Kumkhat hunzatna kichi a kip-akawi(nouneel) tak a genseng diing ahi zenzen kei chih kua peuh in i thei. Huai ziak in Part~I ah kumkim tan bang i tungtou vengvong man a, tu’n a banah i entou sin uh aw lee...
Tuukpi(rainy season) saanlaitak ahih man in vualzawlna vuahtui chuh a tam mahmah mai a, a khenchiang in gial bang a kia a, huihpi toh bang kithuah ut mahmah hi. Vuahzuk ziak a loukuan theihlouh hun tamsim mahleh ahihtheih liai nakleh chuh lou kikuan teitei sek hi. Aziak chuh vuah zuzu ahih man in loupa khang ut mahmah a, loukhoh chiang in le khohkhiak loupate’ si khawlkei mahleh ‘khoh’ hi himhim ahih man in phatuam veve hi. Vangvot(leech) leng tam mahmah a, a diak in ‘tungtun’ ah tam utse hi. K’en bel vot laukhol kei mahle’ng a letluat chiang in kachi a zau a himahleh, numei a lau deuh khawng toh i omkhop chiang in ‘kipasal sak’ deuh a ngai, hiai vangvotte’ ziak in ‘sisan’ leng tam kimansuah in teh! Loulai a kituh haichi tuamtuam nektawm thil- tangmai,dawnpawl, mazel(vaitangmai), vaimiim chih leh a dangdang tam mahmah a, nekseng ahih louh ziak in loulai ah ‘muat’ maimah geuh ua hiaite’n loulai thouthaksak mahmah uhi. Hiaite’ a nei ngal in hau mahmah mah le’uh a neilou di khop om veve ahih man in a maute’ a ding kipuaksak a, lamka bom(junction) khawmg ah amin uh kigelh in ki ‘sawlseh’ hi.A hi a, hiai sawlsehbel nungak leh tangval banah deihsak deuhte’ kiang ah kihih tangpi hi. Sawlseh khawng i muhnak leh kei a di a de aw chi’n vaki-en a, ei’ min a kigelh leh kila in a kigelh kei leh kitaisan lel hi. Loulam a tangmai neknate’ a ‘tawkha’ leh a ‘mukkha’(a mukchu khalou hilele a mukkha kichi thouthou!) te kipua a khomual ahihke’h mun tanzau deuhte’ ah kilawn in mit sutai mahmah hi. Nitakchiang in leng huaite ah mei-aam kithuah in kilawn volvol sek hi.
Loukhoh hun bei diing ahi ta a ‘phavaang’ kipanta hi. Loulam kiphavaang sim mahleh kumnawn lou ding mah ngaihtuah ahi zel mai, khenkhat a tangzang deuh ichi hiam ahihke’h a feldeuh i chi zodiam ten ‘phavang in louvaat’ uh ua, ‘phavang louvaat’ pen a leikawl deuh in baihtuanse chi uhi. Banah, phavaang a lou i vat leh louvaat hun taktak chiang in kitawldam a, ki-awl deuh chi uhi. Ahitak a gen in bel Zodawn a teen chuh a fel deuhte’ a di’n awl/zaleenna hun a omthei taktak kei. Huaiziak ei di, i pu-pate’n ‘ekmong go zen a nna kisem’ achihchih uh.
Loulam chouh k’on gen a, Zodawn a ka va omsung a lou nna chouhchouh vasem khawng nonsa kha d’uh ee..! Hituanlou ahi. Loulam kiphavaang ta ahih man in khosung lam i lutta uh aw lee....
Loulam kiphavaang ta ahih man in khosung heutu/makaite’ lemgeelna’n khosung mipite’n “Phavaang Hunnuam(autumn meet)” kizang hi. Hiai Phavang Hunnuam ah kitaitehna tuamtuam a vengveng in kinei a kisuklimna tuamtuam a kineih banah hiai in khosung mipite’ lak ah ki-itna, lemna leh muanna tuntuan mahmah hi. Zodawn ah bel kivaipuakna thoveng mahmah a, makai/heutu hih ut a phezen kuamah omlou hi. Makai/heutute’ dem/solsel/gensia omlou in lam tuamtuam ah tosawn zaw uh aa hiai in makaite’ le thathousak in amau(makaite’n) zong chitak,gin-om,leh,mipite’ khual banah, itna taktak toh sem uhi. Kivaipuaknate Saptuam lam hi’n khosung lam hitaleh thoveng hiuhiau in chidam huai mahmah hi.
Zodawn ah bel kinekngaihna tam a, hiai in khosung mipite’ lak ah ki-iitna piangsak mahmah hi. Nek-le-dawn lim in lim ta keileh tanau-laina, innsak-innkhangte’ toh ‘kinekngaihna ziak in kikhawl chitchit geuh uh a, “sum-le-paai lamtam sa’ng, sakmin hoih phatuam zaw...” chih paipih uhi. Zodawn lamte’n bel ipu-pa ngeinate’ ana kembit mahmah ua, ka ngaisang mahmah hi. Huai ziak in Zodawn lamte’ bel mawk simmoh ahihke’h nuaisiah diing ahi zenzen kei uh, amau omkei leh ipu-pa’ ngeina(tawndan) leh neih-le-lam(gou) te a mangthang ding hitah chih kalungsim ah hongsuak a, Zodawn ka-utna leh ngaihnatna a lian semsem hi. Hiai ka gen lailai in kana ngaihtuah gige thilkhat k’on gen di- Zodawn, a khente’n ‘singtang’ i chi ua a dikkei ka chikei himahleh, ahihtheih leh bel ‘Zodawn’ mah chih ding in hoih kasa hi. Singtangmi ngen ihi ua,tualak ah ‘singtangte’ i va kichih sawnsawn chiang in ei’ sang a niamzaw leh tuantual zaw dia koihna lungsim kinei mawk hi. Tua kawmkal ah ei’ a khopi a teeng leh khosa deuhte’n zong i simmawh/nuaisiah deuh ziak uhia(?), amau zong khopi a teengte’ sang a niamzaw dia kikoihna lungsim a nei om ding un ka gingta mawk hi. Tua ahih man in, ei Zomite’ teennate bel ‘singtang’ vachih geugou sang in ZODAWN mah chizaw maile kirualna a ompen zaw maidiam chinuam dan ka hi. Ahia, a loutheilou a ‘singtang’ chihna ding mun bel a om veve, ke’n leng singtang ka chihna mun leng a tam a, himahleh ahihtheihliaina teng a bel ‘Zodawn’ mah i chi mai d’uam????
Kholai i pawt/vaak chiang in khosung a naupang tamtakte’ kholai ah kimawl naihnaih sek uh ua, a khenleh hawktui ching,kelkumtou, zawiboh, kangtalai tai chih leh a dangdang hih kimu khatheisek ahih mah in lunglen huai mahmah hi. Naupangte’ nitaklam chiang in ‘vaidawn’ in kuan naihnaih sek uhi. Nitakchiang in khosung a teirawl vual pasalte’n kholai ah Muana Ngaihte, Thangboi Mangte’ laa te’ banah laa lui tuamtuam khawng sa tuaituai sek ua, khosung sugamlum tuan mahmah hi. Himahleh, naupangte’ laisim subuai di zen a sa uh ahi tuankei’u hi.
Phavaang hun leng bei a hita a, buh-aat bang om panpan ta uhi. Buh-aat hun a bel a semtute’ sang a a semloute’n thu hongnei zaw uh ahih man in kuapeuh in kitha-iit petmah chiat hi, a ne ding kituh a kihih man in. Hiai buhlaak hun a bel salunglut(sa matsiam)te’n satang/sabeng in nikhat in 2/3 bang a mat hun khawng u’le om hi. Buh-aat chuh mapan dan le lou nnasep dangte toh a kituam mahmah hi. Lou nna dangte ah bel nnasep chiang in a taw lam a kipat a saanna lam kiman hoh a, himahleh. buh-aat chiang in bel loukhung lam a kipat a niamna lam kizuan daih hi. Chihbel, buhkung ei’ sang a sangzaw ahih man in. Buh-aat zawh chiang a leng khawl tawldam theih a hi mawk kei a; louna sep na laklak a a gimhuai penpen chih ding a diam ah ‘buhpuak’ chuh a louthei lou ahi, hiai deih a thousi-thouvaai nuai a gim-le-tawl khawksa lou a kipang ahih man in.
Buhpuak hun a bel lou gamla neite’n lamkal ah mun 2/3 khawng ah ‘sekbuk’ bawl in huai ah seek uhi. Lou a kipan tangtak a inn tutsuak pen a gimhuai diak banah, meetleng metlou deuh bang hi. Hiai buhpuak hun a bel sun-ann ding in lou a haichi kihih- baal,kawlkai chihte khawng kipua in kine zeelhi. Hiai hun bel buhpuak chouh gentaklouh sazu/zusa kua tou khawng in kikuan a ‘gusu’ a kuan banglou tak in ‘sazu/zusa kua toh’ chiang in tam pipi kiman sek hi. Pawlzu bel thau a,sazu/zusa dangte toh kibanglou in limtuam se hi. Lengmasel toh pawlzu i tumhuan hingheng i nek bangzw mit le vaaktuan kuau a bang a kaa!! I chihsa mah bang in; Zodawn a bel awl hun tatak chih a om theikei. A felte’ a di’n zing nisuak sim a pat tawlnga lou a lup di hun tan nnasep ahi mai hi! Zingkar tuitawi ahihke’h annsuk ahi pah a, zingkar chiang bang in Inn chih ‘sumtawng’ bang chuh ging tialtial mai dan hi’n maw!
Khua bangleng vot panpan ta ahih man in kumkhat sung a dia i hunnuam neih sunsun uh Khristmas thawmging chuh a kiza panpan ta hi. Hiai hun bel mi lungleng theite’ a ding in lungleng louhtheih a hikei, hunlui ngai a nguizen a om theihna ahi hi. Zodawn ah bel bangchituk in vot mahleleng mei-awi diing om ahih man in khovot thuaknuam deuh hi. Zingkar khovaaktung Biak Inn a Khristmas laa kikhah ging ngiahngiah te’n lung a suleeng mahmah uhi. Hiai hun chiang in bel loulai a haichi piang sumsuah theihdeuh diingte zuak a Khistmas van di lei in khopi lam kidenna na zungzung geuh uhi. Lehlam ah, siamsinna ziak leh nek-le-tak zonna ziak a khopi lam a om te’n zong, “ Sumzong paizong zinsuk-zintou khopi sung ah ka-om zawng; Ann lim-ann al ne in Inn hoih-Inn nuam sung ah ka-om zong, khopi sung aa omdan khawldan, nuntakziate’ chimtak ing, kilbang khanna vangkhua mubang ngai ing ee...” chikawm hiauhiau in vangkhua lam hon zuan sauhsauh ta uhi. Azin-le-tung chuh kihelh zen in ki-om a, mi kitam deuhdeuh ahih man in nuam kisa hiai maimah hi. Khristmas chuh a hongtung pet mah ta a, kuapeuh in salam leh khalam ah nuam kisa in kipahna’n kidim hi.Naupangte’n kholai ah ‘mutpuak(balloon)’ tawi selsal leh vanthakte’ silh in kipak thei mahmah uhi. Lehlam ah, mihing hih ziak in hiai hunnuam te zaw hunlui ngaihna puanbang thaksak tu lel a bang hi. Huai ziak in tamtakte’ hunlui ngai leh innkuan kim a leenlai ngai in huibang mau uhi! A hia, Khristmas leengkhawm kitam khawlkei mahleh kua peuh kiphur chiat ahih man in nuam mahmah hi. Khristmas bei di kuanchiang bang in nuam kisa kholdiak a , kumkhat sung vingveng i ngak charchar uh a mawk a bei diing kingaingamlou chiat ahi diing a, khosung ah sum kidong in, leh, mikiphal deuhte’ tungtawn a muhkhiakte’ a pat Khristmas leh kumthak bang kizangmat zou hi.
Kumthak hongtung diing ahih man in, kumlui khakna hun kinei a, mihingte’ kia gentaklouh sing-le-lou banah ganhing tuamtuam te’n zong kipaktak a vaidawn ding in kisa chiat uhi. Sing-le-loute’n a puan(teh/nah) luite uh pai in puanthak silh di’n kisa uh ua banah, ganhing tuamtuam te’n zong a ‘aw’ neih tengteng un Siamtu’ phat in phaphetlou uhi.Mihingte’n zong kumkhat sung vingveng chidam-ludamna hon pia Pathian kiang a kipahthu gen in leh, kumkhat sung a hihkhelh omte’ Toupa kiang ah ngaihdam ngen in, kumthak kipaktak a vaidawn diing in a khiatlah huai mahmah KUMLUI khakkhiak ahi ta hi!!!
“Hunlui ngaih phatuamlou machiang suanzaw veni......”
***Nu, ka kipak***
Related Link: Kumkhat Zodawn Ah - I
.