I gamsung dinmun i et veng veng chiang in lungkham huai lua chihlouh ngal agen ding dan ka thei zou kei.Lawmlawm tel, chihlouh ngal agen ding dan om lou hi. Thilhoihlou chi tin reng in ahon bawm a,i gam chi zen mah leng,adiak in Lamka jaang ah, thil mulkim huai pi pi, zak ding leh theih ding om deuh zuih gige mawk hi. Zu dawn chih khawng bang thupilua a simnon lou, ahi ding mah ah koih, chih phetlouh azuakte bang in singpi tuilum zuak a zuak thoh in, aneu alian,amei apa chih omlou in, inupi ipate hi in i tuailaite hita le uh pateh muat gawp dekte toh kibang peppuap uhi. Himahleh Zu kichi pen khamtheih poilua leh khawklua dan in ikoihkei uhi aziak bel zu sang a khawkzaw leh nasa zaw khamtheih, guihtheih atam luat ziak in.

 Akhamtheih guihtheih khoih khaloute lah mihoih law ding i sak leh mite pasal or mite zii toh kingai thei chih hi zaw mah nalai set! Numei pasal thangtatna lah om zeuh zeuh chih hilou in lek law mahmahta, abang chi lawm lawm i set ua,guai!. Ei mah lawhsuahsa le hilou, nu leh pate neihsunsun sum leh pai apan in mobile phonete bang lei in camera a lak (shot) louh louh ding pi i la ua,ahong leak khezel a, igam inam minsiatna leh mualphouna asuak zel hi. Video camera a lak ding i theih kei mahmah uh leh insak inkhangte voknou suak peuh vala le hang igam inam minsiatna hi lou zaw ding hi.

 Ei lawi hi kilan law deuh adiam chi in om hi. Kua mah ahuklou leh kipolh utlou ki om ken teh! i om khak zenzen leh bel ami banglou ki hi ding hi. Himahleh thil bangkim adik leh tang deuh om hi. Huai adik leh tang theihtheihna bel Pathian in mihingte ahon piak ahi. Ganhingte bel adik leh tang theihna piak a omlou ahihman un kilawmlou pipi in i kongtual khong uah akipehtuah geigoi ve ua le! I omdan leh gamtatdante uh ganhingte toh ki lamdang nonlou pi a! Animal culture houh zui ihi diam uah! Ganhingte akoppih ding uh aneituam kei ua, hiai a Bawngpi inkhangte Bawngtal zii ahi chih in aom kei hial a,huai Bawngpi tuh Bawngtal khat peuh in acheetpih thei hi.Tua bang deuh in eiten mite zii or pasalte va cheetpih in i om uhi. Akhentelah, cheetpih zoulou in mualphoutak a mat leh soisak in om geigawi hi. Acheetpih zouten bel miteng phial va chiam thei thethup zel uhi. Apoimoh leh bel, insak invengte um leh bel khelhtheih mah ahi. Himahleh invengpa or invengnu sum leh suk vakoppih bel ganhingte toh kibatna ahi.

 Khatvei houh, talpak lawm chih dandeuh khat in CCpur numei theih nei ka hi hon va hohpih in, thilteng free ahi ahon chilai zang a, ka lungloulam ahihlam thei leh zaw hiai bang hon gen ngam lou ding hia chih phet in om hi. Hiai mipa kamsung khawnga hong om kha hipen leh bel haizaan phiaphia a, kawkhuk tawneiloua siat khiak dia nak hoih law tel! Bang ziak mahmah a eilam numeite awlsamtaka ut dan dan a bawltheih dia hon koih uh atel diam maw? Eilawi hih mite maingal baih dia om theilua ihi diam uah maw, chih ahon ngaihtuahsak mahmah. Ahihkeileh houh, ahoihlam in la zualta le hang, eilawi minuamte or mineeltheihte ihi uh ichi mai diam? Mi neeltheih a om bel nak hoih lua, himahleh gamgi khungdan kisiam zoulou deuh hi a theih in om hi.

 I khotang enzualta le hang, eilawi kipawltuah neinuaite ihi ua, nopna khatah a nuam mahmah hi.Kei leng Lamka khojang a khang khia ka hihman in.ka nung suut chiang in. I society uh zallen lua ahi chih ka khonung theih a,thil tampi ana taan lawh ka hi chih leng ka thei hi. Teirol tunglai bang lawmte toh nungak hel dia khua amial nak leh kipawt khia in chin, Nungak inn bang a lawmta atawmpen a 6 leh 7 bang va kipawt, huai kia le hilou vengdang te hong pawt beh lai uh bang tuh inndim zen a ki om in akhen chiang bang a lengla tangvalte bang tutna ding kidaihlou in akipom thoh pawl bang ki om hi. Nungak amel ana kiphiat deuhten bel nitak teng in lengla tampipi nei gige uhi. Hichi bang a kipawt tuah vengvung nuam mah leh, apawtte hitaleh heel aom insungmite a dia great loss ahi.

 Tua bang deuh in tulai in nupi papi khawlai pawt hat tam mahmah hi,chih phetlouh mipate toh or minute toh kimaingal a utdandan a kichiamnuih chih athang mahmah hi. Tua bang a kineelna in huk leh kingaihna apiangsak sek hi. Thamlouh, in kineel luat ziak in rape lengle bang mah chi ken teh chi a maingaltaka ki rape dek goigoi om sek hi. I khotang a zalen luat ziak a tampin siat lawh ihi uh chi leng igen khial lawmlawm kei ding. Gen saulai le hang,naupangte bang ahon hon a kithuah a khodung khovai a vak tam mahmah hi. Hiaite lawi ei chuh igamsung amuatgawp saktu Bactaria nou ahi uh.

 Nikhat houh, Aljazeera news channel ka et zual leh, CCpur a Aids leh Hiv veite documentary hon suah ta zen uh, lawmlawm karai sai! chihlouh tuh gen ding om lou.himai! I min uh lawibang thang peuh mah ei,guai!Mite honphok phak dan chu! Khovel a country simmoh huai takmai India a teng hanga, huai country sunga kua mah phok ngellouh northeast, northeast dia le achangkanglou mahmah Manipur, manipur adia a district CCpur a tengte natna kihhuai khovel in hon theihpih chih tel thupi isa diam a?

 Papi khat doctor aki etsakleh TB ana hi a, "aman hi chiin chi hi_" bangmahlou iki sak leh TB bang ana ki kai tou velvual mawk "achih dan deuh in ahoihlam hikhol kei leh leng banglam hiam hiam ah ikiva thei mahmah ua, akipahhuai va chih hial ding in lah hi deuh kei ven.Setan biaktheih ahihlam bang i phok khe jen houh ua,akoilam pilna apan tua bang hong om thei adiam chih hon ngaihtuahsak hi. Hiai namte seten bia om uh ahi chih miten ahon theihlouh khak ding bangle lau lua hileng kilawm hi.. Setan bia chih phetlouh Pathian thugen khenkhatte inntung bang suang a ana deng thei bang ki om.Lasiamte bang lasalai suang a ana deng thei bangle ki om zel, akua dung suun i set ua? Kumpi David enton a suangnou a gal dou sawm i hi duam ah! Khai! gengen leng ahoih kei kha ding.

 Hiai bang igam sung siatnate khawng,hun na nung lam ah thil lamdang pipi ahong om ding chi hiven chi a ahi ding dan mah a ngaihsun kitam mahmah hi. Hun nanung zaw hitham mah,himahleh huai thil lamdangte atangtungsaktu a eilawi ana pang ding i set uh maw? Jesu krist mikhialte tan ding a kros ahongsih ding pen leilung pianma a Pathian in abelsehsa ahi. Himahleh, eilawi Jesu krist dangka sawmthum a zuakpa Juda Iskarriot a pang ding ihi uh hia? ?

 Ahihleh bang ziak a gam hichi siat lawmlawm ading, ingaihtuah kha ngei hiam? aziak gen chiat ding chi le hang igen thei vek ding uhi. Agenthoh i siam lampangtak ahihkhak ziak in.Igamsung virus doutu ding anti-virus chuh Khasiangthou ahi. Sualdoutu chuh Khasiangthou ahi a, igam hichi lawmlawm a sia ahihleh antivirus Khasiangthou in hon taisan houh adiam! achih ut huai phial. Lamka khosungah Biak inn bang zah a om dia?Denomnation bang zah a om dia? Mission munpi bang zah aom dia? Hiai saptuam tuam omte ziak bek a sualdoutu Toupa khasiangthou igam ah taamzoulou a adiam? Toupan Sodom leh gommorah ahal dek in Abraham kiangah mihoih sawm tan bek amuh leh ka hal kei ding chi hi. Ahihleh khasiangthou omtheih nang a mihoih Pathian it mi sawm bek ki omlou adiam? Ahihkeileh, a mi omten Biak innte hi in a mission munte hitaleh zahna himhim kineilou adiam? I mission munte uh leh I Biak buk kim leh vel ah zuzuakna hi in abang bang guihtheih zuakna hitaleh om phitphet mai hilou maw, maw? Thilhoihlou ihih leh leng kisel deuh le bang achi dia? Palaantak leh maingaltak a khelhna a kibual nilouh ding i hi uh hiam?

 Gamsung su bolhlawhte koih mangvekni chi le hang lah ei HINNA bawltu ihihlouhman un bangmah ihihthei kei ding ua, alampi om sun tuh guta in aguk nonlouh a, thilchiin hoihlou hihten ahihnonlouh nang ua, lampi dik leh tang kok muh poimoh hi. Kei ngaihdan mawkmawk in tuh igam a saptuam omte, philantrophic organisation tuamtuam omte pankhawm a, eilak mahmah hoihtaka ki rehabilate poimoh kasa hi.Koi mun koi gam enlou in eilak mahmah ah dap in dap leng ut huai kasa hi. Huchia eilak kibawlhoihna luanglet in gamteng munteng hon deng pan leh chih ut huai mahmah.

 Mi bawlhoih i ut leh bel gam leh nam bawlhoih ut chihna ahipah a,i bawlhoih zawh leh bel gam leh nam bawlhoih chihna ahi. Mite bang ziaka sia ahi ding uh? A ut mawnga sia zaw atamluat agintak huai kei. Bang hiam haksatna puaklah luat ziak himaithei hi. Naupang tagah khat akemtu ding om kei leh bel asesa ahi achih theih mai hi. Numei kizuak ichihte leng ahuk luat ziaka kizuak hi khol lou ding uhi. Guta bangle aguk mahmah kithalop hikim khollou maithei.Setan bete leng asetan mahmah pakta a bia hikhollou maithei.Chimoh tong khong kisa a hihlouhlouh ding khong hih hi zaw kha ding uhi. Meithai tagahte hoihtak in kem in enkol le hang,tampi ki humbit ding hi. Tuchiang in Orphan home chihte leh adangdangte patkhiak dan i hon theita ua,khamuan huai mahmah. Huchi bang in mite bawlhoih leh tundin utna ineihtouh jel uhleh Pathian deihlam semte i hong hi ding ua, Toupa khasiangthou ilak ua ahong om dia, igam adam mai ding.