KA TAPA POSTIVE (Covid19) Heart touching.

Biak S Tawmbing.

Ka min tuh malsawm(min taktak zat hilou) ahi a, innkuan ki ittak ka hi ua, ka lawinu tuh Pathian ah kipezou tak hi in, innkuan kikhopna ka nei gige uhi. Tulai hileng leh natna lauhuaitak Covid-19 in khawvel a hih buai a, eilak leng a hon pel tuankei. Mite tungah tung ahi chi a I koih uh ei lak ah leng hongtung ta.

Ka tapa ka neihsun ka it mahmah Covid 19 a vei ding chih hih ka ngaihtuah ngeikei. Ka mumang lam ah leng ka man utlou thil ahi. Ka tapa tungah thil tung hih bang ziak a ka tung ah a tung zawk louh. Ka tapa hiai natna lauhuaitak a vei dan tuh hichibang ahi.

Natna hileng ziak a naupangte school kai theilou a om uh ahihman in innsung a kikhum det tuh piching a dingin leng a chim huai a, naupang i tate a ding bang in tuh a chim huai diak ding hi. Ei nu leh pa ten I tate hehpih lou itllou kuamah i om kei ding hi. Ka tapa Samuel (amin tak zat ahi kei) kum 7 mi chim lo sam ahi dinga, a nu kiangah nunu zingchiah zingkal chiah ka lawmte tawh PT ka va tai uh aw chi in a mama kiang ah hon ngen tautau hi. A mama in leng ka innkuan ua ka tut khawm laitak uh ahi a, awle a chi mai hi.

Zing baithak in ana thou a, ka thoh in a nu kiangah ka kan leh a Mama in leng ka thoh ma a na thou ahi, Bang mah zaw hong chisam kei ven chia ka lawi nun hon chi hi. Sawtlou nung in ka tapa tuh hongtung belbel hi. Na gim hia bawi chi kawm in mask a na muk tuam lou maw bawi, hand sanitizer na tawi hia ka chi leh Papa ken huaite keng khalou chi in hon dawmg tautau hi. Nidang chiah ka mangngilh nawn kei di Papa chi in hon dawng tautau hi. Va ki hah khia inla na mama in ann huan khinta ann i ne di ua, kei leng office kai louh theih louh kou hun tung ahih ziak in ka va kuan d chi in ann nekhit in nuta te tuh ka kuan san hi.

Kalkhat zawh nungin zankhat ka tapa tuh a sisa in a taksa na sa, nak haksa sa in ana om a, a nu tawh ana ki buai pih uh ahi ding, zingkal ka thoh un ahon gen a, Papa zan nitak a nanau kha a khua sik sang lua a, a taksa nasa in nak haksa sa ahi... Zing I thoh leh a dan a om deuh a, ken nang gim theilua chin a hon phawng utlou ing tua ka hon gen ahi hon chi hi. Hospital ah nanau ka va en sak aw hon chi hi. Huchin ken leng Covid natna a om tawh huai test pah le hoih in teh maw Nunu ka chi a, ka tapa tawh a nu tuh office kai kuan kawm in hospital ah ka tapa test sak ding ka kha hi.

Ka tapa pa lupna tung a lum a nu leh kei a kiang a tu a, a nu tawh ka tapa khosik a tal dep a ka om lai un hospital a pan a nu phone ah call hongpai a, Samuel( a min lemlem ahi) nu na hi hia, na tapa vangsiathuai taking Covid positive ahi hon chi uhi. A nu le shock lua ahihman in, a pau thei nawn kei a, a phone kesak kap kawm in ka tapa tuh hitheilou chi in a kawi belh ta mai hi. Ka lawi nu phone ki off lou ahihman in ken ka la huchi in hospital lam a ten na ta ka hon kepsak uh ngai ding ahih ziakin a van ding bang kim ana sa un la, ana man un banah nou leng na ki test uh ngai ding ahi. Lengla leng na nei theikei phot ding uh hon chi ua, huchi kawm in ka tapa in a nu kiang ah mama kei hileh dam zou nawn lou di maw chi in aw nem tak in a nu kiang ah gen hi. Hiai hun chet in zaw nu in a ta a itna lian in thupi hina maizen e maw chi in kei leng ka ta en kawm a phone a pau tuh ka mittui hong luang khia hi. Hospital lam a te kiang ah nou chih dandan ahi. Kana sa pah ding ua a man pah ding chi in ka dawng hi.

Sawtlou nung in ambulance hong tungin a mama in thumna neihsak in, ka tapa leng amah leh a mah mask ki but in, a nu a sak sak a van ding a school bag a guang sak, a nun a ma phone leh charger bag a a guansak te ki puak in a nu leh kei sawt sim hon en a, a tuanna ding ambulance in kong a ki dawh tuh a zuan balbal mai hi. Et ahaksa mahmah hi. Lai dip na e... Anat dan tuh gen theih ahi kei nulehpa hi a ta neita ten na theihsiam mai uh ka gingta

Kou leng koi mah a vak khe theilou leh kua mah tawh ki thuah thei nawn lou phot ka hihman un inn ah ka om mai uhi. Ka tapa aw tuh a nu tawh ka za ut thei mahmah uhi. Ni khat a nu tawh a ki hou lai un a nu kiangah Mama papa tawh hong pi ta ve ua kon ngaita.. Papa le ka ngaita nang leng kon ngaita na ann huan te ka duh ta hon chi khe kiaukiau a, ka ki dek hamham a, a nun kap kawm in bawi, kou papa toh le hon ngailua ka hi uh, kou ana thum zel chih teng a nun gen thei in a dang a gen thei nawn kei. Huchi in ka tapa kiangah Doctor in kou leng pawt hon phal chiah mama tawh na kiang kon pha d ua... Kong pi di uh, papa bang a pasal na hi a, pa deuh a om ding, doctor te hon chih dan a om ding ka chi hi. Hiiai tuh ka ki hou tawpna uh ahi.

© Biak S Tawmbing | 30th september 2020.