I neu lai in Akpi laulo kua mah om ding in ka um kei hi. Ahi zongin bang hang akpi hangsan hiam cih I na ngaihsun kha ngei ding hiam ka lamen kei hi. A hih dan mah  in I tuat zelzel lel hi; Akpi a tuite hong keuhtak ciang in, a-note a khual hong kisam a, a maute maih ah a hangsanlopipi sa in a hangsan hong ki neih ana hi zaw mawk hi. Mihing zong tua mah bang I hi lel hi; nu leh pate’ tate mai-ah hangsan mah mah uh hi. Mi bang zah in I nu leh pate’ hangsan na I ngaihsun kha ngei diam?

Singtang dawn pan in zanggam ahi Lamka leh Kalemyo cih bang hong na zuatpih mawk uh. Zanggam ah bang ci innkuan nuntak ding cih geel sinsenna om khollo in upna tawh ei a tate uh hong na tunpih uh hi. I singtang/zodawn ah meh lei luat’ kisam ngeilo hi. Lo kikho in meh ding piang a, zanglo pan leh lote pan ann nek ding ana kho uh hi. Zanggam ah’ leiloh peuh mah loin, nek ding omlo pah hi. Kumpi nasem leh sepna kician neilo I nu leh pate tampi om lua. Zanggam ah ei a tate, I nu leh pate’n hong ten-pihna uh pen a hangsan masak na pen uh hi.

Zanggam ah I nu le pate’n hong tenpih bek hilo in, pilna leh siamna I neihna ding sanginn ah’ sang hong kah sak lai uh hi. I singtang dawn a gancing leh lokhoh bek hi ei a tate uh a ding in. A dang peuh mah sep ding om vetlo hi. Sum leh pai val man in sang hong na kahsak uh hilo a,  ei a tate uh hong khual man, khanggual I phak ding, nu leh pate tha I dawn zawh na ding lam etna saupi nei in sang hong na kahsak uh hi. Sang hong na kah sak hang un, ei a tate laisiam ding, pil ding, sepna nei ding, nu leh pate vakzo ding cihna hi tuanlo hi. Nu leh pate’n ei a tate tungah upna hong na nei uh hi. A piangnailo, a tungnailo khat ah upna a hong neih uh hangsan mah mah uh hi.

Hong khanglian zanggam ah sep nang leh nuntakna haksa, sum leh pai zong khuapi tuam tuam ah Zomi khangnote I tam mah mah khin uh hi. Sepna hong nei lawm leh gual tawh nuamtak in khuapi sungah I nuntak ta uh hi. Nidang i neih zawh loh na hoih nonote I hong nei, kua mah thusim nonlo liang in I om uh hi. Zu leh sa, khamtheih tawh kidiah in Zomi khangnote tampi I om khin zo uh hi. Nu leh pate zong phawk nonlo, sum loh ci lah inn lam khak zo ngeilo, innlamte’n leh khak bang I om thei uh hi. Nu leh pate’n a buai a hih leh ci’n neilopi pi’n sum leitawi in a hong khak tampitak om ding hi. Nu leh pate hangsan mah mah uh, nang leh kei tung a hong upna uh leh lametna bei tuan deklo hi.

Akpi zong, aknote a neulai bek hi hangsan hi, a ton tung a hangsan hi tuanlo uh. Aknote amau leh a mau nek ding a zon theih uh, a sawtlo in Akpi zong ak dangte hong bang kik veve hi. Zomi khangno tampi takte’n ngaihsun leng; I nu leh pate uh nidang bang a thahat tam non hetlo ding hi. Ei a tate tung ah ki nga-ta tampitak om ding hi. Pawl khatte bang tekpi leh hat hetlopi mah in vailo kuan tampitak om kik theilai zawsawp hi. A tek nung duai nung un Zomi khangnote’n I pianna nu leh pate khasia sak hi hang. I singtang dawn pai in zanggam hong tungpih uh ah, en zanggam pan koi mah a tunpih zolo, a min bek a zazate suaksak theilai hi hang. Khangnote hangsan I kisatakpi diam?

Akpi a tontung in hangsan zolo a, a ciangtan nei bek hi. Akpi pen a tawp, I go in a sa I ne lel a, a nuntakna bei hi lel. Akpi nuntakna mihingte nuntakna ah teh theih ding hilo hi, I sin/zuitheih bek hong pia thei lel uh hi. Ngaihsun pha leng Zomi khangnote Akpi sang in a meidawi zaw tham, akpi na ngawm a pha zolo ki tam mah mah kha ding hi. Akpi dem ni Lia leh Tang..Takkheh!