Leitung ah biakna lam le kumpi lamah ni thupi tuamtuam kinei a, Pate Ni pen ni thupi khatin kiciamteh hi. Hih ni pen Khristian te ading bek hi loin, Pa a nei khempeuh ading ni thupi ahi hi. Pate Ni atam zaw USA,UK,Canada, Australia gamte ah June Nipi thumna ah kibawl a, mun pawl khatte ah June Nipi nihna azang zong om hi. Europe gam lamah Nute Ni le Pate ni pen US lam te bawlni tawh a ni a kha kibang het lo hi. Kawlgam ah Zomite in America Missionary te hong makaihna zui-in, Nute Ni leh Pate Ni cihte akipan vai khat peuhpeuh atam zaw USAte bawl dandan in, kibawl hi. Tua manin tukum Pate ni (Father’s Day) zong June 17,2012 (Sunday) Nipi thumna tawh kituak leuleu hi.

Pate Ni hong tun sim in, i theihtheihsa ahi phial zongin, hong piankhiatna leh i zattheihna thu tomkim cing khat i genloh phamawh zel hi. Nute Ni leh Pate Ni hong piankhiat zia pen Nu leh Pa it luatna vive mah pan hong piang khia ahi hi. America gamah Pate Ni (Fathers Day) tawh kisai genna tuamtuam kinei hi. Mipawl khatin West Virginia(USA) Biakinn khat pan 1908 kumin kipan ci uh a, pawl khatte in Vancouver, Washington ah Pate Ni amasa pen kibawl ci uh hi. Pawl khatte leuleu in Chicago branch,Lion’s Club ,President Mr.Harry Meek in 1915 kumin a ma suahni tawh kinai pen ding June Nipi thumna ah Pate phawkna bawl masa kici hi.

Pate Ni (Fathers Day) tangthu kiciamtehna taktak pen America gam Big Ben gun gei khuaneu Spokane,Washington, a teeng Mrs.Sonora Smart Dodd tung pan hong piang khia ahi hi. A mau Unau 6 pha uh a, a nu in nusia baih ahih manin a pa Mr.William Jackson Smart tawh nungta to uh hi. Mrs. Smart Dodd in a pa kepnate thupisa lua ahih manin, 1909 kum Nute ni kibawlna biakinn pan Thugenna(Sermon) a zakna tungtawn in Pate Ni zong bawl dingin lungulhna leh veiina lianpi nei pah hi. A pa pen June kha sungah suak ahih manin, June 19,1910 kumin a masa pen Pate Ni(The frist Fathers Day) Spokane,Washington ah bawl pah hi.

Mrs.Smart Dood ngaihsutna pen 1916 kumin US President Woodrow Wilson in hoihsa in thapiakna nei hi. 1924 in US President Calvin Coolidge in US gambup ah Pate leh tate kizop zia limtak puahphatna nei-in, Pate ni thupit semsemna ding panlak hun in nei hi. 1926 ciangin US gambup Pate ni panmun leen ( National Fathers Day Committee) zong New York Khuapi ah kiphuan khia hi. Pate ni Committee te thukhensatnate US Congress in1956 kumin theihpihna leh kipsakna nei hi. 1966 in US President Lyndon Johnson in June Nipi thumna Pate Ni dingin pulak khia hi. 1972 kum ciangin President Richard Nixon in US gambup zum khakni ( US Holiday) a zat ding phuang khia leuleu hi. Pate Ni thupi kisa semsem a, a sawt loin US leh leitung mun tuamtuam ah kizel hi. America gamah Pate Ni pen tuni ciang dong Ngeina ni thupi khatin kiciamteh a thupitak kibawl den hi.

Pate Ni in pate phawkna ding Ngawng awh(Necktie) kipia hi. Pa a dam laite lingpaak san (Red Rose) kipia in, a dam nawn lote phawkna Paak kang(White Rose) kipia hi. Pate Ni ciangin mun tuamtuam pan inn lamah kiciah in Pate pahtawina leh zahtakna kipia ciat hi. Pate letsong hoih pen kipia in, anlim theithei banah a tamzaw Aksa meh(Chicken) leh Ngasa( Salmon)namte kinesak hi.Pate itna kammal hoihnono lai kikhak in, tate le pate lawmta bangin kithuah khawm hialhial hi. Pate Ni hong tun simin Pa nei nawn lote Zuapa ngai in a kap tampi om thei a, pa nei laite in na pahtawi zia ding na lungngai ta hiam?

Mihing a piankhiatna dingin Pasian in Pasal (Pate) thupisak hi. Leitungah Pa kammal tuamtuam a kineih hangin a tam zaw ( Papa,Dad,Dady,Pop,Father) a nei kitam pen hi. LST sungah Pasian mahmah Abba- pa ci in kigen hi. hi. Pa cih kammal pen zahtakna leh thupisakna leh a sang pen munah koihna khat ahi hi. Leitungah numei kumpi sangin pasal kumpi tam zaw a, numei sangin pasal(pate) mah in thukhual zaw veve ci hi. Innkuan nuntakna ah tate in Nute ki it a, Pate kizahtak leh kilau zaw hamtang hi. Tua pen Pasian in innkuan Lutang dingin Nute koih loin, Pate mah koih sese hi. Nute in tate inn sungpan pattah a, Pate in khuasuah uh hi. Innkuan nuntakna ah Pa om lohna inn pen hawm suah in kisimmawh nuam hamtang hi.Pate pen tate a ding lungnuamna leh lamlak meivaak tawh kibang hi. Na pa adamlai leh na itna lakin la, pahtawina leh zahtakna piak ding mangngil kei in. (Eph.6:1-3)

Pate lam panin i theih dingah Pa suahna haksa lo a, Pa hihna picing taktak ding baihlo hi. Pa khempeuh zi leh ta neihna tawh Pa hoih kici thei bei lo a,Zi leh tate ading limpha suakin, Pasian thu tawh inn sung a makaih zote Pa hoih kici thei bek hi.( Eph.6:4) Pate in zong i dam sungin i tate mai lam ding khualna tawh Inn sung vai hawm kholh ding thupi mahmah ding hi.(Isai.38:1-2) Tua hi leh na sih khit ciangin, na tate kitawng ngeingai lo ding uh hi. Innkuan lutangin Pate ahih manin, Pate khempeuh in i inn sung vaihawm siam mahmah ding leh tate in Pate makaihna nuai ah thupha sang siam ciat ding thupi hi. A kipahhuai 2009 Pate Ni (Happy Father’s Day 2012) in PIANNA ZUA PA LAMBANG PAK NI. Happy Father's Day, 2012.

Source: Zogam.Com Fb Group