Mihingte’ kia hilou in khovel a hinnanei tengteng a damden diing khatlel zong omlou hi. Hinna nei dangte thutuam in koihphot zozen le, “mihing a ding a khatvei sihseh ahi” chih kuapeuh in I thei a, I niteng hinkhua ua leng uplahlouh hial di’n a tangtun gige hi. Sum-le-pai, neih-le-lam hauhziak a sihtheihlouh diing leng ana hi zenzen kei a, himahleh hiaite tungtawn in kep bel I kikem theitham banah, leitung tomkhah I damsung un I hinkhua uh nakpitak a hon panpih in hon dawn zangkhai zo-mah lai hi.

I chihsa mahbang in khovel a damden diing kua mah ki-om lou ahihna ah it-le-ngaih tamtakte’n hiai khovel gentheihna, lungzinna leh mangbatnate thuaknawnlou diing in honna pailiamsanta uhi. Himahleh, ei hilhial huai sihna hammual lam zuan a pai thei diing a kigintak a haksa, ngaihtuah in leng a kinei ngei(khol) kei alah damden dia kigintakna leng a kinei tuankei bok, kinei mawk leleng a lohsamsa a kihi him hi. Pathian lemgel siamdan bel mihing suut vual ana hilou mahmah dan ahi lo ngut aka. Hongensau laizual ta le’ng-  Namdangte’ bang a tamzengzung hilou; tawm mahmah lai himahle hang I tawm mahmah hang un hiai sihna in a honhawi in a hon peel tuankei thamlou in I milip(population) toh tehkak in misi le tamthei ka kisa mahmah zo-ve!! Niteng a sidak ging dongdong kiphamat va chih zozen lah uang lo-deuh bang vee’n maw….

Khelna ziak a hiai sihna in I tung ua vaihawm ahi a; mihing a piangkhe-ta  phot a khiallou a ki-om kei, I  hongkhanglet dungzui un I khelhna u’leng a thupi deuhdeuh a, I pil dedeuh ua leh khelhna huangsung ah I lut thuk semsem zo-mah lai dep uhi. Huaiziak in, Khelna neilou kumah ki-omlou hi. Ahi , midik, chitak leh muanhuai ‘gensiatbei’ mihing kua mah om kei ahihhang in I hongsih hial chiang un chu khelhna himhim neilou, dik bukim ‘gensiatbei’ ihi daihdaih zel uh! Mihing a damlai a hoihna himhim neilou, salam leh khalam a et-ton na di mawngmawng omlou, ‘zatna bei’ bang a I ngaihsut ua, a hoihna himhim gen di omlou dan a I koihte uh a hongsih hial chiang un a hoihnate tomkhawm in I kigensiat kheukhou ua, gentham bel chinglua gentaklouh a kigensenglou ahi lai. Hiai in khovel ah zatna bei mihing omlou ihih dan uh a honglang chiangsak mahmah mai hi.

Sihnunga a luangtung hi’n tung kei ta leh gawlgui dawk zenzen a phat theihtawp a I kiphat hang un a hi di teng hikhinta ahih man in phatuamnawn vaklou hi. Chihbel, en phat theihtawp a I phat hang in I phatna in vangam a tunpihtuankei ding a, I gensiat(chimaini) hang in I gensiatna in leng meidil/gawtmun ah a pii lut sam kei ding. Tuanak sangin a gentute’ lam awlmawhhuai leh lauhuai ka sa zaw daih lampang ve! Kei ngaihdan a bel sihnung na-na-na a chuh hihna bangbang a kichih  khiak phekphek mahpen chidam huai leh vualzawl huai zaw sa ing. Sihnung a gawlgui dawk punpun leh khut vai nungnung zen a hoihna te kia gen a, phat theihtawp a  I kiphat nate uh a sipa/sinu damlai, a bilbuk mahmah a azak ngei ding in genle bangchituk in a kipak phet dia?bangchibang gah a hon sung dia? Phat utlou kua a om a eita!? Banah,  sihnung a naphatna in bangchibang gah a suang a le? Ngaihtuah tham chingthou eive. Sihnung a phatna in bel sau a den ka gingta kei, gah thupitak a suangleng ka gingta sam kei. Huaiziak in tamtak a di’n kikhel kha ta mahleh a tamzawlai te damlai sam ihihna  uah kikhel deklou ahi. Sihnung a ikiphat nate uh damlai a kiphat na di’n zangzaw thei in sihnung in bel ahi bangbang(kiphatkei di chihna hilou!) in kigensuk miatmiat maile a gahkhum leh kipahhuai loh ding houh a hong om zaw diam chinuam dan ihih chu…I phat a, a hoihlouhnate uh imm mang a, Pathianmai a imm pihzou di ihih le bel thu tuam… eilawi chuh sih chiang a Pathiam mai a asipa/sinu sawn a sawn lutthoh (by force) maimah hang a!! “siallut nung a sial daikaih zaw phatuam lovak lou hi veh aw…. Maw le?”

Hun-le-nite khawllou hial in a pailiam zungzung a, it-le-ngaih tamtakte’n sihna hammual hon zotsan nung un a kal lak ah damlouh-hiitan khawng kituakzel mahleh sihna hial in in I tung a vaihawmlou banah awlmawh, vei leh puaknatna lungsim tuamtuam I neihte’n leng hon taisan mailou a; gelhzom theizel a a ki-om man in kipahhuai isa(I gelh pen in gahsuang kholkei lele). Mihing I hihna ziak in I maban hun diing nengchilik na-ngawn leng theilou ihihna ah hiai tan dam a, hiai bang hunhoih leh manphate mu diing in lam-etna a kinei hetkei, I mu a kipahhuai chihlouh kan gen di dangle theih huai kei zozen hi.

Kumkim bang I zatkhit nung un tu’n kumtawp kuanlam ah ding leng ihi sim nawn vengvong photta ua, a “Ber” khate kipan ta, eilawi hun hi maimah eita zeel ve…. Khovot bangleng theihlouh kal a hongtung maimah diing ahihna ah chiamnuih dan a I gengen uh “mahni ngawn a khovot/phalbi dou peihlou” chih kha thudik ana hilim ve aw, maw le… tu phalbi sung in bangzah in zi/pasal I hon nei peuhmah diing u’am maw…tanukha/moulawm la?? Bangzah in chialna lai na ngahta ua le?? I chiindan u’kha khat veivei lamdang leh nuihzathuai sa thethup ke! March-August tankhong chuh bangmah phawklou mah kibang, dai zikzek a ki-om, a Ber khate(March kha tan in) hong kipat nak le chuu, innsung, saptuam leh khotang vaai ah phulunphul mah kibang zou a kei! Gongthak, sa duh vulvul chih pen om  vaang mahmah eive(duhgawl ziak chihna le hituanlou!) lehlamah, gan(bawng/vok) chihte’n bel hiai hun pen ana vaidawn lotel lou hial ding uhi!

Ahi, hiai hunte ah Programmee neneuh namenlou ahihna ah chiangtak a gen in ‘siatna hun’ chile kikhial sautel ding in ka gingta kei. Sun programme banah, nitak programmee mahmah leng gensenglouh a tam ahihna ah khelhna khuk a ana tummang khinsa tamtakte’n nuam asa ua, mihoih tamtak mah in hiai khelhna lampi zui in khelhna khuak ah hon tummang san uhi! Hiai hunte in bel I melma ‘setan’ a vualzou petmah. Numei leh pasal kal a thangtatna leng a maimai kei, tamtakte’n a siangthouna uh(virginity) mansuah ua, khelhnopsakna hiai khovel khelna utna: mit-utna, sa-utna leh thanghuaina tampitelak a kibual in, sapkiik zohvuallouh ding ih hon tummang san uhi! Ahitak a genlel in zaw, hiai hun tomchikpen I minam a ding in supna liantak ahi, pahtak huai lo-kholkei hial veh!!

Zanlam mah in Mary Kom dawnna ah ka va hohtei ua, singpi eh! Theitui ka chihna khawng ka dawn malam ua leh a mun ka tung un mi a na tam mahmah man a, eilam ngeina dan in mikawm phu chihtak a phu suk kawm a ka lutlut ua leh ka va ma dawk lenlon dek zozen thethup uhi.  I hohna san, I ngaklah mahmah Mary Kom a hongtung a,  kuapeuh in ki-en ut chiat, hiainu mah mu-ut a hoh ihihna ah mipi a hongdingtou suausuau ua, kou omna lam ah muhbat di ahi kei. Nisat lah salua ahih man in Lawmte’n lungkia in hon paisan khinvek mahle uh Kuhkal tak a om in, programme zatna gin-omtak in ka uaptou nilouh a, zohdi kuan lam in mipi paikhawmte’n Mary leh stage lam mitsuan nawn talou in mundang kia mitsuan leh paikhe so-souh in hong om mawk ta get hi! Huai hun chiah  in chu kita zou ngial, tutna awng ngial e. Ahi a, eilawi in banghiam khat I sai nak ua ahih leh hichi bang “Buaina” te a loutheilou toh kibang, Buaina om kei leh I programmee pen lohchinglou toh kibang maimah  hi! Hiai khawng changkan(g) na a ngai a, kisaktheihpih mahmah theilai ihih ua le bel, khangtou lellel leng kichih ngamhuailou; niamkiat, manthat lam man-hoh ihi zo-daihdaih di uh ka chi!

Zanlam  mah in le New-bazar ah damdawi hunbei, gap khat ngut ka leikha netnot chih zaw ka hon genlang sese dahmai di… a enkai tu omsam hive hang, a expirely date enkhial/simkhial kha ua hinteh!!!

***Nu, Ka kipak!***

© ZM Tonsing
5/9/12