ITNA TAKTAK
Biak S Tawmbing

Itna taktak bang ahia ?
Honluah dim thei, lungnuam sak thei leh nopsakna taktak hon pethei itna khat kia a om hi. A ziak bei, a san bei, ngiatneilou itna, ahihk’a leh Itna Taktak ahi. Itna taktak bangchi’n na mu thei dia ?

Itna taktak bang ahia ?
Itna taktak bang ahia ? Hiai dotna kuamah a dong omlou phial dotna ahi. Tua sang mah in, “Itna bang ahia ?” chiin mite’n dong uhi. Niteng in mite’n itna tawh kinaih in dotna dot ding neitei gun ua, tua in akhuak ngaihtuahna uh sou sak hi. Bangziakin ? Dotna dik hilou hiven. “Itna” kichi thumal suk nit a thaangbawl leh sukthaang maimai theih hilou hi. Mi 100 kiangah “itna” hilhchetna dong lechin, a kibanglou ngen in dawnna 100 na mu dinga, buaihuai pipi hizawmah ding hi.

Dotna DIKTAK ahihleh, “Ngiat neilou itna bang hi hiam ?” chih ahi.Tua pen, Itna taktak, mi tampite’ theih dan tawh kilamdang mahmah hi. Itna taktak tuh ngiat neilou, aziak-asan bei itna hi.

Michih in a deihdan uh itna, tuabang ngiat neilou itna ahi. Itna diktak ah, lungkimlouhna, thuaklahna, chimtakna, ahihk’a leh, hehna, thangpaihna omlou hi. Tangei oh, a kibangkei, a kilamdang mahve, lamdang lua, mite’n diktaka a phawk ngeilouh uh ahi. A dawnna diktak na theita hi : Itna diktak bang ahia ?, chih.

Itna taktak in midangte ading khualin, a nopsakna ding uh khual in, muhkik ding bangmah kilamen louhi.

Ngiatneilou itna bang ahia ?
Itna taktak hilou thildang peuhmah itna hilou hial hi. Tuabangte a taktak’ lim, achiin-a-chiinthawh ahi.

Midangte tawh kisaikhakna ziakin haksatna tampi palkhaa thuak kha malam hihang chih I phawk kheguih hi. Hon dimsak, haksatna damsak leh hon damsak itna chikhat kia om hi.

Ngiat neilou itna – Itna taktak – in mi teng’ deih nopsakna pia hi.

Itna taktak in bangmah poisakna omlou hi; a tellou in bangmah a hunta chih omlou hi.

Nopsakna taktak bang hi ahia ?

Midangte’n I nopsakna ding, I lung nopna ding, bangmah ngiata kinep chihte loua, hon khualsak chiang un, Itna taktak leng kichi hi. Itna taktak a kizatna ah, haihuaitaka hihkhelh bang om hun inleng, kuamah lungkimlou, ahihk’a leh, hehna-haanna kichite omlou hi. Hihdi a chih uh I hihkhaklouh ton hiam, amaute adia lemtanlouhna I tut chang inleng thawmhauna (ha huaihuai a omna) mit a ki-et dundunna, chihte omlou hi. Itna taktak tuh ngiat neilou, aziak-azaal omlou ahi.

Nopsakna kichi thumal kazat chiangin, tomchik sung adia sum, numei-pasal kal hiam thuneihna te ziaka nopsakna khengvalte ka geenna hilou hi.

Ahihk’a leh, ngiat neihna, kinep neihna in a lawhkhiak a ngiat banga gamtatna gah hilou hi.

Kinak-kiseelna, hiam, tuahsia omlouhna huna tomkha sung adia lungkimna leng hituanlou hi.

Nopsakna taktak tuh midangte apan kipahpihna I tan I don, hiam, I poimawh bangtak a midangte’n hon sepsak uleng hilou hi.

Nopsakna taktak tuh lungmuanna, gaalmuanna sawt daih leh taksa mahmah leh buching leh kuitung tak, hon lungkimsak tuntun leh I khalam hinna nasan khangsak tualtual khopa lungkimna ahi. Thil omdan a haksat mahmah chiang inleng hon nuse ngeilou hi. Haksatna leh thuakna om hun chiang inleng hing kiukiau in khang hiithiit hi.

Nopsakna diktak tuh I hinpih pumpi, itna taktak neia tua itna taktak, midangte I kikoppih theih hun chianga kingah thei lel ahi.

© Biak S Tawmbing | 150920