Hangkhokam, Brigadier ahi. Amauten tangval gamit mi 21 underground a lutpih in hiai movement thak ahon pan uhi.
January 26, 1963 nitak dak 6:00 in Sungnu Police Station thau in ahon ava kapta tuartuar mai uh
uhi. Mipite patau in bangthil om hiam chiin diang vengvung uh a, himahleh athu ala a thei chiang aomlouh man un sawtlou nung in hongdaithei mahleh Police station aom Police te tuh abuai petmah uhi. Athau neihte utuh Rifle ah a, tua hunlai adia amuanhuai mahmah pawl hihtuak. Ahihteihtawp un thukmahle uh alawm ngaih khat un ahinna ataan loh hi. CLA lamte leng tangval khat, Mr. Sokho, Major in ahinna ataan a, Chinland ading a tangval gamit a hinna laan masapen hi dinga ngaihtuah ahi. Hiai kikapna ahon zohphet uh azan mah in Moreh a Tengnoupal BDO office ah CLA paunlap ahon takkhe ngal uhi. Huchibang mah in Churachandpur BDO office ah leng CLA puanlap ahon takkhe nawn uhi. Hiaiteng a hunsa mai lou in hong paizom zel ua, tuazan mah khoovak ma, January 27, 1963 zingsang dak 2:30 vel in Chin Army tangval muanhuai ten Singngat Police station ahon kap nawnta zialzial mai ua, Singngat khopi tuh apau nawn mahmah ta mai hi. Himahleh Singngat Police station tuh akhoto lampekua om ahihziak in patau mahle uh tampin ava delhthei pahkei ua, tamlou chik kia in ava delh uhi. Ahihhang in avatun chiang un atung ding teng ana tungkhinta a, Police ten a lawmte uh kht hinna aaman ua, himahleh CLS te bel si le liam tanchin zak hilou hi. Tua ban ah, Singngat kholai ah leng CLA te puanlak takkhiak in ahong omnawn hi. Hiai January 26 & 27, 1963 a Sugnu, Moreh, Lamka leh Singngat a thiltung tuh CLA ten khovel thieh a athil tup uh leh om (presence) ahih uh apuan khiakna uh ahong hita hi!
Hiai CLA ten gamtat na in Manipur, India leh khovel gam athawnpaha, chikmaha Manipur pumpi a poimohna nei ngeilou Singngat leh Sugnu tuh Manipur security leh milian teng ahong ahong dimpah mai ua, huaimah tuh CLA te kipuanna ahong hipah ngalmai hi. Manipur kia hilou in India pumpi ahon dengpah ngala, India a newspaper minthang khenkhat (viz Amrita Bazar, Calcutta) ah ahongsuah chiang in India polam, Pakistan, China leh Burma chihten India ana bildoh mahmah ahihman un ana theipah ngal uhi.
Huchia CLA in Sugnu leh Sinngat ahon kapzoh nung un Pu Tunkhopum Baite in Manipur nusia in 1963 kumkim lakvel in Burma vasika, Rangoon ah athiltup panpihtu ding va zong hi. Tuamun ah Chinese Embassy a Ambassador ava kimuhpih masa a, himahleh Chinate pen Communist ahihman un 
Liberated Chinland a Socialism solkal phuhkhiak ding chihpen haksa sa ahihman in China toh kizop lunglut zoulou hi. Himahleh Pakistan Ambassador toh bel hoihtak in va ki houlim thei ua, Pakistan President, General Ayub Khan toh Rawalpindi akimuh na di arrangement abawlsak pah hi. Huchiin thumu kisa in Pu Tunkhopum Baite Rangoon apan Manipur akhong kik nawnta, Pakistan President pa toh kimu ding in inn lam ah ahong kisata hi. Pakistan President kinga piak ding memorandum, laisiam leh hiailam a lunglut mi khenkhat toh ahon draft ua, azoh tak un hong kisakhiata hi. Rawalpindi (West Pakistan) tunna ding in East Pakistan (tau Bangladesh) atot masak uh ngai hi.
Atanchin theizuite gendan in Imphal apan in Silchar atung a, Silchar apan in Devagir ah, Devagiri apan in bel khe ngen in apai a, ni 3 sung ann nelou in apai ngeuhngeuh mai a, gamlak te ah agiaka, suangpi tung, sungpi tung, singnuai khawng ah alumzel achi uhi. Amah Tunkhopum thugen gensawnte gendan in zingsang thohchiang in suangpi tungmah apa athoukhia a, van ginte ahong omzel, himahleh vuah zu hial thuakkha lou hi. Tua agiahna munte ah sahang in va giahpih zela, ava tonpih zel chi uhi. Huchia ni 3 sung asun azana ann nelou a ahong pai nung in vai putek gawsat khat ahon tuakta hi. Tua vaiputek thawm a zakchiang in sahang in paisan ta hi. Tua mipa ziak in khua naichik chihleng athei thei hi. Tua vaiputek in khua a pailut pih in, ann huansak ding in Pu Pumnou in angen a, ahuanman in Rs 5/- apia hi. Huchia ann ahon nekleh ahong halhta a, atha ahong hatta hi. Tua khua a kipan Chitagong honglut in, East Pakistan atungta hi. Tua khua ah ana dawn ding in Pakistan Police te ana om ua, amaute makaihna in Dacca (East Pakistan khopi) ahong tungta hi. Dacca a nitamlou aom nung in Pakistan President Ayub Khan toh Rawalpandi (tua hunlai a Pakistan khopi) ah kimu ding in longh in puakkhiak in aomta hi. 1963 kum tawplam in Rawalpandi ah Pu Tunkhopum Baite, Chin Liberation Army President leh Gen. Ayub Khan, President, Pakistan akimu theita uhi. Tuamun ah Pakistan amilian sagih/giat ding vel in interview ana bawl uhi. Amauten, Tunkhopum na hi hia? Chi a adot chiang un “hi e” chin dawngzel hi. Ayub Khan in a table drawer apan press cutting a hon dokkhia a, huaituh, Chin Liberation Army ten Sugnu leh Singngat Police station a kaap na thu uh kigelhna, Indai newspaper Amrita Bazar Patrika, Calcutta apan kisuah khia ahi. Pakistan President in Sugnu leh Singngat ava kapdante uh lecture pe dia anget dungzui in Pu Tunkhopum Baite in gen a, tuazoh in Pakistan in CLA te training centre pia hihdan uh ahon puanga, Gen. Ayub Khan in, “Chin mite ki gawmna ding in na honsem unla, apoimoh bangbang sum leh leh galvan Pakistan in kon supply ding uh” achi hi.
Tua hun in kingaihnat etsakna leh mimala zat phatuam ding Rolex sana compass toh ki thuah leng athawn piak hi. Tua Pakisatan President toh kimu zou a Rawalpandi a hun a zat lai in Pu Laldenga, President, Mizo National Front toh leng ava kimukha uhi. Pu Laldenga leng MNF tangvalte ading training Centre ngen ding a Gen. Ayub Khan toh kimuh sawm ahi a, hunsawt kuam anak nung in kimuhpih theilou in kik hi. Pu Laladenga inleng Mizo chih min zanga Zomite kigawm khawnga Independent state bawl khiak ding in galvan la in pan ana la a, October 28, 1961 in Mizo National Front (MNF) kichi ana phuan a, amah President ana hipah ngal hi. Pu Laldenga bel tuahun laia bangmah sepkhiak nei nailou chih ziak in Pakistan in nana ngeingaihlou hih tuak hi. Pu Laldenga bel tuahun a ding lohsam suak ta dih hi.
Pu Tunkhopum Baite bel tuahun adin loching suak in East Pakistan lam manoh in tui longh in puak khiak in om nawnta hi. Dacca mah hon tawn in inn hong tungkik nawnta hi. Inn ahong tun kik chiang in CLA a Chief of Army Staff Col. Shonkhopau toh kithuzak in training ding, gam it, Burma leh India apan in tangval 50 toh January 1, 1964 in East Pakistan monoh pihnawn pah hi. Amun ava tun uh ni 3 nung in President Ayub Khan toh atuam in kimu ua, Pu Tunkhopum pen numei lam leh sum-le-pai ah a chitak na hiam chih etkhiakna nei masa in, muan ngamhuai asak tak in Chin Liberation Army dinga kipia tangval 50 ten kha 5 sung training hon panngal uhi. Huchia CLA ten East Pakistan a training ahon zohtak un Pu Tunkhopum Baite tel in sum-le-pai, thauvui, thautang leh thau in phuangvuh ua, inn lam hong tung kik nawnta uhi…
Chin Liberation Army leh Mizo National Front:
Pu Tunkhopum Baite tuh Rawalpindi (Pakistan khopi) ahohzou phet Gungal lama 2nd batch akuan nawn na dingdan uh ngaihtuah a ahongtham kala in MNF makai Pu Laldenga in Sialkaltang, Lushai Hills laka Paite mite kiang ah ana kanta hi. Amah Pu Tunkhopum in Sialkaltaang anutsiat sung in Pu K. Paukhohau (P Khuptong), PA to President pen acting President in aom hi. President pu khualzin Sialkaltaang ahong tunkik tak in Pu Laldenga in nana zongzong ahi chih ahilh pah ua, Laldenga toh kimu ding in Imphal, Silchar tawn in Aizawl zuanpah hi. Aizawla Pu Laldenga toh akimuh chiang in Pu Laldenga in MNF mina Pakistan laka training lah ki mulou ahihchiang in, CLA toh I pangkhawm ding ua, MNF tangval, atawmpen a 80 vel CLA mina training dia sawlsak ding in hahtak in ngen hi. Pu Tunkhopum in agensawn dan in, training na ding in mi 50 sanga tamzaw batch khata kisawl theilou ahihman in, 2nd batch ah CLA te toh kuankhawm a, MNF 25 leh CLA mi 25 mah toh akigawma mi 50 CLA mina kuankhawm bel lemsa hi. Tuaban ah MNF tangval te minte leng, Lushei te min dana gelhlouh ding, atawpna a “a” chi a tawpsak louh ding Pu Tunkhopum in lemsa hi. Tua ban ah movement a kithuah khawmna ding toh kisai ah leng, tup kibang ahih dungzui un, bangmah kikalhna omlou ding. Himahleh Sialkaltang leh Manipur ah bel Chin Liberation Army (CLA) te ukna hi dinga, adangte pen MNF te ukna hiding in ki thukim uhi.
Tua ban ah 2nd batch Pakistan a sawlnanna ding in leng Rawalpindi vapha ding in Pu Tunkhopum Baite leh Pu K Paukhohau te CLA in gellemsa in koih uhi. CLA apan mi 25 (Chin state apan mi 10 leh Manipur apan 15) te chuh training akuan khe ding ahong kisa nawn uhi. Akuankhiak ma un hiai bang in portfolio hon lemthak uhi, Pu K Paukhohau, PA to President leh Incharge Medical lenkhawm ding; Pu Hangkhokam, Brigadier hisa ahi a; Pu Lamkhosiam, Major ana hikhinsa mah; Pu Paubul Baite, Vice-President ahi a, Col.Shonkhopau Suantak bel Chief of Army staff ahi a, Lt.Col.Ngullet, Home Secretary ahi a, Capt. Thosei Guite, Finance Secretary ahi. Hiaimun apat akipat khiakma un vaihawm felsa diam in akoih uhi. January 7, 1966 in East Pakistan a training ding in Mimbung apan Aizawl lam ahon manoh masa ua, January 11, 1966 nitaklam dak 3:00 in Aizawl ahongtung uhi. Aizawl ahong tung chiang un MNF tangal ten a tunna di uh bangkim ana lemfel vek uhi. President pa bel MNF Fin.Secretary Pu Lalkholiana inn ah tung sak uhi. Adangte bel Vaivakawn ah tungsak uhi. Aizawl ah mi 3, Presidentpu, A body guard Pa Tawng leh Pu K Paukhohaute mi 4 ahong nituang ua, tangval te bel group 2 aki khen in, Group khat Pu Vungzalian in makaih in, group dang khat pen Pu Nengzathang in makaih in ana pai masa ua, Lunglei ah kisutuah ding in kithukhak uhi.
Aizawl ah January 15, 1966 in Pu Tunkhopum Baite tunna, MNF Finance Secretary Pu Lalkholian inn sawng nuai ah MNF Leader Pu Laldenga leh a cabinet teng toh maban pai ding dan leh panlak didan strategy poimoh tak genkhawm uhi. Tua agenkhawm te uh bel, MNF mina Pakistan a training centre kimu nailou ahihman in, CLA mina, MNF tangval 25 te training di detail khiakna leh CLA tangval 25 mah detail khiak di chih ama a Pu Laldenga leh Pu Tunkhopum Aizawl ana kithukim masak pen uh sukkipna ahi a, tua ban ah Pu Tunkhopum in hiai movement nihte a taang china gam khata gawmkhawm theihna dinga, Mizoram pen aminsa ahihman in Manipur ah panle hang buaina ituah chianga Mizoram ikibuk na di uh ahih ziak in chih athusun ahi. Himahleh Pu Laldenga in bel, hiai movement ana kipanta, ahihhanga galvan lah bangmah kineilou, athu amin lua, adiaka Champhai biala volunteer sang tampite, Manipur gam pansan in nasem ni chilehang, tangvalte alung uh liap ding lauhuai asak dan ahon gen hi. Huchiin amau tegel kithouzohzou om talou in, training ahong tunkik chiang ua, kuamah kisubuai omlou ding leh, Sialkaltang leh Manipur bial teng Chin Liberation Army (CLA) te bial hi ding, adang teng MNF te bial hi dingin, ama a agensa uh hon namkip thaknawn uhi. Hiai ahon namkip na pen uh “Saitual Agreement” akichi hi. Hiai mun ah Pu Tunkhopum thutanna hong lamdang zek in, Pu K Paukhohau leng Pakistan President Ayub Khan toh kimuhna atel dia atonpih himahleh “tu tungin ilawmte Mizo toh kithuah ihihtak man in, amau lungkimna din nang tranining center nana makaih inla, MNF leader Halleluiah pen Rawalpindi ah ka tonpih mai ding” chiin Pu K.Paukhohau kiang ah gen hi. Huchia meeting ahon zohphet un zan dak 2 vel ding in MNF leader F/Secy Pu Lalkholiana, a meeting na mun uh, gari ahon la ua azan azan in Lunglei ahon manoh ua, sun nitum a atai nung un nitaklam dak 3:30 in Lunglei ahong tung ua, tua ah advance party a nanapi Pu Vungkholian ten ana ngakna mun uah aki sutuahta uhi. Huai mun ah giah utsim mahle uh security reason ziak in pawtsan lou theilou in om ua, January 18, 1966 nitak dak 8:00pm ding vel in Pu Halleluijah toh Rawalpindi lama pai ding in Lunglei ah Pu K Pauhkhohau toh akikhen ua, amau Demagiri lam manoh in apai kheta uhi.
Huchiin, Pu Paukhohau makaiah CLA tangval mi 25 te tuh Dirchungtlang ah MNF tangval mi 25 mahte toh kisutuah ding in ahong kipankheta ua, huchia hong kitonkhawm in Phalva luidung kichi km 8 vel ding asau ahon zuihzoh nung un Lengtlang (East Pakistan tua Bangladesh toh gamgi) kichi ahon zuihna uh gamlak munkhat ah aminte uh ahon khekta uhi. Igentaksa mahbang in MNF te min “a” chiha tawpte ahon paihvek uhi. Huchi a zankhua a hongpai zomzel in East Pakistan a dist Rangama district a, Ruma Bazar kichi ahongtun tak un East Pakistan police te leh Pakistan Forest guard ten ana dawn ua, luiliantak khat Barak lupi geia forest ah camp ana bawlna mun uah akoih uhi. Huchiin hiai mun ah MNF leh CLA tangvalte Pu K Paukhohau makaihna in ahong training uhi, Hiai training center ah Pathianni kalteng in motor boat in van leh nek-le-tak tuamtuam Pakistan solkar in ava puak gige uhi.
Huchihsung in Mizo Hills (India) ah tuh MNF ten February 1, 1966 in buaina ahon pan kheta ua, Aizawl, Lunglei, Champhai chihte a India sepaihte omna security post tuamtuam ahon kap ta zungzung mai uhi. MNF ten ahon thazoh mahmah maimah mai ua, India sepaih tampi MNF salmat aom in, hunbangtan hiam tuh Mizoram pumpi MNF khut ah omtoh kibang in ahon koihzou uhi. Muntampi te ah MNF flag ahon takkhia zungzung mai ua, Mizoram tuh Independent ahita chih khawng in ahon puang uhi. Huchia MNF te ahong gamtat tak un India pumpi ah ahong kithangsuak pahngal a, kha khat sung khawng MNF ten Mizoram ahon opkhum khitung un India sepaihte ahong kipanta ua, tunglam ah Jet-fighter in makai in inn te leh khuate tuh ahong kuang zuazua maita hi. Huchiin MNF leh MNF lou khentheih ahong hinawnta kei a, leitual lam akipat in leng India sepaihten Hight way teng ahong luahdim ta mai ua, Mizoram ading in “ni tawpni” ahi hial dia aw chihkhop a buaitheih ding in ahong omta mai hi. Numei hi in naupang, pitek, putek, tuailai, tuailai lou kuamah dop neilou in India security force ten Mizoram ahon luh taktak chiang un Mizoram gambuai ahong suakta mai a, Disturbed Area apuan in ahong om ngal hi. Thuneihna sangpen Sepaihten tawi in Mizoram tuh etkol in ahong omta mai hi.
Huchiin gam leh nam itna ziaka East Pakistan a training aom MNF leh CLA tangvalte leng innlam buaina thawm ziak in om maimai theihnawn vual ahita kei. Innlam ah sepaih tam hiaihiai ta, apaina di bang ulah hong haksa thei hiaihiai ahihban ah agam leh amipite ading a dou ding lah kihuai gawpta ahihman in kha 3 sung training ding himahleh kha 1 leh akim training man hamham in innlam apai ding ahong kisata uhi. Huchihsung in Rawalpindi ahoh Pu Tunkhopum Baite leh MNF makai Halleluijah te leng tangvalte training na mun ahong paikikta ua, tutung inchuh ‘Tasken Declaration” achih uh khat ziak in galvan alangtang a piak in aomkei mahleh sum ahun khoptak, ip liansim pi dim piaka om in, East Pakistan a tangval training aomte kiang ahongtung ta hi. Huchia paidia ahong kisaktak un Pakistan in bawng liantak gou in khakna thupitak in bawl ua, inn lam manoh in hong pai kikta uhi.
March 13, 1966 in Lunglei Mizoram ahong tungkik nawn ua, Lunglei ahong tunkik tak un akuan lam utoh innlam ana kibang nawnta kei a, India sepaihte toh kidouna tuh kipan ahingal mai hi. Tuamah tuh Mizoram Independent na ding a beihna ahi pah ngal hi. Lunglei a CLA tangvalte ni 3 ani tuan nung uh ani 4 ni nitalam in “Army te ahongpai uh” chihthawm ziak in kintak a kisa khia Pukpui kichi Pu Laldenga khua manoh ding in ahong kisa ua, zing khua vak philhphelh ding kuan in ahongtung uhi. Hiai mun ah MNF tangvalten an ana huansa uh CLA tangvalte ne dia aksak ualeh Pu Tunkhopum in ann lungmuantaka nekhun hi a atheihlouh ziak in kuamah ann nek phallou in Sialkaltang lam manoh in ahong paisuak ua, March 29, 1966 in Teikhang ahong tukik ta uhi. Ahong tunkik chiang un CLA ten ma ana kekzel ahihman un Camp thupi deuhdeuh Mualngat (Tengnoupal), Khaukhual (Churachandpur) leh Teikhang (Mizoram) chihte ah neiman chi uhi.
Teikhang ahong tunkik tak in gamuang kisa deuhta ahi dinga Pu Tunkhopum in gungal lama a sungkuante veh ding leh 3rd batch training ding leng ngaihtuah kawm ding in Teikhang nusia in Lamka lam ah azinkhiata hi. Amah omlouh sung in a PA pa Pu P Khuptong tua Sialkaltang vaihawmna leh thuneihna apekhia hi. Tangvalten leng Teikhang atunnung uh ni 2 nung in Baklui Camp kichi, Mimbung mipite tuninekpi Tuisazang kichihna man ah abawl uhi. MNF te toh organization parallel dana paikhawm helhel hi in akingaihtuah ua, ahong kithuah theihlai zokmah chiang un Sialkaltang dung ah Chin Army ten nuam asa mahmah mai ua, a zalen uhi. Mipiten Chin Army te amuang mahmah mai a, Chin mite hon ki gawmkhawm sakzou ding a lungmuang taka aomlai un MNF te apat Pu Tunkhopum omlouh kal in thu tuamtuam ana om hi:
- 1)MNF Ngoupa Battalion aomten PNC Sialkal Block V/Pre Pu Suakdam tungtawn in apoimohte uh nek ding, meh ding leh bangkim apoimohte uh pe ding in ana ngensek uhi. Himahleh PNC heututen Chin Army te kem ka hi ua, MNF leh CNA kilemna dungzuia Sialkal taang pen Chin Army te opkhum ding ahihman in ka hon petheikei ding un chi in ana dawngzel uhi.
- 2)MNF leh Chin Army pangkhawm ahihchiang in MNF fund hondong unla MNF Ngoupa Battalion te lak ah asum leh a pite list hon submit un chi’n Brig Hangkhkam leh Major Lamkhosiam kiang ah agelhthoh in MNF ten apia uhi. Tua hunlai in President amah tanga akoih Pu P. Khuptong lah Sadar Hills lama fund dong dinga azin khiak laitak ana hikha zomah hi. Birg. Hangkhopau ten leng apoimoh khakleh chi’n fund tuh ana khon ua, himahleh MNF te laka submit di pen thupukna lianzaw poimoh ahihman in submit louh in nana koih uhi. Pu P. Khuptong ahon tung chianga thil omdana ana hilh ua, amauteng kihoukhawm in piaklouhmah hoihzaw sa in dongkhin mahle uh pelou uhi.
- 3)PNC Sialkal block a telching thak Pu T. Thanghruai toh Pu P.Khuptong bialfang ding leh PNC General fund dong in Daidou lam ah ahong kuan uhi. Hiamahleh Pu T. Thanghruai in hiai sum pen Chin Army (CLA) te khon ding hizaw chin Daidou atuntak un kiksan hi. Huchi’n CLA ten December 31, 1966 in Kholian a fund ava khon uleh Kholian miten ni khat in pekhin vek pah sipsip uhi. Huaizoh in Tangnuam ah painawn ua, zankhat thu in ana pekhin nawnpah uhi. January 1, 1967 kumthak Daidou uah zang ua, huai ah leng fund khon khinpahmahle uh ni 4 tan nituang uhi.
Huchihsung in MNF Commissioner Vanhela in Kholian vapha in, Khlian tangtunga Paite hilou nam omten MNF te lak ah Chin Army ten House tax ahong khon uh chi’n ana report uhi. Huchi’n MNF Commissioner pu in volunteer te sawl in Chin Army President-in-charge Pu P. Khuptong tuh Daidou a omlai ava samsak pahngal a, Kholian High School khat ah akihoulim uhi:
Commissioner Vanhela: Chin Liberation Army a na dinmun bang hia?
P. Khuptong : P.A. to President ka hi. Nang MNF ah bang na hia?
Commissioner Vanhela: Commissioner ka hi.
P. Khuptong : Commissioner a napan kum bangzah aphata a?
Commissioner Vanhela: Kum 2 ahita. Hiai Kholian tangdung ah House tax khon ahon chi ua, na khon hia?
P. Khuptong : Hi, kou Hqrts te thupiak dungzui a ka hong khon ahi.
Commissioner Vanhela : Hiai Mizoram ahi a, MNF te khutnuai aom ahihman in na sum khonte VC te khut ah pekik inla, huchia alemchang kei leh amau mi malmal chiat ah va pekik in, huchia na piakkik keileh ka sepaihten a ngaisiam kei ding uh.
P. Khuptong : Ken house tax ka honglak, keithu ahih ka hikei. Ka Headquarters in ahonsawl dungzui a thumangtaka thupiak semkhe lel ka hi. Huchin, hiai sum ka Hqr ka tun dia, nang toh iki muh thu leng ka gen ding. Kei ka Hqr honsawl ahihman in ka tut phot angai.
Commissioner Vanhela : Eh! Huchibang ahihleh ka sepaihten angaisiam kei ding uh.
P. Khuptong : Eh! Na sepaihte nang zui na hi hia? Ahihkeileh na sepaihten ang hon zui uh.
Commissioner Vanhela : Kei ahon zui uh.
P. Khuptong : En in, kei sepaihten kei ahon zui uh a, tu in ka chih chiang in atu uh a, ding un ka chih chiang in ading ua, pai un ka chih chiang in apai uhi. Ahimhim thu ah nang Commissioner kum 2 khawng semta china, bangchidan ahia MNF leh Chin Army kizopan sungthu phawkphalou honsa ka hi. Tuma in Aizawl mun ah Pu Laldenga leh a cabinet te toh Chin Army a President leh Kei, banah President bodyguard te toh Pu Lalkholian inn ah kilemna akibawlthu phawkphalou na hi ding- Tua ah MNF leh Chin Army pangkhawm a nasem ding, Mizoram a Paite bial (Sialkaltang dung) teng Chin Army te thuneihna hi ding, huailou dang teng MNF te thunuai hi ding chih ahi. Huai dungzui in Pu Laldenga in MNF tangvalte Pakistan ah training ding in hon tonlut pih un chi’n a ngen a, kouleg “hi hen” ka chi ua, MNF tangval hukhop Pakistan ka lutpih tau hi. Hichi bang tan thukimna omsa dungzui in kisuanglah hetloua a nasem mah ka hi.
Commissioner Vanhela : Ahihleh Pu a, tuzan giak hinla, Politics thu khawng le iki kum touzel ding.
P. Khuptong : Kei hichidan hun zangbei manvual ding ka hi kei. Nang toh kei iki thuah theih ziaka pawng giah theih vual ka hi kei. Ka mialmial tuzan a kaki khinkhiak ngai ding ahi.
Commissioner Vanhela : Ahihleh Chin Army leh PNC kikal bang ahia?
P. Khuptong : Ami kibang hiamahleh apawl pen atuam. Chin Army pen underground movement ahi a, PNC pen Paite mite kizopkhawmna ahi.
Tua hun a galvan lampang a et in Chin Army ten 303 thaute atawi ua, MNF ten 22 leh single barrel te atawi uhi. Huchiin Pu P. Khuptong tuh tangval nih toh Tangnuam ah ahong giakphei nawna, Azing in Daidou ah zing ah nephei malam in January 5, 1967 in Daidou apan Mimbung ahong tung anawnta uhi.
- 4)Pu Tunkhopum omlouh kal in Champhai MNF DC thupiak dungzui in Mizoram a
Educational institution leh Office tengteng khak ding chih thupiak ahong om hi. Tuahun lai in Pu P. Khuptong leng Manipur lama azin kaltak ana hinawn hi. Tua dungzui in Mimbung a ECC (tua EBC) Mission Jr. High School leeng khak angaita hi. Tua school a headmaster Rev. Kamzakham ahi a, Pu V. Vungkhai leh Pu Hangzadal ban ah midang bangzah hiamten kipezou taka asepna mun uh ahi. Pu P. Khuptong ahong tunkik tak in hiai MNF te thilhih pen Chin Army toh MNF kihoulemna omsa toh kituaklou ahi chi in Headmaster hongthak sak hi. Dotna aomleh Chin Army te heutupa thupiak ahihdan hilhding in theisak hi. Tuaziaka mat leh thuak aomleh amah (P. Khuptong) in a moh pawngap ahih dan leng gen hi.
Tuazoh in MNF volunteer Khodungsei ate mi 15 hiam galthuam toh, Headmaster Rev. Kamzakham, School asem Pu Hangzadal leh khosung mi shool staff om teng avek un mi (4) ahong man ua, Shool
mah ah nungleh hensawm ua, amai uh atuamsak uhi. Huaithu report Pu P. Khuptong kiang ahongtun tak in vadelh pah a, amuan atun mama a kikou phei in, ‘phel un phel un’ chi hi. Amantu ten leng thumangtak in phelpah vanglak uhi. P. Khuptong in ‘hiai school puten amau thu ua shool hongnawn ahikei ua, keithu a ka honsak ahi’ chi hi. Tuaban ah, Amah Chin Army a Administration pua ahihban ahi a, Tunkhopum in thuneihna apiak dungzui a hiai school kikhak pen ahon thaksak nawn ahihdan gen hi. School pute mohna bangmah aomkei, mat a kul leh kei hon man unlan, thah akul leh kei hon that un, chin va gen hi. Himahleh MNF Commander in heutute thupiak dungzuia hiai school pute Ngoupa a pisuk ngaih ahihdan hilh hi. Pu P. Khuptong in vazuih asawm hang in vazuih apoimoh louhdana nana hilh hi. Tua ni in vuah a chiin nileng a, mei akaai a, vuah phiin singsong gige in om hi. Nitumkuan ahihhang in Pu Khuptong in ava zui teitei hi. Khodungsei atun un khua amialta a, huaizan Khodungsei a MNF volunteer ten inn khat, a commnader pa uh inn ah giahpih in, zan khua in a duty khum uhi.
Azan in volunteer te P. Khuptong statement la ding in ahong kisa ua, P Khuptong kihehsak in, na rank bang ahi chih adot leh, Ngopa are a, MNF Second-in-command ahihdan ahilh hi. Huchi ahihleh,
Captain/Major rank ahih dan agen ba ah, amah P. Khuptong pen Chin Army President-in-charge ahihman in amah statement la ding in MNF Captain/major neu lua leh incompetent ahih dan agen apan in, a state ment lak ding ahong khawlta hi. Azing in MNF Ngopa ah Commissioner Chawnghnuna inn ah apiphei ua, akimusak uhi. Chawnghnun in ama a CLA Brig. Hangkhokam te MNF fund khon dia asawl thu ana genpah a, P. Khuptong in amah omlouh kala sumkhondia ana sawlpen hihkhelhna thupitak ahihdan agen pah ngal. Tuban ah, P.Khuptong in Chonghnuna kum bangzah service ta ahi chih adot leh Chawnghnuna in Commissioner khat 3 vel sampan ahihdan hilh hi. P. Khuptong in a service tawmluat laiziaka thil omsa tampite nana theilou ahihdan ahilh ban ah, MNF President Pu Laldenga leh CLA President Pu Tukhopum Baite ten Aizawla kithukimna ana bawl uh a theihlouh ziaka hiaitan ana semkha ahihdan ahilh hi. Tua hunlaitak in Chawngnuna in MNF Home Minister Pu Sainghaka sam ding in thupia a, hiamahleh aomna gamlapi samphalou ding ahihdan uh ami sawlten ahilhpan ngal uhi. Tua thukimna tuh, ‘Sialkal tang dung teng ah MNF ten thuneihna anei kei ding uh a, Chin Army te thuneihna ahi ding a, India solkal kap khawm ding’ chih a thukim uh ahi chih Pu P. Khuptong in ahon gen nawn hi. Huaiziak in, hiai Sialkal tang dung, Chin Army thuneihna nuaia om ahih dungzui a, hiai school leng ana khaksak uh honsak thak aom ahihdan leh, MNF Fund leng nana khonlou uh ahihdan leh, tua toh kisai in Commissioner in hihkhial mahleh ngaidam ahihdan P. Khuptong in hilh hi.
Tuabang thuteng ziak in Teikhang leh Mimbung lam ten a heutupa uleh skulpute MNF mat aom thangpai in MNF Senetor khat leh a nungzuipa Teikhang lam ah ana mantang uhi. Tua thu Teikhang apan tangval nih hongtai vengveng in Chawnghnuna kiang ah ahong tunga, Chawnghnuna in a mimat te toh Senetorte kikhek tuah theih ding in agen hi. Pu Khuptong toh tukhawma houlimlai ahihman un, Pu Chawngnuna in hiai sepaih matte khah na dinga laigelh sak ding in ngen hi. Pu Khuptong inle khahna ding lai gelhsak pah ngal hi. Tua ban ah apaidek kuan un, MNF lai poimoh taktak, Solkal gensiatna te posak a, Sialkal tangdunga na thehdalh ding in ngenmahleh utlou hi. Akimusung un Chawnghnuna in Pu P.Khuptong kiang ah Kholian tangdunga Commissioner Vanhela in khatvei lama ana theihsiamlouh ziak in ngaihdam ngen hi. Huchiin nitaklam dak 4 vel ding khawng in Ngopa apan in hong kipan kheta ua, P. Khuptong leh Skulpute Mimbung ah damtak leh bittak in hongtung kik nawn uhi. Huchimah bang in Teikhang khua a ana detain uh MNF Senetor leh alawm leng Brig. Hangkhokam ten ana khah tau hi. Hiaihun lakvel khawnga pan in Chin Army leh MNF kal ah ki theihsiamlouhna hong piang panpan ta. MNF apan in ‘Chin Army ten hiai hong hih un’ ‘huai hongpia un’ ‘na hong hihkei uleh kou ka hongkuan ding uh’ chihte thu ahong tam deuhdeuh a, himahleh CLA ten kinawkkhawk louhna ding in anem theitawp in ana dawngzel uhi. Kichou tuahna khawng in amau camp chiat khawng ah galvan aneihsuhte uh sial in thau bang gintuah zuzung zel uhi. Huchiin Sialkal tang ah MNF leh CLA om khawm ziak in muanna tuh ahong dengdel mahmah ta hi.
Pu Tunkhopum Baite leh CLA ni nanung lamte:
CLA President Pu Tunkhopum Baite Gungal lama sungkuante vehkawm leh 3rd batch bawlna di lunggel kawm dia zinkhia tuh January 12, 1967 in Sialkaltang ahong tung nawnta hi. Amah omlouh sunga Sialkaltang dunga anut siat heutute uh pansan in PNC te toh maban pai ding dan Pu Tunkhopum toh a ngaihdante uh ahong kikum khawmta uhi. Tua hunlaia PNC Sialkal Block President, Pu Suakdam ahi a, Secretary Pu V. Vungngul ahi. Tua agen khawmte utuh Chin Army te kithuzak tuahna di leh apoimoh na muna kintaka pankhawm theihna din emergency/information office khat Teikhang hiam Mimbung hiam ah hon khiak hileh chihkahwng toh, office bearer khawngleng neih vanglaka, asum leh pai teng bangleng President pu in alom-atang a amah sakhau a avial puakpuak pen tuahkhelhtheih ahihman in Treasury khat neiha Finance Secretary leng neih ding chihthu te khawng agenkhop pipen uhi. Maban pai ding dante chiangtak in genthei kei mahleh uh, Pu Tunkhopum in Pu P. Khuptong kiang ah azianga Ngoupa lama 3rd batch training bawl dinga zin nawn sawm ahih dan ahilh hi. Tua ban ah, Sialkal tang dunga, Murlen khua tanpha a, a politics uh nana gen zomzel ding leh volunteer nana khonkhawm ding in kampau nusia hi.
Huchiin azingchiang zingkal in Pu Tunkhopum in Ngoupa lam manoh in amah kia in paikhe suk ta hi. Huai tuh Pu P.Khuptong toh akimuh tawpna uh ahita hi. Ngoupa atun in P. Khuptong laithon khak nawna, huai ah agen ngeiteng mah, ‘iki thukhah bang in Sialkal tang dung ah Murlen tanpha in nana pai inla, I politics leng nak tak in nana gen inla, volunteer leng nana khawm in’ chiin gelh hi. Huchihlai in bangsimthu lelziak hiam, bangdoh ai hiam chihding khop in Pu Tunkhopum mat ding thu ana theikha pawl om hihtuak hi. [Kim leh Ni A Om Ang em? Chih gelhtu C. Vanlalrawna] Aziak hihleh bangmah gen aomkei. Huchiin amah mat ding thu Mizoram pumpi a MNF commander om tengteng kiang ah piakvek ahihman in sun leh zana duty kipia in amah mukhate ading in matlouh theihvual ahi kei. January 1967, khovot san laitak in Pu Tunkhopum Baite, CLA President tuh MNF Volunteer Lamlira Battalion ten amanta mai uhi.
Pu Tunkhopum amat nung uh sawtlou in Teikhang khotaw a Baklui Camp, MNF ten ava luh phut uhi. Tua Camp luhna ah Pu Tunkhopum makaitu in MNF ten pangsak chizomah uhi. Agendan un, Pu President in, ‘Chin Army te kuamah gamtang kei un, kei om ka hi’ chihtoh valut ahi chi in gen uhi. [MNF ten thaulong toh anohna ziak ua hiaibanga thiltung ahingei ding] Huchilou hileh MNF mi 25 vel vakuanten nuamtak a va capture lou ding in gen uhi. CLA tangval mi 15 vel thau hoih taktak toh ana omsam ahihchiang un CLA ten kap masa ding uhi. Huchiin Chin Army te, Baklui Camp aomte tuh MNF ten lungleh hensawm in, maituam kawm in Teikhang kholai ah kai tamai ua, a khomite, Paite te ading in alungsim uh teipi asut bang ana ngei mai ding. Amaute tungtawna Chin miten khatvei ni chianga kigawm khawm na mel mungei dinga alamet utuh hiai tangvalte matna ah tungsunni lenkil ah aketa!! Aman tuten khosung ah ahong kaihlai un anung leh ma uah thau in bittak in aveng ua, amaulah gamtat theihna ding in nungleh hensawmsa ahihziak un bangmah hihtheih aneinawnta kei uh. Khotaw lama Mission school ah apaipih ua, khomi te kiang ah ann angen zomah ua, piaklouh ngamlah ahita kei, MNF te tuh a vualzou ngeimai uh!! Avamat lai ua nana ki gingman hile uh zaw kithazoh luatna ding omlou hiven!! Huchiin Selam lam manoh in ahongpai ua, akhua uh tundektak un kenlak ah Brig Hangkhokam tuh anunglam deuha paikha hiven thakhat in ken lak ah atheih patawp in aki khuksuk bubut mai, MNF ten kapzui mahle uh kapkhalou in, damtak in Teikhang atung kiknawn hi. CLA tangval amatte uh Selam ah agiahpih ua, zinglam in Selam apawtsan kawm un khonawl ah Captain Pa Tawng, Pu Tunkhopum bodyguard, kaplum masa in aluang lamlai ah nusia in ataisan uhi. A mimat dangte Champhai a Phalva Camp Hqt lam manoh in manoh in puak in aom ua, khenkhatte asuakta theipawl om uh hihtuak a, asuakta loute tanchin bel theihnawn hilou hi.
Huchia Pu Tunkhopum Baite amat uh chuh MNF Army Hqt, Tuichiang Camp achihna uah akhum uhi. Akhumna mun uah MNF section khat in aveng uh a, kua ahia aveng uh, bangziaka mat ahi chih tanpha leng atheikei uhi. Heutute thupiak ziaka veng ahitop mai uhi. Avengtute laka thupiak tuh, ‘kuamah in houpih louh ding’ ‘kuaman leng atat khiak louh ding’ chihte ahitop mai. Hiai thupiak avengtuten bohse tale uh ahinna tanpah tanthei di khopa thupiak khauh ahi.
A tanna mun tuh haksat chi mahmah achi uh. Piala zawng awk bangmai a akhum uh ahi. Avengtute kiang min ‘agimhuai chi na e’ ava chihchiang un, ‘heutute thupiak bangbanga ka koih uh ahi, kou chuh ka sulamdang theikei uh’ ana chizel uhi. Akhumna mun utuh akochik mahmah maia, mittunga khutpek kidaal hiala etlouh intuh asunga saltangpa kimutheilou chi uhi. Atung aniam a, asung ah adin theihkei. Himahleh tuttheihna bel ahi a, mi khat lup theihna lel in alian. Puansetak silh in January khovot tuh athuak hakchi mahmah mai. Akhumna mun uah liing keuhkeuh in atu a, ‘lawmpa, bang na chi zela? Ann khawng na ne theizel hia?’ chia adot chiang un, ‘hiaituh ka dinmun ahi a, ahaksat dingdan leh leh anop dingdan tuh etmai inleng nonthei mai ding’ chi’n ana dawngzel hi. Amahchuh tuhut tan in gawnglum louphet ahita. Amah ading intuh tu dinmun in hinsang in sih atel huaizaw ding abangta!!! ‘Innkong nisa ah omsak ve ua’ ava chipawl aom chiang un, ‘heututen aphallouh uh ahi’ chin ana dawngzel uhi. ‘Ann ane thei hia?’ chia adot uleh, ‘gentham bangmah ane kei’ chih adawnna uh ahi nawn. Khat in ava houpih a, ‘Bang chi in na omzel dia?’ chi a ava dot aleh ‘Ka si di’ chi in adawng achi uhi. Huchi’in February 5, 1967 zingsang in Rifle khatvei kia ahong ging zua a, aging in akim leh kiang ate ahon thawn zui a, a cap gim namtuh akiang ah ahong nam siip vengvung a, khat in, ‘Eheu! Akap lumta uh hinteh’ achi a, azoh a sana a et aleh zingsang dak 7:03 in apelta hi. Huchi’n Paite mite suan mahmah leh Chin mite kigawm khawmna dinga panlatu Pu Tunkkhopum Baite tuh vuallel tak in abeita hi.
Angaktu tammah leh ngak ding tuh abeita! ngak ding aom ta kei hi!!!! Hiai anuai a lavui amah suunna in anei uhi.
Aw ngai veng a minthang Chinland,
Amual kitawi ngou bang alang;
Zatam vontawi ten hai bang ngak’
President Pu Tunkhopum Baite athah khitnung uh sawtlou in Sialkal Block PNC President Pu Suakdam tenna Teikhang ah MNF Ngopa Battallion te vazintung uhi. Aman leng siamtheih tawpa ana siam in aksa khawng ana huan in zan giak uhi. Zingkal ahong thohtak un hiai MNF ten ka heutute uh toh kihouna ding om ahihman in nang sam dia hongkuan ka hi uh achihziak un tua hunlai a aseppih PNC Secretary Pu V. Vungngul leng ka va sam dinga, amah toh ka hongkuan ding uh chi in tonpihta uhi. Mimbung lam ah tonpihta ua, Teikhang toh Hiangmun kikal km 3 ding vel atun tak un Pu Suakdam nungleh hensawm ta u, Pu Vungngul pen paikik ding in sawl uhi. Thil omdan amuh chiang in kik utlou a, himahleh MNF ten, ‘Na sih nop leh honzui inla, nah in nop leh kik in’ chiin vau zel uhi. Huchihial ahihtak chiang in Pu Vungngul leng lungsim nuamlou takmai toh innlam hong kikta hi. Inn ahong tunchiang in bangmah gen tulou a, hiamhleh, ‘Pu Suakdam mi pilvang theitak ahi a, a hong kigen fel thei din ka gingta’ chilel hi. Pu Suakdam pen ani a inn ahong tunkik louhtak in ahong patau tau a, khotang hong kipun khawm in hon zongta uhi. Ahon zongna lam uah Hiangmunte khokhung vum munkhat ah khetbuk kisuihna khutnung thak hon mu ua, huai sulnung thak ahon zuih uleh agamtat na uh sisan kai zelzul ahon muta uhi. Khetbuk a khetlup thoh uh hihtuak a, akhet paih nung ua ken a khuak uleh singbul ataang ahi ding a, Pu Suakdam sisa in singbul khat ah muh ahita hi. Huchi’n Sialkal tanga, Paite makai muanhuai, Pu Suakdam tuh agam leh amipite a itman a, amau adia muanhuai taka asep ziak in ahinna manpha tak tuh MNF te khut ah mulkim huaitak in latkhiak in aomta mai hi.
Pu Suakdam athah khitnung ualeng ahehna uh dai nailou ahi ding a, ahong kileh hei ua, Tuisa zanga phailou/zanglou bawl agiak PNC Executive member 3 Khodungsei mi, Vungzakhai, Lianhnun leh Pachhung te ava that nawn zel uhi. Huchi’n Paite miten Chinland kigawmkhawm ding tuh hiai mi liante sihna ziak in maban abing ta hi. Hiai thiltung teng in Sialkaltang leh munchih mualchih a Paite mite adahsak a, patau sak petmah hi. Paite miten Mizo National Front leh Chin Liberation Army akikalh hilou a, paikhawm helhel banga angaihlai un MNF ten mulkim huai taka asuk chimit pen uh ‘sin dip vut’ mahmah mai hi. Hichibang ahong hih chiang in Sialkaltang aom Paite mite bit kisa nawnlou in Manipur ah atai theite hong tai in, Sinzawl, Thanlon, Mualnuam, Songtal, Kangkap, Singngat, Lamka, Imphal leh Assam a Karbi Anglong tanpha a hon zuan tau hi. Tuahun lai in Paite miten bauian athuah in kitangkha hi. Mizogam disturbed Area apuan ahong hihchiang in Manipur a Churachandpur leng ahon huapkha a, mel leh puam a Mizo te toh ki lamdanna omlou ahihchiang a, India sepaihten Mizo te abawl gentheih bang un Paite ten leng pumpelh thei tuanlou uhi. Huchih lai in MNF ten lah Paite mite melma et a en in amaute lauhna toh sepaihte lauhna toh buaina namailou thuahnih tuh ana kituak ahita hi.
Zomi National Congress (ZNC):
Hunte hongpailiam zel in CLA Era ahong beizoh nunga ei Zomi sunga movement hong omnawn leuleu chuh Zomi National Congress ahi. January 28, 1972 in Daijang, Lamka khopi kianga om ah Pu T Gougin makaihna nuai in phutkhiak hong hinawn a, Amah President apang in in, Pu (L) S.K Samte (Semkhopau) Gen. Secy in pang hi. Hiai pawlpi thakleng hong khanghat mahmah in 1979 tan in Manipur singtanggam teng ah ZNC Block leh Unit phutkhe zou uhi. Churachandpur chih phetlouh Sadar Hills, Ukhrul, Chandel chihte ah leng Unit ana neiman uhi. ZNC hatsung in India President leh Prime minister kiang ah Union Territory muhnanga a ngetna Memorandum 3 vei mahmah ana pia uhi (viz. i. 1973 ii. May 21, 1981 leh iii. March 1983). Kum 1982 laivel akipan in I pawlpi 2, ZNC leh PNC kal ah ngaihdan kibatlouhna ziak in ki theihsiamlouhna ana piang zeuhzeuh hihtuak hi. ZNC ten non-violence principle a nei in election khawng hon tuhtou in, Amau party khua teng a phuhsawm in pan honla uhi. Ahihhang in PNC in democracy deihlou in communist mindset one party system ngaisang in khuachih a ZNC unit phuh a, PNC toh ZNC omkhawm ding ngaithei lou uhi. I tenna gam India Democracy hi a, Communist country hilou ahihman in ZNC in leng party unit khuateng a phuhsawm dalna pen gamdan toh kituak le hilou ahi chi in ngaisiam tuanlou ua, kingiikna thupitak ana omngei hi. ZNC toh PNC ki thiehsiamlouh ziaka thiltungte laka agen tham deuh 3 te ahihleh 1) Sinzawl ah PNC volunteer 300 vel in ZNC te va satlup sawm uhi. 2) Mualpheng a ZNC makaite inn PNC volunteer 500 in va um ua, Police leh CRP in va hunkhia uhi. 3) Mualnuam a ZNC khawmpi omdek ma nitak zankim in PNC volunteer ten attack vabawl uh hi. Huchibang khawng ana kingik tou, himahle uh tua hunlaia volunteer khentkhatte tu hun in Zomi a ding a mi muanhuai tampi om dan uh ahi. Khenthamlou ana kikhendekte tua lungsim munkhat pu a Zomi adinga nasemkhawm theia omnawn man uh kipahhuai lua hi. “In politics there is neither permanent foe nor permanent friend” achih uh atangtung ahilel.
ZNC hatlai mah in asulnung uh chiamteh theih ding hiai bang in movement ana nei uhi: 1) November 21, 1985 apat in ZNC volunteerte 40kms a sau “Indira Road” kichi Pangen apat Thanlon tan lampi ana sial ua, azoh un voktal tuk guk in ana lawm uhi. 2) January 08-20, 1987 in Pu T. Gougin makaihna in ZRV ten “the long march” Luangleh Vaisuah (Tipaimukh/Sipikawn) apat Lamka tan khe in ni 12 sung in ana paitung hi. 3) Lamka apan Champhai tan (May 1 - May 19, 1988). 4) Champhai apan Aizawl tan (May 23 - May 29, 1988). 5) Vairengte apan Lunglei (June 1 - June 25, 1988). Huchiah hun hongpai zel in Diphu a Assam Tribal toh Student leader te meeting na ah ZNC makaite leng va kihel ua, hiai a thupukna dungzui un December 18, 1987 in Lamka ah procession thupitak neih in oma, DC/Churachandpur kiang ah leng UT ngetna memorandum ana pelut nawn uhi. Akum nawn in ZNC makai Pu T.Gougin leh Mizoram People’s Conference makai Brig. T.Sailo in Zomi Re-Unification Organisation (ZORO) phutkhe ding in suai ana kai uhi. Huchiin Champhai ah khawmpi thupitak First Zomi World Convention kichi May 19-21, 1989 sung neih in oma, Manipur apt ZRV member 600 vakihel in palai paikhawmteng mi 20,2000 bang phazou uhi. Khawmpi zoh in “long march” gari peinih nei in nei nawn ua, tua hun ah Jeep tungbei in Pu T. Sailo, Pu T. Gougin leh Pu L.Sanngam te tuang ua, ani 7 ni in Zemabawk kichi Aizawl apat km 7 vel dinga gamla atuntak un mipi sing tampin ana dawn uhi.
Zomi Re-unification Organization (ZRO)
I gen taksa mahbang in ah I tenna gam, Manipur election gam ahihziak in huaiten ZNC hon peibuai zek in ah apai ding bangtak in ahongpai theikei a, ahong beikuan tak chiang in gam-le-nam itte, I makaite uh ading in om maimai theih ahi nawnkei. Amau ‘consultative meetings’ leh study nei in lam tuamtuam ah ahon enchain masa uhi. ZNC ah I makaite uh Pu T. Gougin, Pu T. Thangkhangin ten ah Org hattak in ana paipih uh a, Zomi ihihna uh publisized hahtak a bawl in na thupi mahmah tampi ana semkhia uhi. ZNC hunlai in Churachandpur kia hilou in Sadar Hills, Ukhrul, Chihte ah leng ana om uhi. Zomite story ading in pawlpi pammaih mahmah khat ahi ichi lou theikei. Makaiten hiai ZNC ahong ki phutkhiak dan, a nasep dante uhleh Zomi ah ana kivaipuak dante uh ahon et vengveng chiang un ah Zomi ihihna uh settak sa mahmah uhi. Tua ban ah I Zomi pihte uh Burma aom ten Sepaih thuneihna nuaia khosak haksa asa mahmah ban uah Mizoram aomten leng haksatna tampi tuak gige ahihman un vaihawmna tuam deihhuai sakna tuh I makai ten honnei huaihuai uhi. Manipur lam ate ahon en nawn ua, Democratic movement bawl ding in ah Zomite geographical area tuh ahoihkei, bangmah connection omlou, rail lampi lah omlou, National Highway lah omlou, Airport lah omlou ahihchiang in I thute uh Delhi in aza pahpah theilou hi. Huan ah Indiaten ‘thau’ zadah mahmah mai ua, thau neite hih pakta hetlou uh ahihman in India te attention draw na ding in April 1993 at Phapian (Kachin State), Burma ah Zomi Re-unification Oraginzation (ZRO) kichi ahon phutkhia uhi. Hiai ZRO ah Pu K. Guite, Karbi Anglong (Mikir Hills of Assam) apan founder President ahi ahi.Hiai pawlpi ah kihel ding in September 2, 1995 in Paite National Council (tua Paite Tribe Council), Simte Tribe Council, Tedim-Chin Union, and Vaiphei National Organisation ten sasin-salung nekhawm in kichiamna “Oath of Loyalty” nei uhi.
Hiai kum mah in Tuimang dung ah Nahtangteh nuai bel in training ana kipan uh hi. Ana training masa 1st batch te kuhkalna leh chihtakna te I ngaihtuah chiang in thupi isa a, amaute zahna sangpen ipia ahi. Hiai ah ZRO a ihong din nung uh kum 4 ding khawng phapan kiang kiang in chikmah a gal leng nei ngeilou, kuamah leng dou ngeilou, Churachandpur a nam tuamtuam lungmuang tak a insak-inkhang mehkhing kikholtuah a tengkhawm kimlai Unau melhaih hun in honpha in Kukite toh Zomi nasatak a kidouna, “Tualgal” om hi. Hiai thu pen I bulsut mankei dinga himahleh Zomi khangthu adia mangngei nawnlou ding ahihman in igenkai ahi zaw. June 24, 1997 ahong tunma chuh Churachandpur khah Kuki te ading a, "safe haven for Kuki refugees" ahimai hi. Inn neilou tampi hongtailut in midang kianga tai hilou in, khotang ah, nek-le-dawn ah, tawndan ah akibat pih uh Zomi te kiang ahonglut ahilim uhi. Ahihhang in amau huai theilou in, KNF (P) kichiten I nomenclature uh ‘Zomi’ kichi hon zahtak pihlou in, Lamka khopi a thuneih utna lungsim toh athu zanglou in thagum in ahon pan ua, ZRO in leng ahong nasep dan uh ngaithei tuanlou ahihman in kodouna nasatak mai hongping hi. Amasa pen ding in Mission Compound ah Paite tangval mohna neilou mi 2 May 6, 1997 nitaklam dak 4:00pm vel ding va pimang ua, anung ama uh sui theihlouh ding in mulkimna bei ahinna uh laksak uhi. Tuazoh anung sawtlou in Geljang ah Paite tangval mohna neilou mi 2 mah June 14, 1997 nitak dk 8:00pm vel ding in va pimang nawn uh a, hon thahsak nawn uhi.
Agamtat uh hon sunzom touzel in hiai tan in chuh mipi leng thangpai gawp in hong puakzak ta mai hi. June 24, 1997 khomui kuan in Saikul khua ah KNF (P) te valut ua, kholai munkhat ah khomipi pasal photphot kai khawm in "Hiai khua ah ZRA te leh Naga helpawl (NSCN-IM) te om uh, hon pekhia un," chi in va gam phut mawk uhi. Aomlou tuh piakding omlou ahihman in amatkhak te uh khotaw lama pisuk un nitak dak 8:0pm ding vel in salpha mi 10 te mulkimna bei in ahon bankaplup tamai uhi. Hiai nitak a Zomite sisan luang te ziak in minam leh pian pih Zomite hehna kuang zak in ZOMI-KUKI gal kichi hong piang kheta hi. Kumkhat val vengveng kilemna omtheilou in kithah, kimat chihte kia hilou in Inn-le-lou kihalsak in iom uhi. Tua bang kal ah Unau Zou ten Paite te’n ahon simmawh un leh ahon musit uh chih buaisung a ana ngaihdan uh ahikha a, mawhna neilou Zou tate thah-le-mat kia hilou in inn-le-lou tanpha ahon haltum sak uh chi in Zou nam venbit na ding in Zou Defence Volunteer (ZDV) kichi October 11, 1997 ni’n Tuining Jr. High School, Tuining khuo ah UZO Home Secretary, Pu Amchinkam makaihna ana ki phutkhia uhi. Tuanung September 30, 1998 in Kuki Innpi leh Zomi Council in kilemna suai hon kaithei khongkhong uhi.
Conclusion:
Tunin hun paisate uh I ngaihtuah khak chiang in khasiat huaithei ahong bang deka himahleh ZRO kum 17 ahong chinnung in ah SoO India te toh ihon kai thei ua kipahhuai ahimai ding. Adiktak in Army te ithat tam hetkei ding uh, ahihhang in igen taksa uh mahbang in thau ineih ziak un chial in I om uh a, kipahhuai isa uh ahi. Ahi a, ZRA ichih khah midou di hiam, mi that di mawnga kiphut hilou in ah I politics nucleous dinga hong kipankhia ahi chih ithei uh. Zomi thu toh kisai ah Pu Kipgen, Pu LS Gangte, Pu Tualcihn Neihsial chihten research ana bawl uh, amauten ana muhsuah uh bangbang a nomenclature “ZOMI” ki pomtou ahi a, khenkhat te ngaih ding in ah thak hikhamaithei, ahihhang in research base a ahon muhsuah uh ahihman in alui penpen ana hi daih maidan ahi. Huaiziakin ei originality ahi chih ipom uh deihhuai ahi. Zomi ah ikilawikhawmna uh leng tribe a settle taka bittaka om phitphet te ihihman un tribe base a organization ipaipih keileh khatvei ni chianga puk ding ihi chih I ngaihdan uh ahihziak in tribe I base uh a, tuni chiang in Zomi sung ah Tribe 9 iki ngahta uh ahi. Tamtak inleng asamlai. Hilehleng "amaute" athu toh zohngai ahihman in hun ahon la lai ding. Kuamah suknat leh kuamah sukbuai Zomi te utlou ahihman in I political deamand ah leng Zomi Autonomous State kichilou in Tribal Autonomous State chi uhi. Hiai in atup bel tuni a Zomi huamkhalou te leng hiai I Tribal na in huamkha thouthou ding hi. Ataktak ding dinmun I etchiang in I communal paisim chiatna ua I problem uh khah ‘same problem’ ahilim hi. Nagate problem leng ei atoh kibang chet, Kuki kichite aleng hithou, Zomite te ale hithou. I same problem uh khah issue khat a solve theihding ahi, ahon a thakhat a nasep khawm na chang itheihlouh uh khah I mawlna ziak ahi, hichi khopa tribal te imawl ziakmah uale min honna nuaisiah uh ahi a, huaiziak in ginna hattak leh vision toh ipaithouzel ua, atawp chianga munkhat a hong ki sungkhawm teitei thou ding ihi chih I muh dan uh ahi.
©
References:
SHAIKHAM LAIBU by Pu T Awnzagen
Interview with Pu Thangkhangin Ngaihte
Interview with Pu Khamkhanpao
Pu K Guite, Advisor, ZRO speech on the 1st Anniversary of Camp Champhai.
Autobiography of Pu T Gougin