Thanlon Vangkhua Kituhna - III
By C Lian Langel.
Ka paina lampi ua bok in aw ging hong kipatna zawn ka thrut phei ngal uhi. Amah leng kigingsa a om ahih ngei dia a hon kapthuk pah hi. Kikaptuah dia kuan hi hetkei mahle ung, vangsiat huai tak a a dinmun in hon pawkhe guih mawk ahihziak in thautang kikhah khum kha tuak ka hita uhi. Vuahzu nipnip, khua lah mial chitak a mial, a chang a kawl hong phiat zot hun a thil kimu theizual in kawl a phiatlouh chia lah bangmah muhtheih di hiselou. Ki kaptuah chu ki hi na in, khuamial luat ziak a muh neilou ihih chia, ki kapkha hia kikap khalou chih natawm ki theibun selou hi. Aw ginna zawn kikap thoh top ahihna ah, magazine khat kap bei lam theihman ding ahisekei. Thau gintoh kiton in innsung a omte leng hong taikhe sosouh ua, a thau uh tunglam khawng ah pawng in hon pawng kap maimah sam uhi. Ka inn phawn dek masak na uale ana giak khin uh ana hi maimah a, tua ka phawng sawm na inn ua le ana om uh hidan ahi. Lampi toh kinaih lam khanglam ah inn thum ki zom sim hilhel in om a, a thum a giak uh ana hi hi. Ka phawng deknate uh inn a laita pen ahihziak in, a kikal ua omkha ka suak uhi. Ka nung ua inn (ka phawng masak dekte uh) a omte’ a lawmte kiang ua hong paiphei dek hile uh ka bokna lampi ua a hongpai uh ngai di, buaihuai sim mahmah.
Khua a mial luat ziak in kap di mulou aki hipen mai a, amau leng kap di mutuan samlou ahihman un van tunglam khawng kap a kap maimah dan uh ahi. A hong taikhiat laitak ua innsung bukap suk mai din hoihsim mahleh, innsung a numei naupang leh inntekte’ kah ging khawng akizak man in inntekte’ kapkhak ding lauh ziak in ki kap ngamlou hi. Amau leng innkim teng ah panmun honla ua, ka kikal uh huan dai, dailing in a hon hal lel hi. Khanglam a hongpai lawmte’n leng thau hon kap ging ua, alang alang ah thau ging chelchul hi. Koubel ka mazawn ua duty pa kap ka hi ua, huchia thau a ging chelchul laitak a ka khang a mun niamzaw (lampi mah) ah ka kisiklep sukleh, ka pang a ka grenade puak tatkha in ka naksam dektak zawmah a, hon kapkhak uh ka kisa man hial hi. Ka magazine kheng kawm leh thau ging thawm a ngaih mahmah laitak in lawmte a min ua ka bansap leh kuamah hon dawng a omkei hi. Ka kiang a chu lawmte khat om ahi chih ka thei a, a khe ka kaihsak leh aman leng hon tangsak in, a tatsak dan apan bangmah chilou ahi chih ka theithei hi. Himahleh lawm dang mi thumte omna ki theilou ahihman in lungnuam hetlou hi. Kap khak hiam, kaplup a om uhiam hi ngeingei di’n ka gingta hi.
Kouleng thau kap khawlphot in, amaule kap nawnlou phot dia mi khat hong kikou in a thau ging uh awl in a hong dai hiaihiai hi. Kawlphia vak tungtawn in ka khang zek khawng ua hong pang om uh ahi chi ka thei ua, ka omna uh bit hetlou ahidan leng ka thei hi. Bit kei mahle ung, tua va taikhiat phing ding thil hithei nawnlou bangta hi. A ziak ahihleh amau lak a va ki om khata, ka gintak dan in ka kinaih luatziak ua amau lam mah honsa uh hi ngeingei di’n ka khonung ngaihtuah hi. Ka kikal uh laam nih leng phalou ding hi. Vuah hong tamsim a kouleng ka bokna mun ngei ua omden lai in, kawl hong phiat nawn in ka kiang a lawmpa chihlouh lawm dangte kuamah muh ka neikei, ka muh manlouh ziak leng hi maithei. Huchia ka omna mun ua va omom mawk thil hithei hilou, hon theikhe thouthou di uh ahi chih ka theih ziak in leh, suakta dia le ka kikoih nawnlouh man in sihma ngei in awle chih lungsim ka neita hi.
Ka khangzek uh huandai zul ah minih hong pang ua, kou a sak ua lampi ah ka bok uhi. Thau lah ging nawn khollou, dai sim zikzekta, kei leng bang pentak hih a hoih di a chih ngaihtuah in ka buai mahmah hi. Va kapsuk mawk leng nuamtak a adang te’n hon kap zui ngal di uh theihsa, huchi ahihna ah I sihma a galte khat bek toh sihkhop louh ngal adang tel di omlou ahimai. Kawl hong phe zot nawn a, ka khang ua pang tegel hoihtak in ka muthei a, a ki hou susuih uleng ka za thei hi bang gen uhiam chihbel theikei mahleng, amaulam ka hihlouh lam uh hon theita uh hi ngeingei ding in ka koih hi. Huchihlai tak in khanglam a lawmte’n thau hon kapging ua, ken leng thumna nei in, “Toupa hon panpih in” chihteng ka gen lamtak ka theiman. Sih le sih chi in lawmpa puanak a kaikawm in, thakhat in ka khang ua pang tegel om na hi dia ka gintakna mun kap kawm in lampi sak a dailing kawm ah lawmpa toh ka tailut tou uhi. Huchia thau ka kap ging nawn tak in amau leng kap in kap ging sosouh ua, himahleh, vangphat huaitak in kuaman hon kapzui hetkei mawk uhi. Amau mah in a kap uh hidia a koih ziak uh ahi ngei di.
Dailing kawm ka tuntouh tak un bel ki nai mahmah lai mahle ung, suakta khat dan in ka kikoih phot uhi. Himahleh kougel suakta a lawm dangte taisan mawk ding chih ka utkei hi. Ka magazine teng kap beita ahihmanin lawmpa kiang ah, a vek a ka thunkik sung hon guard inla hiai mun ah k’on thun khin di ka chi hi. Himahleh, saklam deuh ah thun in chikawm in kintak in taitou mawk a, ken leng huaimun a ka thunzoh in amah ka nung delhtou hi. Amin a awl a ka sap hang in hon dawng hetkei a, hon taisan hi a ka koih man in ka thangpai mahmah hi. Nahtang kung belh theih ding ana om man in huai pansan kawm in bangzah vei hiam ka sukkap hi.
Note: Thanlon kituhna tua ka hon gelh mawk leh nam sepaih panglai honna sa kha bang i om khak zenzen leh, huchi hilou in nam sepaih a ka na panlai a ka thil tuahkhak khenkhatte hon gelh ka hizaw hi.
(Aban sutzop nawn sawm ni)
RELATED ARTICLES:
Thanlon Vangkhua Kituhna - II
Thanlon Vangkhua Kituhna - I
Thanlon Vangkhua Kituhna - IV