KA NU LEHKHA THON
Based on realife
Biak S Tawmbing.

(Hiai thugelh in sinlai bang hon pe thei a chi kawm in simtuten sim chiatni)

Bawi, hiai lai na sim hun chiangin, hiai khawvel ah ka om nawn kei ding. Hehpihtakin na nu nawn ngaidam di aw. Hehpihtakin na nu nawn ngaidam di aw.

Ka tan chin hon hilh ka ut lua a, hichi ahi kha 5(months) na hih lai in, na pa'n zi dang hon neihsan a, na nu (kei hon nawlkhin in numei dang a bel chihna ahi.) Na pa'n hon paisan leh leng, nang kon neih ziak in ka kipak a, bangmah dang ka deih kei. Ei nuta kia himahle hang na pa dinmun ah na ding zou a, ka kiang a na om chiang in kei na nu ka khamuang petmah ahi.

Nang kon ziakin ka kipak a, ka ang nem bel a ihmut lim tak na ihmut chiang in ka suangtuahna a vak vel a, den hun chiangin ka kiang a tawldam tak a ihmut ut mah lechin ka om nawn kei ding. Haksatna leh buaina na tuak ding a, na thawmhau na lungngaih chiang a, na ma a ding na nu ka om nawn ta kei ding.

Lehkha sim lawmlehvual phak louh ding lau a tha it tak a na omlai in, sawt ka dam nawn kei ding chih na thei hetkei. Nu ka hong tangval a, sepna ka hon neih hun chiang in gimtak a non chawmna ken na tha ka khengta ding na chih lai te, kei a dingin khawvel ah khamuanna deihhuai pen ahi a, ka kha na hih muang mahmah ahi.

Ka tha na khek hun mu thei ding hileng, tawldam tak leh khamuangtakin ka om sam ding hi. Himahleh ka damtheihna in huai hun ut huai tak tuh a mu pha nawn kei ding. Bawi hiai ka natna ka damlouh lai in hon hilh ka ut a, ka damtheihna ding a damdawi non piak laite kei a ding a na thumna ging tuh khawvel a ging kilawmtak ahi chih hon theihsak in aw.

Kei ziaka lungsim gimtak a na omte ka thei a, naupang mawl milmel na hi ka hon chih lai in kei ziakin piching mahmah na hi. Hon it na hi chih ka haih kei. Himahleh thil ka hon hilh kei leh na damsung in dotna ngen in na dim ding chih ka thei. Ka zumna leh ka hangsanna tengteng pangkhawm in hiai thu ka hon hilh a ngaita hi.

Himahleh hiai thu ka hon hilh ding tuh khawvel a ka ut louh pen leh haksa kasak pen ahi. Hon ngaidam in aw. Na pa tawh ka kiteenlai un, Hiv positive ka hih thu ka kithei a, Na pa'n huai thu a theih chiang in hon kih a, ka om duhdak louh ziak ahi hon chi a, Hon tot theihna ding in zu a dawn a, zu kia hilou in damdawi tang leng a ne a, ka kiang a a lungkim theihlouh ziakin, zi dang hon neih san ahi. Bawi ka damlouh lai hon hilh mai ka ut a, Himahleh ka hon hilh ngam ngei kei. Bangmah dang ziak ahi kei ka hih khelh ziak ahi.

Ka natna tuh zah pih in a damdawi ART a chih uh leng ne ngam lou in ka natna tuh ka na im a, ka natna in hon zou zel a, natna dang ka taksa a hong zamlut tuh ka zou nawn ta kei hi. Bawi na nu tuh non ho di maw? Kei ziak a hiai khawvel khattang tak a na masawn ding tuh. Himahleh hehpihtakin na pa ho ken aw. Ka nungak lai a kholou tak a ka chetna gah vek ahi. Na pa siamlouh ahi kei. Kei ziak vek ahi.

Hiai thugelh na sim chiang in ka taksa tuh a muatta ding a, hon sam mah lechin ka hon dawng thei nawn kei ding a, himahleh van a pan in ka hon en den ding. Ka thugen lunglut takin ngai khia in, i khua ua pan ni nih na ah na pi ( Ka pa nu)a damlai a, huai khua ah va pai in la, aman kei bang mah in deihthoh takin hon enkol ding.

Hehpihtakin na pa tuh na zuan kei ding, houpih tak ahi nawnkei. Na pian tung a na pa tuh tuhun in a lungsim a dang ta. Hon itlou ahikei khamtheih in a taksa a hih buai zouta. Na pi angsung ah kipaktakin hun na zang thei zaw ding. Hehpihtakin ka thu zui in aw.

Bawi, a gen uh van khawpi ah kei tuh ka omta a. Hiai khawvel non potsan hun chiangin ka kiangah kipaktakin na om nawn ding. Niteng in ka hon en den ding. Hiai khawvel hangsan tak in masuan inla, lau ken aw. Na kiangah na Nu leh Pathian ka om gige uh. Kon it lua. Mangpha aw.

Lungngnaihna leh mangbatna ten niteng in hon tuam zel, Natna leh gentheihna ten hon nawk zel a, Panpihtu ding leh hon nem ding lei ah ka mu kei. Panpih tu Toupa kon ngai hi.