KA NU LEHKHA  

By Biak S Tawmbing

Laigelhtu apan:

Khawvel hinkhua haksa ahi, chih phawklou a nopsa taka hinkhua zang tuailai tampi I om lai un, milak ah kipahmel pu leh lungkhamna di neilou hileh kilawm himahleh a lunggim tawng ua thawmhauna lianpi nei ki om ahi chih phawk in hiai anuai a tanchin kon gelh sim in ngaihtuahna thuuk tak pe leng I chi ahi. Mi khat tanchin a pan hon ki gelh khia ahi.

College khatah sinlai ka hi a, ka Nu deihthusam hih pichin dingin, class ka kaizel hi. Lawm tamtak ka neia, nuamtakin college ah lehkha sin khawm in ka kipawl zel uhi. Ka lawmte kiangah kipaktakin ka om a, mahni kia a om chiangin thawmhau taka ki ngaihtuah vungvung hun ka nei zel hi.

Ka Nu’n hon dampih laia, kipaktak leh khamuangtak a ka omlai nite ka thawmhau ka ngaihtuahna luahtu pen ahi. Ka Nu’n a damlai in hon it mahmah a, kei a dingin khawvel ah ka Nu tuka om kei, Ka Nu a pawtna tengah ka zui a, thu ngaihnop huai leh thu hoih pipite hon hilha, ka theilouh a om chiangin leng amah thil tengteng thei ding sa in ka dong zel hi. Lawm tamtak ka neia, himahleh ka Nu tuka, hon theisiam ding leh hon khawtuah ding a omkei hi.

Amah(ka Nu) toh hun zat khawm tuka nuam khawvel ah a omkei. Ann hon nekpiha, ka vahlouh ding lauin, hon baak zel hi. School kai peihlou a, kapa ka omchiangin hon tailou in School kai poimawh dan te hon hilh a, ka let chianga, khawtang leh saptuam a mi zattak, phattuam leh mite a dinga vualzawlna hi ding in chiin hon thuhilh in school a ittak leh deihthoh takin hon kha zel hi. Zan chiangin lupna ah ka lauh chiang in hon kawi in, a anglum ah nuam leh khamuang tak in ka ihmu zel hi.

Ka Nu awlawl in, hong lamdang hiaihiai a, nidang bangin hon kimawlpih zou nawnkei a, ihmut le a ihmu hoih ngeikei a, bang ziak adia aw hichibanga a om, chi in ka ngaihtuah zel hi. Hon kimawlpih peih nawnkei, lupchiang in le hon kawi peih nawnta kei, a mel et in a gim mel mahmah hi. A lungngaih mel gige hi. Ka Pa dam nawnlou ahihman in kou gel kia a khosa ka hi uhi, A damlouhna hong uang huaihuai ahihman in Ka pute ka hilh a, huchiin damdawi in ah ka nu tuh a pua uhi.

Ka nu’n damdawi in hon om san nungin haksa kasa mahmah hi. Bangkim hong lamdang leh kikhek vek in ka thei hi. Ka thawmhau in thilbangkim ka ngaihtuah theikei, ka omna mun peuhmah nuam kasa theikei hi. Ka Nu omlouh chu thawmhau huai kasa mahmah hi. Ka nu tawh omkhawm ka ut mahmah hi. Himahleh hun teng a om khawm theih ahi kei. Thawmhau huai in ka nu ka ngai mahmah hi. A kiang a om hun ding lamen takin ka ngak ta mai hi.

Hun leh nite hongpai zelin, ka nu tawh sawttak ka nu tawh ut hunhun a kimu theilou a ka om nungun, hoihlam a nawt theihlouh ziakin in, sawttak khawvel a dam dingin lametna anei nawnkei a, Naupang lai ka hihmanin, Ka piching hun a bangkim ka theihsiam na dingin ka pi te kiangah thukhak anei hi.

Bawi, Na Nu’n hon it ka hi chih mangngilh ngeikei in, hiai khawvel ah genthei takin na om a, na duh leh na deihte le konpe kei, mi hausate’n a tate uh a deihdeih uh a leisak bang un, nang a di leh ahoihpen leisak hihsak ka utsek hi. Himahleh nei leh lam in chin lou ahihmanin kon hihsak zoukei, hon ngaidam in aw Bawi. Nunu maw zawnglua ka hi. Thil tamtak konpe theikei himahleh kon itlua chih mangngilh ngei kei in aw, Nunu maw a taksa tengteng HIV AIDS natna hikin ne segawp mah leh ka kha pen khamuang tak a Pathian kianga paiding ka hi lungmuang in aw Bawi. Kei tellou a hinkhua hon zangtou ding na hi a, thumanna chihtakna ginomna te hinpih in la, na hong pichin chiangin kei leh papa taksa leikawm ah ka na muatta ding ua, hon mangngilh kei in aw, Na naupanlai a na ut mahmah non gen sek, Doctor chu pichingtakin hih ngei hon tum in, Na nu leh pa te banga, HIV/AIDS a nate enkol leh kemthei dingin, tup guhna toh na mailam nawt in lungke lou in hong pangin,Kou a ding in zattheih hi nawn kei mah lechin Midangte a dinga vualzawlna hiding in. Mangpha aw Bawi.

Ken mangngilh thei ngeikei hial ing Ka nu’ thugen ken ka zak ni “Hon nusia ding maw, Bawi, tuin Na nu’ thumna ngilh ngei ken,” chi

A it huai lua ka ngaihsut chiang’ Ka kiang’ om bang Amah ka thei Huihkhua pan aw huihkhi’n hon len Ka nu’ thumna hon theisak thak

Ken mangngilh thei ngeikei hial ing Hon lungdamsak tawntung a aw Gamlapi ah ka taiman hang’ Ka nu’ thumna thei gige ing

Hunte bei zong mangngilh thei ke’ng Hon itna thu ka za lailai A tutna ngei a tu lai a Ka nu itpen thum in ka mu

Ken mangngilh thei ngeikei hial ing Hondampa’n kei hon sinsak hun Ka khelh mohna a thaisiat lai’ Tua ah ka nu’ thumna dawng hi

Toupa phat in hehpihna hang Eite vantung ah kimu ding Tua van innpi ah tengkhawm ding Ka nu’ thumna dawnna hi ding

Keikia a ka omchiangin ka naupanlai hunte ka ngaihtuah zela, ka nu hon thuhilhna kammal te thei gige in ka tup hih pichin dingin pan ka la tou zel hi. Nu-leh-pa tellou a hiai khawvel ka masuan a ngaita. Toupa hon pi in nang kon muang hi.