Thanlon Vangkhua Kituhna
By C Lian Langel

“Thou uau! Thou uau! Talpakte hong kuan uh! Talpakte hong kuan uh!!” chi’n duty-te khat in khovak tung in hong ban phawng hi. Kintak in ka thoukhe ngal ua, khedap na ngawn a bun man omlou in panmun ding ka kihawm ngal uhi. Ka tuithawl a tui om teng in mai ka phiat zotzot a, thau kap masak ut nailou ka ahihman un, khedap kintak in ka va bunkik nawn uhi. Kiphatna hetlouh dia, khakhat le pai nailou a mi 12 lel in amau mi 30 val nuamtak a ka na delhtai khitsa uh ahihman in ka ngap thoh mahmah ua, delhtai suk pah nawn sawm bangleng ki om ngal himahleh...

Ka panna mun uh Thanlon khokhung a VVF/Home Guard-te camp lui ahih ziak in pan theihna mun ding hoih thei mahmah vanglak hi. A kimvel in Trance leh bunker ki bawlsa omsuak a, vicks singkung leng hunkhop camp sung ah pou zomah hi. Mual bawk tung a om himahleh, simlam leh mallam ah mual sangzaw tuak om a, tumlam ahihleh kawl/kense lak ngen leh suahlam pang a khawsung toh kizom a kensuk hihiai ahi hi. A hohkha leh mukha ngei ten na thei mahmah di ua, kei theihdan in khe a Joutung leh Bukpi zotna lampi kiang a school sak ahi.

Khua a hong vak hoih mahmah tak in ka gal khatlam ua lampi ah anntah bang a hong taikawi zatzat bangzah hiam hoihtak in ka mu thei ua, uttak ahih uleh chi’n huaite lawi ka hon thrut pan ngal uhi. Huaite om na tan a pang uh isak leh, nai chikchik ka khang ua school tan ah zong hunkhop in panmun ana khoh khinta uh ahihlam ka theih pahlouh ziak un, ka ngapthoh tuk un baihlam khol hetlou ding ahih dan ka hon theithak uhi. Mi 22 lel himahle ung, hoihtak a panmun ki hawm thak in camp kimvel in ka pangsuak ua, school lam a pangte chauh in kikaptuahna hon pan phot uhi. Huailam chauh a pang uh hidia ka gintak khollouh mah bang un, honna umkim vel khin tham uh ahihlam ka theihak kha sim zawmah uhi. Ahia, kou leng pilvang thei tawp a pang in kikaptuahna taktak ka hon patpih zui ngal ua. Bomb hausim ahi ngei di uh a hon nak zat khum sim uhi. Nuam kasak hetlouh bel, bomb hon kap khiat chiang ua kithei, hong leng vengveng pen koilak a hong puak di a chih theihlouh mahmah ahi. Koi hiam a hong puak ngeingei di chih lah theihsa hingal. Huai hun chiang a hihtheih om sun bel, “BOMB!!” chia kikou a bok nainai zel ahimai. Bomb hau mahle uh target teh dan a siamlouh luat ziak un a tamzaw camp sung tu khalou in camp pawlam ngen ah lengsuak vengveng sek hi. Camp sung a puak dia hon kap uh chu hingei di hia. Camp sung hong tukha zenzen om mahleh, ahon hihkhak gentham ding omlou vanglak, a bomb hal neng un lawmte khat tawbou a denkhak chihlouh ngal, huaile aman tham sa vetlou hilai.

Ahitak in, tumalam zek a ka ki kaptuahna uah a makai khat uh ka kaplup khak ziak ua huai phuba lakna a hong kuan thak nawn ahi uhi. Kouleng hong kuan thak ngeingei di uh ahi chih ka theih ziak ua Thanlon a om den leng ka hi uhi. Huai banah, Thanlon khua luah tum gige ua, sum ziak mah ahi dia, ei singtangmi thuguk pesawn dia a zattheih ubang leng om hi, kou ka pawtkhiat nak uleh amau tung chetchet thei uh. Thanlon khosung hoihtak in luah thei le uh amau adia mun lemchang petmah ahihziak a leng enlah ahi ngei ua, himahleh, enleng Zomite’ tuallenna vangkhua’ silhpuan piandang mel a theihlouh zatamte luah ding lung in a awilou e. Ahihi a gen in Thanlon kituh aki himai, himahleh enbel hiai zahzah hong kuan noinoi ding ua bel ana ki gingta hetlou.

Ka sak ua mualtung ah helipad (helicoter bohna) zat nawnlouh khat om a, huai mun hong luah le uh nuamtak a hon suk kap ding un, pang thei hetlouh a hon beizou ding uh ahi chih ka theihman un huai mun va luah ka sawm uhi. Camp sunga pang di te kiang ah Grenade leh M-16 bomb khonkhom in, kou a tamzaw pua in dak 10 lak vel ding in huai mun luah di’n mi 4 ka taitou uhi. Huai mun luah dia camp sung ka kan utoh kiton in, hiailam a dai dinden a ana pang hunkhop om ten honna kap zui ngal mahleh uh taisuak teitei in a mun ka tungtou ua, vangphat huai tak in kapkhak bel hon neilou uhi. Lawmpa puanak ban a kapvang khak uh chihlouh ngal. Gintak bang mah in amau leng ana luah sawm petmah ua, hong naihphei man mahmah tak ziak un ka kinai kap ngial uh aka. Hangsan deuh hile uzaw ka va pangtouh ma uh kuamah ki omlou, nuamtak a ana luah khinta di uh hiven. A mun ka tuntouh utoh kiton in thautang leh bomb chil hetlou bang a zang in hot in ka hot khum ngal uhi. Bangzah hiam ka kap thal ngei ua a liam leng hunkhop om uh ahi chih a khonung a sisan kimute akipan in theihtheih hi. Huchia, ka hon beih tak un amau leng chimoh ahi ngei di ua taikik namnam uhi. Ahia, hiaimun va luah touh le pilvan ana ngai mahmah zel, a ziak bel nunglam leh mailam ah thautang apan ki ven ngai tuaktuak, pan mun hoih lah omlou dailing kawm simpi ahihtoh boksa apan ahimai. Vangphat huai takin ka mailam uah pansan theih ding munkuak lianlou khat ana om zenzen a, huai ah lawmpa toh pang in lawm dangte gel leng ka khang ua kuak khat ah pangtuak uhi.

Siik guibei tungtawn in Re-inforcement hong kuan om ahihdan theihsak in ka om ua, thautang tasam sim mah le ung zatdan siam a taise lou din ka thupuk uhi. Ann nek chih leng om selou, ngaihtuah leng hituan samlou, a dingdan leng om himhim lou. Thau kapkap aki hihmanin dangtak petmah, ka tui neihsun a zingmai ka phiat khak sese bang ka kisik vungvung, ahia, hichituk a sawt di ana ki salou himhim ahihziak leng ahi. Sunnung dak 1 vel ding in lawmte khat ahon kapkhak ziak un kou panna lam ah hon pawtou ua, naklai mahleh lam-et ding a omkei. A mittung ah thautang lut ahihman in. Kawlnuai lam ah ka va koih suk mai uhi. Aziakbel, buaisiat khak zenzen leleng a luang pen galte’ muh saklouh himhim ding chih ahi. Hiai hun a ka lawmpa adia hihtheih bangmah ka neihlouh pawna mahmah ing. A liamna ma tuamna ding na tawm omlou, a sou beitan ngak in ka towel in a luang ka khuh uhi. Lawmte khat in Solacid ana pawkha zenzen a, tang khat chiat a ka hon tawp uleh tha honpe tuan mahmah ka sa chiat uhi. Hiai hun a di’n ann kuang khat nek toh kibang din um lel ing. Kaltou nawn in ka panmun ngei uh ka luahnawn ua, ka omlouh kal unleng ahong naih ngam tuansam kei uhi. Vangsiat huaitak in hun bangtan hiam zoh lawmte khat mah a lu ah hon kapkha nawn sese ua, aman leng sawt thuaklou in hon beisan nawn hi. Poi petmah. Thautang a ki hah kapkhiat sim mahmah ziak in nitaklam tan in bel chiilpan ngai petmah ta. Muhchiang mahmah louh ngal kikap ngam nawnlou hi.

Khomial zul in Re-inforcement team-te hong tung khongkhong ua, huai hun tan in bel thautang 350 ka puakna lak ah 2 chauh ka neita. A tam neipen inleng 5 kan a neikei ding. Re-inforcement hong tun theihlouh na khat a om zenzen leh nitak khomial nung a hon umna uh munkhat bek honkhiat na dia kisit ahi. Hong tung thak te’n Talpakte’ nunglam a kipan hon bei ngal ua, lawmte’ thawm ging I hon za bang zaw kipahna a lian chih lel inleng a genzou kei. ‘Commando’ chi a kikou bang, laa ngaihtak a sa a kikou vengvung toh lum in a hong lumsuk uhi. Dawm hetlou in ka gal mual uapan nawk in hon nawk suk ua, camp sung hong luttou zoupah uhi. Camp sung hong lut un kou panna lam a leng bangzah hiam thautang leh tui toh hong paitou di’n ka sam ua, hilele tui hon tawi khakei zomah uhi. Naiasawm sang hon puak ua, i ne bangzaw chil omlouh toh valh a haksa khopmai. Thautang leng hunkhop hon puak ziak un deihdan tak in kikap ziahziah theinawn hi. Tuhun in bel Talpakte a mangbang ta mahmah ding un a gintak huai hi. Khua lah mial hoih mahmah ta hilele, kou bel kipat thak sawm mah bang in thautang chil hetlou in kon kap ziahziah nawn uhi. (Sutzop ding…)

Related Articles:
Thanlon Vangkhua Kituhna - II
Thanlon Vangkhua Kituhna - III
Thanlon Vangkhua Kituhna - IV

Phamsa Salpha
Asa: Lianlunching
Lyrics: Funny Haulalmuan

.