Thupatna

Gam changkang Korea gam mite–hindan, gamtatdan leh khosak dan i muh chiangin, pianna gam ngaituah khak louh theihlou hi. Tuabang gamte i muh chiangin anasepte ua pan gam it taktak natoh gampuah uhi chih kithei mai ahi. Agam uh neuchik himahleh amite kulkal leh ginom/muanhuai ahihmanun Asia gam kia hilouin, leitung bupah minthanna tampi anei gam khat ahi. A gam mite fel thei ua, thil khatpeuh a hih chiang un, "Kin! Kinoh! Kinoh!" chiden uhi. Tuabanah, pil (creative mind) chihkhong, siam (nasep) chihte ngaisang mahmah ua, tua dungjui mahin a hih/bawl peuhmah uh–a maimai, hi nemnum chih om vet lou hi. "New Idea, New Thinking," chihte thangsak mahmah uhi. College leh university khong a leng–"NEW IDEA, NEW THINKING" chihmah thupi bawl uhi. Tua hangin, Korea product himhim tuambikna khat nanei teitei se hi. Bangteng himahleh thilteng gen senglou di i hihmanin a gam uh toh kisai lung hong khoih diak deuh tam lou i gen ding.

1. Lampi

Korea gam omdan bel ei zogam toh kibang mahmah–tang gam ahi. Seoul khopi bang zong plain area hilou a, a khopi omdan eilam toh tehin Shillong khopi toh kibang mahmah hi. Pathian hoihna hangin agamsung dung-le-vai ka vapal suang kha hi. Tua a thupi kasak mahmah te laka khat ahihle bel lampi hi. Amau ecomomic khanna lampi a kinga mahmah chi ua, alampite uh ahoih theipen, anuam theipen leh atou theipen dingin bawl zel uhi. A bawldan himhim uh zong thupi–a foundation lei(soil) khuk(knee) tanding khong hoihtak a hualtak masa ua, tua khit chiangin alkatara/concret feet khat khong a sah in sung uhi. A let aneu thutuam a lampi peuhmah uh mam zihziah hi.

A lampite uh hoihin, kilawm leh tawldam huai thei mahmah hi. Sign board-te kilawmin lampite hinemnum chih omlou ahihmanin garihekte leh khualzinmite adingin lampi dung mit taihuai hi. Gari hattai theih ahihmanin 400 km agamla bang zong, dakkal 3 khongin kitung zou mawk hi. A lampite uh mun khenkhat a, mual khat pan mual khat kikal lei (bridge) doh suak ua, mun khenkhat ah, mual 2/3 bang vutpailet (tunnel) ua tua mualte kikalte ah lei thupi taktak doh suak uhi. Tua alei dohte uh sauin, sangin, thupi theita buang! Amau bel lampi toh kisai in, a mual, a guam poisa lou ua, a mun lemlouna te ah design nalh saksem uhi (tua hih a creative mahmah na uhi). Tua bang lampite muhkhak chiangin i pianna gam lunglai ah hong lang zel hi. (Zogam lampite pai didan khong ngaihtuah: Lamka to Kangpokpi, Lamka to Moreh via sugnu, Lamka to Teddim via Behiang, Lamka to Aizawl via Singngat, Lamka to Tipaimukh chihkong. Korea te lampi dan bangin bawl leng bel Lamka to Singngat bang 15 minute khong lela kitung zou dia, Sinzawl dakkal 1 khong lelin kitung zou ding hi. Tua bang hilebel, Behiang kual, Guite kual leh Thanlon kual pan sa, ngasa leh anteh louhing fresh tak a zing meh dingin Lamka ki potung thei ding hi. Tua bang hilehbel nektak zawnna hong nuamtuam mahmah ding hi). A ngaklah huai khop mai!

2. Siangthouna

Korea gamah niin(trash) utna munmun a mawkpaih theihmawk louh hi. Nullah khong ah paih phal hilou hi. Inn chihin (family khat in) dustbin a lou theihlouin 5 bang neih ngai hi. Tua te: i) paper trash, ii) bottle trash, iii) polythene trash, iv) General trash leh v) anneng trash chih te ahi. Tuate apaih chiang un mix khom mawk lou ua, a tuamtuam in tun sawn uhi. Paper-te bel paper bag mah ah thunin pai ua, polythene leh bottle te zong polythene bag khatpeuh zangin kipai thei hi. Himahleh general trash leh anneng te bel a tunnang a tuam omse ahihmanin tuate zanglouin kipai theilou hi. Tua bag te special a kibawl ahihmanin draw a kilei zel hi. A vengveng min kigelh ahihmanin, vengkhat a, vengdang ah zat theihlou hi. General trash bag te bel eilam a Ramboo te chia pha ding, orange rong ahihbanah mantam sim a bag khat ei India ' 200 phial man hi. Tua ahihmanin adim phitphet ma kipai ngamlou hi. Anneng bag ahih leh a green rong ahi. Himahleh a green tengteng kizang thei hi tuam lou hi. Tuabang a pai di chiangin, a lomlom in kithun tuamin inn kiang a niin koihna dimun ah kikoih a, tua chin niin paihten napaih sawn uhi. Niin paihten zong khol chih omlouin niteng in pai uhi. Tua banga paiuh ahihmanin, inn kim-le-kiang thang nengnung, namse velvul chih om lou hi. Tua bang a family tengin feltak a hihuh ahihmanin, khosung, vengsung niin nianua chih omlou hi. Tuabanga siangthouna lungsim neih ahihmanun a public market/bazaar kim-le-kiang khong uh niin pai nia nua lou ua- thang nia nua leh namse huthut chi omlou hi. Ei zomiten zong tua bang lungsim nei in tuabang chindante zui thei leng hoih mahmah ding hi.

Public gathering munte ah nek a neih himhim chiangun dustbin om kei leleng, a cover mawkpaih lou in, sakhaua po phot ua, tuachin dustbin a tuah masak pen hiam uah paih uhi. Tua hih a chiindan himhim uh ahi. Lehkha neng, niin neng kholak mawk paih lou uhi. Kholak paihna di dustbin lemchang a muh kei uh leh zong tua a niin nengte pua ua inn ah dustbin ah paih zel uhi. Chewing gum bang leng a hai peuhmah chiangun a cover paih mawklouin, a haikhit chiangun a cover mah ah tun nonin dustbin a pai zel ua, laithem khong hiam a tun louin pai mawkmawk lou uhi.

Tuabanah, Public toilet mun teng a koih uhi. Namse huthut leh thang nengnung chih omlou hi. Dailen na dia kibawl mun ah daileng ua, zunthakna dia kibawl mun ah daileng ngei lou uhi. Tua hih nam changkhang ahihna mahmah uh ahi. Tua ahihmanin ei zomite leng i tenna gam ah i public toilet te uah gim namsia velvul leh uak lawlaw khong a zuntha gige ding a Sian siam hi tuam tuan kei hang maw Guai! Mi gamdangte bang a public toilet te siangthou tak leh namtui vengveng a koih thei lou tuam ding a mawl hi tuam kei hang! Tua ahihman ei ten zong "New Idea, New Thinking" i neih uh hunta hi. Tuabanah migamten public fund/ Development fund tungtawnte khong a bawl khak peuhmah uh, ahoih theipen, a etlawm theipen leh a tou theipen dinga bawl a kidem theih ua leh, eiten leng i pianna zogam i puahna te uah banghang' tuabang mentality nei thei lou tuan ding? A zal zou ding lah eite mah i hi sin ngal au! NEW THINKING! NEW IDEA! NEW POSSIBILITIY!

3. Hinkho Vantang

Koreate nam changkhang ahihdungjuiun, alungsimuh zong lian chih ding ahi. Ofis khong leh Bank khong i hohleh mi ngaihsak mahmah uhi. Ofis nna toh kisai nasep peuhmah pending chi omlouin zoh pahpah sawm ua, zong zou pahpah takpi mah uhi. Ofis akipat hunin tung kim ua a top hun louin pai mawk lou uhi. Koreaten ofis khong a nasepnate nekmuh namaimai hilou a, gam-le-nam leh mipte panpihna dia sepna mun poimawh mahmah ahihbanah pilna, siamna aneihte uh sepsuah namun leh hun zatna mun poimawh mahmah mun ahi chi ua, kithalop tak leh kipe zou takin sem uhi. Tuabanah nasep na mun ofis sungte khong kilawm tak, tawldam huaitak, smart tak leh hoih tak a i chei leh lungsim ngaihtuahna hoihtak kinei thei in New Idea, New Thinking leh creative mind chihte kinei thei a, tuachin nna hoih pipi leh manpha pipi kisem khe thei chi ua, a sepna ofis sungte uh kichup takin bawlin chei zel uhi. Tua hangmahin a ofis khong uh i hoh leh smart thei takpi hi. A ofis sungte uh zahtak huai thei mahmah a, tuabang ofis khong ah semleng kipil taktak mah leh kilawm hi. A sweeper te uh maimai zong officer va sak khak theih in om hi. Tuabang lungsim eiten zong neithei leng hoih mahmah ding ai!

Nam changkang gamten ofis nasepna te tuabang ngaihsut na nei uh ahihmanin, a ofis sungte uh zahtak huai mah leh a mau mimal polite thei mahmah ua, ofis vai toh kisai a hohte ngaihsak mahmah uhi. Tua hih apilna, asiamnate leh ahihtheihnate uh, midangte panpihna dinga zat khiakna mun a zang thei a himanuh ahi. Tua hih vualzawlna don huai mahmah hi. Tua hangmahin hospital khong a nasemten mi ngaihsak mahmah in polite theih mahmah uhi. Tuabanah, building himhim bang zong a siangthou dan agen agen thohin gensiam haksa, mit mahmah toh muh vek dingin hoih hi.

Koreate a thilhih peuhmah ua "Kinoh" chi mahle uh, gari a hek chiangun mipi omna mun–lam kan nate a pilvang mahmah ua, lamkan omte kankhit hoihtakin ngak dimdiam uhi. A horn ki mekkhum chite ching khol lou uhi. Tuabanah driving licence bang leng a deihdeih in ngahmawk chih om thei lou hi. Pasal peuhmah kum 2 leh akim sepaih a pan teitei uh ngai hi. A pang lou ten kam (job) mu thei loudan uhi. A thupina mahmah uh bel pang lou a certificate lei chih ching vetlou uhi. A diktakin bel sepaih pan lin theih mahmah uhi. I pan baih leh zohbaih chi un, high school a zoh chiang un lut tangpi zel uhi. Amau gam a high school kum 19 in zou zel uhi.

Tua banah Korea te video game lung mahmah uhi (video game mai hilouin online game). Leitung bup a amau gam internet hat penna gam ahi. Internet hat ahihmanin online game nuam mahmah hi (a mobile handset bawlte uh bang zong game kimawlna di aim deuh ngen a bawl ahimanin game lunglut te a dingin hoih mahmah hi). Online game lunglut lua uh ahihmanun, nitak a naupang kimawl ding deihlou na hangin govt. in, nitak dak 6 apan zinglam dak 6 kikal naupang curfew puang uhi.

Laizial tep mahmah ua, zu zong dawn mahmah uhi. Himahleh Christian kichih peuhmah ten laizial teplou ua, zu zong dawnlou uhi. Christianten Pathian thuduh mahmah ua, tuabanah apastorate uh zahtakin, ngaina thei mahmah ua, tuachin a pastorate uh nektheih, theigah, cold drink leh a dangdang chihkhong piak thangsak mahmah uhi. A kisap ziak uh bel louin, as a token of love. Tuabanah, Koreate la (song) uk mahmah uh ahihmanin, lasak dan–staff notation, music–keyboard, drum, guitar leh a dangdangte elementary school apan kisin sak pah uhi. Tua hihmanin, a tangpi in music khoih theisim vek ua, staff note leng theihvek sim uhi.

Christianten prayer mountain tampi nei ua, tua munte gamla pipi singtang gamlak himahleh, a munte nuamin, inn hoih pipi lam ua, tuabanah electric nuam, tui nuam vek hi. Tuamunte ah giahman pia in va giak thei gige hi. Mi tampi ten tuamun Monday to Saturday hun va zang jel ua, Sunday in bel Sunday worship a mau biakinn te a zang dingin pai jel uhi. Tua mun a biakinn hoih taktak om a, worship service zong nitak teng leh sun tengin nei jel uhi. Restaurant zong oma, tua ah an kilei jel hi. Tua munte ah atangpi in Saturday leh Sunday night chilou full gige hi. Eilam bang zong prayer mountain a tam thei lam nei thei leng se het lou hi.

Thukhitna

Koreate mi ginom leh chitakte hi uhi. A hih/bawl peuhmah uh ahoih theipen leh tou theipen dingin bawl zel uhi. A khopite uh chei hoih thei mahmah ua, lamkiang a akoih peuhmah uh a cheina hi pahpah mai hi (e.g waiting shed, phone booth leh adang dang). Niinneng kipai thang jiajua chih zong om lou hi. Khopi sung a lei (bridge) tampi doh ua, tuate mawkdoh chi omlou in design nalh taktak leh style tuam taum ngenin bawl ua kilawm thei mahmah hi. Tuate a pilna, a siamna uh show na hi pah mai hi. Etton tak mahmah uhi. Tua ahihmanin, eiten zong Development fund konga i bawl/sep khak peuhmah te, a hoih theipen leh a tou theipen din bawlzel ta lehang, i gam it, i zogam puah, i mi i sate tawisang i hihbanah–miten i gam ahong muh chiangun, gentam louin, Zomite Pathian nei namte hi uh! Mi ginom, michitakte hi uh, panpih takin/puah tak mah hi uh hong chi thei ding uhi.

Tua fundte tungtawn a i bawl–ofis buildingte leh lampite leh adang dang i bawl thil peuhpeuh te–zomite pil uhi, khutsiam uhi, midang te siamna/khuak pilna ban lah lou uhi chih show na hong hithei taleh uthuai mahmah hi. A hoih theipen in bawl leng, a zal zou di midang namdangte hilou a, i zomi pihte leh i suan i ta i tu te mah hiding uhi. Ei leh ei i kipuah ke'n kuan hong puah tuan ding! A hoih lou nem num te bek zang gige ding te hi kei hang! Leivui leh a namse huthut te nam den di zong hi tuan kei hang! Ei zomite leng ahoih, anuam, asiangthou leh a kilawmte zang ngei lou dia Sian siam hituan kei hang Guai! Ki hai saksak non kei ni! Kipan ni!