I omna Zougam a khantouhna (development) a omna ding in meivak a poimoh mah mah tampite lak a khat a hi. Nidanglai in i Pi-Pu ten nisuah a pan a tumdong lou nasepna leh nekzonna hun in a na nei ua, khua a mial chiang in taptung leh pialkhang khong a tu in thuk a mei kuang zang in numeiten khau a khek uh hi. Huai tuh hun kinehchilh mahmah (limited timing) a hi a, inkuan khat in a nek ding uh leh a silh ding uh a kingaihtuah zou ham ham uh hi.

Tu hun chiang in gam khangtou deuhten bel kawlphemei (electricity) zang in sun leh zan chih omlou in na a semthei uh hi. Huchi a hihziak in mihingte hinkhua ah misiamten a na muhkhiak uh kolphemei tuh a phatuam petmah hi. Gam khangtou hih theihna dia kawlphemei a poimohna hiai a nuai a te bang in sui lehang i chi a hi:-

1) Insung tanvaktu: Nidang in taptung ah thuk a sing khul in, meikuang zang in na a na sem uh. Huai tap tung a meikuang in insung teng a tanvak zoukei, munkhat kia a mei kichih a hih ziak in. Huchi a hihziak in i Pi-Pu ten in a lam chiang un indan khat kia lianpi in a na lam sek uh. Kawlphemeivak a hong om chiang in inkhat ah meivak tampi a dettheih a, inleng dan tuam tuam bangzah hiam in i bawltheita uh hi. Huai tuh khantouhna bul khat a hi.

2) Meikhu Thengta: Insung a kawlphemei vak indan teng a hong kidet chiang in thuk a meichih a insung meikhu dim ziaizuai pen a hong bei a, mite a hong damthei tuan uh hi, huihsiang dik gigeta uh a hih ziak in. Hiai damtheihna tuh hauhsakna chikhat a hi. Sapten 'Health is Wealth' a na chi uh hi. Mi a hong damtheih chiang in na tam a sem zou tuan uh hi.

3) Laisimna: Meivak a hoih chiang in Skul naupangten nitak leh zingkal phalvak in lai simthei ua, laisiam hong tam tuan thei hi. Tuma deuh lai in kawlphemeivak a om kei a, laizil naupangten a laizil uh kumtawp a pawl a suan theih nak uh leh second hiam, third division chiang leng a na kipahpih ua, tampi a fail zomah uh hi. Tu in meivak i nei sauhsauh ta ua, first division leh position la pha bang a hong omta hi. Hiai tuh kawlphemei ziak a khantouhna a hi.

4) Kholai a meivak deta: Nidanglai deuh in nitak a kholak pawt ten singkhuah am peuh a pei ua, pawl khat in meisel peuh a de uh hi. Lampi mial a a paitheihna ding un. Tu hun chiang in kholak ah leng kawlphemei a kal lak teng ah a kide a, thil poimoh a nitak pawt a nuam mahmah ta hi.

Hiai a tung a kigen point lite tuh i gam in a a tankhak phakte lak a electric meivak phattuam nate a hi a, hiai chiang ah leng khantouhna bangtan hiam a hon pia hi. Himahleh i Zougam ah kolphemeivak deih a bang kei, nikhat a dakkal 24 sung a hun tomchik khong mei hong pailel a hih ziak in. Kolphemeivak niteng a tatlaklou a hongpai hileh bel hiai sang in i gam uh a khangtou sem lai ding; huai khantouhna dingte a nuai ah i gen lai ding uh:-

1. Education (Laisimna) : Meivak hoihtak a hongpai gige hileh i gam ah laisiamna a sangsem ding. Tulai khovel pumpi in munteng a nasepna ah; laizilna hi in office hitaleh Computer zang a thilhihna a hita. Khovel a library lianpipi omte eg. Library of Congress, New York; London Library chih leh a dang dangte tuh computer ah thunvek ua, computer a pat internet a en i deih deih simtheih a hih ban ah a copy leng lakkhiak theih (Download) a hi. Huchi a hihziak in a galzilna (distance education) skul a ki-admit a, in a om kawm a, kumtawp chiang a exam a laizil theih a hita. Sun hun a nasem a nitak hun a ei indan sung a laizil ding a himai hi. Civil Services examna khong a lohchinna ngahte tuh state dang a meivak hoihna mun a laisimte a hi ua, huchibang a ding in a poimoh petmah chih i thei uh hi.

Kolphemeivak dakkal 24 sung bang hoihtak a a pai keileh computer ei poimoh hun a kizangtheilou ding a, internet a library a lut ding bang leng hitheilou ding hi.

2. Nasem mite panpih : Tulai in mistry ten sing notmam leh khuakte a hihna uah singnotna khawl (machine) bang a omta a, thadam tak a kilohtheih a hita. Sing, suang leh sikte vuhna vanzat (machine) bang leng a omta a, nidanglai a singvuhna leh notnate zang a thagum a hih a hi.

3. Beauty Parlor: Mel leh puam kicheimoina mun 'Beauty Parlor' kichi khopi ah mun tampi ah a om a, mi tampi in nekzonna in a zang thei hi. Hiai munte a meivak hoihtak a a om kei leh na sep theihlouh a hi; mi tampi in nek ding muhlouh loh ding uh a hi. Kichei nuam a va hohten leng, tu hun in bel, meivak om hun ngak in a thapai ua; dakkal kimkhat a zoh ding nikhat sung bang a subei uh hi.

4. Kithuzakna baihlam : Tu ma deuh in laithon leh telegram khong a kithuzaktheih a hi. Tulai in meivak a hoihnak leh Computer leh Mobile phone te a internet ut hun teng a et theih a hita. Newspaper minthangte leh T.V. e.g. CNN,BBC,NDTV, etc. ettheih gige, lawmta leng ei insung tuak a kipan kithuzak theih; huaiban a laibu bang leng a manuscript computer a thun a Delhi, Madras, London a om Offset Press khong a sut theih a hita hi, huai tuh a mun a vapai ngailou a, a gal a kithot a laibu bawl theih chihna a hi.

5. Damlou ki-etkolna a poimoh: Damlouhna ki-etkolna ding in meivak mah a na poimoh hi,e.g. Ultrasound, X-ray, E.C.G.chihte a natna zonkhiakna ding in a poimoh hi. Huaiban ah natna electric a hai a damsakna bang leng a om hi. Hiaite a vek un meivak a om kei leh hitheilou a hi.

6. Insawng kalna baihlam : Kolphemeivak thahatna zang a insawng (storey) sangpipi a kikhaitouh leh kikhaisuk theih a hi. Kolphemeivak omlouhna ah bel kalbite a kaltouh ding a hi a, insawng 50 na a kaltouh leh kumsuk chih bangtuh gimhuai mahmah ding hi.

7. Industry : Factory tuamtuam leh a dang khawl thahatna zang a nasepna a poimoh mahmah lak a khat tuh kawlphemei a hi. Kawlphemei omlouhna ah industry a om theikei.

i) I gam ah Motor Car a tamta. Workshop hoihtak bawlna ding in kawlphemei a poimoh hi.

ii) Laipuan bawlna (Paper Factory) bawlna ding in mau tampipi kumteng in Tuiluang (Barak) lui ah i gam uapan Assam ah a kitolh gige hi. Kawlphemei dakkal 24 sung hoihtak a om hileh Factory lianpi bawltheih ding ahi.

iii) I gam uah suang mual/tang lianpipi a om, Santing tang leh Kaihlam tangte bang. Cement Factory bawlna ding a suang poimoh om ngeidia gintak a hi. Huailou in hiai kawlsuangte inbawlna ding leh lamlian bawlna ding a tohkhiak a suangsekna khawl tampi koihtheih ding a hi. Huchibang nasepna ding in Kawlphemei hoih a poimoh hi.

iv) I Zogam lei uh 'Acid' a tamziak in singpi kung in (Tea-Plant) a ngeih mahmah a, gamlak a singkung dan a pouthoh leng a om hi. Mei thahatna hoihtak neilehang Tea-Industry neih theih a hi. Tu in bel i gam ah tampi piangsak mah lehang, a singpi bua te i lohkhit phet a pan dakkal 12 sung a factory a lut ngai a hihziak in hitheilou hi. I gam ah mei hoih henla singpi huan i bawlna kiang ah a factory om leh bel singpi tampi kibawlkhe ding a, i gam ua sum leh pai honglut ding nasakhelaw zektal ding dan ahi. Huchibang jel in haichi dang Lemon Grass bang leng Pu Dr. R. Sanga in hon polut a, lohching ding in a gintak huai hi.

v) Press: Kithuzaktuahna saipawlte tuh Presste i chi ua, a maute leng computer leh vanzat tuamtuam meithahatna zang a nasemte a hi uh. Meivak omlou in presste bang leng hoihtak a na sem theilou uh a hi.

Kolphemei hoihleh i gam ah huihkhua a kikawmna a hoih ding hi. Tulel in huihkhua a kikawmna i neikei. Huai tuh lenna (Air Traffic) chihna a hi kei. Kaihlam tang a kipan Hanship, Bukpi, Loibual, Thanlon, Mualnuam, Songtal leh Thangching tangvumte ah Ropeway (Sikgui) khungle hang electric a Aerial Tramway zang a huihkhua a khualzin litlit maiding a hi. Lamka jang ah Thangching tang a pan Lentang dungte ah a kual in a paitheihding a, tulai a phaijang buhlei a i neihte a teng lou in tangtung mah ah teng lehang nuam mahmah ding a, i tuiloute uh buhlei mah a bawl a nekding kiningching a om ding a hi. Huchi hileh i gam uh khovel a gam changkang mahmahte lak a khat hipha ding hi. Singtang a anteh louhing meh dingte lou a loh khitphet Lamka jang a dakkal khat a potung mai ding i hi, huihkhua a lampi tuh tangtak a paiding a hihziak in kikawmna hong nai tuan ding hi.

Huchitel a Kolphemeivak poimawh a hihziak in Englishten tuh 'Energy' a na chi hial uh hi; Huai tuh thahatna chihna a hi. A hihleh eigam a hiai 'thahatna' omtheilou a hi diam?

Omthei lotel ahi.

Hydro-Electric: I gam uah lui hoihpipi i nei ua,Tui a kipan meivak lakkhiak a hi, huai tuh Hydro-electric a kichi hi. 'Hydro' chih thumal tuh 'tui' chihna a hi a, Hydro-electric chih tuh 'tui-meivak' chihna a hi. Tu in Tipaimukh Project 1500 MW bawlna ding khukpi solkal (Central Govt.) in a sawm hi. Tulaitak in Manipur State in mei thahatna a poimawh tuh 150MW khawnglel a hi. Tipaimukh Project kibawl khin leh bel hong kidaih mahmah ding hi. Huailou in Loktak Downstream Project 66 MW leng Manipur State Govt. in bawl a sawm hi. Tulai tak a State Govt. in energy a neihzoh tuh 60-70 MW khong a hi; hiai hon hih khin le uh energy hong kiningching mahmah ding a State dang ah leng kizuakkhe thei lai ding hi.

Huaite ban ah Hydro-Eletric Project dang Tuivai (51 MW), Irang (Tuiluang) 60 MW leh Barak (Tuiluang) 90 MW te State solkal in bawl a sawm uh a hi. Hiai thumte lak a Tuivai Hydel Project tuh ei gam a om a hi. Tuivai Project pen Mualnuam leh Dialkhai gam kikal a Tuikoi a chihna mun ua dantan a (Dam) tuilam a tui zawlkhiak a Leijangphai khosak a Power House bawl hileh 70 MW bang piangthei dia gintak a hi. Tua ban ah Project tui, Tuipi lui ah a lut dia huaipen Santing khonuai lam ah Dam bawl in PowerHouse bawlnawn lehang 50 Mw bang muhtheih dia gintak a hi. Huchi hileh Tuivai Project leh a Downstream Project ah (70+50) Mw = 120 Mw kimu zou ding a gintak a hi, eigam ah. Tu a 51 Mw chih pen a hihleh dam khat bawl a, a khangzek a Tuivai luipang mah a Powerhouse bawl ding chih a hihziak a hi(at the toe of the dam). Huchi in a tunglam a Ropeway Project i gente hong tangtung thei ding hi. Huailou in leng khosung a meivak det ding tuh luineu nounou tampi a om a, huai luite ah 300KW, 400KW, 600KW leh 1000KW (1000 KW = 1 MW) tan bang leng muhtheih na ding a hi uh hi. I Zogam pen tu hun in haksa tadih mahleh Pathian vualzawlna hauhsakna thupi tak gam a om i hi uh chih i thei uh a deih huai hi. Phaijang gam a Hydel Project kibawl theilou a hih ziak in.Isai laibu a kigen mah bang in Pathian in mun daite a hauhsakna tampi honna koihsak a hi.

Hiai Hydel Project te ban ah a poimohleh khukpi solkal in Thermal leh Nuclear Power Project te hon koihthei hi. Nuclear energy Project 500MW bang i gam uah hong koih le uh bel Burma gam a unaute natan piak/zuak sawn theih ding hi. Kum 2010, October kha in khukpi solkal India in Civil Nuclear project scheme a bawl ua, huai tuh Kum 2032 A.D. chiang a 63,000Mw bang bawlkhiak ding chih a hi. Huai lak ah 1000 hiam 2000Mw bek tangkha le maw? Tulaitak in Jaitapur, Maharashtra ah 9900Mw leh Kudankulam, Tamil Nadu ah 2000Mw khukpi solkal France solkal huh in a bawl lellel a, a gam mipi pawlkhat in a nang uh hi. Huchi mah bang in Haripur, West Bengal ah leng 6000Mw Russiate panpihna a bawl a sawm uh a State solkal in a nolkhin uh hi. Tu in leng ei gam ah 1500Mw Tipaimukh Hydro-electric project tuh pawl khat in dal a sawm ua, a phaphet kei uh hi. Khantouhna ding dal i hi kha zaw thei hi. Dalna omkei leh tuhun bang a zohsiang hilota ding hiven. Gam hong khantouh dungzui a kikhekna hong om kha dingte bang leng theihsiam sawm a kikhektheih sawm ding a hi. A omdan ngei kia deih a kikhek dan i theih kei leh khangtou theilou ding hi hang. Tukawl toitoi mai lai ding maw? Khangthak hong om dingten hon mohpaih kha ding uh e!

Hiai khantouhnate a hong om theihna ding in Pathian deihsakna i poimoh ua, ngen lehang – Heutu muan huai, Mipi thutak, thanuam leh gin om a hon pe ding a, gam hausa leh khangtou gam i hong suak ding hi. Zogam Toupa Jesu Kris in hon phungvuhta hen.