Huantuu bang chiing
By VzSiam
‘Ka chiin ka ngai na chihleh tuai lianu aw,
Simlei tung ah huantuu bang hon chiing un aw.’
‘Huantuu bang chiin sa’ng zaila ngaih chiing nuam zaw’ng,
Chiin lungching aw gui khau in khih nuam ve’ng e.’
-Galmatpa’ tangthu.
‘U-le-nau simthu kidawng dilldial leng aw,
Tou chiilchial in siambel tuu bang chiing le’ng.
Tou chiilchial in siambel tuu bang chiing le’ng,
I hawmkhelh zong ziin’ hawmkhelh chi ve ni.’
-Khanglui la.
‘Siam bang sin a kawlgam-vaigam a hei,
Laizomte aw lung ka mawl zong in,
Simthupha khat hong muam ning aw,
Lunglai ah tuu bang na chiing un aw...’
-Tuu bang chiing un, -Sir Funny
‘Heina khatlou gi bang khen in
A mual zatam in ei hong hal zong in
Tang bang kholhlai tong i kupte
Tuu bang na chiing in aw
Vai bang tungsak aw ngaih...’
-Lengtong Pauno
Pupa zaila luanlawmnou e;
Khau bang suut ding kiamta e.
Khau bang suut ding kiamta hi e;
Tuu bang chiing ding kamta e.
-VzSiam
Lungsim ah a thaam nilouh a, lapau toh kisai gelhkha ngei hi a ka kitheih toh, gelh peih nawn hetlou napi gelh masiah lungsim hon kam ding abat man in k’on gelh nawn mai ve. Kitheihsak bang le buai naak omlaw sek a!
Tuma in facebook ah, ‘tuu bang chiing,’ chih toh kisai houlimna a hong sousang mahmah a, a nop natak khat bang a omdek vanglak hi. Hiai ‘tuu bang chiing’ chih toh kisai a a neupen apan a lianpen tan, leh a theipente leh a theiloupente apan a lehna kigensiakna a om a, theihdan tuh a tuamthei mahmah hi. Heutupa T Pumkhothang in a la ah, ‘huantu bang in hon ching inla,’ chih a hon zang a, bangzah hiamte hon lung-amsak hileh a kilawm hi. Khat ngial in houh, ‘Huantu bang chiing, chih ahikei, Huan, tubang ching, chih ahi. A dik a tang thei napi kihaisak kul in ka sepkei,’ a chi gamgam hi. Khat in, ‘Paite pau upa ah belam kichi kigen vang mahmah hi. Belam khoi nam le kihilou ahi. Huansung ah le belam kikhilou bok hi. Huaiziak in hiai la in a genpen belam ahih ka ging kei. Huansung a i chiin or i khoi/kepbit thildang haichi genna ahi zaw ding. Eg. Kawltu,’ a hon chih thahah leh khatpa utdek nenglou, ‘Belam eimite’n i neihlam uh theilou bang le ki om hihtuak. Ei neulai a belam, kel chih khawng a kihauhhauh maizen toh singtang dawn a. Huan tuu, kawltu chihmawk hi ngallou,’ chi’n hi a saklouh thu a hon gen memelh hi. ‘Belam pen Tedim lamte’n tuu ana chi ua, Tedim pau tuh Paite pau dia lapau chile khiallou di. A diak a Pathian laphuakte’n Tedim lapau hahzat diak uh ahi,’ chi’n amah selpa a thuhilh kaankaan laideep hi. Khatpa’n le thei peetmah tuh hidi, capital letter a, ‘A sawt lota tuu kichihna i unau pih simlamte pau in... Kawltu chihna hikhalou...!! PASIAN TAPA TUU CHING HOIHPA KA BELH MUANHUAI NA HI... chih le om ahi!! LAMKA KHUA A KHOSA MIPIL TAMPITE’N CHIH ANA THEI KHOLLOU DI EIMAH VE... UNAU KHODAAK ZEK LE HOUH AHOIH DI E...’ hon chi motmot tuh houlimte bang le daiduak zouhial hileh kilawm! Huai hun a houlim tamzawte tuh kum sawmnih leh sawmthum kikaal mi ding ahi a, a houlimna ua pan et in Paite lapau maban ding tuh a lungzinhuai mahmah chihlouh gen ding bangmah ka neikei!
A phuak tupa’ zatdan hilou in, ‘huantuu bang chiing,’ chih kia en phot ni. Pi leh pute hi in eima deuh a khangte tan in leng ‘huantuu bang chiing,’ chih a na zat chiang un, ‘thei gige, chiamteh, lungsim a vomden, mangngilhlou, keem tawntung,’ chih lampang genna in ana zang uhi. Huai tuh huansung a kawltuu i chiin toh na tehkhin uhi. Banghang a kawltuu pentak toh na tehkhin uhiam chihbel teltak a theih ahikei. A theizaw deuh lu a kelsam poute’ hon hilhdan in bel huansung ah kawltuu chimanlou in kichiing ngiitngeet a, huaiziak a kawltu toh ana kiteh khin ahi ding, chih ahi lel hi.
Huchi ahih lailai in la phuak tu in hiai a tung a ‘huantuu bang chiing,’ chih toh kizom hi hetlou, a ‘tu’ chihpen tedim lamte’ a la a, huan a belam bang in hon ching in, chihna dia, ‘huantu bang in hon ching inla,’ a chihleh leng a diklouhna ding a om tuankei. Laphuaktu in a utut toh a tehkhin thei hi. A utleh, ‘phone bang hon charge in,’ leng a chithei.
Lapau a tehkhinna (simile) zat toh kisai ah laphuaktu in ama a dia lemtang penpen a zat ahi a, huaite lak a a kilawmdeuh leh a kizangmun deuh tawmchikte kia hong khosuak a, tutan a a na theidenkha lel i hi uhi. Huaiziak in tua i theih bangzah hiamte kia lapau a tehkhinna ana hilou uh ahi. Denlam a i gen bang in laphuak tu’n a utut toh tehkhin thei hi.
A himhim a Paite khangnoute’n i lapau, huai tuh i tawndan (culture) uh i hichi theihlouh maimah tuh thil lungziinhuai ahi. Kum sawmnih lel khawng a upa khat in ama piannung kia en a, ama piannung a thil omte kia i tawndan sa a, ama pianma a thilte thei hetlou a thukhitna i bawlmawk leh bang suak ding? Khangthakte thil suut leh kan (research) i peih ding uh ahi. A diak in i khanglui thilte i kan mengmengkei leh tu a lu a kelsam poute a bei chiang ua beikhawm ding ua, laibu a bangzah hiam i na gelhmante lel uh kemkha ding i hi uh.
Laphuak mite bang in leng lapau i zat ut ding leh sinzek a, mi dotzek ding ahi. I khanglui late uh bangzah hiam beek sin in suut le hang i laphuahna naakpi in hon panpih ding hi. I siamnalam beek a siam sawm ding ahi. Laphuakmi i hihleh mite’n ei’ phuak teng leh ei thumal zatdan teng a dik dia a na koih mawk ding un, i zatkhelh ngeingei leh a diklou a paisuak mai dingdan ahi. Huaiziak a pilvan ngai mahmah thil ahi. Lasiamte bang in leng la i sakma a i la thu theihsiam masak ding ahi. Awphawi diktak a la saksawm ding ahi.
A bullam a houlimte lak a lawmpa’ gen, ‘Belam pen Tedim lamte’n tuu ana chi ua, Tedim pau tuh Paite pau dia lapau chile khiallou di. A diak a Pathian laphuakte’n Tedim lapau hahzat diak uh ahi,’ a chih bang a diknatak om lehlam zezen! Ei mallam a Paitete’n i Paite pau diktak paihkhiakhia hang a, kholai pau leh paudang tawm mengmeng i hih chia thutak genna dia tuh ana keembit zaw deuh Tedim lamte a mah va kawm ngai ei set vo oi! Tu a Lamka zaang a i Paite pau bang zaw Paite pau le hilou, Neo-Paite pau hita eive! Pau i chih kikheek thithe ahihna ah huchi ding mah hi a, tu a laphuahna dia taaklou i chihte khangnih-khangthum hong hileh hong taaktou zel ding ahi. Pulpit khawng bang a le, ‘eichu maw,’ chih khawng lamdang nawnlou. I zaak tuung kho tuh nuam lehluhlou.
Tedim pau bang leng Paite pau apan a piang liauliau, hinapi i huatbawl mawk a, bangchi et a enkha i hi di uam ah. Mi’n amau pau, Teizang, Zou, Sihzang leh a dangdang nawlkhin a Tedim pau, huai tuh Paite pau diktak, a hong pau uleh ei a pau neitu Paitete’n huat chihtak a haw mawk! I huchihnalam a khahsuah peetmah!
Banglou teng k’on gen a, saulua gen sawm leng ka hikei. Khangthakte’n thukan-lakan hahbawl ni. Ei muhdan leh suangtuahnadan a diklua bang leng na dik hetlou thei ahi. A tung a i houlimdan bang ua thei hetlou napi theilua kisa a chiltui kai zen a i gente bangbang a i om mawk leh i lapau teng bang ule a lehna lumlet vek kha ding i hi. Huaiziak in sinni, sui ni, kan ni. I thului i laluite uh theih sawm ni. I tawndante uh theih sawm ni. En zuunkei leng kua’n zuun tuan ding? Huantuu bang chiing ding nanglou omlou!
Thei kisa na hih uleh hiai hon la hon khia un e-
Hong ki-uai-am, hong ki-uai-am e;
Tung lengthe nau bang ki-uai-am e.
Simlam ka mazap mun ah aw;
Tung lengthe nau bang ki-uai-am e.
-Khanglui la
Lapau toh kisai khawng zaw khanglui la dawng sawmthum-sawmli beek suut masalou in theilua kisapah mawkmawkkei ni mate! Na piannung ua kiphuak late khawng chetna a zang a i lapaute uh n’on hilhchet sawm uleh zaw hilhmang kiikei di neive ua. Lapau khawng hilhchet na ut uleh khanglui late hon suut taai dimdem phot un. Heuhou gouh.