INNKUAN
Biak S Tawmbing
Innkuan gen ding leh gelh dingin kei ah chitna bangmah a omkei a, himahleh ka lungsim a let luat mahmah ziakin ka hon gelh ahi hi. Innkuan bawltu Pathian ahi a, innkuan chih i gen chiang nungak khat leh tangval khat a hong kiteeng ua, ta a nei ua huai tuh innkuan ahong hi hi. Innkuan omlouhna ah society a om kei a, society I chih leng innkuan sung apan hong kipan ahi a, innkuan a siat chiangin society sia hong hi lel hi.
Ka ngaihtuah chiangin nidang lai in innkuan sung siatna hi chi lawmlawm a om lou ahi chi leng ka gen khial kholkei ding. Nu leh pa singtang lou na sem apan atam zaw ahih chiat man in, school kai lou teng lou a nu leh pa tawh a tam zaw ki kuan in nu leh pa tawh leng hun tamzaw kizang khawm thei hi. Nitak hong hi a nu leh pa te inn a om in tangvalte nungak hel ding in a pawt khia ua a huchi loute khawlak a a dung a vai a ki zui ahih kei leh mun khat peuh a om in guitar tawh zawlla peuh sa in huchin hun nuam tak zang uhi.
Khawvel hong changkang hiai hiai in, mihing ki tam semsem a, khawvel a pilna hong khang hiai hiai a, haksa gentheihna pal kha lou tuailai tamtak hong omta hi. Nu leh pa gentheihna theihpih lou nu leh pa hai sa tuailai tampi tak tulai khangthak te lak a omta hi. Huchi bang kawm kal ah khawpi a singpuak louhna sing a ann huan louhna munah khang khia a, pasal nei zi nei tampi omta nulehpa te sanga pilna siamna hoihtak nei a nuleh pa te simmawh nelhsiah musit innkuan sung tamta hi.
Tu dinmun in en leng innkuan sungah tuailai omte haksatna leh mangbatna theih pih lou nu leh pa tamtak omta hi. Pa in a tapan haksatna a kup dek chianga kup theih louh tampi om ta huai ziak in nulehpa tawh tate kal leng innkuan khat sung a teng khawm hi zenpi ki gamla mahmah ta. Nupa hi ngal tate mai ah ki sel gige tam in tamta hi. Zi te a dia thukup theih louh pasal tam a, Pasal te a dia leng zi thukup theih louh tampi om hi.
I gamsung a bik in lamka khopi a 100 a 100 Christian himah lehang 100 lak ah 80 te tuh biakinn va kai a kikhom maimai ki hi lel hi. Innkuan sung ah Pasal te angsung leh zite angsung ah muh ding a omlouh chiangin innkuan sungah khamuanna omkei a kholak a innkuan sung miten khamuanna hon zong ua lah a mu tuankei ua. Innkuan sung hong sia in society a hong sia a, bawl a haksa mahmah ta.