Hinkhua manpha
Biak S Tawmbing

Toupan mihingte, taksa lungsim leh kha neia hon bawl ahi. Hiai pen mihing ihihna leng ahi. Tulai hun in ka tuailaipihte laka lungsim lam bah leh tongkhong i tam mahmah uhi. I lungsim lam abah chiangin i taksalam leng ana bah thei hi. I taksalam damlouhna sawtpi nei a i hong om chiangin kingaihsiatna leh khalam tanpha leng bah thei hi.

Khalam hong hatlouh chiangin samitna lungsim hong piangin, i lungsim a hoihlou lam ngen ngaihtuahna hongtung thei hi. Laibu khat ka sim khakna ah mikhat in hichiin ana gen hi" Heh heh leh phunphun a i om chiangin khalam ah i keu mahmah chih theihna khat ahi" ana chi hi.

Mihing tengteng Pathian in hinkhua manphatak honpia hi. Mihingten i ngaihtuahna damtak toh khosak a poimawh mahmah hi. Lungsim a kipahna neite en lechin amel uh vaak dinga, thathou tak in om sese ding uh.

Paak (flower) khoiten na thei mahmah ding ua,niteng in paak leng tui a piak ngai a, tui i pesek ua, huchibang mahin mihingte leng khanhoih leh manpha a i khantheihna dingin, lungsim damna poimoh hi.

Misiamte gendan in i lungsim i natpih ua, i lungsim mah i dampih uhi. Ka tuailaipihte milohching hizenpi lohching hihlam kiphawk lou, bawltheih hau mahmah hizenpi hihtheih neilou banga kingai, manphatak a bawl hizenpi manpha loubang a kingaihna, hinghing leng leng bangpi hikei ning chi a kingaihna.

Ka tuailaipihte lakah mahni hinna kilak ut tam, beidong kisakna lam tuamtuam ah tam lota.

Ngaihtuahna tuh kidouna phualpi ahihmanin i ngaihtuahna veng hoih in Pathian khut ah kikemsak gige ni. Hinkho manpha zangthei dingin Toupan hon ompih chiat hen.