Minam Kician Khat Hihna Ding Theih Huai Thu 

Sia Khampeek (Norway)

Sim le mal , nisuah nitum, tuilu tuitaw le leitungbup a om Zomite in nuntak khuasaknate le pilna siamna akipan thukizatuahna lamah leitung hun luan zia tawh kizui-in, khantohna lamah namdangte mah bangin i madawk mahmah ta hi. Hih bangin i madawkna sungah i khantohziate manlang lua zaw ahih manin sinna, zonna le hanciamnate sangin, a hun zui a theihtawmna ( Tual khut) cihte tam mahmah mawk hi. A diakdiak in tuhun a kilimzat mahmah ahi huihlak pilna, siamna (Internet) tawh kisai kizopna le zatzia ( Media and Information Technology) lamah kisiamzo nai lo ci leng kikhial lo kha ding hi.

I pu i pa khang a i neih ngeiloh bek tham loin, i zak ngeiloh thute le nate ahih manin, ahi ding mahin sang siam ciat ding zong kilamen hi hang. Information and Technology cih zong sinloh, kanloh in athei zong ki om kha mah dinga, ahi zongin theih taktakna ding sinna le kanna mah kisam hih tuak hi. Hih Technology tungtawn mahin thukizakna tuamtuam( Media) kici pen hong khangto mahmah a, sep le bawlzia zong kitheisiam mello pi mahin, Zomi sung nangawn ah kisemin kilunglut kheu kho ciat hi. A diakin gamdang tung Zomite sungah hong laang pha mahmah in, a lungdam huai thu khat mah ahi hi.

Media nasepna ah suahtatak septheihna, pulak theihna le genkhiat theihna cihte pansan in, Internet pan ut bangbang kigelh in kitawng, kigensia in akikoko tawh kigamlum khengkhanghi. I theihngei / theih ngeiloh le mipil, misiam cihte kikan nawn loin, gambeel (Refugee) ciatciat cih khatin kua mah kizahtakna zong om nawn sese lo hi. Kawlgam sungah om lai khawng a minam thu le kipawlna cihte ah panmun nei ngei mellote khawng gamdang tun ciangin, Inn lam (Zogam) ngaih man le lungleng/ lungzuan man lel tawh minam a it a veii panpan om tuak in, tuate zong a sia hipeuh mah lo hi. A hi zongin a dahhuai le alunghimawh huai thukhat ah Media zatzia i siamloh luat manin, tuni Zomi sungah akitheik tham zah dongin, buaina le kilungnop mawhna tampi om thei dingin lamet huai hi.Tua bangin Internet le Media tungtawn a mindaisakna le minsiatsaknopna tawh mawk otot te le lai mawk gelhgelhte pen a mau mahmah minsiatna hi zaw in kimu hi.

Hih bangin Internet tungtawn a thusia le thupha pulaktheihna i cihte zong lam khat panin i muhna le i omna munte in i mit hong vaksak in thumuhna le thutheihna lamah zong ut in ut ta kei phial leng pilna le thukhualna ciang khat i neih khak man hi kha ding hi. A hi zongin tuate lel pen pilna le thutheihna kici khin thei peuh mah lo ding hi. Hih Media and Informationa Technology i khantohna tawh kiton mahin, gampua lam Zomite sungah biakna le kipawlna tuamtuam kiphuan khia khengkhang in, Pawlpi sia le makai ding khawng i kituh luailuai zel hi. Pawlpi le kipawlna i kalsuan zia le dante theician mello in makai nuam bulom peuh ki om gawpgawp ahih manin, tua kipawlna le pawlpite sungah hun tomno sungin buaina piang pahpah hi. Lam khat panin kipawlna tuamtuam i phuatkhiatte zong minam veiina , khantohna ding le kipumkhatna ding vive mah deihna tawh kiphuankhia hi dingin i lamen a angtan huai mahmah hi.

Tua bang a i neihsa kipawlnate pen a lian zaw le a neuzaw, a thupi zaw le a thupi lo zaw cih bangin mipite' sungah kigenna om a, tuate zong a hithei khin lo thu ahi hi. Leitung ah biakna akipan kipawlna lian UNO akipan tampi om a, a hi zongin a lianpen le a thupi pen kipawlna cih a kiciamteh om nai tuan lo hi. UNO sung nangawn ah a ut lo a kipawllo zong gam tampi mah om zel kawikawi hi. A hi zongin ei Zomi ( namtawm) khat sungah a neihhuai veve thukhat ah minam vai ( Politics) lamah neihkhop theih ding kipawlna Gnt: ZCD (ZNC) party bang nei khawm thei-in, khantohna lam adingin GZA cih ? bang koih thei leng kikhiallo ding hi. I sanggam India lam Zomite in minamvai ah ZRO koih thei-in, khantohna le nam kipumkhatna lam ading in Zomi Council (ZC) cih bangin nei thei uh hi. A hih hangin kipawlna dangdangte pen amau sepna zui in, kalsuan ciat veve lel uh a, kilenkhawm dimdiam thei uh hi. Hih pen kalsuan zia man/ diktak le Democrecy dan hipah hi.

Tua hi-in, gampua pan kipawlna bangzah in a tam phial zongin minam khantohna taktak sepkhiat theihna ding pen gamsung mah tawh khutkilet akisam ahi hi. Gampua pan vaihawmnate gamsung ah Kumpite' theihpihna le phalna nuai ah akisepkhiat kei le lawhcinna kineithei lo ding ahi hi. Kawlgam ah kumpite le minam tuamtuamte khantohna dingin gamdang te le NGO tuamtuam in sumbawl/ sumzuakna lam kizopna hong kipansan mahmah uh hi. Tuate in kumpi mah tawh kizopna bawl hamtang uh a, tua khit ciangin a sepnop bangbang uh semkhiat sawm uh hi. Kawlgam kikhelna sungah Zomite in i kalsuanzia, i khuasak zia dingte ngaihsut huai mahmah hi. Democrecy hunah ut bangbang a septheih cih tawh lawhcinna kinei thei tuan ding hi lo hi.

Tua ahih manin Zogam le Zomi khantohna ding ngimna le tupna a neite in ei le ei sung mahmah i kizopna le i malaksawm ziate ah pilvang huai le kipumkhat masak photphot ding a thupi penpen le kalmasa ahi hi. Tuhun thugente le laphuak/ lasa khempeuh in zong minam itna le kipumkhatna ding vive mah kigen/ kisa ta hi. Kipumkhatna i cih pen a vekpi a kipumgawm sawmna hi loin, i kibatnate ah sem khawm a, kibatlohna munte ah a tuam aseptheihna ahi hi. GZA i thuletpi khat ah " Unity in Diversity " cih pen a man le adik mahmah thubulphuh ahi hi. Zomi buppi kipawlna huang sung khatah lutkhop meimai ding cihte pen abaih lo ding le a piang thei ngeingei lo ding thu ahi hi. Tuni akipan in kipawlna tuamtuam pan i makaite' hong makaihnate zuihsiam ding le makaite in zong pilvang tak le khat le khat kithuzaktuahna le kitelsiamna tawh hong makaih siam ding uh kisam lua hi.

Bangbang ahi zongin, abeisa in Zomite minam kician lo cih kamging/ thuging tuamtuamte sung pan tu petpet in minam kician taktak khatin Kumpi in kipsakna le theihpihna ( Recognition) hong tangko sak khin ta uh hi. Minam kician khat hihna sungah i kisap thute telsiam in, i kalsuan zia ding vaihawm siam mahmah kulta hi. Minam picingte sungah kiselna le kitotonate neu semsem dinga, kipumkhatna le pilvangna tawh khantohna lam kimanawh ding ahi hi. Minam picing i suah ciang bekin a khangto minam kisuak thei pan ding ahi hi. Mawhna in minam mindaisak le kiamsak a, thumanna in minam tawisang/minthang sakin khangtosak ding ahi hi. Zomite i cihtakna pen pu le pa khang akipan i suahpih Pasian hong piak ahih manin, i kepcing zawh ding kisam hi. Thumanna le cihtaakna i masuan kik hun ciang bekin a picing, akhangto le thupha ngah minam kisuak thei pan bek ding hi.

By: Sia Khampeek (Tongsan Pu)