Thupatna: Thugelh piching (main article) ka gelh louhna kum khat bang avalta hi, khenkhat bang in koilam tungta ahia, ana chi thei uhi. Aziak gendi pi omkei mahleh bangzah hiam bel om veve hi (huaite kikup sawm i hi kei). Himahleh awlmohna leh veina omlou ahi tuankei. Tutung ka ‘Birth day’ ahihtoh chi in ka mi leh sate ‘Birth day gift’ chihdan in thugelh khat kipe leh chih ngaihdan nei in kon gelh hi. Kuahiam in neuchik beek aphattuampih leh gelh thaman om ahi di.

Khichiri (Anchiim): Tutung in tuah khakkhak hon baan gelh ding ka hi a, (khichiri = thil tuamtuam helkhawm a anchiim hon bawl ka hi), afuh leh nek theih limtak i suah dia, huchilou in bel nek theih louh pi hong suak kha ding hi.

Goutan: Gil a gah goutan kipahman a Pathian in mihingte honpiak ahi. Pathian’ vualzawlna gilgah goutan tapa deihthawh takmai August 16, 2012 in piak in ka om ua, hiai ka tapa amin Lianlalvena Shoute khovel ah kana welcome ahi. Khenkhatten nupa lupkhawm a ta neihmai sa pawl a om ua, himahleh tuadan hi zenzen lou in, Pathian in kipahman a goutan ahonpiak ahi chih theih ngeingei ding ahi. Pathian in goutan honpiak hoihtak a kem a Ama’ deihna toh kem piching a enkawl din mohpuakna honpia hi. Hiai mohpuakna peen maimai lou hial hi. Gilgah goutan i neihte Pathian deihna toh kituak a kep ding nu leh pate’ mohpuakna masa leh thupi pen ahi chi leng i gen khial lawmlawm din ka gingta kei hi. Bible in ‘Na gou omna peuh ah na tungtang a om ding’ achih bang in i tate omna peuh a i lungtang a om ding ahi. Mi kuahiam in Gold 2 kg nei taleh a koih nana ihmu theilou hial in a ngaihtuah ka gingta hi. Ahihleh tulai in nu leh pa tamtak in tate gou manpha Gold sanga manpha zaw leh tehpih vuallouh ahihlam phoklou uh adiam chih theih hi. Tate i gou manpha peen ahihna uh phok a i kep ding bangtak a kem hileng tulai a tuailai khamtheih, guihtheih leh thil chiin hoihlou hih atam kei ding hi. I khotang siatnate leng hiai sang in adaan om zaw ding hi.Nu leh paten i mohpuakna i sep/ngaihsak louh ziak a hiai bang siatna i gam a om hikha ding hi.

Khotang Siatna: Mimalmal tamlou tengkhawm ten inkuan bawl ua, inkuan tamlou tengkhawm ten khua khat bawl ua,tuabang in khotamlou tengkhawm ten nam khat jat khat bawl khia hi. I khongtang siatna leh hoihna koi a kipan ahia i chihleh insung mah a kipan ahi hi. I gam i nam bawlhoih taktak ni i chihleh ‘inkuan ah kiknawn ni’ chih alampi omsun ahi. Insung a mi hoih leh thumang mahmah khotang ah aseding chih haksa hi, tuabang in innsung a thumanglou leh kolhak mihing khotang ah ahoih ding chihna omlou hi. Bible in ‘Apaina ding lampi ah naupang chiil in, huchiin a upat dong in tua lampi apialsan kei ding’ chi hi. I khongtang leh i gam sung a siatna leh huhamna tuamtuamte i insung kikepna uh gahsuah hilel zaw hi. I khotang bawlhoih nang mimalmal tunga kinga ahi. Kuahiam Mr A/B heutu MLA/MDC/IAS/MCS etc a ahongpan ziak a i gam hong hoih guih ding ahi kei. Mimalmal i ki bawlhoih chiang in hong hoih pan ding hi. I gam i nam i bawlhoih ut leh ei mimal ah akipat masak ding ahi. “Be the change you want to see”, chih bangle om ahi.

Identity Crisis: Hiai in hihna diktak kitheih chetlouh apoina gen hi. Kua ka hia, bang hi ka hia, bang ahia ka hinsan or sep ngeingei ding chihte i kitheih siang sitset chiang in buailuat nang a om kei hi. Tulai a i buaina uh tamtakte hiai hihna kichetlouh ziak ahinuam mahmah hi. I theihsiam sem na din etsakna tamlou gen ni. Student khat in ahihna diktak akitheih chet nakleh laisim ding sawlsawl ngailou in sim kinken ding hi. Tuakia hilou in nu leh pa’ thuman, teacherte’ thuman, sanga lianzawte’ thuman & zahtak, mahni kithunun, skul hoihtak a kai gige etc. Tuamah bang in nu-le-paten zong hihna leh mohpuakna diktak kitheihchet chiang in insung leh tate lak a mohpuakna hoihtak in semsuah masa ding ua,tuazoh in khotang leh thil dangdanga mohpuaknate in zui ding hi. Tulai in nu-le-pa tamtak in mahni hihna leh mohpuakna masa theilou in ahuntam zaw uh khotang leh thil dangdang ah zang ua, atheihlouh kal un a insung un thuakloh khasek hi. Govt nasem khat in ahihna leh mohpuakna diktak atheihchet intuh asepna a om in asepding bangbang gin-om leh chitaktak in a sem ding ahi. Tulai a i society a siatna tamtakte aziak khat hinawn tuh hihna leh mohpuakna theihchet louh ziak or theinapi a hihlouh ziak or thadah a anuam kia utna ziak ahi hi. Student, teacher, govt servant, politician, church leader, social activist etc i hihna toh kituak a i sepding peelmoh a omsa i sep ding ahi.

Mahni hihna diktak kitheihchet chiang in i hihna leh sepna ngaihsanna hong om thei ding hi. eg; Sweeper in amah nekzonna leh hihna atheihchian leh zumpih lou hial ding hi. Aziak, amah ziak a ofis leh mun dangdangte siangthou leh etlawmsuak hi. Tuabang in, khedap bawltu in amahziak a mite khedap hoihtak toh kilawmtak a kichei thei ahi chih atheihchian chiang in lungkim leh kipak mahmah in a nekzonna or seppen ah pride nei ding hi. Teacher bang leng amahziak a laisiam leh mithupi tampi piangkhia ahi chih atheih chian chiang in lungkim in kithalawp deuhdeuh ding hi. Dortorte bang zong amau ziak a miten lungmuanna leh kinepna neithei, mite adia damna tuntu hithei chih atheihchet chiang un anasep uh ngai poimoh leh kipak semsem ding uhi. Tuamah bang in sepna or nekzonna om thei liaisiah hiaidan in en vek leng ngaihsanlouh ding khat beek omlou hi. ‘Dignity of labour’ i neih chiang in tuasang in i khangtou zaw ding hi. Mimal tek kingaihsun ni i hihna leh mohpuakte ah i chiang huntokna hiam? Na hihna leh sep ding na chian zahzah in kipak leh thanuam in na sep dingte nasem dia agah kipahhuai na at/ngah ding hi.

Dependency Syndrome: Atangpi in eilamte mahni khe a kidin sang a mi khuahiam in hon panpih a tua pasan a khosuah ding ngaihdan neite i hi uhi. Eg; Mr X/Y apu, api, ani, agang, a upa, a naupa, a paneu, a papi etc kua hiam sepna nei a om leh tua in apanpih teitei ding ngaihdan om mok hi. Akipanpih zoute bel thupi in hoih mahmah hi. Himahleh kipanpih zohlouh chiang a unau, sungta, putu, kuahiam kitheihsiam louhna tun in relationship kisesak thei mawk hi. Hiai dependency syndrome apan i suahtak theih nang un mahni khe a din a mikhat suah ding ngaihsutna i neih uh kisam hi. Hiai bang a ki lam-etna in Mr A/B asepna a alohkia kidaih lou ahihman in veilam/taklam phamtheih nana ‘side income’ hong zong in mi diktat leh govt nasem muanhuai mahmah hilai corrupted person hisak hi. Hiai in i khotang leh gamsung a moral degradation leh siatna tamtak hontun zaw a, a long run ah mipite mah athuaktu in pang hi. Huaiziak in, kuapeuh in mahni khe adin a mikhat suah ding, diktatlouhna sum khong kipahpih leh lam-et louh ding ahi. Hiai i genlai in miteng hichi chihna hipahlou,hiai in a sukkhak tampi om a tuate bangchi leh bawl hoih thei ding chihlam focus in neileng chih deihna ahi zaw.

Chief Guest Culture: I gam uh leh mun tuamtuam ah hunzatna teng phial ah Chief Guest (CG) aloutheilou bang a ngaihna om adiam chih in om hi. Hiai CG culture koi a pan or chik a pan i lak uh adiam. CG i chial leh leng a programe toh kituak leh huailam pang deuh mite hileh. eg; Siamsinte thil hihna ah Scholars leh laisiamna neite hileh, Sports toh kisai leng Sports lam a siamna leh hihna tungtuan neite hileh. Saptuam vai khawng a politician khong vachial, chihbang angaihna omlou! CG chial peuhmah in lah sum mah kilam-en in sum pezou dite kia mah chial zel uhi. CG pang gige a sum pezou gige MLA/MDC/ Govt servant ten huai dia sum atuam a muhna nei uh adiam or aloh uh kiching lua uh adiam or fund khenkhat amau utthu a ana divert ziau in CG a apanna ua vapia uh adiam! Ka thei kei. Hiai CG culture apoimoh luatna ka thei kei, sukbei theih daan khat om leh hoih kasa. Abaan zaw simtute’ khut ah ka nga.

Land Ownership: I gam ah tulel in Hausa (Chief) thuneihna in i kipua ua, khua khat a Hausa gam neitu ahi mai hi. Khovel khantouhna akikheng hat mahmah ta. India khovel a mipi thuneihna (democracy) gam liantak khat ah i teng a Indian Constitution in hon huam khavek hi. Central Govt in democracy grass root level a zat a mipite khantouh nang scheme tuamtuam sepsuah in a nei hi. Tuabang ahihtheih nang in ‘Panchayat system’ a poimoh hi. Himahleh ei lak ah azat theih kei hi, Hausa system i zuih ziak un. I theih chiatsa bang in tu leh tu in Hausa system sukbei theih ahikei, bei guih hileh i singtang gamteng Govt gam hongsuak guih dia, phaizang mite hong pemlut zungzung ding ua, milip ei sang a hongtam zaw in hong nomvalh pah ding uhi. Himahleh, tulai thil paidan i et vengveng chiang in Hausa system peen Indian democracy toh kituaklou banah, bangtan survive zou ding a chih theih haksa hi. Manipur Govt bang in MLR & LR ACT singtang gam teng a zat di ut hita. Singtang gam a oil exploration bang leng hiai toh kisukha issue ahi. Singtang gam Govt a ahihleh i daal thei kei dia, Hausapa a ahihleh le i daal thei kei di, amah gam amah thu hi di. Tu leh tu in mipi lou in Hausa amah kia in survive zoulou dia, Hausa lou in mipi le survive zou lou ding! Hiai bang vengvung kal ah i survive taktak nang uh ngaihtuah leh sual a hun mahmah ta hi. Khanloh hun mahmah ta. Aban zaw simtuten ana ngaihtuah mai un.

Thukhitna: I gam ah kikawm tuahna lampi ahoih kei. Khangthak ten lai hoihtak in sim ut le uh leng skul/college hoih leh kaina taak a tamkei. Electric meivak agina kei. Damlouhna tuamtuamte singtang lam ah ki etkol theih ahikei. Lamka ah leng ki at ding atam zaw phial in Sialmat Hospital ahihkeh Imphal lam azuan uh. Lamka zang leh singtang khuate ah tuisiang dawn ding aki tasam. Singtang gam a keu deuhdeuh a luilian a i neih sunsun uh Tuivai leh Tuivel khawng aneu deuhdeuh. Govt scheme tuamtuamte ahi ding bangtak in sepsuah atamkei. Sepna neite a posting na mun ua om a chitak leh diktat tak a sem atamkei. Singtang apan Lamka kidelh huan, Lamka apan ahithei teng Vaigam or Foreign ah. Zodawn or singtang lam theu/ lawi deuhdeuh. I gam ah muanna leh bitna a om kei, tuaziak in khantouhna a om thei kei. Hiai a i gen tengteng bang ziak a hi di? Kua ziak ahi di? Kua i ngoh dia? Bangchileh bawlhoih ahi thei dia? Simtuten hon kum un.