NU LEH PA
Biak S Tawmbing

Laigelhtu apan: Hiai laigelh na hon sim ding a, na sim khit chiang in na phattuam pih leh share sawn zel in.

A pa nuihsan leh, a nu thuman musit, guam va-akte’n a tawm ding ua, muvanlai noute’n a ne ding uh Paunaakte:30 :17

Nu leh Pate i lei Pathian ahi ua, i pian khiat akipana hin dingdan hon hilhtu leh khelhna a kipana hon vengtu hon enkol a hon kem khangliantu lawm te i eng ding lau a i poimawh te hon ngaihtuahsak tu ahi uh. Nu leh Pa te amanphat luat ziak un Laisiangthou in leng a thu uh mang ding in hon sinsak a thupiak honpia ahi.

Mosi in, na nu leh na pa pahtawi in, kuapeuh a nu hiam a pa hiam gensia tuh si mahmah heh, a chi ngal a; Marka:7:10

Nu leh Pa gensiat a poidan tuh Pathian hamsia i tung ah hongtung ngeingei ding ahi. Si mahmah hen achi top mai ahi. I nulehpa te i mu thring in khanglui i sa ta uh maw? Khanglui leh mawl isak ziak un i soisel zel uh hilou maw?

I naupan laia lawmte eng di laua, haksatak a hon enkol a hon kemtute tun a lawmte uh engin i koih uh hia? Dawr ah nektheih lei ding hon ngen kha ding uh chi a i thil nget te leina ding neilouh lau a sum leh pai ana siit chenchen tute i Nulehpa te pocket money ding i pe ngei uhia?

I duh lam meh hon huansak tute i nulehpa duh lam meh leh a ngaihnat lamte uh i ngaihtuah sak zel uh hia?

Damlou a iit leh deih thoh taka hon enkoltu i nulehpa te a damlouh chiangun ittak leh duattak in i enkol hia?

I pau chiang theih ma a panin i deih leh i duh duh te i gen a, dawh zoutaka hon ngaih khiatsak zel ahi ua, i nulehpa te gen utlam veilam te a hoih limte uh hoihtakin i ngaihkhiak sak zel uh hia?

I thil hih khelh tengteng uh hon ngaidam zel i nulehpa i ngaidam zel hia?

I lawmte laka i nalh kei lo ding chih lau a, ahih theih bangbang ua nna sem a honkem i nulehpa te a lawmte lak uah nalh lou leh khanglui tak khawngin i koih kha uhia?

Hon ittu nulehpa te bang chiin ahia hon itna uh i dawng kik uh?

I nulehpa te mite nulehpa banga hausa sumnei leh lehkha siam ahi kei maithei uh, i zahtak ding ahi. Thu leh la hon gente uh i ngaih khiat ding ahi. Khanglui mi hita in hong upa ta mahle uh leng, koimun mah ah i zahpih ding ahi kei. I duat in i iit thuk ding ahi.

Mi nulehpa tuk kei mah le uh i nulehpa te ei a dingin nu thupi leh pa thupi chih theih apoimawh pen ahi. Vaihawm khelh hunte hih diklouh anei hun nei mah le uh leng i theihsiam ding ahi.

Nu leh Pa zahtaklou te, a thu uh ngaikhelou te a lam zang ngeikei in a mulngilna a nei kei uh chih theih a poimawh. Phun chiak hunte, thu huat huai hon gen hun uh, hou chikchik a hong heh hun uh anei zel uhi himahleh dohzoutak leh theisiam tak a enkol dingte i hi.

Naupangte aw, Toupa ah na nute uh leh na pate uh thu mang un: huai tuh thil dik ahi ngal a. Ephesate:6:1

Naupangte aw, bangkim ah na nu u leh na pate uh thumang un, huai tuh Toupa pahtak lam ahi. Kolossate:3:20

Naupangte kia man ding leh zat ding kia i chi kha ding, i nulehpa te uh uh a damsung un, amau adingin naupang, tate uh i hi gige uh ahi. A thu uh zuih ding ahi.