Tungsunni tum in zankhua hong miala, zouhuihkhi siang hong nung hiauhiau hi. Khua lum mahmah ahihmanin ka u Ngangaih toh innkongtual ah huihvot nung hiauhiaute diik dingin katukhawm uhi. Ka sanggamte laka leng thilbangkim ka kikuppih tampen ahihmanin amah toh ka omkhawm chiang un nuam kasa mahmah ua, mailam hun ding khong kikum in ka duhthusam bang uh gen in nuam kasa mahmah mai uhi. Huchia chiamnuih toh ka lunglutna tuamtuam uh khong ka genlai un, ka u in “Ash..! Nau, huaite enhuai uh e…” honchi phut-a, ken leng “UNgaih, huai hihna dia bang hih ngai masa dinga, keile ka nak ut e..” ka chithuk pah hi. Nidanga kana ngaihtuahluat hihetlou napi in ka u in hong gen apan hih utna lungsim ka neidenta a “ka hih teitei ding” chi’n ka lungsim guuk ah ka hanchiamta hi.

Lungsim a laisim mengmeng a, pawk XII khawng zoh lam chianga huai ka thiltup taksuah teitei ding chi’n lungsim kipahna toh lai ka hihtheih khomkhom in ka hon simta hi. Himahleh pawl sawm tan tungzou hamham in Innsung khosak haksatna ziakin laisim pen utlai mahmah hinapi in khawlsan a sep theihtheih seplouh lampi ding dang ka neita kei hi... Akum a et in zaw naupangchik kahilai, himahleh ka tup khat ana om tinten a, huai tangtun zoulou, “ka hih teitei ding” chia ka thupuuk vailak zunthak suah maiding kahi chih khawng ka ngaihtuah a, vangsia ka kisa petmah mai hi. Alehlam ah ka nu leh pate mel ka etchiang in kei a tanu uh lehkhasiam a, officer khat hiam ahihkeh ka tup tan lehkha hong zilsak ut mahmah uh ahihdan amit hah uah kathei mahmah a, himahleh huaitan dinmun a dingzou lou, ka tunga kisuanglah mahmah ahihdan uh amelpuak un kathei mahmah a, huaiziakin, ka nute nopsaklouh ding ka khualmanin haksa samahleng lungkim bangbang in ka om hi. Ahitazongin, a muhlouh un zaw mittui ka seeng tam mahmah mai hi.

Huchin keileng vaigam lamah mi inn a nasem(maid) dingin nu leh pa siang nusia in kahong zinkheta hi... Chikmah a hiaibanga khual zinkhe ngeilou kahihmanin Innlam ka ngai mahmah mai hi. A kum a et in kum 16 lel a upa kahihmanin nute ngai-a guuk kahkah theilai mi ka hilel hi. Ka kiimvel khawng ka etchiang in kidang kasa petmah mai a, innlam bang ka ngai deuhdeuh mai hi. Ni tumding a kisa a mualdawn a hong san chiichiai chiang bangin thuakhaksa kasa diaka, innlam ka ngaihluatmanin ka lungsim ah “bangdia hiai gamgam vapai kahiam aw, inn a nu leh pa toh om in ka ngolh uleh leng ngawl khawm zawle ung maw…” chih peuh ka ngaihtuahna ah hongsuak zel a, numei dia leng numei lungsim lawlou ka kisak lai in khasiatna toh ka kidim dena, ka mittui in hong tuumtuum mai hi.

Ka omna ding tung in nasep ding ka hon sempan ngal hi. Chikmah a mi innsung a hiaibang a nasem a kuan ngeilou kahihmanin haksa kasa sim mahmah a, ka omnate maipha ka etna toh, a deihlouhdan ua thil kahih khaak ding ka lauhna toh kuamah taai, kuamah hehsan hihetlou napi in kei leh kei gimna tampi aguuk in ka kiguankhop hi. Himahleh ka lametna khenlam ah ka omnate ana nuam mahmah vang lak ua, awl-awl a kingeinaseh thei in nuam konsa panpanta hi. Himahleh ka neu apan kana tuppen ka lungsim in a mangngilh thei mahmah keia, tangtung zou lou ding hita kahi maw chi’n ka kingaihsiatni atam mahmah mai a, nuam kasakni inleng ka lungsim guuk in kipahna taktak hongtun zou ngeikei hi.

Nikhat keivuak in inn ah ka om a, tutna a tuu kawm in thil ka ngaihtuah nilouh hi. Ka ngaihtuahna bang a paisau mahmah mai a, ka lungsim in “ka theihtawp suaha nna sep mengmeng a, huchi kawmkawm a ka omnate tungtawn a saappau kizil a, ka omman hong piakteng ua panlaak a, Open beeka pawl XII zohkhiat teitei ding himai” chih ngaihtuahna ka honnei hi. Huai pawl XII tan zou hileng ka tuppen adia lampi om ding chihte ngaihtuah in kuamah phawkpih hetlou in keivuak in kana kithalawp mahmah a, apaisa hunte sangin leng nasep bangkim ah ka thathou in nuam kasazaw hi’n ka kithei hi. Innlam ka ngaih mahmah hang in katupna in hatna hongpe petmah a, sep dingte leng lin hetlou in ka hong semtou zel a, innlam ngai a kakahna luankhi teng ka tup tangtun theihna ding ngaihtuahna in hong nuul siangsakta hi’n kathei ahi.

Huchia hun bangtan hiam ka omnung in mibanga siam hikei mahleng kei-a ding khop saappau bang ka zilkheta a, huai in kipahna hongtun mahmah mai hi. Pathian in ka lunglutna honna theihpih mahmah hingei ding in ka um a, a lampi ding bang ka ngaihtuahna ah hong piangsak toutou hi’n ka mu ahi. Nikhat ka lungsim ah “hiai a ka om-om leh bangmah tan tung ngeilou ding kahi a, huaiziakin khopi deuh khat ah nasep ding zong in kava kuankhe ding, hileh ka lunglutna pen leng ngaihven thei ding kahi” chih ngaihdan kahon nei nawn leuleu hi. Himahleh hichiphut a ka omnate taihsat ding chih haksa kasa a, amau ziaka hiaitan ana tung inga, hong phallouh ua taihsat ding bang ka utkei a, lah va kinget ding bang haksa sa mahmah kawm in lungbuaitakin ka omkha nilouh hi.

Huchia lungbuaitaka ka omlai in ka gintak hetlouh in ka omna te US ah azinna ding uh hong om phut-a, a innkuan ua zin ding thu hon sawm zenzen uhi. Ka lungsim guuka ka buaina mahmah khat baihlamtaka hongveng mawk ahihmanin ka kipakgu petmah hi, aziakbel huai a zinkal chiang ua keileng ana zinkhe thei ding kahihmanin. Huchilou hileh kingen lengle hong phal hetlou ding uh ahihmanin. Ka ngaihtuahzel a, hun paisa sanga ka tup tangtun theihna ding lampi nai zaw deuhdeuh hi a katheihman in ka lungsim guuk in ka nuinui tamai hi. Ahitazongin panpihtu ding hoihtak neilou, keimah a ka uingol gamphuut ngai ding ahihmanin ka lung chu abuai mahmah veve hi.

Sawtlou nung in ahong zinkhiatsan petmah uhi. Huchi’n kenleng ka paina ding ticket la in ka u lawmte khat ka contact a, akiang ah “na omna lam ah hongpai dek inga, nang hong beel ding kahi” chi’n ka gen a, kava gumpai topmai hi. Chik a ka khualzin toh teh ding genlouh makaihtu ding, hong lamhilhtu ding lah neilou, pau lah siamlou kahihtoh aguuk in haksa kasa mahmah hi. Ka kipatkhiat apan ka lungsim bang ah ka u lawm in honna pii theilou bang hi zenzen leh bang kasuak diam maw kei bangmah theiloupi in chih peuh ka ngaihtuah a, lungkiat huai thei mahmah mai hi. Himahleh ka tupna in hong haatsak zel a, ka kipuuk hun in leng hong taisan mailou in hongphong den a, ka haksatna, ka mangbatna tuamtuam teng hong mangngilhsak zou mahmah hi. Huchia lungliaptaka ka painung sawtlou in kei leng damtakin ka tupna mun ka tungthei khongkhong hi.

Ka tun tuunglam teng ka buai mahmah mai hi, aziakbel apaisa hun a innkhat a mi nasem a kikhumden kahihman in ka hih ding bang ka theikei a, khopi a thil omdante theilou kahihman in mangbat huai mahmah hun katuak sek hi. Sepna bangchi zon ding ahia chihlah theilou, kuan lah hon zongpih manlou, mite leng amau sepna a buai chiat uh ahihman in va sukbuai mawk ding thil kilawmlou ahihban ah kisuanlah huailua ahihziak in kuamah kiah kava dongdong utkei a, ahihziakin ka buaigu mahmah mai hi. Sem keileng lah koi a sum la ding???? Bang a kivaak ding????? Innlam ten lah hon khak zou lou ding ua...... chi’n kaguuk buai mahmah hi. Himahleh mihing khat kahih ngal leh kapang theihtawp in kapang dia, innlam ah ka thawnkik kei himhim ding chi’n kei leh kei bang ka kihasuan zel hi. Pathian in hon panpihtu ding mi honna pe ngei ding ahi, ken tupna taktak nei in Pathian buanzou peuh leng chihte ngaihtuahna a nei in Pathian hatna muangkawm in ka lungsim khauhsakin pang taktak dingin ka kisa hi.

Numei maimai siamna-pilna a kuamah phalou khat kahihsam manin mi khenkhatte’n ka nunglam ah hon nuihsan sek uh chih ka phawk mahmah hi. Kuaman sepna mu a, kei leh kei kitoudelhzou ding in gintakna himhim hon neikei uhi. Ka paina tuamtuam ah kol leh vaite simmawhna bang katuak mun mahmah a, nuam kasa hetkei hi. Huaiteng in abeikei a, eimi mahmah, ka pau kibatpih, ka tawndaan kibatpih, ka haksatna hon panpih dinga kana kilamet mahmah tampite panpih naaksangin amaute simmoh leh engchihna kampau bang kaza zel a, thuakhaksa kasa thei mahmah mai hi. Genlou ding, ngaihtuahlou ding ka chih hun inleng ka ngaihtuahna ah hongsuak zel ahihmanin kua theihpihlouh a ka mittui nuulni atam mahmah mai hi.

Interview pai ding himawk lengle gam theilou kahihban ah ka paina ding sum na tawm leng neilou kahihman in a nainai, khe a tuntheihna ding mah ka zon angai hi. Huaiziakin zingkal kathoh chiang in walking chidan in 1km khawng kapawt a, ka kilehkik zel hi. A zingchiang in huai sa gamla zawdeuh kamang louhna ding tan ah ka pawtzel hi. Huchia ni bangzah hiam kapawt nung in shopping complex khat katuakkha a, huai ah ka daakdaak a, huchi’n restaurent lianlou khat kamu hi. Keileng kindeuh apai in huai ah kava gumlut suk-a, sepna ding zong ka hihdan kava gen leh, “na RESUME” honna chipah uhi. Ei a omtuungpan I hihtoh RESUME bang a chihle theilou kahihman in “bang a huai?” ka chih leh mak honsa deuh uh hia, ahihkeh hai honsa deuh uh hia, hon en heihoi zozen uhi. Huchi’n amau leng bangmah gentam tuanlou in dak 2 in hongpai thak in, zingkal dak 7 a kuaman interview bawl ngeilou ahi hon chihsan uhi. Huaiphet in kenleng “awle” chi in sepna mu mah bangin kipaktakin kapaipah a, ka kalsuan bang zaang tuan mahmah hi’n ka thei a, ka paina gamla sim hinapi in a gamlat lam leng kaphawk nawnkei hi.

Nitaklam dak 2 bang ginghak kasa mahmah mai a, sana ka enkhop hi. Atawp in ahun hongtung khongkhong a, keileng kithalawptak in ka va paithak hi. Amun ka tunphet in ka resume honna ngen nawn leuleu ua, ka neikei kachih leh ka kiang a numei khat thau keikai zozen, mittang lian deuh khat in “na min bang e?” honna chi a, kenleng “Mawi” kahi ka chipah hi. Huchia ka kihouzoh un bang nasem thei dia hon chi a, ken bang lam pang ahia chih leng theilou kahihman in khat peuhpeuh ka chi hi. Aman leng “a hoih e” chih toh “tun ah na man diam?” chih hon thuah ngal a mi a poimawh lai tak uh ahih lam leng hon gen thuk a ka vang in zou mah mah e ka chi lungsim hi. Ken leng ka muhzoh sunsun ahihtoh “Hi, ka man ngal ding” ka chi pah hi. Huchi’n amahmah in “HOSTESS ding nahi a, nang chauh numei na hihmanin problem na neih leh hiai in non contact thei gige ding, restaurent kha kei a ahi” chih toh a phone number piak hong thuah hi. Ka gintak sangin ka restaurant sepna ding nu uh anuam mahmah a, mi hehpihna nei mahmah khat hihtuak in ka thei a, ka kipak mahmah mai hi.

Bangteng hileh sepna mu chu kahiphot a, kalung amuang mahmah mai hi. Lamet hetlouh a sepna thupi hikei mahleh muphut kahihmanin bangmah ka theikei a, ka loh ding bangzah a chih kanna changle ka theikei hi. Ka omna uapat in 4km khawng ding ahi a paiman ding nangawn leng neilou ka hihmanin, khe ngat in ka paizel a, nitak ka tawphak chiang bang un ka paina ding lampi ka laugu mahmah sek hi. Himahleh Pathian panpihna ziakin bang zaw kachi zeenkei a damtak in inn katung theizel hi. Inn katun chiang inleng ka om awlman tuankei a, numei nna teng sempah in ka man chiang in lehkha ka simzel a, nikhat in dakkal 3 kaan ihmutna ding hun ka nei ngeikei a, ka gim toh haksa kasa thei mahmah mai hi. Ka sepna ah saappau lah siamlou, experience lah neilou kahihchiang in anop hetlouh hun bang chu aom mun mahmah hi. Bangtan hiam kasep nung in ka loh honpia a, vai dangka 2600 la kahihmanin ka kipak petmah hi. Kenleng kalaak ni mah in sawm-a- khat ding koihkhe masa in huaizoh Pathian kiang ah kipahthu ka gen hi. Khalawh Rs.2600 tawh awl-awl in ka hong khosatou hi, mi lawh toh teh dingin zumhuai sim bang mahleh kei ading inbel a thupi mahmah a, ka lung anuamsak mahmah hi. Huchihlai in pawl XII ka examna result bang hongsuaka, vangphathuai takmai in lohchinna ka ngah a, kuamah theihpihlouh in kipak in keikia in ka nuinui mai hi.

Pawl XII certificate bang kineisamta ahihchiangin Restaurant sang a neukha ana sang zawdeuh dia ka ging tak na a hih hoihsa in Call center lam kong mitsuan nawn leuleu hi. Himahleh ka ngamthoh bang hetlou in sappau ka siamlouh ziak leh graduate lou kahihziak mah in sepna ka muhak petmah hi. Interview in ka kuankuan mai a, lohchinna ka nei theikei hi. Himahleh ka lung aliapkei a, interview ding in kava kuanthak zel a, mun khenkhat bangah interview bawltute’n honna meltheih gawp zozen uhi. Ngaihtuah mai in zaw azum huai mahmah mai, himahleh katup tuna ding ahihmanin haksa in zumhuai mahleh huaite ziak maimai a lungliaplou ding kahi chi’n kei leh kei ka kihanthawn touzel hi. Hiaibang hun khawng in panpihtu, deihsaktu ding mibang a nei hileng zaw kachi vungvung seka, ka tuah haksatte ziak ahingei dinga nu leh pa ngaih vungvung ni bang atam mahmah mai hi.

Mi toh teh ding vual hilou, siamna pilna a niamchik chih theikawm in ka tuah haksatnate ka tan ding mah ahi chi’n ka pomthei a, huaiziakmah in alungkiat huai mahmah hun tampi ah ka paisuakzou zel hi. Huchia interview a 50 val veibang kong pai hialtak in kalung aliap sim mahmahta hi. Mikiang a hiaizahvei ka kuan a lohchinglou kahi chihding leng azumhuai mahmah, mite nuihsanlel ka suak naak hi. Atawptawp in ken leng ka lungsim in a tawpna dingin khatvei konpe thak lai himhim ding chi in kava kuannawn a, vangphat huaitak in Company neuchik khat ah sepna kong mukhong hi. Kipak petmah kahingei dinga, ama-a kazumna teng bang ka mangngilh zou zozen hi.

Huchi’n Company ah nna konsem toutou a, huai a kasep kawmin kei leh kei leng naktak a kizil in nidang toh teh dingin saappau bang kong siamzawta hi. Huaikia hilou in mi toh kihou, maitaitaka mi houpihdan leh thil tampi ka sinkhia a, huaite kei adingin katup tangtun a ka mualsuahna ding a phatuam mahmah hi in kathei ahi. Company a kasep sung mahmah khawng inleng haksatna katuak mun mahmah mai hi. Ka bahni a hon suhalhtu ding, milaka hon sanggam bawltu ding kami-kasate’n hon encourage naaksang un ka minsiattheihna ding, ka zahlaktheihna ding ana zongzong uh ahingei dinga, ka hih hetlouhna tanpha a hong minsesak mahmah mai uhi. Kei mimal hinkhua haksat mahmah laia hichibanga kisukminsiatna kampaute kazaak chiangin ka kideek zoukei seka, ka mittui ka nuul mun mahmah mai hi. Mittui toh pangzen in kenleng ka lunglutpen ka try toutou a, atawptawp in ka haksatnate mangngilhna ding in chiklaipeuh a hon taisan ngeilou Pathian in ka thumna hon dawnga, ka lunggulh leh katup gige AVIATION INDUSTRY a chihchih uh ka hong tungtou khong hi. Mite adin bangmah tham hikei mahleh kei a dingin bel ka utpen ahihgige ziakin nuam kasa a, kalung akim mahmah mai hi.....

“Toupa honpi daan ka ngaihtuah’n, theihphaklouhte Na hon thei a,
Bangmahloute Na hon phawk a, milian lakah Na hon simtel sam zaw…
A lamdang ngei….. Na hon piidan, si lah hilou hing minpu in,
Gensiatna leh nuaisiahna kal ah, Genthei banga oma, taksap him neilou in,
Lungngaih hun ah aw hon khamuan in,
ka gentheihna zong pahna na suaksak zel…. “

[Ka hinkhua apan theihtuak:
Simtu ka sanggamte aw, kei bangmahlou apan in zillai hoihtaka hongla ding in ka hon ngen ahi. Katup ka taangtunna dingin ka siamna, ka pilna, ka neih leh lam in adaih hetkei hi. Himahleh Pathian muangkawm a tungzou teitei dinga pan konlaakna in atawp in vualzohna hongpia hi. I tup tangtunna dingin haksatna, zumna, housiatna, gensiatna, demna leh I deihloulam thil tampi I tuah ngai ahi chih thei in, huaite I tuahchiangin vangsiatna, lungkiatna a ngai mailou in kihihhat in Pathian kiang a thuumkawm in pang peuhleng mi’n azoh leh enleng zou ngei ding ihi. Pathian in amite chiklaipeuh ah hon taisan ngeilou ahi, en I tha pia in panlaphot peuhmah leng abaan aman hon ngaihtuahsakna ding ahi.]