Khua asiat ziak in mite akinoh ua, bus sung akidimpah hi. Tutna dang a awn louh ziakin a nungvual ah katu hi. Bus apaikuan mah2 in upa kum 70 miding mulnei thiapthuap, vun keu velvul leh kawng konsim khiukheu, puan tumten, singtang sakhaupi kuah khat ahong lut hi. Amel etmai in khosak haksa tak a pan ahi chih akitheimai. Agim bang ahat sim vutvut a, Meitei nungakte ngial intuh anak uh a hum hial uhi. Kuamah in seat a awn ut kei ua, bangtan hiam ding kawm a seat zong hi awmtak a adak kualh nung in keilam ahon ngaphei a. Huchiin kenleng kakianga tuding in kasama, ahohna ka dot leh agenthei zokkei a, atawp in, "mizawngte chi uhia? Pisa ah hoh kahi" chi'n hon dawnga, huaituh, "TRIBAL WELFARE OFFICE" achihna ahi. Aman atanchin hiai bangin hon hilh ngiatngiat hi.

"Kum 30 val vingveng singtang khua ah sikseek in kana panga, vangzat hoih kaneih louhziakin deihbang in nna kasem theikei hi. Khosung mite hon lam-et leh poimoh uh vanzat te amau deih hun2 in ka bawlsak zou mankeisek hi. Huchihlaiin vanzat hoih kaneihlouh ziakin solkal ah panpihna dangka bangzah hiam toh sikseekna vanzat ka nget leh piak ahonchiam ua, huai lakna ding in phaipi zinna ding im ka ak neih sunsun api tuilai zuak hial in kahong kuan a. Himahleh,  mi kuate hiam in honna lak khitsan ua, khutvuak a inn tung ding kahi mai ve. Ka bus tuangman ding le'ng Teng nih(Rs. 2) in asam zomah lai hi." chiin aw liing pepelh in a tanchin ahon hilh hi. Hiai thu te agen sungteng kawl aphia a, kek kia in van a ging zuazua a, tuikangpi akinawk zuazua a, tuisunga ngasate bang phul chitak in aphul ua. Gulpi te'n akam uh aka ua, akam uapan in mei hong kikhohpawt zotzot hi. Buspu le'ng akinoh mahmah a, himahleh ahat thei tuankei hi.

Kakianga tu sikseekpa mel kamuh in leh atanchinte ka ngaihtuah in ka khasiat tha asuak a, AW ngaihtakin kaki koukhia hi. "Khovel leh asunga om tengteng aw kathu ngaikhia un. Khosung, saptuam sung leh gamsung ah thudik in mun anei nawnta kei hi. Panpih ngaite panpih ahikei ua, panpih ngailoute panpih in a om uh. Building in neite'n Housing Scheme amu ua, inn neizoulou te'n amukei uh! Tualthat te nasan le'ng sum ahauhziak un ngaihdam in a om ua, mizawng leh gentheite tung atu. Amuate khelhna, aleh sawm a hihpun ahi a, mihaute khelhna bel mekmit ahi! U-le-nau, beh-le-phung haute thu apai a, nam tangkhatte thu dikmahleh laklouh ahi. Sum in vai ahawm a, Bible inlah, 'Sum apau chiangin thudik ataimang zel' achi ngal a. Saptuam heutute nasan in thudik leh diklou ngaihsun lou in mehlim ameh mun nate uh leh phalbi chianga asilh ding puanlum haute thugen peuh dik in apom uh. Vaihawm te'n dan abawl ua, asimmohte uh tung ah dan bawl sanga khauhzaw in vai ahawm ua, azah te uh tung ah dan a omta kei hi." chi in kakikou khe vongvong kha zozen a, meitei te bang in ahai ahonsa hial uhi.

"Poi hina maizen e! Bangteng hileh tu in zaw, mihing tehna a teh in i om ua, den hunchiang in Pathian tehna a teh in i om ngeingei ding uh. Pu aw, lungkham ken aw!" chi in sikseekpa kapom tonton a, huchih hunlai takin vuahpi hongzu a, vanpi ging zuazua te'n ahonphawng guih a, kapom tonton pen ka etleh, kalukham ana hi a, ka lukham puan tung ah, "nahtang kung ah tem ahiam" chih akigelh in kamu a, lamdangsa a kamit nuaithak a ka et thak leh, "Tung anem na lamlam aki khuat" chih ki gelh in kamu zel a, lamdang sa deuh in meivak ka hekvak a ka etchet leh......... Maizen..... "SWEET DREAM" ana himai mah.

Note: Hiai article (L) Pa Thangneikhup in adamlai a ana gelh ahi a, Unp Lian Guite in phattuamngaihna toh suahkhiak dia ahon teisawn ahi.