USA gam sungah Biakinn 100 val bang ki khakcip khinta hi. Bang hang! a ki khawm ding mi omlo maw, kumpiten phallo maw, bang dan hi ding hiam?  England gam pen Christian gam kici na pi bang hangin Milim bia te thahat semsem mawk hiam? Milim biate a mission na semte uh khauh pai zaw aidiam? A hih keileh Christian te up PA manlo zaw hi ding hiam? Rev. Dr Gin Khan Khual leh Rev. Dr Lal Buaite in Zomi Pentecostal Church, Nashville TN, USA ah hong gen thu hangin ka lungsim tampi hong sukha hi.

Zogam ah Cope Topa hong pai hunin Zomite dinmun nuntak khuasak , silh leh ten, nek leh dawn..cihte bang tan hi ding hiam? Zogam ah tuhunteh bang hangin mikangte Pasian na sem dingin hong om nawnlo uhiam? Muanhuai luata ihi diam? A ut om nawnlo aidiam?

Phawk manman teng gelh suk pak leng:

Cope Topa te innkuan a sihtan dongin hong ki pia khia hi. A sihdan uh ka ngaihsut teh ka khasia suak mahmah mai hi. A ta nihte damlohna tawh silo in  khuavotsa lua in si hi.  Pasian na' sem takpi uhi.
Hun hong paito in mikangten a pumpi uhtawh Pasian nasem dingin hong vak nawnlo in sumleh neihsa tawh Pasian na hong sem uh hi. Tua ban-ah a tomin genleng Pasian thu thuk gending kuamah in ki ngaihsun nawnlo in a THUPHA bek ki genin ki delh khengkhang hi. Tuapen hoihlo hilo in Pasian thu thuklut lohna lamphial ki patna hong suak mawk hi. A tate un Pasian thu thuk thei nawnlo za nawnlo uh a, a THUPHA bek hong thei  uh hi. Tua panin Biakinn pai kul nawn kei cihtawh ki zomto ta hi.

 A THUPHA bek ki thei, ki deih ta hi. Tua bang teng hangin khangno Pasian a phat/bia om nawnlo in piteek puteek tengbek Biakinn pai lingling uh a, a tawpna ah Pasian ki lunggulh nawnlo ahih manin Biakinn a pai ut om nawnlo aa, Biakinn hoih mahmah inn 100 val ki khakcip ta hi. Khangno te koi lai ah om hi ding hiam? Koi lai a tung zen uh tam. Kua mawhna......thupha..thupha..maw Jesu…

Zomite ki khopna USA ah biakinn 80 val kum 2012 ciangciang ki sim thei lai hi. Biakpiakna ki hat takpi a, ahih hangin Pasian thu laigil a ki genna mun tam omlo in a THUPHA lam bekbek ki tamgenzaw ahih manin a THUPHA in koi ciang hong tunpihta hiam? Gen suk leng:

• Biak inn sungah CD, DVD van tuamtuam ki zuak ziahziah theita...
• Biak inn sungah van a leite leh a zuakte ki mawhsak om nawnlo..
• Pasian ading phatna ki lim bawl mahmah a, tuate tawh sum muhna ding ki zongta...
• Pasian ading phatna ahanciam mahmahte..vanzuak vanlei biakinn sungah hat mahmah ta...
• Pulpit tung panin van ki zuakta, thungetna ah ki hel tangtangta...
• Pasian na semten van zuak ding biak piakna ah khat mah pua hamtang ta...
• La sakna munteng vanleina in ki zanghta...
• Phatna munteng piakna in ki zanghta...
• Amen cihna munteng Game ki mawlna in ki zanghta....
• Khangno te biak inn a pai uh hangin sawl manna bekhita…
• Biakinn sung anung lam ah khangno te phone tawh buai khengkheng ta…
• A etteh huai pipi in zong Biak piak hun sung a phone te khaknuamlo lailai..
• Tampi ka gen ding om…….hunsak phot ni.

Zomite hih bangin i kalsuan tohtoh leh innkuan ki melmuh kimna leh phatna te ah cimang ding hi hang.  Biakinn pen nidang ciangin khangnote biakinn hong pai ut nawnlo dinga, papi putek pitek teng bek in Pasian ki phatnuam bek ding hi.
Ka deihna bulpi taktak pen:
1. Pasian thuthuk takpi Biakinn ah gen tangtang zaw ding, a thupha bekbek genlo ding..
2. Biak piakna pen vak tuamtuam zuakna in zanghlo ding...
3. Pasian thu ah Siangtho tak in nungta gamta ding...
4. Biakinn cihpen Pasian biakna inn ahih manin a Siangtho penin zangh ding...
5. Pasian lungsim takpi tawh phatna pia hamtang ding...
Zomi mintawh pawlpi tam semsem ta hi. Pasian thu laigil kuamah in gen ngam nawnlo hi. A thupha bek kideih/kigen ta hi. Khantohna sangin khansukna lamah kalsuanta hang ei. Thupha bek deih keini, hong piapa lianzaw a phat huaizaw thamtham hi.

Kei dinmun mahmah panin ka phut khak thute,  kei a kipan ki phuahphat ding lunggulhna tawh...
Thawn Tuang
Zomi Angvaan
http://www.zomi-angvaan.blogspot.com/