WHATSAPP GROUP A KA THIL MUH.
Biak S Tawmbing.

(Ka lungsim hon khoih mahmah ziak in saulou ka hon gelh khia hi)

Tuzing a zingthou, zing singpi dawn khin om maimai kawma ka WhatsApp group te abanban a ka etleh group khat ah lamka hanmual a hong ki post awklum kana mu hi. A lim ka en ua ka thei mahmah khat uh ana hi a, kuamah hon theihpih lou in ka suun mahmah uhi. Bang ziaka ta lukim nei a, hichi tel a om hiam chih i ngaihtuah a chiang in a puak nat huai mahmah hi. Pona chih in le a gen zoukei.

Mihing i lungngaih luat chiangin a tung theilou ding thil omkei hi. Awk lum chih thu i zak chiang in a poi petmah a, himahleh mihing i awklup khit chiang in gen bei a ki hi mai hi. Awklum ding te tuh thil gen tam sese lou in hih mai uhi. Inn nuam tak building hoihtak sung leh hauhsak na in kipahna hon tunlou hi.

Ngaihtuah na pe zek leng ka chi mahmah hi. Tuailaite hi in tekpi tekpu neite ki ngaihtuah zek leng i chih mahmah hi. I nu leh pate i vua a singkhuah suangtum in i sat kei, tem in i dawt kei ahi mai thei himahleh a lungtang tawng uah lungsim tawlna leh gimna in i dawt lum a i awk lum sak thei hi. Lung in gelh thak ni.

Mite theih in innsung nuamsa leh khosa thei in lang mah le hang, pianna nulehpa te i suk lunggim a I suk khasiat a, a lungtang uh na tak a I khoih khak zenzen leh i ma a vang het kei ding. Nulehpa sangin na pil mahmah ahi zong in, tuailai hinkhua ah nuam i sa mahmah a, nupa kal kituak in hinkhua na zang ahi mai thei. Na pianna na nulehpa, na tekpi na tekpu lungtang na suk nat mahmah le zaw na lamzang tuankei ding. Panla thak chiat ni.

©Biak S Tawmbing | 28 September 2020